قصة ولادتك + نصائحك

انا ببنتي تنومت لاني كملت التاسع وخذيت من العاشر سوو لي تحريض ورجعت البيت لقيت افرازات السداده نمت وصحيت الظهر (لحد يخوفك يقول مووت والم وووو ) ترى نفس الم الدوره عادي رحت المستشفى وتنومت لحد ماوصل الرحم ٤ سانتي قلتلهم ابي ابره الظهر قالو لا مانعطي بالمستشفى رحت تهاوشت معهم ورحت مستشفى ٢ وعطوني الابره والحمدلله ولدت من فضل ربي وكانت مره سهله ونصيحتي لاي بنت سواء بكريه او لا ابره الظهر نعمه من ربي نامي مرتاحه البال لا الم ولا شي وبولدي كانت ولادتي زي بنتي بس الطلق حامي يعني يوم خذيت الابره حقت الظهر لازلت احس بالم محتمل ( بسم الله ماشاءالله) نصيحتي لكم حطو في عقلكم ان الولاده شي طبيعي مايخوف




لو بقولك ( كلي ملح معصور عليه ليمون اخضر واصفر ) بتسعبلين لان عقلك الباطن عارف ان حامض مع مالح شي نتيجته يع
حطي بعقلك الباطن واقنعي نفسك تمام الاقناع ان الله لايكلف نفسا الا وسعها والله يابنات اذا اقتنعتي ان الله مابيعطيك الم فوق مقدره تحملك مابتخافين ولا تقلقين وبتمر ولادتك مافي اسهل منها

ببدأ أنا بسم الله
وياليت القصص اللي تنذكر ما تطلع من المنتدى
عن نفسي ما اسمح لاحد ياخذ قصتي وخااصه فقط بعالم حواء عشان افيد الاخوات
طبعا انا خووواااافة درجة اولى طول التسع شهور شايلة هم الولادة وكيف بتصير الولادة وكيف الألم خصوصا ان حولي كانو هوالات كثييير وكل وحده تشوفني تقول الله يعينك ووو
ويوم دخل التاسع زاااد الخوف اضعاف الليل اتقلب بسريري من الخوف ما يجيني نوم واتحلم حلوم ووو
وكنت امشي كثييير بالتاسع اطلع للمخططات وامشي عشان لو حصل تمزق لكيس الجنين لا تصير فضايح بالشارع (وهنا نصيحة لا تطولون بالمشي اول ما تتعبون وقفو عشان ما تجيكم بواسير ولا شيء)
قبل يوم ولادتي
طلعنا تغدينا بره وكان مالي خلق للمشي الكثير
لكن قلت لزوجي بمشي ويارب تفرجها علي
رغم اني كنت اخاف من الولاده لكن كنت ابي الخلاص لاني ثقلت مره وكنت متعذبه بنومي وقومي
ورحنا لمخطط قريب من بيت اهلي على اساس خلاص كنت مخلصة وقتي ولميت عفشي جيت بيت امي
ومشيت بالمخطط حول نص ساعه تقريبا وقرب المغرب قلت لزوجي ينزلني بيت امي لاني تعبت
رحت البيت وعادي ماكنت احس بأي شيء الليل كلمت زوجي بالجوال وصكرت منه قال بكره الساعه كذا بطلع الدوام وانا كنت محرصة عليه من شهر انه ينتبه على جواله
( طبعا رحت بيت امي لان امي هي دقت وقالت تعالي يوم عرفت ان وقتي خلص بس اني كنت ناويه اخبي عنها لان ادري امي بعد قلبي تخاف علي مرررره وما تتحمل )
ليلتها نمت وانا ما احس بأي الم قمت الصبح الساعه ٩ونصف دخلت دورة المياه الله يكرمكم الا وأشوف
افرازات مخلووطة بدم والجميع بكرامة😲😲
خفت ما علمت لا امي ولا اختي ولا اي احد مدري ليه خفت يسحبوني للمستشفى كنت خايفة
ومن ذكائي ما كليت شيء قلت يمكن اتحول قيصرية فيصير بطني فاااضي
طبعا استمرت الافرازات هذي ساعتين بدون أي ألم وقتها أختي اللي اصغر مني متزوجة جت لبيت امي تقول حسيت بتولدين اليوم رحت علمتها باللي شفته (هي ولدت قبلي بفترة فتعرف) فقالت اجل ولادة ان شاء الله
حرصت عليها ماتعلم امي
فطلعنا من البيت وخذتني لبيتها عشان امي لا تدري
وقتها كان ١٢الظهر بدات الاللام خفييفه ما تذكر اخف من الدورة
قمت خذت شاور ومشطت لي شعري وجدلته (نصيحة جدلوه عشان لا يحوسكم مع الطلق)
سوت لي غدا وغدتني وسوت لي مشروب نانخة وقرفه وجابت لي تمر الله يجزاها بالخير
والالام تزززيد وتقرب وقتها قمت اقرا سوره مريم وسوره البقرة والزلزله
بديت امشي واتمسك بالجدران وادعي ادعيه تسهيل الولادة لحد ما صارت الطلووووق حاااره واختي تترجى فيني نروح المستشفى وانا اقول بصبر شوي مابي يلعبون فيني بالكشف
واشتد الالم على اخر العصر قريب المغرب لدرجة يوم يجيني الطلق ما اقدر امشي ولا اتحرك بس امسك اختي من كتوفها لين صارت الساعة ٥ المغرب دقيت على زوجي جا مع امه وانطلقنا للمستشفى مع اختي
هناك كشفت علي قالت ماشاء الله ٥سم
عوووني الكشف يابنات مدري ليه
وقالت بس البيبي راسه فوووق
ودوني غرفه بها سرير وشقت الكيس وانصبت الموية قالت بنصبر سانتي ثاني وبنحولك ولادة ان شاء الله
يوم انشق الكيس تحجر الجنين ورجع الطلق قوي قوي وحااامي وحسيت برغبه للحمام جت السستر ودتني وقالت لا تقفلين عليك الباب
طلعت من الحمام والالم يزيد كل دقيقه
قاست طلع ٧سم قالت ولادهً ولاده وينادددوون ويطلعون اختي وام زوجي وابقى بحالي وانا شوي وببكي من الربكة
يوم شفت سرير الولادة وسرير البيبي اللي عليه كشاف قلت هنا بيحطون ولدي حبيبي متى بس ويارب كم بطول
ركبت لي المغذي وقالت اطلعي ع السرير
وجابت حاملات الرجول وتقول يلا ادفعي وكلما ادفع ما اقدررر
والسسترات يشجعوني يلا بوش بوش وانا مافيني حيييل من الالم والطلوق الساابقة وجو ثنتين يفغصووون بطني وانا ادددفع ومايصير والالم بهاللحظة زاد عشرات الاضعاف قمت اصيييح بس بدون صراخ بس دموعي تنزل واقول حولوني قيصري مابي مابي
والدكتوره تقول لا خلاص هذاني اشوف راسه يلا ادفعي وكانت حليله وتدعي وتصبرني
قمت قلت لنفسي خلاص ادفعي بأقوى ما عندك وتخلصين
قمت دفعت باقوووووى شيء وانا ماسكة يدات السرير وماحسيت الا وهم يحطون ولدي على بطني
ااااه ي بنات اجمل اجمل اجمل لحظة ربي يرزقكم اجمعين بهاللحظة قمت المس فيه ماني مصدقه
كنت ابكي من الفرحة ووقتها دخلت اختي وكانت اخر شيء معلمه امي فدخلو الثنتين كانو يصيحون معاي
وام زوجي واقفه مع السسترات ينظفون ولدي ماكنت بوعيي
شوي الا وتمسكني رجفففففة شديدة برد برد برد واتنافض قامو شغلو لي دفايات وجابو لي بطانيات ولبسوني شرابات وطلعوني غرفتي
وجابو لي مشروب دافي وطلبت منهم ولدي اشوفه وجابوه لي وبسته


لا تخافين من الولادة لان كل وحده ربي يعطيها الشي اللي تتحمله وفيه اختراعات تسكن الالم لكن انا ما كنت حابه اخذها
الطلق مهما اشتد فهو نفس الم الدورة
ربي يرزق الجميع الذريه الصالحه

فعلا كلامك صحيح
نفس الدوره بس ع اشد شوي
والحمد لله ع سلامتك
ومشكوووره على مشاركتك للقصه

انا من كثر ماخوفوني من الولاده والمها من حسيت بطلوق صرت اصيح بقوه واصارح حتى حولوني قيصري
احس لو والده طبيعي ممكن صاير فعقلي شي

هههههههه
يزينك ليه عاد الصياح
اقولكم صكرو اذانيكم من الهوالات اللي حولكم