نظام لكل نحيفة .. سمنة صحية

يا مرحبا بالحلوات !
زي ماهو موضح بالعنوان اليوم بنتكلم عن السمنة الصحية + شرح كل نوع من انواع التمارين و فائدته

بداياً نتكلم عن النحافة :
ايش يعني يكون الشخص نحيف؟ ومتى نقول هذا شخص نحيف؟
اذا كان وزنه اقل من المعدل الطبيعي
هل النحافة مرض؟ هل لها علاج !
اكيد النحافة مرض ومرض له اعراض كمان زي الكسل النوم الكثير قلة التركيز الخمول ..الخ
له علاج اكيد واغلبنا يجهل طريقة العلاج الصحيحة واليوم ان شاء الله اقدر افهمكم كيف تتخلصوا من النحافة بطريقة صحية بدون اي اضرار .
والنحافة زيها زي السمنة مافي شي اهون من الثاني عشان كذا لا وحدة تقول انا نحيفة اهو من اني سمينة ! او وحدة تقول انا سمينة اهون من اني معصعصة ! كلاهم بمكانة الامراض ويجب التخلص منهم .
طيب .. بما اني كنت ام العصاقيل سابقاً فأنا عارفة ايش هم يبغوا وايش اللي يلاقوه بسبب نحفهم الغير طبيعي ..
جسم أنثوي يوك! بشرة صحية يوك!
مافي اي نوع من الملابس يضبط عليك ان لبستي جينز صرتي كنك مسواك !
وان لبستي فستان صرتي كنك طفلة بالابتدائي تلعب بفساتين امها لا صدر لا مؤخرة ولا شي!
واذا رحتي جمعة ولا حفلة خلو كل الموجودات واستلموك .. ماتاكين! اهلك حارمينك من الاكل! شهالجسم! وقرقرقر
وترجعين البيت بنفسية الله اعلم فيها وتمسكي هاللاب وتبدأي عمليات البحث بهالخلطات اللي حفظتيها
وتبدأي تجربي بنفسك ومحد متحمل الا هالمعدة المسكينة
هذا سيناريو كل نحيفة صح ولا لأ !
تبغي معالم انثوية تفرحي فيها باللبس ؟ تبغي تدخلي المحل تشتري اللي يعجبك بدون ماتركزي انه يكون منفوش او مو ماسك ع الجسم عشان لا يخليك عود اسنان متحرك !
تبغي تلبسي اسورة ولا توصل زندك اذا رفعتي يدك ؟ تبغي وتبغي وتبغي !
تقومي ايش تسوي؟ تتجهي للخلطات والجنك فود و التشوكلت و هالخرابيط
وهذا اكبر غلط يا حبيبتي .. تقدري تزيدي وزنك و تبرزي معالم جسمك و تفرحي بلبسك بدون هالخرابيط اللي تحولك من عصاقيل الا براميل
وبدون ما تتعبي معدتك وتدمري بشرتك
كيف؟ بمعادلة بسيطة جدا ( الرياضة + الاكل الصحي)
ههههههههههههههههه رياضة !!!!! انتي من جدك ولا تمزحين؟ اقولك انا نحيفة جلد على عظم تقوليلي رياضة !
هو انا ناقصني اختفي اكثر من ما انا مختفية ؟ هو انا فيني سعرات عشان احرقها؟

اييه رياضة! ماراح يبني جسمك الا الرياضة .. كيف؟

التمارين يا حلواتي انواع وذكرناها سابقا وبرجع اعيدها ..

اول شي التمارين القلبية ( الكارديو) ايش هذي ؟
هذي تمارين شغلتها رفع معدل نبضات القلب وزيادة اللياقة للجسم ..
التمارين هذي لازم يركز عليها السمين ليش؟ لانها تساعد في حرق الدهون والتخلص منها يعني هذي التمارين اللي لازم يكثفها السمين بجدوله الرياضي
يعني النحيف مايسوي هالتمارين ؟ الا طبعاً يسويها لانها تساعده على رفع مستوى اللياقة و تعطيه الطاقة والنشاط .
طيب انتي توك تقولين تنفع للسمين!
هي تنفع للفئتين ولازم محد يستغني عنها ولا عن اي تمرين ليش؟ لان التمارين الرياضية كلها تكمل بعضها يعني السمين اذا ركز فيها واستغني عن تمارين المقاومة بالتالي بيحرق دهون لكن بيكون جسمه مترهل!
والنحيف اذا استغنى عنها بفتقد اللياقة والنشاط و الطاقة الايجابية المكتسبة من هالنوع من التمارين
طيب ايش هي التمارين القلبية اعطيني امثلة عليها !
هي : المشي ، الهرولة ، رقص الزومبا ، نط الحبل ، صعود ونزول الدرج ، السباحة ، القفز ...الخ

النوع الثاني من التمارين الرياضية اللي هي تمارين المقاومة :
هذي هي اللي لازم يركز عليها النحيف .. ليش؟
لان هذي التمارين هي اللي تبني العضل و النحيف عضلاته صغيرة و ضعيفة فبالتالي لازم نمارس هالتمارين عشان نبني عضلاتنا ونكبر جسمنا !
كيف يعني؟ يعني انا البنت بشيل اثقال؟ كيف يعني ؟ تبين تصير عندي عضلات كني مصارعة !
لالالا انتي البنت مستحيل تتضخم عضلاتك او تكبر زي الرجال مهما شلتي اثقال ليش؟
لان هرمون تضخم العضلات هذا بس عند الرجل و المصارعات غالبا ياخذو هالهرمون عن طريق ابر عشان تتضخم عضلاتهم ..
انتي فقط اللي بيصير معاك بتنبني عضلات جسمك وتكتمل عشان يصير جسمك بحالة طبيعية ووزن طبيعي ويتخلص من حالة الهزالة اللي كان فيها .
كيف امارس هالتمارين؟
هي عدة تمارين في منها بالاثقال وفي منها بدون اثقال هذي التمارين تعمل على شد وارتخاء العضلة و بنائها

　
طيب انا كنحيفة اعطيني نظام امشي عليه ايش اسوي؟

بدايةً انتي شخص مبتدئ بالرياضة و بالتمارين وغيره فلازم تتدرجي وتبدأي حبة حبة .
تحتاجي اسبوع الى اسبوعين تمارسي فيه فقط التمارين القلبية لزيادة اللياقة عشان تقدري تبدأي بتمارين المقاومة .
في برنامج للمدربة الشهيرة جوليان بتتبعه معاي السمينات والنحيفات
بس لازم اول شي ينتهي شهر تهيئة الجسم


في هذا الموضوع كتبت نظام تهيئة الجسم وتمارين اول شهر
http://forum.hawaaworld.com/showthread.php?t=4234648 .
بالنسبة لغذائك اساليب التغذية تكلمت عنها بمواضيعي السابقة ارجعو اقروها+ هذا نظام غذائي للسمنة الصحية للدكتور محمد الحريري
https://docs.google.com/file/d/0B9eOqjLot6x5N3dPUnNoSEh4elU/edit?pli=1

اذا انتي عندك تويتر حساب ( نبغاها سمنة صحية) راح يفيدك كثير وهو الحساب اللي غير حياتي للجميلة حصة الله يوفقها ويسعدها والمعلومات اغلبها تعلمتها منها


وهنا موضوعي تكلمت عن الغذاء الصحي والرياضة بشكل عام
http://forum.hawaaworld.com/showthread.php?t=4232492


.

كمان نصايح للسمنة الصحية :
تقدري تشربي على الريق مغلي حلبة تغلي شوية حلبة مع شمر و تحطي معاهم شوية ورق نعناع او قشر برتقال عشان الريحة + عسل اسود
العسل الاسود تقريبا فيه جميع الفيتامينات المهمة .
كمان تكثري من شرب العصيرات الطبيعية او السموذي .
تكثيري من المكسرات الطبيعية المفيدة يعني لوز جوز فستق كوجبة خفيفة.
ضرووووووري شرب الموية .
ترطيب الجسم لا تنسوه .
شرب كاسة حليب قليل الدسم قبل النوم مباشرة يوميا .
الفواكه ماننساها .
+ لاتنسوا تقرأو وتبحثوا وتتثقفوا لصحتكم .

(سؤال لمتابعاتي: وحدة من جميلاتي اقترحت علي نسوي هاشتاق بالانستقرام نحط فيه اكلات صحية .. عجبتني الفكرة وفكرت لو اسوي حساب و احط لكم يومياتي و نصائح سريعة و فوائد افضل من قروب بيبي ام او واتساب .. ايش رايكم ؟)