كيفكم ياحلوات المطبخ
اليوم كان غدانا يمي يمي اكلة مغربية تاكلي اصابعك وراها وهي دجاج بالزيتون والليمون
اول شئ باكتبلكم الطريقة
بعد ماتغسلي الدجاجة خدي باقة كزبرة كاملة افرميها وشوي بقدونس افرميه وافركي الدجاجة كويس بيها من قلبك طبعا وافركيها كمان ب3 فصوص ثوم وحبة ليمونة و ملح وافركي كويس
بعدها خدي بصله كبيرة او 2 صغار افرميها ناعم واخلطي معاها 3 ملاعق زيت زيتون و صفرا الزعفران وزعفران و ونص ملعقة فلفل اسود و زنجبيل نص ملعقة واخلطيها مع بعض وبعدها شمري الاكمام وافركي الدجاجة فيها (ياسلام على ريحة اليد ثوم وبصل ) وخلي الخلطة على الدجاجة واتركيها على جنب 30 دقيقة اقل شئ عشان تاخد الطعم
ودا شكلها بعد الحرب
بعد النص الساعة تجيبي مويه حارة وتصبيها في القدر اللي فيه الدجاجة وتخليه يغطي تقريبا نصها وارمي عود قرفة معاها وولعي النار عليها وخليها تستوي على نار هاديه وقلبيها من وقت لوقت واقلبيها على الوجه التاني بعد وقت عشان يستوي وذوقي المرق اذا يحتاج ملح ملحيه زيادة
ودا شكلها وهي بالقدر تستوي
بعد ماتستوي شيلي الدجاجة من القدر وحطيها بصينية ودخليها الفرن تتحمر
وفي دا الوقت خدي الليمون والزيتون وحطيه مع باقي المرق اللي بالقدر وخليه يغلي يغلي عشان ياخد الطعم الزيتون انا اخدت الحلقات هو المتوفر عندي في الاخر كله زيتون تقريبا نص كوب وانصحكم بالزيتون التركي الاخضر اذا تبغو بالحبة مو شرايح مرة دمااار
في الصور الزيتون والليمون بس الليمون المخلل اخدت شرحتين بس منه والباقي قطعت ليمونه حلقات تقريبا اخدت منها 3 حلقات بس واللي ماعندها المخلل عادي تستخدم اليمون العادي
وبعد ماتتحمر الدجاجة رجعيها في القدر وصبي عليها المرق و اقفلي النار وقدميه مع الخبز
ودي صورته
ان شالله عجبكم بس (والله كانت دجاجة بنت حلال)
ملاحظة اذا المرقة كانت مرة خفيفة ممكن تذوبي شوي نشا في شويه مويه وتضيفيه مع المرق في الاخر وهو يغلي مع الزيتون والليمون عشان يثقل