الله يعطيك الف الف الف عافيه انت وصاحبت الكتاب وكل من ساعد فيه
جزاكم الله خير الجزاء
مجهود رائع
الله يسعدكم في الدنيا والاخره
مسلمه امري لله ربنا يسعدك ويخليكى ونفضل نسمع دعواتك الحلوة دى على طول





حبيبة قلبى don
حبيتب اهديلك هدية بمناسبه رأس السنه وعيد الاضحى المبارك فقررت أعيد ترتيب كتابك على شكل ابواب هنأزل كل باب فى كمان منفصل ... ويتم تجميعة على ملف ورد عند كل اخت على جهازها وبالتالى يكون أحسن فى التجميع والبحث عن اى وصفه بسهوله
يارب يعجبك يارب



********


نبدأ بأول قسم

(( قســــــــــــم اللــــــــــــحـــوم))

كفتة داوود باشا
المقادير:
نص كيلو لحمة مفرومة حمراء _ بصلة متوسطة مبشورة _ملح فلفل _بهارات لحم .،( الصلصه) 2 ملعقة كبيرة صلصة طماطم _ماء _ نص ملعقة كبيرة توم مهروس _ سمن للتحمير .
الطريقة:
تخلط كل المقادير مع تخلط تماما..ناخد قطعة لحم اد الليمونة و نكورها بين ايدينا على هيئة كورة...وهكذا نستمر حتى ينتهى المقدار كله...نحضر مقلاة تيفال ونضع فيها سمنة الى ان تسخن ثم نحمر الكفتة...بعد ماتتحمر نشيلها فى طبق جانبا..نحضر حلة نضع بها حوالى نص كوب من السمن الباقى من تحمير الكفتة..ونضع الثوم المهروس الى ان يصفر..ثم اضع الصلصة و الماء و ملح وفلفل الى ان تغلى..اضع الكفتة فى الصلصة الى ان تستوى حوالى ربع ساعة تؤكل مع ارز ابيض و بالهنا و الشفا
طريقة للتقديم، بكبشة مخرمة تشيلى الكفتة من الصلصة و تحطيها فى قعر طبق ثم تحطى عليها مقدار من الارز ثم نبطط بضهر الملعقة كويس ثم نقلبة فى سيرفيس التقديم و بجا نبة طبق الصلصة

كباب حلة
اللحمة حسب الكمية اللى انتى عيزاها يعنى كيلو او اكتر او اقل .لحمة مغسولة و مقطعة مكعبات __ ملح و فلفل __رشة بهارات لحمة __ بصلة متوسطة مبشورة او بصل قاورمة ( الصغير قوى ) سليم زى ما هو_ ملعقة كبيرة سمن __فصين مستكة و فصين حبهان __ فحم (حوالى 2 قطعة كبيرة ) فوطة مطبخ نظيفة .
الطريقه:
ضعى السمن فى حلة على النار الى ان يسخن ثم اضع البصل الى ان يصفر ثم اضع الحبهان و المستكة ثم اضع اللحمة و اقلب كلة كويس قوى لحد لونها ما يتغير و يتحمر شوية و تشرب مايتها افضل اذود شوية ماء فى شوية ماء لحد ما تستوى و تشرب مايتها فى هذه الاثناء اكون ولعت الفحمة و احمرت خالص ازيح بالملعقة اللحمة على الاجناب و فى النص اضع الفحم المولع بسرعة و اضغ غطاء الحلة بسرعة قبل الدخان ما يطلع برة ثم اغطى الحلة تماما بالفوطة لمنع خروج اى دخان تترك مغطاة حتى موعد الاكل تقدم مع ارز ابيض و سلطة طحينة

الكبدة الاسكندراني
المقادير:
1\2 ك كبدة +3 بصلات وسط+3 حبات فلفل رومي (بارد)+2 حبة طماطم+ملح و فلفل أسود و بهارات+2ثوم مدقوقين+ ملعتين كبار صلصة طماطم+1\2 ملعقة خل+زيت ذرة
الطريقة:
تقطع الكبدة مكعبات صغيرة. يقطع البصل كالاتي: كل بصلة تقطع أربع إرباع و بعدين تقطعيها شرايح رقيقة نوعا. الفلفل برضه يقطع نصفين و بعدين شرايح رقيقة. الطماطم برضه نقطعها اربع ارباع و تقطع شرايح رقيقة.
نجيب الطاسة التيفال و نضع فيها الزيت لكن مش كتير ممكن ملعقة طعام أو اتنين. نضع البصل و نقلب حتى يذبل و لكن لا يصفر ثم نضيف الفلفل و نقلب حتى يذبل الفلفل كمان ثم نضيف الطماطم مع التقليب حتى تختلط بالباقي. ثم نضيف الكبدة و نقلب و نتبلها بالتوابل المذكورة. أما الخل و الصلصة و الثوم الدقوق نخلطهم مع ذرة سكر و نقلبهم كويس لحد ميبقى عامل زي الكاتشب و نضيفهم الى الكبدة بعد نضجها و لو محتاجة نقطة ميه ممكن نضيف شوية لكن الأفضل نسويها على نار هادية تقوم الكبدة تنزل المية اللي فيها و لا نحتاج مية من برة. و تقلب ثم تطفي النار. و تؤكل مع الخبز و سلطة الطحينة و السلطة الخضراء.

صينيه الرقاق باللحمة المفرومة
المقادير:
1/2 كيلو رقاق+سمن سايح أو زيت +مرق لحم أو دجاج أو بط حسب نوع اللحم اللي حيقدم الى جانب الرقاق+1/2 كيلو لحم مفروم+بصلة كبيرة مبشورة+مقدار من السمن او الزيت لعمل العصاج +ملح- فلفل أسود- بهارات
الطريقة:
نحضر صينية فرن و ندهنها بالسمن او الزيت. نقوم بغمس ورقة ورقة من الرقاق في وعاء به المرق قبل رصه في الصينية. و عند رص الورقة في الصينية نقوم بدهن سطحها بالسمن او الزيت. و عندما ننتهي من نصف كمية الرقاق، نفرد العصاج على السطح ثم نقوم برص الجزاء المتبقي من الرقاق بعد نفس الخطوات السابقة (غمسه في المرق ورقة ورقة و مسحه بالزيت او السمن). و عندما تنتهي الكمية نقوم برش القليل من المرق على الوجه باليد بحيث لا تكون كمية كبيرة و لكن كمية تكفي لتطرية الوجه، ثم نقوم بتقطيع الرقاق بالسكين مربعات. ثم نقوم بدهن السطه بالسمن او الزيت. تجهيز العصاج يتم عن طريق بشر البصلة ثم وضع الملح و الفلفل و البهارات عليها و اضافة القليل من السمن او الزيت ثم اضافة اللحم المفروم و التقليب على نار هادية حتى ينضج اللحم. توضع صينية الرقاق بالفرن و عندما يحمر الرقاق من اسفل، نشغل الشواية من فوق لتحمير السطح مع الانتباه حتى لا يحترق السطح. بعد خروج الصينية من الفرن نقوم بتغطيتها بغطاء حتى "تعرق" أي يتصاعد بخار الماء بها فيساعد على تطرية الرقاق. تقدم قطع الرقاق و الى جانبها لحم محمر، دجاج محمر، بط محمر، شرائح ديك رومي، بفتيك، دجاج بروست، كفتة لحم او دجاج، او اي نوع اخر من اللحوم او الدجاج، مع السلطات الشهية مثل السلطة الخضراء و سلطة الفاصولياء الخضراء و بابا غنوج و الطحينة و الحمص و غيرها

حوواوشي
المقادير
للعجينه: 1ملعقة سكر صغيرة+ا ملعقة خميرة كبيرة+3/4 كيلو دقيق+1 ملعقة زيت+كوب ماء
للخلطة:3/4 كيلو لحم مفروم+8 بصلات مفرومين+ا ملعقة فلفل اسود وملح +2 ملعقة كبيرة زيت+بقدونس مفروم
الطريقة:
السكر + الخميرة فى ربع كوب ماء او اقل ويكون الماء دافى ويوضع فى مكان دافئ ومظلم لمده 10 دقائق ليخمر،نضع الدقيق ونفتحه من المنتصف ونضع عليه الخميرة + ملعقة الزيت ويقلب مع اضافة قليل من الماء( نص الكوب مثلا)ونزيد ماء كلما احتاج الخليط بحيث تكون النتيجه ان العجين لا يلزق فى اناء العجن ،بعد تجانس العجين تعجن باليد لمده 5 دقائق حتى تصير يتمط قليلا ومتماسكة لا تقطع اثناء الشد تندى بالماء وتترك ساعة ثم تعجن مرة اخرى ل 5 دقائق وتترك نص ساعه،تقطع وحدات حجمها حسب الرغبة وتوضع فيها الخلطة السابقة وتغطى كل قطعه عجين بقطعه اخرى وتلزق الاطراف فى بعضها ونمسح وجهها بالماء باليد،توضع فى فرن ساخن لمده نص ساعه حتى تلاحظة ان الوجه احمر،او لنتيجه احسن توضع على بلاطه كبيرة داخل الفرن لتاخد نفس نتيجه الافران البلدي

اللحمة الباردة
بانسبة للحمة هى مش كتلة لحم ؟ هو عرق تلبيانكو مخصوص للحمة الباردة او الروزبيف بتغسليه كويس و تنشفية ثم تجيبى ملح وفلفل و بهارات و تدعكية كويس كلة من برة وبعدين تجيبى 5 فصوص ثوم صحيحة زى ماهى وترشى عليهم رشة ملح وفلفل ثم تعملى 5 شفوق فى العرق و تحشرى فىكل شق ثومة تجيبى دوبارة جامدة و تلفى العرق كويس (المفروض انه بيتلف بطريقة معينة علشان يتلف صح واللحمة ماتكلكعش)المهم هاتى صينية بها 3 ملاعق سمن وفصين حبهان على فصينمستكة و حمرى العرق كويس من جميع الجهات لحد ما ياخد لون احمر حلو ثم تضيفى الماء شوية شوية الى ان يستوى بياخد حوالى ساعة و نص ثم تضعى الصينية فى القرن لحد ما الماء يتشرب والعرق ينشف شيليه من الفرن لما يبرد خالص فكى الدوبارة و لفى العرق فى فرخ ورق فويل و ضعيه فى الفريزر لمدة يوم ولما تبدؤا فى اكله يقطع سلايس رفيعه ولما تخلصى يلف فى الفويل تانى و يوضع فى الثلاجة و فى المناسبات يدهن التوست او البيتى بان بمسحة ذبدة و عليها شريحة الروزبيف بالنسبة للبنات حديثى الزواج اعملو اللحمة الباردة عندك جاهز لانه بيكون سريع انك تسحبى منة سواء عشاء او غذاء او السفر

صينية الجلاش باللحمة المفرومة
المقادير:
نصف كيلو جلاش (باكو)+لحمة مفرومة معصجة +بيضتان+ملح ,فلفل+كوب حليب ( طويل او مج)+سمن
الطريقة
اضرب البيضتين بالشوكة و عليهم ملح وفلفل و احطهم على كوب اللبن واخلطهم كويس قوى بالشوكة.تدهن صينية بالسمن ثم نضع نص كمية الجلاش مع المسح بالفرشاة سمن بين كل ورقتين و هكذا حتى ننتهى من نص الكمية ثم اضع اللحمه المعصجة مع فردها كويس ثم نضع نص كمية الجلاش التانية بنفس الطريقه الاولى ثم ادهن وجة الصينية بالفرشاة بالسمن و اقطع الجلاش بالسكينة اما مثلثات او مربعات وادخلها الفرن حوالى 10 دقائق حتلاقيها وشها احمر خفيف اروح مطلعاها و صبة عليها كلها كوب اللبن بالبيض و ادخلها تانى الفرن لحد ما تستوى و تحمر . تطلعيها و تعيدى تقطيعها على القطعة السابقة و بالهنا و الشفا

الشاورما 1
المقادير:
علبة ذبادى_بصلة متوسطة _ طماطماية متوسطة _2 ملعقة خل _1/2 ملعقة سماق _ 1/2 ملعقة كارى _ عصير 1/2 ليمونة _ 2 فص ثوم _ 1/2 ملعقة تابل شاورما . دجاجة كاملة مخلية او صدور دجاج مقطعة شرائح رفيعة
[الطريقة
نضرب كلة فى الخلاط بتاع العصير ( الدورق ). نفتح الفرخة من ظهرها بالطول و نضع عليها المقدار المضروب . ونتركها ساعة ثم نضعها على النار و نغطى الصينية بورقة فويل لحد ماتستوى نص سوى . نتركها تبرد ثم نقطع الفراخ شرائح رفيعة مثل الشاورما و ممكن تقطعيها بأيدك على طول من غير سكينة حتلاقيها سهلة جدا مع الاحتفاظ بالسائل الموجود فى الصينية ، نضع شوية زيت فى صينية يعنى حوالى 3 معالق كبيرة . ونفرد فيها الشاورما الى ان تحمر من جهة ثم نقلبها تحمر من الجهة التانية .ارش عليها شوية من السائل اللى سبق و احتفظنا به و اقلبهم علشان تاخد شوية طراوة . وكدة اصبحت جاهزة طبعا انتى عارفة طريقة تقديمها بتجيبى العيش الشامى و تفصلى الوش عن الضهر او تعملى الرغيف زى ماهو و تدهنية بالمايونيز المخصوص اللى حقولك طريقتة حالا .ثم شرائح خيار مخلل او كام صابع بطاطس محمرة و بالمعلفة نحط الشاورما ونلف الرغيف و تلفية فى ورقة ذبدة و بالهنا و الشفا
طريقة مايونيز الشاورما:2 فص ثوم _ بعض نقاط عصير ليمون _و بعض نقط خل _نضعهم على المايونيز ونقلبهم بالمعلقة ثم ندهن بيهم الرغيف .

البيكاتا بالمشروم
المقادير:
شرائح بفتيك بتلو (العدد حسب ماانتى عاوزة) - ملح - فلفل – عصير ليمونة – ملعقة كبيرة زبدة_ علبة مشروم صغيرة مقطعة قطع صغيرة - 2 علبة كريمة لباني الحجم الصغير- 3 بصلات كبار مقطعين صعير
الطريقة:
يتبل شرائح البفتيك بالملح والفلفل و عصيرالليمون ثم نضع الذبدة في صينية يا ريت لو تيفال على النار و لما تسيح نضع اللحمة و نحمرها على نار هاديةمع التقليب باستمرار من الناحيتين لحد ما الوشين يتحمروا . ثم اشيلهم من الصينية فى طبق و بعدين احط البصل فى الصينية مكان اللحمة اللى شيلتها و اقلبه لحد ما يدبل ( يعنى تحسى انه بقى طرى ) و بعدين تروحى حطة المشروم المقطع مع البصل و تقلبيهم لحد برضة اما تحسى ان المشروم دبل . و بعدين تروحى حطة الكريمة اللبانى على البصل والمشروم فيغلي لحد ماتلاحظى ان الكريمة اللبانى تخنت شوية .( خلى بالك كل دة حياخد منك مجرد ثوانى علشان الكريمة اللبانى ما بتستناش كتير على النار ) وبعدين تروحى حطة اللحمة اللى كنتى شيلتيها على جنب فى طبق فى الصينية و يادوب تلفى اللحمة لفة فى الكريمة اللى فى الصينية و تلاحظى انها عليها كريمة من الوشين تشيليها فورا. وبالهنا و الشفا

صينة الكفتة بالطحينة وشرائح البطاطس
لكفتة بالطحينة:_
المقادير:
كيلو لحم مفروم+بصلة كبيرة مبشورة+خلطة تتبيل الكفتة من كنور أونضع ملح وبهارات العادية+1/2 رغيف فينو
مقادير سلطة الطحينة:نص كوب طحينة+3 فصوص ثوم مدقوق+معلقة خل+زيت+ماء للتخفيف
الطريقة:_
اولا بالنسبة للطحينة بنحط كل المقادير نع بعض ونقلب كويس جدا وكل ما نلاحظ انها تقيلة خففى بشوية ماء لحد ما يبقى لونها فاتح وفى نفس الوقت نخلط اللحم المفروم مع البصلةوالتوابل وبنجيب الفينو ونبلة بالماء ونفتفتة مع خليط اللحم انا بقول فينو لان من غيرة حتلاحظوة ان الصينة بعد ما تخرج من الفرن حجمها صغر او كشت وجود الفينو بيساعدها تحتفظ بنفس حجمها ال دخلتى بيها الفرن،نجيب صنية مدهونة ونبدا فى وضع اللحمة بداخلها نفرشها يعنى فى قلب الصنية وممكن نحط على الوش ترنشات بطاطس وفى الاخر نسقيها بالسطلة الطحينة ودخليها الفرن و أول ما تخرج من الفرن سخنى فحمة على النار وحيها بعد كدة فى الصنية علة قطعة خبز وحطى فوقيها حبة سمنة وغطيها باحكام الفحم بيدى نكهة الشواء

الكرشة بالحمص
المقادير:
كرشة مسلوقة و مقطعة قطع صغيرة _كوب عصير طماطم _بصلة متوسطة مفرومة _نص كوب حمص (حمص الشام )مسلوق نص سلق _معلقة سمن كبيرة _نص راس ثوم +ملح _فلفل _ كمون _ كوب و نص من ماء سلق الكرشة
الطريقة:
نضع السمن فى حلة و نحمر فيها البصلة لما يصفر نضع الثوم و الحمص و نقلب تقليبتين ،و بعدين نحط عصير الطماطم و على نار متوسطة لحد الطماطم ما تتسبك و دة طبعا بانك حتلاقى لونها اتغير و تقلت اضع حوالى كوب و نص من الماء اللى سلقت فية الكرشة اللى الحلة و الملح والفلفل و الكمون و نسيبها لحد ما الماء اللى حطناة تغلى نضع الكرشة المسلوقة المقطعة فى الحلة و نقلب و نسيبها على نار هادية لحد ما تستوى و هى مش بتاخد كتير يعنى حوالى 20 دقيقة مثلا و بالهنا و الشفا

المخ البانية
المقادير:
مخ مسلوق _ملح _ فلفل _بيض مضروب_دقيق _ بقسماط ناعم ._سمن
الطريقة :
نقطع المخ اما قطع صغيرة او شرائح ،نضع المخ فى الدقيق حيغطية و بعدين نحطة فى البيض و بعدين فى البقسماط ،نضع السمن فى مقلاية بس يكون السمن غزير يعنى كتير و نحمر المخ و بالهنا و الشفا

الكبدة المحمرة
المقادير:
نص كيلو كبدة _ملح _فلفل _عصير ليمون _ سمن للتحمير
الطريقة:
تقطع الكبدة شرائح و تبليها بالملح و الفلفل وعصير الليمون و سيبيها شوية فى التتبيلة ، نضع السمن فى مقلاية ولما تقدح احمر الكبدة الاول مرة على الوش الاول و مرة على الوش التانى ،وبعدين حطى عليها شوية فى شوية ماء لحد ما تستوى

الكبدة بالفلفل و الطماطم
المقادير:
نص كيلو كبدة _ملح _فلفل _فلفلة رومى كبيرة _بصلة كبيرة _طماطماية كبيرة +م زيت او سمن _ م ص خل +فصين ثوم.
الطريقة:
نقطع الكبدة قطع صغيرة و كذلك الفلفل و البصل و الطماطم .نضع السمن فى حلة و نشوح فيها البصل و الفلفل و فصين الثوم لحد ما يصفروا ثم نضع الطماطم و الخل و نقلب ثم نضع الكبدة و نقلب نقلب لحد ما تاخد لون محمر اضع ربع كوب فى ربع كوب ماء لحد ماتستوى و يكون فيها صوص بنى.

السحق البيتى
المقادير:
نص كيلو لحمة مفرومة _ملح _ فلفل _ قرفة _ جوزة الطيب _ نص كوب ماء _شطة حسب الرغبة – امعاء منظفه
الطريقة :
نضع التوابل كلها على اللحمة ،اضع الماء على اللحمة و اخلطهم كويس بايدى لحد اللحمة ما تطرى خالص علشان تنزل فى الامعاء بسهولة ،اضع القمع فى اول طرف الامعاء و ايدء انزل فى اللحمة المفرومة و انا عمالة ابل صباعى اللى بزوء بيه اللحمة بالماء .لحد ما املى الطول اللى امامى و بعدين اروح ماشية علية بايدى مبططة مبططة مبططة علشان ،فى السوى حيملى و يتنفخ المهم بعد ما ابطط ابدء بقى بالنطر احسب طول صباع السجق و اعقد وكمان الصباع اللى بعدة و اعقد و هكذا لحد ماحتلاقى حبل السجق اللى بتشوفية عند الجزار اتكون قدامك ،تحطيهم فى اكياس نايلون و على الثلاجة

طريقة تسوية السجق
المقادير: سجق _ 2 طماطماية كبيرة _ 2 فلفلة رومى _ فلفلة حامية -ملح _فلفل _زيت او سمن
الطريقة :
بطرف السكينة اعمل شق صغير فى كل صابع سجق ،اضع الزيت او السمن فى مقلاية على النار ثم اضع الفلفل رومى و الطماطم ،تقليبة و بعدين احط وحدات السجق و اقلب اقلب ثم اضع شوية شوية ماء و اغطى المقلاية لحد ما يستوى اعلى النار واقلب السجق لحد ما يتحمر اروح طافية النار و نعمله سندوتشات بالمستردة او حسب الرغبة ،ملحوظة :ممكن نعمل سندوتشات بيض بالسجق بتبقى حلوة جدا و من باب التغيير

كفتة الرز
المقادير
- نصف كيلو لحم أحمر مفروم- 1 كوب رز مطحون + نصف ملعقة بيكربونات- بصله كبيره + 2 فص توم كبار- ملح + فلفل + ملعقه كبيره كمون- 3 ملاعق بقدونس مفري- سمن أو زيت للتحمير
الطريقه
بإستعمال الكبه أو المالتي براكتيك (أكبر من الكبه )أفرم البصل والثوم وأضيف الملح والفلفل الأسود والكمون وبعد كده أعجنهم مع اللحمه والرز المطحون المضاف اليه البيكربونات وكمان البقدونس .. أعجن الكل مع بعض كويس .. ممكن أعيد فرمهم بالكبه من تاني لتكوين عجينه متماسكه أشكل من العجينه كور صغيره أو أصابع .. ثم أقليها في السمن أو الزيت

الكفته بالصلصه
أسخن ملعقة سمن أو زيت وأحمر فيها ملعقه صغيره ثوم مفروم إلي أن يصفر لونه..أضع 2 ملعقه كبيره صلصه ونصف كوب ماء وبعد ما تتسبك .. أضيف 2 كوب ماء ..وأتركها لتغلي .أحط الكفته بعد تحميرها وأتركها تستوي حوالي ربع ساعه علي نار هاديه

كفتة محشية ( الطريقة الاولى )
المقادير:
كيلو لحمة مفرومة +بصلتان +نصف حزمة بقدونس +نص رغيف عيش فينو مبلول فى الماء و معصور جامد+ملح _و فلفل اسود _ جوزة الطيب +بيضتان مضروبين بالشوكة +ست بيضات مسلوقة +بقسماط ناعم +زيت للتحمير
الطريقة:
نضع اللحمة و البصل والبقدونس و العيش بعد عصرة بايدك من الماء ثم يضاف اليها الملح والبهارات وتخلط جيداً،تقسم اللحمة الى ست قطع متساوية وتحشى كل قطعة ببيضة مسلوقة بعد ما تقشريها طبعا و تضغطى عليها كويس قوى بايدك و بعدين تدحرجيها فى الدقيق وبعدين فى البيض و بعدين البقسماط و تحمر فى الزيت المقدوح و تنشل و بالهنا و الشفا

الطريقة التانية
بدل ما نحمرها فى بيض و بقسماط نعملها زى ما قلت و نلفها فى ورقة فويل مدهونة زيت بالفرشاة و بعدبن نسويها فى الفرن (( وفية طريقة تانية بالسلق بس الصراحة اللى فى الفرن او التحمير احلى )ممكن تنوعى فى الحشو يعنى خضار سوتية و انا بحط مع البيض شرائح خيار مخلل بيبقى طعمها حلو

اللحم بالورق بالورق الفويل ( سهل جدا)
المقادير:
كيلو لحم قطع ( بتلو او كباب حلة )+ملح _ فلفل _ بهارات _ رشة جوزة الطيب +2 معلقى كبيرة سمن _ او معلقة سمن و معلقة زيت +بصلتين +فرخ و رقة فويل
الطريقة :
نقطع البصل شرائح و بعدين نحط علية مقادير التتبيلة كلها و ندعكهم كويس،نضع اللحم المغسول و السمن على البصل السابق ، نفرد الفويل امامنا و نضع المقدار اللى عملناة و نلفة كويس باحكام عشان لما اللحمة تنزل مايتها ما تخرجش من الفويل،نحطها على صينية و ندخلها الفرن حوالى ساعة و بعدين نفتح الوش اللى فوق بس بتاع الفويل وحطة تانى عشان وش اللحمة يحمر

البرجر
المقادير:
1 كيلو لحمه مفرومه+1 كوب فول صويا منقوع 3 ساعات+2 بصله كبيره مبشوره+ملعقه كبيره توم مفروم+4 ملاعق كبيره نشا +ملح - فلفل أسود - بهار +ملعقه كبيره سماق (اختياري)
الطريقة:
نجيب طبق غويط نحط فيه اللحمه المفرومه وبعدها نفرم التوم والبصل في الكبه ونتبلهم بالملح والفلفل والبهار ونخليهم ناعمين خالص ونحطهم علي اللحمه، ونخلط بالكبه فول الصويا بعد ما يكون منقوع في ميه حوالي 3 ساعات وعاصرينه كويس قوي .. ونضيفه علي اللحمه ..ونعجن ونعجن.. ونضبط العجينه بإستعمال النشا حيت تتكون لدينا عجينه متماسكه نقسم العجينه لكور .. نضعها بين كيسين نايلون ونضغط عليها إما بطبق صغير أو بغطاء علبه نشوي قطع البيرحر في مقلايه تيفال وعلي نار هاديه يوجد في محلات الأدوات المنزليه قالب لتشكيل البرجر لحفظ البرجر في الفريزر يجب وضع بلاستيك بين القطع

الاستيك بالصوص و المشروم
المقادير:
قطع ستيك يفضل البتلو حتبليها بالملح و الفلفل +مشروم مقطع شرائح+علبة صغيرة كريمة طازجة+ربع كوب شوربة لحمة او مكعب ماجى لحمة و 2 معلقة كبيرة دقيق +زبدة و زيت (لتحمير الاستيك)+ملح , فلفل
الطريقة:
ضعى قطع الاستيك فى دقيق من الوجهين و نفضى الدقيق الزيادة- سخني على النار 2ملعقة من الزيت مع2 ملعقة من الزبدة في مقلا ية لحد ما تقدح . ضعي قطع الا ستيك و اتركيهم من غير ما تقلبيها لحد ما يتغير لونها شوية بس ما تحمريهاش يعنى حتبقى بنى فاتح تروحى بالشوكة مقلباة على الوش التانى و اتركيها برضة لحد ما تبقى بنى فاتح . استمري لحد ما تخلصى كل القطع واحدة واحدة فى الزيت و الزبدة اللى حمرتى فيهم الاستيك وحيكون فية برضة زى صوص او سائل غامقة ناشف قليل ناتجة عن تحمير اللحم حنبدء في عمل الصلصة البنى وللعلم ان الخطوة دى هي سر الطبق ضعى المشروم و حمرية حتى يتغير لونه .
اضيفي الكريمة اللبانى و قلبي أو ملعقتين من الدقيق مع التقليب ثم ضعى الشوربة و قلبي حتى تحصلي على سمك مثل الكريمة . او البشاميل ضعىالاستيك فى الصوص تقليبة على الوجهين ثم يغرف فى السرفيس و نضع على جنب الطبق الصوص بالمشروم

الكفتة و الكباب المشوييين
بالنسبه للحمه لو ضاني أو شمبري بأحب أسلقها نص ساق وبعدين أشيلها من الشوربه وأتبلها وأشويها علي الفحم .. ولو بتلو لباني أتبلها وأشويها علي طول..
تتبيلة الشوي ( أفضل التتبيل قبل الشوي بوقت كافي أقله 6 ساعات ):بصل جوانح أو ترنشات - فلفل أسود - بهار - شوية خل صغيرين - قطع من الليه الملح أفضل وضعه بعد الشوي كل دول أدعكهم كويس وأضعهم علي اللحمه وأسيبها للتتبيل وقت الشوي تتشك في أسياخ ده لو كان الشوي علي الفحم مباشرة ومعها قطع من الليه أما لو كان الشوي علي الشوايه الغاز أوالكهرباء أوحتي في مقلايه علي البوتاجاز أعطي ريحة شوي الحاتي بتوليع فحمه أو أكتر وبعد شوي اللحمه أضعها قي حله وأتبلها بالملح و في وسطها طبق صغير به ملعقة زيت أو سمنه أحط فيها الفحم وهو والع وأقفل علي طول بإحكام دخانها سيعطيني ريحة الحاتي ..

عمل الكفته
المقادير:
1 كيلو لحم مفروم وعليه حوالي 100 جرام ليه +2 بصله كبيره مفرومه ناعم +ملعقة كبيره ثوم مفروم ناعم+ملح - فلفل أسود – بهار+1 كوب بقدونس مفروم+كوب بقسماط ناعم
الطريقة:
أخلط جميع المكونات وأعيد فرمها مع بعضها،اشكلها في الأسياخ أوبشكل أصابع مجوفه من الداخل بتشكيلها علي يد ملعقه خشبيه
وأعمل نفس طريقة اللحمه وقت الشي

البفتيك المحشى
المقادير:
كيلو بفتيك +ملح _ فلفل _مستردة _3 فصوص ثوم _عصير ليمون _ عصير بصل
الحشو :عصاج بدون صلصة _ او خضار مسلوق مشكل _ ملح _ فلفل
الطريقة :
زى ما اتعودنا بندق البفتيك بالمدق المخصوص بتاع اللحمة و نتبلة بالملح و الفلفل و عصير البصل و عصير الليمونة و المستردة كويس نفرد كل شريحة و نحشيها بالخضار او اللحمة المعصجة ( يعنى نجيب معلقة كبيرة من الحشو و نحطها عند اول حتة البفتيك و بعدين نلف نلف )حيبقى شكلها فى الاخر زى صباع الكفتة التخين لو حتحشى بالخضار شوحيه الاول دقيقتين فى معلقة زبدة على النار و ممكن تحطى معاة شويه بقدونس صغيرين مفرومين نقفل البقتيكة بعد ما لفناها (برمناها ) بخلة او لفيها بالخيط
نضع معلقتين سمن فى مقلاية و فصوص الثوم وبعدين ضعى البفتيك وحمرية فى السمن كويس و بعدين حطى شوية شوية ماء او شوربة لحد ما البفتيك يستوى نشيلة و نفك الخيط او نسحب الخلة بالراحة ويقدم بالهنا و الشفا

الممبار
المقادير :
كيلو ممبار- 3 بصلات- شبت مقطع صغير - بقدونس مقطع صغير - كزبرة خضراء مقطعة صغير- ملح - فلفل - كمون- 3 طماطم كبيرة- 3كوب ارز- شطة ( لو عوزاة حراق )- 2 ملعقة سمن
اولا :طريقة تنظيف الممبار
- اول حاجة تشيلى الدهن بتاع الممبار و تغسلى الممبار جيدا و على الوش التانى و بعدين حطية امامك فى الحوض و ابتدى اجردى فى الممبار بالسكينة كويس قوى بس اوعى يتقطع منك و بعدين خلى ماء الحنفية ينزل جواة كويس و اغسلية تانى كويس قوى ثم ضعي علية كمية مش قليلة من الملح و الخل و سيبية ساعة ثم اشطفيه لحد ما تلاقى كل المخاط اللى كان فية نزل روحى رشة رشة دقيق كمان وادعكية كويس و بعدين ارجعى اغسلية كويس كدة تبقى مطمنة انه نضف تماما و ابدئى بقى تقطعية بالمقاس اللى انتى عوزاة يعنى صغير او يبقى الصباع طويل.
الحشوة: -
نغسل الارز،نبشر البصل والطماطم و نحطهم على الشبت و البقدونس والكزبرة ونضيف لهم الارز والملح والفلفل والكمون والشطة ونقلبهم جيدا وبعدين نحط السمن بالقمع- نحشي الممبار لثلثه بس بالخلطةو بعدين ندوس على الممبار بايدنا خفيف علشان توزعى الخلطة و عشان ما يبقاش الممبار مكبوس قوى - فى حلة كبيرة نغلى ماء و نضع به ملح و نمسك كل قطعة ممبار و نزلها بالراحة فى الماءالمغلى نلاحظ انها تنكمش و تتقفل من الطرفين و يترك على النار حتى ينضج - يصفي من ماء السلق و يحمر في الزيت و بالهنا والشفا

الكبدة بالردة
المقادير :
كيلو كبدة شرائح +رأس توم مفرومة ناعم جدا - ملح -فلفل - نصف ملعقة صغيرة كمون - 2 ملعقة كبيرة كزبرة ناعمة -2 كوب ردة ناعمة + نص كوب دقيق - ( تخلطيهم مع بعض )+زيت للقلى
الطريقة :
تبلى الكبدة و ضعى عليها و الملح و الفلفل و التوم و الكزبرة و الكمون و قلبيهم كويس وحطيها فى الثلاجة تقريبا ساعتين علشان تشرب من كل التتبيلة كويس طلعيها من الثلاجة و سخنى الزيت ،نضع شريحة شريحة فى خليط الردة بالدقيق و اضغطى عليها با يدك كويس من الناحيتين ،و ضعيها فى الزيت لحد ما تحمر من الناحيتين بس خلى بالك الكبدة اساسا بتستوى بسرعة يعنى ما تسبيهاش على النار دى يادوب بتاخد ثوانى،طلعيها من المقلاية و بالهنا و الشفا
ملحوظة لو عاوزة الكبدة مشوية :تعملى كل اللى عملناة عادى لحد مت تخرجيها من الثلاجة و بعدين تشويها

الطرب ( منديل الخروف )
المقادير:
- منديل خروف +كيلو لحم مفروم+بصلة+معلقة بقدونس مفروم+- ملح- فلفل –بهارات+1/4 كوب سمن
الطريقة:
- يقطع المنديل قطع متساوية بالسكينة على شكل مربعات او مستطيلات - يفرم البصلً ويخلط مع اللحم المفروم والبقدونس والملح و الفلفل والبهارات- يوضع مقدارمن الحشو في وسط كل قطعة من المنديل ثم تلف زى ما بنلف محشى الكرنب على شكل صوابع تخينة نرص الطرب على الشواية او فى الفرن على الرف الشبك

الياخنى
1/2 كيلو لحم ضانى او بتلو او كندوز صغير (نقطعهم قطع متوسطة مش كبيرة )+1/2 كيلو بصل قاورمة ( الصغير اللى عامل زى البلى )+2 معلقة كبيرة سمن +3 معالق كبيرة حمص الشام +عصير طماطم
الطريقة :
ينقع الحمص فى ماء من بليل او ممكن نسلقة نص سلق مع شوية ملح و كمون ،نضع السمن فى حلة على النار ثم نضع البصل القاورمة صحيح زى ماهو لحد ما يصفر ،ثم نضع علية قطع اللحمة ،ثم نضع الحمص على اللحمة و نقلب المقدار كلة و نضيف الملح و الفلفل،و عصير الطماطم حوالى نص كوباية ،نسيبة على النار و نزودلة شوية فى شوية ماء لحد ما يستوى نص سوى نطفى النار و نضع المقدار فى صينية او طاجن فرن و ندخلة الفرن لحد ما اللحمة و الحمص يستووا و طبعا نبقى بنبص علية عشان ازا احتاج شوية ماء على ما يستوى نحط له نطلعة من الفرن(البصل بنستخدمه زى ماهو صحيح مش بنبشره)

الكبيبة الشامى
المقادير:
1/2كيلو لحمة مفرومة حمراء +كيلو الا ربع برغل +بصلة متوسطة +ملح - فلفل
للحشو: لحمة مفرومة معصجة وحطى عليها مع التتبيلة رشة قرفة ناعمة و( شوية صنوبر محمرين ودة حسب الرغبة )
الطريقة :
اغسلى البرغل كويس وخلى بالك علشان بيبقى فية حصى صغير و انقعية فى الماء حوالى 1/4 ساعة بس،صفى البرغل كويس قوى قوى من الماء،وحطية على فوطة مفرودة علشان تشرب الماء اللى فية ،و بالضغط علية بين ايديكى كويس ،افرمى البرغل الاول لوحدة فى المفرمة او الكبة مع البصلة ،ضعى اللحمة المفرومة على البرغل و اخلطيهم كويس،وبعدين افرميهم تانى مع بعض و مع التوابل،كونى محضرة جانبك طبق فية ماء مثلج،و ابدئى فى عمل وحدات الكبيبة ،خدى قطعة اما صغيرة قد البيضة لو انتى بتحبيها صغيرة او خدى قطعة من العجينة قد البرتقالة لو انتى بتحبيها كبيرة ( زى بتاعة ابو حيدر )،تبلى ايدك بالماء و تكوريها على شكل بيضاوى و ما تخليهاش تخينة من الداخل و بالمعلقة الصغيرة حطى داخلها الحشوة و بلى ايدك و لفى واقفلى لفى واقفلى وكدة بقيت جاهزة كملى باقى العجينة ،رصصى كل الكبيبة فى صينية و حطيها فى الثلاجة شوية و بعدين يا تحمريها فى زيت غزير يا اما تحفظيها فى اطباق فل فى الفريزر و بالهنا و الشفا

الكبيبة الصينية
نفس الطريقة بعد ما تبقى عجينة الكبيبة جاهزة، ادهنى صينية بالزيت و ابدئى افردى جزء من العجينة فى الصينية برضة تبلى ايدك بالماء و تبططى لحد ما تغطى القاع ،تجيبى اللحمة المعصجة و تفرشيها على الراقة الاولى و بعدين تجيبى حتة حتة من العجينة و تبططيها بين ايديكى و تحطيها على اللحمة جنب بعض جنب بعض لحد ما تغطى اللحمة كويس و بعدين تقطعيها بطرف السكينة المبلول سمبوكسات و فى كل سمبوكسة واحدة صنوبر و قطع صغيرة على الوش من السمنة ودخليها الفرن لحد ما تستوى و تتحمر

البيض الاسكتلندى
المقادير:
يكيلو لحمة مفرومة +5 بيضات مسلوقين جامد+بصلة كبيرة مبشورة+نص حزمة بقدونس مفرومة +ملح – فلفل – دقيق – بقسماط ناعم – بيضة مضروبة بالشوكة
الطريقة
نخلط اللحمة بالبصلة بالملح بالفلفل بالبقدونس و نخلطهم كويس زى ما بنعمل عجينة الكفتة ،بعد ما نسلق البيض كويس و نقشرة طبعا و ننشفة من اى ماء و ندحرجة فى الدقيق ،نجيب اللحمة و ناخد قطعة حلوة و نحاول بأدينا كويس نغطى البيضة خالص بالضغط كويس قوى على اللحمة ،وبعدين نحطها فى الدقيق و نضغط برضة بأيدنا كويس و بعدين نحطها فى البيض المضروب وبعدين نحطها فى البقسماط الناعم ونحمرها فى الزيت الغزير
( 2 ) ممكن بعد ما تغطى البيضة المسلوقة باللحمة كويس قوى
تجيبى قطعة ورقة فويل و تدهنيها بالفرشاة بالزيت وتحطى فيها كورة اللحمة المفرومة و تقفليها كويس و تكملى باقى المقدار بنفس الطريقة و تحطيهم فى صينية فى الفرن لحد مايستووا يعنى ابقى افتحى واحدة بعد 1/3 ساعة وانتى حتعرفى بالتقريب باقى على سويها قد اية ؟ وبعد ما تستوى شيليهم من الورق الفويل وحطيهم تانى يحمروا و بالهنا و الشفا

الكبيبه (للقلي والشوي والصينيه)
المقادير:
1 كيلو لحم مفروم ناعم ( 3 أدوار بالمفرمه )+1 كيلو برغل +2 بصله متوسطه +1 ملعقه صغيره من كل من فلفل أسود - قرفه - بهار - كمون ونخلطهم+2 ملعقه صغيره ملح+حوالي ربع كيلو لحم مفروم ( خشن ) مقلي بالزبده ومتبل بالملح والفلفل والبهار
بصله كبيره مقطعه بالسكين لقطع صغيره ومقليه بالزيت ( لونها بني فاتح )+صنوبر محمر بالزيت ( إختياري )+شرائح رقيقه من الليه أو الدهن لحشو الكبه المشويه متبله بالبهارات والملح والقرفه
الطريقه
ننقي البرغل ونغسله وننضفه من أي شوائب .. وننقعه في ماء بارد حوالي نص ساعه +نعصره جيدا ونفرده علي فوطه ليتخلص من الماء الزائد+نفرمه بالمفرمه مع البصل ثلاثة أدوار حتي نطمئن بأنه أصبح ناعم جدا ،ندعكه باليد كويس ،نقسم كيلو اللحم أربعة أربع،نأخذ ربع كيلو لحم مفروم ونعجنه مع البرغل ونكون عجينه ،نقسم العجينه ثلاثة أقسام للقلي ثلث العجينه نضيف عليها بهارات مخلوطه وملح - للشوي ثلث العجينه الثاني نضيف أليها نصف كيلو لحم + بهارات وملح - للصينية ثلث العجينه التالث نضيف إليه ربع كيلو لحم مفروم + بهارات وملح
بالنسبه للكبيبه المقليه.. نعجن كبيبة القلي كويس ونضيف القليل من الماء البارد إلي أن تتكون عجينه متماسكه وطريه ليسهل تشكيلها .. ونقسمها قطع في حجم البيضه .. نرق الكبيبه ونجوفها من الداخل ونحاول نخلي الغلاف رقيق بقدر الإمكان ونحشيها بالبصل واللحم المقليين وممكن الصنوبر أيضا .. المهم يكون حشو قليل أي حوالي نصف الفراغ داخل الكبه .. بعد الفراغ من تشكيل كل الكميه .. نقليها في زيت ساخن يغطيها أو نحفظها في الفريزر لحين الإستعمال
بالنسبه للكبيبه المشويه ..نعجن اللحم مع البرغل .. والنوع ده من الكبيبه اللحمه فيه أكتر من البرغل للتشكيل نقسم الكميه لقطع في حجم البيضه .. ونرقها دائره ونحشيها بالدهن أوالليه .. ثم نفرد قطعه ثانيه ونضعها علي الأولي ونغلقها جيدا .. وبكده تكون جاهزه للشوي إما في مقلايه تيفال مدهونه بالزيت أو في شواية الفرن أو الأجمل علي الفحم
الكبيبه بالصينيه ..
ندهن صينيه حرفها واطي بالسمنه ونفرد أقل من نصف العجينه ونبططها لإرتفاع حوالي 1 سم .. نضع اللحم المفروم المقلي والصنوبر .. ثم نفرد باقي العجينه علي كيس نايلون بمقاس صينية الكبيبه .. ونحاول قلبها فوق الصينيه .. أو نفرد قطعه قطعه علي باطن اليد ونحاول بالطريقه دي تغطية الصينيه .. المهم نجهز الصينيه بحيث تكون الطبقه السفلي أقل من العليا .. ونرسم عليها خطوط كالبقلاوه لكن غير عميقه .. ونضع حوالي ملعقتين سمن ونعمل حفره صغيره في وسط الصينيه لتجميع السمن فيها وتوزيعه من القاع نخبزها .. بعد الخبز نسكب باقي السمن منها ونغطيهاحالا حتي تبقي طريه ..

كفتة بالارز
المقادير:
رز"حسب الكمية"+بهارات،ملح وفلفل وثوم+صلصة طماطم متسبكة+بيض و ودقيق
الطريقة:
ترفعي الارز علي النار حتي ينضج جيدا"رز عادي خالص مش مفلفل لاننا عاوزين الرز فيه شوية معجنة بسيطة اوي و بعد ماستوي ترفعيه من علي النار تضيفي اليه صلصة طمام متسبكة والبهارات والثوم"بهارات مش كتير لاننا محدقين الرز من البداية وتكوري تكوري....تدخليه الثلاجة يمسك نفسه وبعدين تحمريه في الزيت بعد ماتغطسيه في بيض ودقيق وتحمريه حتي يصبح لونه ذهبي...

طريقة خفيفة للسجق في عشا
انتى ممكن تعملية بالبيض انك تقطعيى قطع صغيرة و تخلطية مع البيض الملخبط وممكن تعملى بيض اومليت و تروحى حطة السجق جواة وتبرميه علية وممكن تجيبى مربعات من عجينة الباف باسترى اللى عملناها و تحطى واحدة فى كل مربع و تلفية و تدهنى الوش بالبيض او اللبن و تحطية فى الفرن وممكن تحطية برضة فى البيتزا وممكن تحطية فى اللازانيا وممكن طبعا الطريقة بتاعتنا اللى هى بتحمرية فى سمن خفيف وتقطعى علية طماطماية كبيرة و ممكن واحدة فلفل رومى او حامى و شويه ماء و ملح وفلفل وتقلبية لحد ما يستوى

السجق الاسكندراني
والي ممكن تعمليه زي السوسيس الإسكندراني وعن تجربه لمده شهر
تأخذي السجق وتقطعيه الى دوائر صغيره المساحه،ثم تقومي ببشر بصله ،وتحمريها في الزيت،في صينيه تيفال ،بعد ما يصفروا ضعي صلصه طماطم عليهم ،واتركيهم الي ان يحدث التسبيك المطلوب،مع اضافه التوابل والملح والفلفل حسب الرغبه ،ثم قومي بإضافه السجق الي التسبيكه ،مع بعض الشطه الحمراء قطع الشطه الخضراء ،يعني تقطعي شطه خضره حسب الرغبه ،وتتركيهم الي ان يمتص السجق الصلصه المسبكه يعني على نار هادئه جدا
ملاحظه مهمه قبل ان تضعي السجق في التسبيكه يجب ان تحمريها في بعض الزيت في المقلاه قليلا حتى تخرج مستويه بالاضافه انها تكون غير رقيقه يعني ماسكه في بعضها

كبد وكلاوى بالصوص مع الارز الابيض
المقادير:
1كيلو كبدة ضانى +عدد 3 كلاوى +عدد 2 قلب +2فلفل اخضر رومى او حامى+رأس ثوم مفصصة ومفرومة+ملح – فلفل – كمون+ربع كوب زيت
الطريقة
يقطع الكبد والكلاوي والقلوب إلي شرائح رفيعة او مكعبات،ثم تغسل بالماء وتصفي في مصفاة كل واحد لوحدة،ثم يسخن الزيت وتقلب شرائح القلوب والكلاوي كويس لحد ما ينزلوا مايتهم ويشربوها،وبعدين تضاف شرائح الكبدة إلي القلوب والكلاوي وتقلب جيدا ثم يضاف الثوم و الملح و الفلفل و الكمون والفلفل الأخضرثم يقلب كله مع بعض ويترك علي نار هادئة لحد ما يستووا مع اضافة القليل من الماء كلما احتاجوا و بالهنا و الشفا ويقدم مع طبق من الارز الابيض
ملحوظة :ازا كنتى عوزاها بالصوص يبقى قبل ما تطفى النار وبعد ما تستوى تسيبى فيها شوية صوص وازا كنت مش عيزاها بصوص يبقى بعد ما تستوى والماء بتاعها ينشف تقلبيها فى السمنة اللى معاها فى الحلة

الكفتة المحشية بالحبن
المقادير:
بصلة كبيرة مفرومة ناعمة+3 ملاعق كبيرة زيت +فصين ثوم مفرومين+كيلو لحم مفروم +2 ملعقة بقدونس مفروم+ملح+بيضة
ربع كوب بقسماط+(او)نص رغيف عيش فينو مبلول فى ماء ومعصور جامد+1 ملعقة صغيرة بهارات لحمة+1 كوب جبن شيدر مبشورة
الطريقة:
حمري البصل فى الزيت لحد ما يدبل ويصفر وبعدين شيلية من الزيت و اركنبة ،ضعي اللحمة و الملح و الثوم و البهارات و البقسماط و البقدونس و البيضة واعجنيها لتحصلي علىكفتة متماسكة..افردي على الترابيزة امامك قطعة نايلون ثم افردى فوقها الكفتةعلى هيئة مستطيل وافرديها وبططيها كويس بايدك ضعى البصل فوق اللحم يعنى افردية على المستطيل وبعدين حطى الجبنة الجبن مع ترك مسافة 1 سم من الطروف.حنبتدى نلف اللحمة على هيئة اسطوانه زى السويسرول بالظبط بس من الناحية العريضة للمستطيل ضعي رول اللحم فى الصينية ودخليها الفرن لحد ما تستوى وتحمر حوالى ساعة الا ربع بعد ما تطلعيها من الفرن اتركي الرول يبرد شوية قبل التقطيع علشان ما تفرفطش منك وبالهنا والشفا

البورجر المحشية بالجبن
نفس طريقة البورجر اللى كتبناها فبل كدة بس حنزود فى المقادير شرائح من الجبنة الشيدر:
1 كيلو لحمه مفرومه 1 كوب فول صويا منقوع 3 ساعات+2 بصله كبيره مبشوره ، ملعقه كبيره توم مفروم+4 ملاعق كبيره نشا، ملح - فلفل أسود - بهار، ملعقه كبيره سماق (اختياري)
الطريقة:
اول حاجه نجيب طبقغويط نحط فيه اللحمه المفرومه وبعدها نفرم التوم والبصل في الكبه ونتبلهم بالملحوالفلفل والبهار ونخليهم ناعمين خالص ونحطهم علي اللحمه،ونخلط بالكبه فول الصويابعد ما يكون منقوع في ميه حوالي 3 ساعات وعاصرينه كويس قوي .. ونضيفه علي اللحمه ..ونعجن ونعجن..ونضبط العجينه بإستعمال النشا حيت تتكون لدينا عجينه متماسكه نقسم العجينه لكور .. نضعها بين كيسين نايلون ونضغط عليها إما بطبق صغير أوبغطاء علبه نضع اول بورجاراية ونضع فوقها قطعة او شريحة او سلايس من الجبنة و نلزقها بايدنا كويس على البورجر ثم نضع واحدة بورجر تانية على الجبنة ونضغط بايدنا كويس قوى علشان طبقتين البورجر يلزقوا فى بعض كويس ( يعنى زى السندوتش ) نشوي قطع البيرحر في مقلايه تيفال وعلي نار هاديه

لحم روستو بالخضر
المقادير:
عرق لحمه+4 فصوص توم - ملح - فلفل أسود - 3 ملاعق خل+ ملح - فلفل أسود - بهار
الحشو ربع كيلو بسله - ربع كيلو جزر - بصله متوسطه - 2 فلفل حلو - ملعقه صغيره ثوم)
الطريقة: نشق عرق اللحمه بالطول ونفرغ جزء من داخله .. نعمل 4 فتحات نضع فيها الثوم .. ونتبل اللحم بالخل ثم بالملح والفلفل نقطع الجزر والبصل والفلفل والثوم الكل تر****ت ونخلطه مع البسله نشوح الخضار في قطعة زبده ونتبله بالملح والفلفل والبهار نحشي اللحم بالخضارونربطه جيدا بالخيط الخاص باللحم،نحمر اللحم في صينيه بها قليل من الزيت حتي يصير لونه بني فاتح من جميع الجهات،بعد تحمير اللحم عندنا طرق مختلفه للتسويه نلف عرق اللحم في ورق ألمنيوم ونسلقه في ماء حتي ينضج
أو نزيده قليلا فقليلا من الماء في نفس صينية التحميرحتي تمام نضجه أو- نضيف للحم كوب من الماء ونغطي الصينيه بورق الألمنيوم وندخله فرن حاربعد تمام النضج نتركه يبرد ثم نقطعه ونحافظ علي الشكل في التقديم ممكن تنويع الخضر في الحشو

طاجن لسان العصفور بالعصاج
المقادير:
نص كيلو لسان عصفور (كيس) – 2 معلقة سمنة – ربع كيلو لحمة معصجة بالصلصة
الطريقة
نسلق اللسان عصفور زى ما بنسلق المكرونة ،بالضبطونشطفها برضة بالماء البارد ،ادهنى طاجن فرن او صينية بايركس بالسمنة،نضع طبقة من لسان العصفور و نسويها بالمعلقة وبعدين نضع طبقة من العصاج عليها ثم طبقة من لسان العصفور (ولو عندك لسة متبقى ممكن تكملى كمان طبقة من كل نوع ضعى على الوجة طبقة خفيفة من العصاج بالصلصة ورشة جبنة مبشورة
ودخليها الفرن يا دوب حتحمر لان كل المقادير مستوية وبالهنا والشفا

فخدة فى الفرن
فخذة ضانى- 2 ملعقة كبيرة صلصة طماطم- ملعقة كبيرة بهارات لحم+2ملعقة كبيرة خل- ملعقة صغيرة فلفل أسود- ملعقةكبيرة ملح 5- فصوص ثوم صحيحة – بصلة كبيرة مقطعة حلقات 2 ملعقة كبيرة زيت او سمنة
الطريقة:
اغسلي الفخذة ونشفيها،اعملي بعض الخروم بالسكينة فى لحم الفخذة، ضعي في طبق الملح و الفلفل – و البهارات – و الخل – و اخلطيها جيدا ،ضعى فى الخروم من خلطة التتبيل وفص ثوم صحيح فى كل خرم وبباقى خلطة التتبيل ندعك بيها الفخدة كلها كويس ،نضع الزيت او السمن فى صينية كبيرة على النار ونحمر فيها البصل ،نضع الفخدة فى السمنة ونقلبها كويس فيها لحد ما تحمر من جميع الجهات، نتركها على النار ونغطيها مع اضافة الماء كلما احتاجت الى ان تستوى تلت ارباع سوى، غطى الصينية بورق الألمنيوم،و ضعيها فى الفرن ،لحد ما تستوى وقبل ما تخرجيها شيلى الورقة الفويل من عليها وادهنيها بصلصة الطماطم علشان وشها يحمر و بالهنا و الشفا

طاجن اللحمة بالبصل ((فى الفرن))
المقادير:
1/2 كيلو لحمة .+عصير طماطم.+3 بصلات مقطعين شرائح تخينة.+ملح ، فلفل.1 معلقة سمن.
الطريقة:
نسلق اللحمة نص سلقة.نضع البصل فى الطاجن وعلية اللحمة ومعلقة سمن.ثم نضع عصير الطاماطم حتى يعطى الطاجن كلة . يوضع فى الفرن الى ان تنضج اللحمة .

الكوارع
أهم حاجه نضافتها وغسيلها .. وبعد كده إدعكيها بشوية دقيق وملح ونص كوب خل .. وسيبيها متبله بيهم فتره في التلاجه وبعد كده أشطفيهم كويس ،حطيهم في حله فيها ميه مغليه .. وسيبيها تاخد غلوه واحده علي النار ..وأرفعيها وأشطفيها تاني هاتي حله نضيفه حطي فيها قطعة زبده صغيره علشان تسيحي فيها فصين مستكه .حطي ميه سخنه علي المستكه وبعد ما تغلي ضعي الكوارع ..ضيفي بصله مقطعه أو مبشوره ونص ملعقه صغيره حبهان مطحون .. وملحي الشوربه أتركيها تستوي علي نار عاليه في الأول وبعد كده وطي النار لغاية ما تتم سواها

الكوارع بالخل و البقدونس
المقادير:
عدد 2 كوارع+3 لتر ماء+بصلة – جزرة+ملح – فلفل – 5 وحدات فلفل اسود صحيح+2 معلقة كبيرة زيت+2 معلقة كبيرة خل+معلقة صغيرة بقدونس +معلقة صغيرة بصل مفروم
الطريقة:
نسلق الكوارع فى الماء مع البصلة والجزرة و الملح والفلفل لحد ما تستوى تماما، نشيل اللحم من العضم ونسيب اللحم لحد ما يبرد، نخلط الزيت مع الخل مع البصل المفروم مع البقدونس مع بعض ،ونضعها على اللحم البارد ونقلبها ونسيبها حوالى نص ساعة بس كل شوية تقلبيها تقليبة مع التتبيله شيليها من التتبيلة وضعيها فى طبق التقديم مع شرايح الطماطم و الليمون

الكوارع بالدمعة
المقادير:
2 كوارع مسلوقة+كوب من شوربة سلق الكوارع+ربع كيلو طماطم متصفية+ملح – فلفل+معلقة كبيرة سمن+بصلة صغيرة مفرومة +معلقة كبيرة خل+5 فصوص ثوم
الطريقة
نضع السمن على النار ونحمر فية البصل ثم الثوم حتى يصفر،نضع الخل على البصل والثوم لحد ما يغلى ثم نضع الطماطم، ونتركها لحد ما تتسبك ثم نضع كوب شوربة الكوارع ونسيبها لحد ما تغلى ، شيلى من عضم الكوارع وضعية فى الدمعة على نار هادية لمدة ربع او ثلث ساعة وتغطيتها اثناء السوى رصصى الكوارع فى طبق التقديم وصبى عليها الدمعة ( الصلصة )

طاجن كوارع الضان على الطريقه المغربيه
المقادير:
مكونات خلطه البهارات
(1 حزمه كزبره - 1 ملعقه شاى كركم مطحون - 2 ملعقه شاى كمون مطحون - 1 ملعقه شاى كزبره مطحونه - 2/1 ملعقه شاى قرفه مطحونه - 1 ثمره فلفل احمر حار مجفف - 2 فص ثوم مفروم - 2 ملعقه مائده عسل )- 4/1 كوب زيت زيتون - 8 كوارع ضان - 3 بصلات مقطعه الى حلقات سميكه - ملعقتين سكر - 1 ملعقه مائده خل - 3 كوب مرقه - ليمون للتجميل - اوراق كزبره للتجميل.
الطريقة:
تمزج مكونات البهارات سويا فى الكبه حتى تصير عجينه متماسكه - نسخن 3 ملاعق زيت فى اناء تحمر الكوارع فوق نار عاليه وتنقل فى بايركس على النار نشوح البصل وننثر عليها السكر وتشوح على نار متوسطه 10 دقائق تضاف خلطه البهارات وتشوح على النار ثم نضيف الخل والمرقه ويترك الخليط على نار هادئه جدا 10 دقيقه نصب صوص البهارات على الكوارع وتدخل فرن مع تغطيتها مده ساعه تقلب الكوارع على الجهتين وتترك حتى تنضج تماما

كبيبه (تركى)
المقادير
1/2 كيلو برغل+2 بيضه +دقيق للعجن+ماء ساخن
الحشو:لحم مفروم معصج+بصله مخرطه+عين جمل أو زبيب (حسب الرغبة)+فلفل أخضر وأحمر مقطع صغير جدا
الطريقة:
يتم غسل البرغل جيدا وتصفيته ثم وضع حوالى كوب متوسط ماء ساخن ونتركه حوالى 1/4 ساعه حتى يتشرب الماء ،نضع البيض ونضع الدقيق (بدون مقدار حسب العجن حوالى 2 أو 3 ملاعق كبيره) ويتم العجن باليد جيداً مثل عجن (عجينة فطاير أو بيتزا)،ويتم عمل الخلطة نعضج اللحمة لوحدها ونأخذ البصله نحمرها حتى يصبح لونها دهبى ونرفعها من النار ونخلط عليها العصاج والفلفل والمكسرات ونقلبهم جيدا،يتم عمل وحدات من البرغل مثل لف الكبيبة العادية نأخذ كور فى حجم البيضه ونلفها من الداخل بالأصبع حتى نفتحها فتصبح مثل محشى الباذنجان بس صغير ومنفوخ (أرجو أن يكون الشرح واضح وبسيط) ويكون بجانب يدنا طبق به ماء نبل اليد به من وقت لآخر حتى لا يلصق باليد،نضع داخلها ملعقة من العصاج ونقفل ونلف بالماء فتصبح شكل بيضه كبيرة قليلا ولها بوز،نضع ماء يغلى ونضع به ملح وزيت ونسلق به وحدات الكبيبه لمدة عشر دقائق ولكن فى حله واسعة حتى لا يلتصق ببعضه أو يفتح،وبعد ان نخرجه ما الماء نضعه فى مصفاه ثم يتم تحميره فى زيد ساخن فيصبح لونه دهبى ويرص فى طبق التقديم

طريقة سريعة للكبدة
المقادير:
1/2 ك كبدة +2 طماطم متوسطة+4 او 5 فصوص ثوم+1 م ك سمن، او زيت لو بتحبيها بزيت+ملح و فلفل اسود
الطريقة:
قطعي الكبدة مكعبات صغيرة. قطعي الطماطم مكعبات صغيرة. دقي الثوم بالملح (الملح بيسهل دق الثوم جدا لما نحطه معاه و بعد كده نظبطه لو محتاج تاني في الحلة). حطيهم في حلة و معاهم السمن او الزيت و الفلفل الاسود و ظبطي الملح. قلبيهم كويس لحد ما تحسي ان الكبدة اتشوحت، وطي النار و سيبيها تستوي براحتها و ممكن تضيفي لها شوية مية صغيرين لو محتاجة. و عند التقديم اعصري عليها ليمون و قدميها مع سلطة و مكرونة اوا عيش او ارز

اللـــــحمة بالجـزر
المقادير:
كيلو لحمة حمرا قطع+نص كيلو جزر حلقات+4 بصلات قاورمة+معلقة خل+قطعة زبدة+ملح – فلفل – بهارات+كوب شوربة او ماء+ورقة لاورو – عود كرفس+قرنفل
الطريقة
شوحى اللحمة فى الزبدة لحد لونها ما يتغير، ثم تضعى عليها كل المقادير مع بعض والتوابل وكوب الشوربة او الماء،نترك الخليط على النار لحد ما يغلى وبعدين نهدى النار لحد ما اللحمة تستوى مع اضافة قليل من الماء كلما احتاجت

كبــــــــاب بالزبــادى
المقادير:
كيلو لحمة من الفخدة+ نص كيلو بصل قاورمة+كوب زبادى+نص كيلو طماطم صغيرة جامدة+فلفلة رومى+بصلة متوسطة+ملح – فلفل – بهارات – عصير ليمون
الطريقة
ابشرى البصلة وضعى عليها الملح والفلفل والبهارات وعصير الليمون وادعكيهم ثم ضعى عليهم الزبادى قطعى اللحمة مكعبات صغيرة وقلبيها مع كل الخلطة اللى فاتت وخليها فى الثلاجة لمدة ساعتين قطعى الفلفل مربعات صغيرة وخلى الطماطم الصغيرة سليمة زى ما هيا جهزى الاسياخ بتاعة شوى اللحمة ونغزى فيها بالترتيب قطعة لحمة ثم بصلة قاورمة ثم قطعة فلفل رومى ثم طماطماية صغيرة وهكذا تشوى الاسياخ على الفحم او شواية البوتجاز

طاجن اللحمة الضانى بالحمص
المقادير :
1/2 كيلو لحمه ضانى +1/2 كيلو حمص شام+بصل قورمه (إن لم يوجد نستخدم 3 بصلات كبار مقطه حلقات)+فلفله رومى كبيره+ثمرتين طماطم مقشرين+2 م ك صلصه +حزمة مقدونس+1/4 م ص نعناع ناشف+ملح - فلفل - بهارات - جوزة الطيب
الطريقة
يتم سلق اللحم نصف سليق- ينقع الحمص من اليوم السابق للاستخدام ثم بعد ذلك يغسل جيدا ويوضع له ماء نظيف ويترك ليسلق على النار- نضع فى الحله زيت ثم البصل ويتم التقليب إلى انا ان يحمر دهبى فاتح ثم يوضع الفلفل الرومى ويقلب قليلا ثم نضع اللحم ويقلب خمس دقائق وبعد ذلك نضيف الحمص والطماطم المقطعة ونتركهم على نار هادئة حتى تتشرب ما بها من ماء ثم نضيف الصلصه والملح والفلفل والبهارات وجوزة الطيب ونقلب ثم نضع الشوربه التى تم سلق اللحمه بها وعندما تقترب من الانتهاء نضع البقدونس والنعناع ونتركهم دقيقتين ثم نطفئ

استيك بالمستردة
المقادير:
4 معالق كبيرة مستردة+4 قطع ستيك +ربع كوب عصير ليمون+ربع كوب بقدونس+ربع كوب كسبرة
الطريقة
افرمى البقدونس والكسبرة واخلطيهم مع الليمون والمستردة كويس،ضعى اللحمة فى الخليط وامزجيها معاهم كويس،وضعيها فى الثلاجة ساعتين،ضعى قطع الاستيك على الشواية لحد ما تستوى

استيك بالفلفل (شطة)
المقادير:
4 شرائح ستيك بتلو+فص ثوم مهروس+ملعقة كبيرة خل+ملعقة صغيرة زيت+ملح وفلفل أسود+قطعة جنزبيل صغيرة مفرومة
ملعقة صغيرة فلفل أحمر حامى
الطريقة
اضربى قطع الاستيك بشاكوش اللحمة وتبليها بالملح والفلفل،ضعى الثوم والخل والزيت والجنزبيل والفلفل الحامى على بعض واخلطيهم كويس،ضعى الاستيك فى الخليط وخلية فى الثلاجة ساعتين،ضعى قطع الاستيك على الشواية لحد ما تستوى

طاجن اللحم بالبذنجان
المقادير:
زيت زيتون - 3/1 كيلو بذنجان مقطع شرائح صغيره - 8 رؤوس بصل اخضر - 2/1 كيلو طماطم مقطعه - ثوم مفرى - 2 ملعقه شاى كمون مطحون - 2/1 كيلو شرائح فيليه بقرى متوسطه السمك - دقيق - 3/2 كوب عصير تفاح - 1 عود روز مارى - 2 ملعقه مائده لوز محمص مفروم
الطريقة:
نضع 3 ملاعق زيت زيتون ونشوح فيهم الباذنجان وتنشل على جنب نشوح البصل الاخضر على نار متوسطه 5 دقائق نضيف الطماطم والثوم والكمون وتترك لتتسبك نتبل اللحم بالدقيق ونشوحها فى معلقتين زيت زيتون وننشلها - مطرح اللحمه نحط عصير التفاح ويترك ليغلى نضيف 2/1 كوب ماء ثم خليط البصل الاخضر ثم اللحم نضيف اعواد الروز مارى - نغطى الخليط على نار هادئه مده 20 دقيقه نضيف الباذنجان ونتركه 25 دقيقه اخرى حتى ينضج اليخنى
يخنى اللحم البتلو بعيش الغراب
المقادير:
كيلو لحم بتلو - دقيق - ملح وفلفل - زيت - كيلوبصل قاورمه - ملعقه كبيرة خل - 2 كوب شوربه - ملعقه زعتر ناشف - 2/1 كيلو عيش غراب - 2 ورقه لاورا
الطريقة
نقطع اللحم قطع متوسطه نتبلها بالدقيق ونشوحها فى الزيت،نخرجها ونضع البصل ويشوح على النار حتى يصبح ذهبى اللون يعاد قطع اللحم الى الاناء مع باقى المقادير الباقية ويغلى الخليط ويخفض النارويترك يغلى 2/1 ساعه حتى ينضج تمام

يخنى اللحم البتلو بالمسطرده
المقادير:
زيت - كيلو لحم بتلو مقطع الى مكعبات كبيره - زبدة - بصله مقطعه شرائح - ثوم - 4/1 كيلو عيش غراب - ملعقه كبيرة دقيق - - 2/1 كوب عصير ليمون- كوب شوربة دجاج - 2 ملعقه كبيرة مستردة - 2 ملعقه كبيرة عسل ابيض - نص ملعقه شاى كمون
الطريقة
نشوح اللحم فى الزيت ونشيلة ثم نضع البصل والثوم لحد ما يدبلوا،نضيف عيش الغراب وتترك على النار مده دقيقه،نضيف الدقيق الى خليط البصل وقلبيه ثم ضعى كل المقادير الباقية،ويقلب الخليط ويترك ليغلى يتبل اليخنى ثم يصب مع اللحم فى طاجن بايركس ونغطية كويس ويوضع فى الفرن 45 دقيقه

الموزة
المقادير:
موزة ( زى ماهى بالعصاية بتبقى شكل دبوس الديك الرومى)+ملح - فلفل - بهارات - معلقة صغيرة كركم - معلقة كارى -حبهان - قرنفل - مستكة - جوزة الطيب - 2 بصلة - نص راس ثوم - نص كوب زيت -
الطريقة:
نغسل الموزة كويس،نتبل الموزة بكل مقادير التتبيل،يقشر البصل ويقطع شرائح،نحمر البصل الشرائح ثم نحمر الموزة فى نفس الصينية لحد ما تحمر كلها ،نغطيها بورقة فويل وندخلها الفرن مع شوية ماء كل ماتحتاج لحد ما تستوى ،ويا اما تنشفيها يا اما تخلى فيها شوية صوص بنى و تؤكل مع ارز ابيض

كـفتـة ذبـادى
المقادير:
نص كيلو لحم مفروم- كوب زبادى - ثوم مفروم– معلقة بقسماط ناعم - 2 بصلة مفرومة- ملح- فلفل- بهارات لحمة – بقدونس مفروم -معلقة زيت - معلقة سمنة
الطريقة :
نضع اللحمة المفرومة والبصل والبقسماط والبقدونس و الملح ،والفلفل والبهارات و الثوم ونخلطهم كويس ثم نضع الزبادى ، ونقلب كويس لحد ما تبقى متماسكة وان كانت طرية قوى ممكن،تحطى معلقة كبيرة كمان بقسماط ناعم ثم تعمل كور او اصابع وتحمر فى زيت وسمنة او تشوى على الشواية او توضع فى صينية تيفال ونغطيها بورقة فويل ونضعها فى الفرن

الكفتة المحمرة بالجبنة
المقادير:
نص كيلو لحمة مفرومة– بصلة مبشورة -فصين ثوم -ملح -جبنه موزريلا– نص كوب بقسماط ناعم-زيت للقلي
لتغطيه الكفتة: بيضتين مخفوقين بالشوكة- دقيق – بقسماط ناعم
الطريقة
نخلط جميع المقاديرمع بعض كويس. افردي كيس نايلون كبير على الرخامة ورشية بالدقيق، افردى علية كمية الكفتة وسويها كويس بحيث تكون قد وسمك قرص البورجر ،قطعيها بكوباية على هيئة دوائر او اقراص البورجر ورشى على وشها رشة دقيق خفيفة وبعدين حطيها فى البيض ثم فى البقسماط. اقليها فى الزيت او خليط زيت وسمنة وطلعيها على ورق ماص للدهون

كرات اللحم المقليه
المقادير:لحم مفروم 500 جرام+بصل 2 بصله+جبن 3 ملاعق مبشور+الثوم 2 فص ثوم مكسور+شبت ملعقه واحده مقطعه+بزخ ثلاث شرائح خبز – هسال عمو يمكن يعرف +مسحوق الكارى ملعقه +بيض 2 بيضه مخفوقه+عصير جريب فروت ملعقه واحده+الملح ملعقه واحده
الطريقه :
قومى بنقع الخبز فى عصير الجريب فروت واعصريه ليجف،ضعى اللحم المفروم والخبز فى الفرامه،اضيفى اليهم الثوم والجبن المبشور والبصل والشبت ومسحوق الكارى والبيض والملح حسب المذاق،واصلى الخلط 10 دقايق قومى بترطيب راحه يديك بعصير الجريب فروت وقومى بتشكيل الخليط الى كرات صغيره،قومى بتسخين الزيت ووضع الكفته خفضى النار وابدئى فى عمليه الطهى لحين اكتمال عمليه القلى بتحول لون الكفته الى اللون البنى قدمى الكفته مع الفتوش

طبق الفلفل
المقادير:
كاس لحم مفروم+ملعقه بصل مفروم+ملعقه كزبره مفرومه+ملعقه ثوم+بيضه – حشرين البيض فى كل حته يا ختى يا ساتر-6 حبات فلفل – اكيد رومى-بيضتان مخفوقتان خفقا خفيفا+2 ملعقه زيت نباتى+اوراق كزبره للتزيين
الطريقة:
نخلط اللحم والبصل والكزبره والثوم والبيض فى سلطانيه،نحشى بالخليط الفلفل الرومى وضعيه داخل مبخره وبخريه لمده 8 الى 10 دقايق ودهنه بشئ من الزيت،اتركيه على نار متوسطه الحراره ثم قدميه مع البيض المسلوق،اصل الوصفه جم لغايه البيض وابتدوا يعكوا فبدل ما تهرونى تريقه سلقت لكم البيض

لحمة بالبطاطس والجبنة
المقادير:
1/2 كيلو لحمة مفرومة+1/2 كيلو بطاطس+1/3 كوب صلصة طماطم+1/3 كوب حليب +1/2 معلقة صغيرة قرفة+1/2 معلقة صغيرة ملح+1/4 كوب زيت +1/8 كيلو جبنة موزاريلا+2 معلقة كبيرة قشدة الخفق+بيضة - بقدونس -كوب ماء
الطريقة
نعصج اللحمة المفرومة بمقدار الصلصة اللى عندنا،مع الملح والفلفل والقرفة،قطعى البطاطس شرائح رفيعة و رصصيها فى صينية فرن،نضع على البطاطس الحليب والماء والقشدة،ثم نضع طبقة من اللحمة المعصجة بالصلصة فوق البطاطس،اضربى البيضة وحطى عليها الجبنة الموزاريلا والملح والفلفل ،و البقدونس المفروم ،وبعدين روحى حطة الخليط فوق اللحمة فى الصينية
ضعى الصينية فى الفرن لمدة ساعة تقريبا لحد ما تستوى

بطاطس محمرة باللحمة المفرومة والجبنة
المقادير:
نص كيلو لحمة مفرومة+كيلو بطاطس للتحمير+نص كوب صلصة طماطم+معلقتين جبنة موزاريلا او شيدر+بصلة كبيرة+معلقة كبيرة ثوم مهروس+معلقة كبيرة خل+3 معالق زيت +ملح وفلفل وممكن ربع معلقة شطة
الطريقة
نضع الزيت على النار ونشوح البصلة المفرومة والثوم لحد ما يصفروا ،ثم نضع الخل والشطة ثم اللحمة المفرومة ثم الصلصة ونسيبها لحد ما ،تتسبك نقشر البطاطس ونقطعها صوابع تخينة شوية ونحمرها فى الزيت ،عادى ونشيلها ونصفيها من الزيت كويس نضعها فى صينية فويل او طبق فويل ونضع عليها العصاج بالصلصة وعلية رشة جبنة ونضعها فى الفرن تحت الشواية
ملحوظة: ممكن نعملها بالبطاطس المحمرة البايتة او المتبقية عندك ومحدش اكلها

الكرشة المحشية
المقادير:
كيلو كرشة (ضانى) - كوب ارز - كوب لحمة مفرومة -ربع كوب سمنة+يصلة كبيرة مبشورة - ملح وفلفل وبهارات+2 معلقة كبيرة بقدونس مفروم
الطريقة
تنظف الكرشة وتقطعها ونسلقها (كما سبق شرحنا) نغسل الارز ونضع علية البصل المبشور و اللحمة المفرومة والسمنة والملح والفلفل والبهارات والبقدونس المفروم ونقلب كله مع بعض كويس نخيط بالابرة والفتله كل قطعة من الكرشة من الثلاثة جوانب ماعدا جانب واحد نحشى فية شوية من الخليط ثم نخيطه هو كمان نضغط عليها بالشوكة نضع فى حله ماء لحد مايغلى ثم نضع فية معلقة ملح ونص معلقة خل ثم نضع الكرشة المحشية لحد ما لماء يغلى تانى .نهدى النار ونتركها لحد ماتستوى وبعدين نشيلها ونتركها لحد ماتبرد وممكن تروحى مقطعاها حلقات

كبدة بالدقة
المقادير:
1/2كيلو كبدة بتلو+1/2 راس ثوم مهروس+3 معالق زيت+عصير ليمون+معلقة كبيرة بقدونس مفروم+ملح وفلفل و كمون
الطريقة
تغسل الكبدة كويس بالماء والخل وتشطف بالماء وتقطع شرائح رقيقة ندهن مقلاية بالزيت ونشوح فيها الكبدة كويس على نار عالية لحد ما تستوى ونشيلها من على النار نخلط كل مقادير الدقة اللى عندنا مع بعض الثوم والبقدونس و عصير الليمون والملح والفلفل والكمون ونضعهم على الكبدة اول ما تنزل من على النار ونقلبهم كويس لحد ما الدقة تتخلط كويس بالكبدة ونقدمها ساخنة

لحمة بالصلصة و الزبادى
المقادير:
نص كيلو لحمة بتلو مكعبات - معلقة زبدة كبيرة - بصلة كبيرة شرائح+فلفلة رومى شرائح رفيعة – مشروم - كوب ونص عصير طماطم+نص كوب شوربة - زرة جوزة الطيب - ملح وفلفل- 4 معالق كبيرة زبادى+بقدونس مفروم
الطريقة
نسيح الزبدة فى مقلاية ونشوح فيها اللحمة 5 دقايق تقريبا ثم نضع البصل ونقلبة مع اللحمة دقيقتين تقريبا نضع المشروم والفلفل الرومى و عصير الطماطم و الشوربة والملح والفلفل وجوزة الطيب وورقة اللورا ونتركهم لحد ما يغلوا على النار ونقلبهم ثم نضعهم فى طبق فرن فى فرن متوسط الحرارة لمدة ساعة ونص تقريبا نضع عليها الزبادى قبل الاكل مباشرة ونرش البقدونس المفروم على الوش

اللحمة بالثوم والطماطم
المقادير:
4 شرائح بفتيك+2 طماطم كبيرة مقطعة صغير+راس ثوم مهروس+ملح وفلفل+عود كرفس مخرط صغير
الطريقة:
نضع كل واحدة بفتيك فى ورقة فويل نخلط قطع الطماطم مع الثوم مع الكرفس ونوزعهم على قطع البفتيك نرش الملح والفلفل ونغلق ورق الفويل كويس ونضعه فى فرن ساخن حوالى نص ساعة او لحد ما يستوا

كفتة بالصلصة
المقادير:
1/2 كيلو لحمة مفرومة حمراء+نص راس ثوم صغيرة مقشرة ومهروسه+معلقة كبيرة بقدونس مفروم+بيضة مضروبة+ملح وفلفل
الصلصة: بصلة كبيرة مفرومة+نص كيلو طماطم مبشورة+معلقة صلصة+زرة جوزة الطيب+زرة سكر
الطريقة
نخلط اللحمة المفرومة مع الثوم مع البقدونس مع الملح والفلفل كويس ثم نضيفلهم البيضة ونخلط كويس ثم نشكلها كور صغيرة نضع فى حلة على النار كل مقادير الصلصة لحد ما تغلى وبعدين نوطى النارونضع فيها كور اللحمة غطى الحلة وخليها على النار لحد ما تلاقيها استوت وطبعا ممكن تحتاج شوية ماء وتغرفيها

ضلع الخروف المحشى
المقادير:
ضلع خروف مسحوب العظام (2كيلو) ،ملعقتا طعام من الزيت ،لفائف العجينة الجاهزة،بيضة واحدة مخفوقة
التتبيل: لحم مفروم ، علبة مشروم مقطعة ، فنجان من فتات الخبز، بيضة مخفوقة) حضرى لحم المفرومة مع البصل المفروم على النار ثم اضيفى المشروم مع فتات الخبز مع البيضة
الصلصة: 2 ملعقة طحين، 1 1/2 فنجان من الماء ، مكعب ماجى ( امزجى عصارة المقلاة بالدقيق و حركى المزيج باستمرار على النار حتى يسمر قليلاً اضيفى الماء و الماجى و حركى المزيج على النار الى ان يتكثف.
الطريقة:
احضرى الحشوة واحشى بها الضلع حتى نهايته. اربطى الضلع بالخيط للحفاظ على شكله خلال الطهو . افركى الضلع بالزيت و ضعيه بالفرن حتى ينضج و هو مكشوف فى الفرن معتدل الحرارة لمدة ساعة حتى ينضج تماماً . ارفعى الضلع حتى يبرد بدرجة حرارة الغرفة ، ثم ضعيه على شبكة سلكية فوق صينية احتفظى بملعقتين من عصارة المقلاة للصلصة ثم ضعى الخروف على ورق ماص و اسحبى الخيط.ابسطى العجينة و ضعى الضلع بالمقلوب فى وسط العجينة المفرودة ثم اثنى نصف العجينة فوق الضلع و امسحى العجينة بالبيض بواسطة الفرشاة ثم اثنى النصف الثانى من العجينة ثم اكبسى الجوانب جيداً ليلتف الضلع و اعكسى الضلع بشكل تكون فيه جوانب العجينة تحت الضلع.ضعى الضلع فى طبق الفرن المدهون بالسمن قليلاً ثم ادهنى العجينة كلها بباقى البيض . ادخلى الضلع الى فرن معتدل الحرارة لمدة 25 دقيقة حتى تسمر العجينة . و اتركى الضلع لمدة 5 دقائق قبل تقطيعه الى شرائح وقدميه مع الصلصة


انتهى قسم اللحوم
ثانيا (( قســــم الطيـــــــور))

الحمام المحشى
المقادير:
حمام بعدد افراد الاسرة او حسب الرغبة .كوب أرز _ أو حسب عدد الحمام -ملعقة صغيرة فلفل أسود -ملعقة صغيرة ملح _ بهارات _ ملعقة كبيرة كمون -الكبد والقوانص بتاعة الحمام (بعد تقطيعهم لقطع صغيرة)- بصلة كبيرة أو بصلتين متوسطتي الحجم-ورق لورا _ 2 فص حبهان _ 2 فص مستكة _ 2 ملعقة كبيرة سمنة
الطريقة:
قومي بخلط البصل مع الملح والبهار والكمون والفلفل الأسود - قومي بإضافة الكبد والقوانص المقطعين إلى الخليط -اغسلي الأرز - ضعي الخليط كله على الأرز مع السمنة و اخلطية كويس - أبدأي بحشو الحمام واحدة واحدة من الأسفل ومن عند الرقبة فوق (بشرط انك ما تمليش الحمامة بالحشو لأن الأرز يينفش وبيذيد فى الماء اثناء السلق - اقفلى الحمام المحشي بوضع الرجلين فى الفتحة اللى تحت او خيطية بابرة و فتلة)- ضعي الحمام في ماءمغلى وبصلة صغيرة وأوراق اللورا و ملح و كمون. مع ملاحظة ان تكون الحلة كبيرة عشان لو الحلة صغيرة على الحمام ممكن رجلين الحمام يقطع الحمام اللى جنبه على النار-بعد ما يستوى نص سوا بنشيلة من الشوربة و نشوحة فى حلة تانية فيها ملعقة سمنة و الحبهان و المستكة ثم نصب عليهم الشوربه لحد ما الحمام يستوى -بعد السوى تشيلية بالراحة فى طبق لحد ما يبرد-ثم تحمرية فى مقلاية بها زيت و سمن

الارانب البانية
المقادير:
ارنب مقطع و مدعوك جيدا بالدقيق ثم يغسل جيدا بالماء _ بصله متوسطة _ملح و فلفل ناعم_2 فص مستكة و 2 فص حبهان _2 بيضة _بقسماط ناعم _زيت للقلى
الطريقة:
*ضعى ماء فى حلة مضاف له ملح و بعد ان يغلى الماء ضعى الارنب فى الحلة حتى تغلى الماء غلوة .نشيل الا رنب من الماء ونكب هذا الماء فى الحوض لانه بيكون زفر .نضع حلة على النار بها ملعقة سمن و2 فص مستكة و 2 فص حبهان لمدة ثانية و ريحتهم حتطلع اضع الارنب يادوب تشويحة ثم اصب علية ماء مغلى نظيف وبه بصلة مقطعه نصين و ملح و نتركة حتى يستوى و ذ لك بوضع بوز السكينة او شوكة اذا كان لحمه جامد يبقى لسه سيبيه لحد لما تلا قى لحمة طرى يعنى استوىطلعى الارنب من الشوربة وحطية فى طبق لحد ما يبرد خالص اضربى البيضتين كويس بالشوكة مع اضافة زرة ملح و فلفل اسود ناعم ضعى قطع اللا رنب فى البيض قطعة قطعة ثم على طول فى البقسماط *بعد ما تخلصى الكمية سخنى لزيت على النار ثم ضعى القطع الى ان يتحمر الوجه اقلبى بالشوكة على الوجه التانى يحمر برضه و بعدين تشيلية على ورق خاص بامتصاص الذائد من المادة الدهنية

كفتة الفـراخ
المقادير:
فرخة مسلوقة تقطع قطع صغيرة _حبة بطاطس كبيرة مسلوقة _بصلة متوسطة _3 فصوص ثوم _حزمة بقدونس _2بيضة _ملح – فلفل اسود ناعم _بقسماط _زيت للقلى .
الطريقة
تسلق الفرخة و تخلى تماما من العظم - تقطع قطع صغيرة تخلط جميع المقادير معاً جيداً فى الكبة- نبل ا يدينا بالماء حتى لا تلتصق بها العجينة اثناء العمل و نأخذ من خليط الفر خة المضروبة فى الكبة و نشكلها اصابع او اقراص مثل البورجر - نضع الأقراص فى البقسماط مباشرة بدون بيض لأن الكفتة بها بيض ثم نقليها فى الزيت و لما تحمر نشيلها على ورق ماص للمادة الدهنية

صينية دجاج بالخضار فى الفرن
المقادير:
فرخة مغسولة بالدقيق والملح ثم بالماء كويس _ عدد 3 حبات بطاطس _3 حبات بصل _ 3 حبات فلفل رومى _ملح _فلفل اسود ناعم _كمون _بهارات فراخ _كزبرة ناشفة _زيت
الطريقة:
قطعى البطاطس و البصل و الفلفل الرومى حلقات متوسطة ..اخلطى الملح و الفلفل و البهارات و الكمون و الكزبرة ..مع بعض ثم حطيهم على الفرخة و افضلى قلبيهم مع بعض كويس .. هاتى الصينية و ادهنيها كويس زيت ثم حطى شوية خضار ثم رصصى اجزاء الفراخ ثم ضعى باقى الخضار وو ضبى الخليط كدة بأيدك ثم ضعى حوالى 2 ملعقة زيت غطى الصينية بورق فويل و دخليها الفرن حوالى 1 ساعه او ازيد نص ساعة لحد ما تبصى عليها و تنغزى الفراخ بالسكينة تلا قيها استوت شيلى الفويل وسيبيها 5 دقايق يادوب تاخد لون من فوق و حيكون فيها شويه صوص

الدجاج البروست
المقادير:
دجاجة +بصل- ملح و قلقل و بهارات- ليمون- خل+دقيق+زيت للقلي
الطريقة:
نقطع الدجاجة 8 قطع و نعمل شقوق بالسكينة في كل قطعة نضرب البصل في الخلاط و نضيف له التوابل و الليمون و الخل ثم نتبل الدجاج و نحاول نضع التتبيلة في الشقوق اللي عملناها. نترك الدجاج المتبل في الثلاجة يوم كامل (كل ما تركت أطول كل ما شربت من التتبيلة اكتر و أنا مرة تبلتها و تركتها في الديب فريزر اسبوع و بعدين عملتها و كانت روعة!!) نضع الزيت الغزير على النار حتى يسخن و بعدين نغمس كل قطعة دجاج في الدقيق (بدون بيض) ثم نقلي القطع على نار متوسطة (لأنها لو حامية الدجاج يستوي من الخارج و ميستويش حلو من جوة و لو هادية حتاخد وقت كتير قوي انتي اتحكمي في النار احسن) تخرج ذهبية اللون و نضعها على مناديل ورقية لتمتص الزيت ثم تقدم مع السلطات و الخبز او المكرونة

الشيش طاووق
التتبيلة عبارة عن:
عصير ليمونة كبيرة _5 فصوص ثوم مقشرين و مهروسين _ نصف ملعقة صغيرة زنجبيل بودرة ملح و فلفل _ 2ملعقة كبيرة صلصة طماطم _ 2 ملعقة كبيرة زيت +صدور دجاج مخلية ( فيلية ) حسب عددكم . تقطعيهم مكعبات متساوية مقاس واحد
الطريقة:
تخلطى التتبيلة كلها و تحطيها على الدجاج و تسبيها فى التتبيلة مش اقل من 2 ساعات و ياريت لو تسيبيها طول الليل بعد كدة تدخلى قطع الدجاج فى العيدان و بين كل قطعتين قطعة بصل و قطعة فلفل رومى و قطعة طماطم و يا اما تشويهم على الشواية او تضعى فى مقلاية تيفال نقطتين ثلاثة زيت و تسويهم على الهادى قوى لحد ما يحمروا

الفراخ البانية
المقادير:
صدور فراخ مخلية __ ملح و فلفل _2بيضة مضروبة بالشوكة مع 1/2 كوب حليب _ بقسماط ناعم _ دقيق .
الطريقة:
تبلى الصدور باملح و الفلفل ثم ضعيها الاول فى الدقيق ثم تشيليها و تحطيها فى خليط البيض ثم فى البقسماط و تحطيهم جنب بعض فى طبق لحد ما تخلصى المقدار كلة و تسيبيه شوية بتاع 10 دقائق المهم فى مقلاية تضعى مقدار متساوى من السمن و الذيت لحد مايسخن ثم احمر الصدور عادى على الوشين بس تكون النار متوسطة .. لانها لو النار عالية حيتحرق الغلاف بسرعة و لو النار واطية ح تتشال الطبقة الخارجية و تسيب الصدور. فعلشان كدة خليها متوسطة و بعد ما يبقى لونها دهبى حلو تشيليها على الورق الماص المخصوص

فراخ بانية ( مطعم لارين )
نص كيلو صدور _2 كوب حليب _ملعقة بهارات _ملح _فلفل _2 ملعقة خل _ملعقة زيت زيتون _فصين ثوم
الطريقة :
يقلب المقدار جيدا ثم توضع فيها الفراخ وتترك ( كلما زادت مدة النقع تعطيها طراوة و طعم مميز .نجهز الغطاء الخارجى:كوب دقيق + كوب بقسماط ناعم + رشة ملح +رشة فلفل +ملعقة بهارات .ناخد شريحة من الفراخ و نضعها فى خليط الدقيق على طول ( بدون بيض ) و نحمرها فى زيت غزير الى ان تصبح زهبية اللون ,.

الفاهيتا
المقادير:
4 فلفلات رومى كبيرة _ 4 طماطماية كبيرة _ 2 معلقة كبيرة ذبادى _ 5 فصوص ثوم _ 1معلقة صغيرة كارى _ 1 بصلة كبيرة _ 2 معلقة خل _ ملح وفلفل +صدور فراخ مقطعة مكعبات مش صغيرة
الطريقة
تعمل بنفس طريقة الشاورما ماعدا( الفلفل و الطماطم )فى مقلاية تيفال كبيرة نضع قليل من الذيت ثم نرصص الفراخ الا ول داير مايدور المقلاية فى الطرف خالص ثم وراها على طول ترصصى الفلفل المقطع داير مايدور ثم نرصص الطماطم ورا الفلفل داير ما يدور فخلى بالك حيفضل فية مكان فاضى فى منتصف المقلاية نترك كلة لحد ما كلة يسخن و ينزل مايتة وطبعا كل واحد حيستوى و يشرب من ماء التانى اللى جانبه فحيبقى الطعم رائع المهم لما يشربوا الماء اللى حينزل خالص فى المنتصف فى الحتة اللى فاضية نطش الخل حيطلع دخان ثم نقلبهم بسرعة مرتين مع بعض و نطفى و نعمل السندوتشات
ملحوظة : مهمة قوى طريقة ترتيب المقلاية يعنى مش بنحط كلة على بعضة لآلآلآ ودة سر برضة

طاجن الحمام بالفريك
المقادير:
حمام مسلوق +الشوربة المتخلفة من سلق الحمام +سمن +كوب فريك
الطريقة :
طبعا حتكونى غسلة الفريك كويس .. تجيبى حلة صغيرة و تحطى فيها السمن و تحمرية شوية لحد ما تحسى ان كله اتبل بالسمنة
تروحى طشة علية شوربة الحمام و تسيبيةيغلى يعنى حوالى 10 دقائق ملحوظة ( لكل كوب فريك 2 كوب شوربة الحمام) و طبعا تظبطى الطعم هاتى طاجن فخار و ادهنية بالسمن وبعدين حطى نص مقدار الفريك فى الطاجن وروحى مرصصة الحمام بالراحة جنب بعض على الفريك حطى باقى مقدار الفريك فوق الحمام و افرشية علية كويس غطى الطاجن بورقة فويل و دخلية الفرن بس الفرن يكون متوسط خالص لحد ما يستوى و ذلك بانك تخدى شوية على طرف المعلقة تدوقية الاول سيحى على النار معلقتين سمن و خليهم يتقدحوا وبعدين صبيها على وش الطاجن دخلية تانى الفرن لحد ما بحمر وش الطاجن و حيبقى شكلة شهى

الحمام بالفريك ( طريقة أخرى)
مقادير:
لكل زوج حمام أستعمل كوب فريك منقوع نص ساعه+ ملعقه كبيره بصل مبشورومتبل بالملح والفلفل والبهارات + بقدونس مفري ونعناع
الطريقه : أضع في حله ملعقة زيت ذره وأشوح فيها الفريك والبصل وبعد كده أحط نص كوب ميه وأسيبها تستوي نص سوا وأضيف البقدونس والنعناع
أتبل الحمام ببصله مبشوره وملح وفلفل ..
أحشي الحمام بالفريك وبين الجلد والرقبه ولا أترك فراغ لأن الفريك مش هيزيد
ألف بالفويل كل واحده لوحدهاوأقفل عليها كويس
أرص الحمام ملاصق لبعضه في صينيه فيها شوية ميه وأدخلها الفرن حرارته فوق المتوسط لمدة ساعه
النتيجه رائعه .. حمام متحمر ومستوي وفي نفس الوقت سهل وخفيف ومناسب في العزايم
شرط نجاح الحمام حاجتين الاولى لازم تحطية اثناء السوى فى حلة كبيرة علشان لما الشوربة بتغلى الحمام بيتحرك فرجلية بتدخل فىالحمام اللى جنبة و بيقطعة فبيتشرم و يخرج الارز . تانى حاجة ما تمليهوش بالخلطة لانة بينفش و بيقطع الجلد لانة رقيق قوى يعنى بعد ما تحشى الحمامة بالارز امشى بايدك عليها خرجى الذيادة من فوق من عند الرقبة

الحمام الكولبست
المقادير:
الحمام العدد اللى انتى عيزاة _ ملح _ فلفل _ كمون _ سمن _ 2 بصلة كبيرة ._ليمونة كبيرة
الطريقة:
بعد غسل الحمام كويس نفتحة من ظهره بالطول بالسكينة نحضر مقلاية او صينية و نضعها على النار و نضع السمن نقطع البصل شرايح تخينة و نحمرها فى الزيت لحد لونها ما يبقى قريب للبنى نضع الحمام جنب بعض مع التوابل و نوطى النار حينزل شوية ماء نسيبه لما يشربها و يحمر فى السمن مع البصل و يبقى لونه بنى اضع قليل قليل من الماء لحد مايستوى خدى بالك ان الحمام حيستوى على طول مش حياخد وقت ولما تلاحظى انه خلاص على وشك بنعصر الليمون مع اخر رشة ماء و ننطفى النار بعد ما يستوى و نطلع الحمام بصوص خفيف مع البصل

البط
المقادير
عدد 3بصلات كبار+عدد 3 معالق كبيرة ارز+معلقة ملح صغيرة+ملعقة كبيرة كمون+نصف ملعقة صغيرة فلفل+2 ملعقة كبيرة سمن للحشو +سمن و زيت للتحمير للتشويح _ فصين مستكة _فصين حبهان .
الطريقة:
نضع حلة على النار فيها ماء و بصلة مقطوعة نصين و ملح و كمون لحد ما يغلي لعمل الحشوة:نخلط البصل بعد تقطيعه بالسكينة تقطيع كبير والارز والملح و الفلفل والكمون و السمن و الكبدة والقنصة المتقطعة صغير و ندعكهم كويس بايدنا نحشى البطة من الفتحة اللى تحت بالعرض بالخلطة بس ما املهاش قوى عشان الارز مايطلعش اخيط الفتحة بعد الحشو بخيط و فتلة نضع البطة في الحلة بعد ما غلي الماء لمدة ساعة او ساعة ونصف و بتعرفى السوى لما تنغزيها بالسكينة ما تطلعش دم و تلاقى لحمها طرى
حنشوحها زى ما عملنا قبل كدة فى الحمام و نطلعها من الشوربة و يا اما نحطها فى صينية و ندهن وش البطة بالسمن و ندخلها الفرن او نحمرها فى المقلاية بخليط من الزيت و السمن لحد ما تحمر

كوردن بلو
المقادير
نص كيلو صدور فراخ مخلية ( او حسب العدد المطلوب)+1.5ك دقيق _ 2 م ك نشا (كورن فلاور )+كوب و نص بقسماط _2 بيضة مضروبة بالشوكة +ملح _ فلفل _شرائح جبنة شيدر او جبنة موزاريلا +زيت للتحمير _ زيتون اسود او اخضر
الطريقة
تفتح صدور الدجاج بالطول بالسكينة بس ما تفصليهاش عن بعض يعنى تبقى ممسوكة من جنب واحد ،تفرد و توضع بين قطعتين من ورق البلاستك و تدق بالمدق بتاع البوفتيك حتى تصبح رفيعة. تتبل بالملح و الفلفل. تفرد كل شريحة دجاج على طبق مسطح. نضع شريحة جبن على نصف شريحة الدجاج ثم زيتون اسود ثم شريحة جبن أخرى. يقفل نصف شريحة الدجاج الآخر فوقهم يعنى كانك حشينى سندويتش و يضغط عليه عشان نتاكد انه اتقفل كويس. تكررنفس العملية مع باقي شرائح الدجاج. يوضع البيض المخفوق فى طبق. و نخلط الدقيق و النشا فى طبق لوحدهم و يوضع البقسماط فى طبق أخر. تمزج كل شريحة دجاج بالدقيق مع الضغط باليد لتلصق جيدا. ثم نضعه فى البيض المخفوق ثم فى البقسماط مع الضغط جيدا باليد. رصى بقى الدجاج بعد ما خلص و حطية حوالى نص ساعة فى الثلاجة .يسخن الزيت فى مقلاية كبيرة ثم يحمر الدجاج (الكوردون بلو) على الجانبين حتى يصبح ذهبى اللون. ليكى حرية الاختيار فى الحشو يعنى ممكن شريحة سلامى مع الجبنة و الزيتون وممكن بصل و فلفل رومى مع الجبنة و ممكن شرائح سوسبس.
سر فى عمل الكوردن بلو ..
علشان تخلية واسع من جوة ويطلع مفرغ من جوة زى بتاع برة السر هو: الخلطة اللى بتحطيها جواة (الزبد والجبنة والبقدونس والتوم) اولا تخلطيها مع بعض لحد ما تبقى عجينة متماسكة ..وبعدين تشكليها صوابع بالتخن اللى انتى عاوزاة وتحطيعا على شريحة الدجاج وتبرمى بكدة الشرائح ها تديكى نفس شكل صوابع الحشو.....

اسكالوب كوردون بلو
المقادير:
شرائح بفتيك بتلو ( العدد حسب الرغبة )،للحشو :علبة عش الغراب ( مشروم ) +قطع لحم مدخن +بصلة مبشورة _شريحة جبن موزاريلا او جودة او شيدر _ملح _ فلفل _ بهارات ، للتغطية :بيضة مضروبة _ دقيق _ بقسماط ناعم_ زيت للقلى
الطريقة :
نتبل البفتيك بالملح و الفلفل و البهارات و عصير البصلة .نفرد البفتيك و ندقة كويس بالمدق المخصوص بتاع اللحمة (عشان ما يكلكعش ويفضل مفرود ) ثم نضع على كل شريحة بفتيك شريحة لحم مدخن و عليها شريحة الجبنة و عليها شرائح المشروم ثم نضع عليهم شريحة تانية فوقهم من البفتيك ( يعنى كاننا بنغطيها ) ندق بقى على طروف البفتيك بالمدق علشان البفتيكة اللى فوق و البفتيكة اللى تحت يلزقوا فى بعض نضع قطعة البفتيك فى الدقيق من الناحيتين و بعدين تحطيها فى البيض و بعدين فى البقسماط نحمر البفتيك فى زيت غزير على نار هادية علشان يستوى

روستو الدجاج المخلى المحشو
المقادير
دجاجة كبيرة، حوالى 2 كيلوجرام أو أكثر +الحشوة +ربع كيلو لحمة مفرومة +بصلة كبيرة مبشورة +5 فصوص ثوم مفرومين
ملعقة كبيرة بقدونس مقطع صغير قوى +ملعقة صغيرة ملح _فلفل اسود+نصف ملعقة صغيرة من جنزبيل _ وجوزة الطيب_ وبهارات مطحونين+رشة قرفة +ملعقة سمن كبيرة +2-3 ملاعق كبيرة سمن، لدهان وش الفرخة من برة +قطعة ورق مفضض فويل تكفى لتلف بها الدجاجة
الطريقة:
تقطع الفرخة من الضهر بالطول و نخليها من العضم مع الإبقاء عليها قطعة واحدة كاملة ومفرودة. ( ممكن الفرارجى يعملهالك و انتى واقفة)تعجن مقادير الحشوة كلها مع بعض و تحطيهم فى وسط الدجاجة المفرودة و بعدين تلفى الدجاجة على الحشو كويس و تخيطى الفرخة ادهنى الدجاجة بالسمن وملح وفلفل و بهارات،وتلفيها كويس بالورق الفويل. وتوضع فى طبق بايركس او صينية
دخليها فى فرن حار لمدة ساعة. اطفى الفرن وشغلى الشواية على الدرجة الهادئة، وافتحى الورق من على وجه الدجاجة حتى تحمر (حوالى نصف ساعة) او لو مفيش شواية خليها فى الفرن و افتحى الورق من على وجة الدجاجة لحد ما تحمر برضة
طريقةالتقديم: بعد ما تبرد تقطع حلقات بسمك حوالى 2 سم، زى حلقات السويسرول بس بسكينة تكون حامية عندما تبرد تماما
ملحوظة: ممكن تحشيها بدل الحشوة السابقة بتشكيلة من الخضروات .

صينية الفراخ بالزبادى
المقادير:
فرخة نظيفة و مغسولة و مفتوحة من الظهر بالسكينة بالطول ملح ، فلفل ، بهارات ، عصير ليمونة ، 3 فص ثوم مهروس ، معلقة خل ابيض ، 2 زبادى صغير جهينة او اى نوع عندك ( ولوعندك بودرة ثوم ، و بودرة بصل يبقى تمام تحطى ربع معلقة من كل نوع ) معلقة زيت كبيرة
الطريقة :
اضربى الزبادى خفيف بالشوكة و حطى عليه كل المقادير ،ضعى كل الخليط على الفرخة و ادعكيها بيهم كويس ،ياريت لو تسبيها من بليل عادى فى الثلاجة او ممكن تسيبيها ساعتين بس وممكن تعمليها على طول،ممكن تشويها على الشواية و ممكن تحطيها فى صينية فى الفرن

الدجاج النجرسكو
المقادير:
دجاجة روستو +كيس مكرونة مسلوقة (نص كيلو)+3 معالق كبيرة جبنة رومى مبشورة +بشاميل (حوالى كوب )+معلقة زبدة للوجة
الطريقة :
قطعى الدجاجة الى اربع ارباع و شيلى منها العضم ،اسلقى كيس المكرونة فى ماء وملح عادى و اشطفيها و صفيها من الماء ، اخلطى المكرونة مع البشاميل كويس ،نضع قطع الدجاج فى صينية الفرن او صينية بايركس جنب بعض ،نضع عليها المكرونة اللى بالبشاميل ( يعنى غطى بيها الفراخ ) ،رشى الوش بالجبنة الرومى المبشورة و بعدين وزعى معلقة الزبدة ،دخليها الفرن

الدجاج الروستو
المقادير:
دجاجة +معلقتين زيت - معلقتين زبدة +ملح - فلفل - بصلة
الطريقة :
حتغسلى الفرخة عادى بالملح و الدقيق و تغسليها كويس تتبليها بالملح و الفلفل و عصير بصل ضعى الزيت و الزبدة على النار و شوحى فيهم الفرخة دخليها الفرن لحد ما تستوى 3/4 سوى وكدة حتكون جاهزة اننا نعمل بيها النيجرسكو

الفراخ المحشية
المقادير:
فرخة حوالى كيلو ونص+او فية فراخ مخصوصة للحشو+كوب ارز مصرى او ارز طويل الحبة+ملح – فلفل اسود – بهارات دجاج – كمون – اقل من ربع معلقة زنجبيل بودرة – معلقة خل – معلقة عصير ليمون – معلقة زيت زيتون - فص ثوم +صلة كبيرة - من ربع لنص كيلو لحمة مفرومة - خلة خشب او ابرة و فتلة +ورقة فويل
الطريقة
نغسل الدجاجة و نضفها بالطريقة العادية و نعمل بالسكينة فيها عدة شقوق عند الصدر- نخلط كل المقادير اللى باللون الاحمر مع بعض - ونتبل بيهم الفرخة كويس جدا بالدعك الجيد - نتركها فى التلاجة حوالى ساعتين عشان تمسك فيها التتبيلة ولحمها يشربها و تبقى طعمها احلى - نجهز الحشو : نغسل الارز و وننقعة لمدة نصف ساعه تقريباً - وفي هذا الأثناء نضع ماء يغلي بالملح.وإذا غلى الماء ضعي الأرز وسيبية يطبخ لحد ما يبقى نص سوى بس أهم حاجة مايكونش مستوى تماماً - ثم تقومي بتصفيته بالمصفاة وتتركيه جانباً-نحمي قليل من زيت في المقلاية ثم نضع البصلة المبشورة لحد ما تزبل وحتى يصبح لونها ذهبي تضيفي اللحم المفروم وبعد تغير لون اللحم تضعي البهارات والملح وتتركيه حتى يستوى و يتعصج اللحم وتضيفي ورقة واحدة غار و تقلبيى كلة .الآن جهز اللحم - ضعي عليه الأرز وحركيهم مع بعض وبكدة تكون الحشوة جاهزة والآن تحشي الفرخةو تحاولي تمليها تماماً - ثم تغلقيها أو تخيطيها حسب ماانتى عاوزة وتضعيها في الصينية ثم تدخليها في الفرن و تغطى وش الصينية بورقة فويل على درجة 180 يعنى متوسط الحرارة لمدة من ساعة و نص لساعتان - وممكن تحطى تشكيلة من الخضروات فى قاع الصينية تحت و حوالين الفرخى (بطاطس – بسلة – جزر) - وممكن تحطى الفرخة فى كيس حرارى و تخرمية بالشوكة كام خرم و ترششية الاول رشة دقيق و بعدين تقفلية بالرباط المخصوص بتاعة و تحطية فى صينية فى الفرن
ملحوظة: خلى بالك اثناء سلق الارز نص سلقة ان الارز المصرى بيستوى بسرعة اسرع من الامريكى او البسمتى - بعد ماتستوى الفرخة تشيلى الورقة الفويل من عليها و تدخليها تانى الفرن عشان وشها يحمر و بالهنا و الشفا

طريقة عمل المرتديللا
المقادير:
1 كيلو صدور دجاج +حوالي نصف كوب زيتون أسود وأخضر قطع صغيره ( إختياري )+2 ملعقه كبيره توم مفروم+ملح وفلفل أ سود وبهارات
الطريقه
نفرم الدجاج مع التوم والملح والفلفل والبهارات ..مرتين بالمفرمه ،نعجن ونضيف الزيتون للعجن نشكل العجينه كأسطوانه ونلفها بورق الفويل نسلق الأسطوانه الملفوفه في ماء مغلي مضاف إليه ملح وفلفل و بصله مقطعه وفصين مستكه وحبهان وربع كوب خل نتركها علي نار متوسطه حوالي ساعه ننزع ورق الفويل عنها وننشفها من الماء بورق المطبخ نعيد لفها بالفويل ونتركها في التلاجه لحفظها عمل مرتديللا اللحم بنفس الطريقة نستبدل كيلو الدجاج بكيلو لحم أحمر مفروم

الدجاج بصلصه الصويا
المقادير:
فرخة +بصله مبشوره +مقدار من الملح +مقدرا من الفلفل +والقليل من الخل
الطريقة:
أولا بعد تنظيف قطع الدجاج وتقطيعها يعني فصل الاوراك عن الصدور ثم نقوم بتتبيل قطع الدجاج بها ونضعهم في حلة الضغط الباخاري أو البرستوا ونقوم بإشعال النار عليها من دون أن نغطي الحله أو القدر الموقد على المنتصف يعني درجه حراره عاليه
المهم بعد أن تري بخار الماء يتصاعد قومي بإضافه صلصه الصويا على الدجاج على كل قطعه على حدا ثم أغلقي الحله وإتركيها على نار هادئه جدا لمده ربع ساعه ثم زيدي من درجه الحراره لمده ربع ساعه أخرى المهم الى أن تتبخر كميه المياه التي تنزل من الدجاجه كلها ولا يتبقى الى القليل من الماء ارفعيها وضعيها في صينيه وضعي ماءها عليها واتركيه افي الفرن في الشوايه الي ان تحمر واجهتها وانعمي بطعم رائع للدجاج

الفراخ بالمايونيز
المقادير:
فرخة مسلوقة+تقريبا نص كوب مايونيز او كوب حسب حجم الفرخة+بصلة متوسطة
الطريقة
بعد ما تسلقى الفرخة و تطلعيها من الحلة و تسبيها تبرد، اخليها من العضم ،ويا اما تقطعبها قطع صغيرة (يعنى تنسليها)،يا اما تقطعى مثلا الصدر على اتنين و الورك على اتنين ،ابشرى البصلة و حطيها على الفراخ واخلطيهم وبعدين حطى نص المايونيز معاهم و اخلطيهم وقدميها فى الطبق مع شرايح طماطم و شرايح ليمون وممكن شوية بقدونس مفرومين بالسكينة

الديك الرومي
المقادير:
ديك رومي وزن من 4الي 6 كيلو+ربع كيلو لحمه مفرومه أو مقطعه بسكين إلي قطع صغيره+كوب من الصنوبر علي لوز (محمر)+بصله مبشوره+3 كوب رز+ملح - فلفل أسود - بهار – قرفه+ملعقه كبيره صلصه + ملعقه كبيره زبده
الطريقه
نتبل الديك الرومي بالملح والفلفل والبهار وعصير برتقاله ونتركه في التلاجه لتاني يوم نضع ملعقة سكر في كسروله علي النار إلي أن تسيح ويتغير لونها للون البني الفاتح .. نضيف عليها 3 كوب ماء أو شوربه + ملح وفلفل أسود وبهار وقرفه لنستعملها في تسوية الرز ، نقلي اللحمه المفرومه بالزبده ونتبلها بالملح والفلفل والبهار .. نضيف الصنوبر واللوز المقلي نحمر الرز بربع كوب زيت علي سمن .. ونضيف له اللحمه المفرومه مع المكسرات ..ونقلب نضع الشوربه .. ونتركه علي النار حتي يتشرب .. ونسويه نصف تسويه نسلق الديك الرومي في حله واسعه نصف تسويه أيضا ..مع إضافة المستكه والحبهان ثم نرفعه من الشوربه ونتركه يبرد قليلا ..نتبله ببصله مبشوره ومدعوكه بالملح والفلفل والبهار نحشي الديك الرومي بالرز ثم ندهنه بملعقة صلصه عليها ملعقة زبده ..نلفه بورق ألمنيوم ندخله فرن ساخن حوالي ساعتين حتي يتم تسويته بالكامل ويكتسب اللون الوردي الجميل يوضع في سرفيس ونضع تحته فرشه من الرز بالخلطه والمكسرات المحمره ممكن حشو الديك الرومي بدون سلقه ولفه بورق ألمنيوم .. ووضعه في الفرن .. في الحاله دي ممكن يستوي .. لكن لحمه بينشف شويه .. وخصوصا لو كان من النوع البلدي

صينية الفراخ بالكاتشب
المقادير:
فرخة حوالى كيلو ونص+3 بصلات متوسطة شرائح+4 معالق كبيرة كاتشب+نص ليمونة كبيرة +معلقة خل – ملح – فلفل – زيت – بهارات – فصين ثوم
الطريقة
نغسل الفرخة و نقطعها من ضهرها بالطول بالسكينة ندعك الفرخة بالملح والفلفل والبهارات والثوم والليمون والخل ونتركها ساعة فى التتبيلة بعد ساعة نشيلها من التتبيلة وندهنها بالكاتشب بالفرشاة كويس ندهن صينية بالزيت ونضع فيها الفرخة ونضع عليها معلقة زيت ونغطيها بورقة فويل وندخلها فرن متوسط الحرارة لحد ما تستوى وبعدين نشيل الورقة ونخليها تحمر

الاجنحة بالسمسم
المقادير:
اجنحة متجمعة او كيلو اجنحة+معلقة طحينة+ربع كوب سمسم+بصلة مبشورة+ملح و فلفل و ربع معلقة بودرة زنجبيل+بيضة
بقسماط ناعم
الطريقة
اغسلى الاجنحة و شيلى الجزء الرفيع اللى فيها اخلطى الطحينة و البصلة و الملح ضعى كل البهارات على الاجنحة وادعكيها كويس ضعى خليط الطحينة على الاجنحة وسيبيها ساعتين ثلاثة ضعى السمسم على البقسماط واخلطيهم شيلى الاجنحة من التتبيلة وحطيها فى البيض المضروب ثم فى البقسماط ضعى الزيت على النار لحد ما يسخن حمرى فية الاجنحة وطلعيها على ورق ماص الدهون

قالب الاجنحة
المقادير:
كيلو اجنحة+3 بصلات كبيرة +نص كوب عصير ليمون+3 معلقة كبيرة خل+3 معالق زيت زيتون+فصين ثوم مهروسين+ملح و فلفل و معلقة بودرة فلفل احمر و بهارات فراخ+معلقتين زيت
الطريقة:
اغسلى الاجنحة و شيلى الجزء الرفيع اللى فيها تبليها بالملح و البهارات و الخل وعصير الليمون لمدة ساعتين ثلاثة نضع معلقتين الزيت على النار يسخنوا نحمر البصل و الثوم ثم نضع الاجنحة يتحمروا ونسيبهم على النار حوالى ربع ساعة ضعى الاجنحة فى طبق بايركس ونضع زيت الزيتون عليهم و معلقة بودرة الفلفل الاحمر غطيها بورق فويل ودخليها الفرن حوالى ربع ساعة

طرق لعمل الدجاج البروستيد
الطريقة الاولى:
المقادير:
دجاج على حسب الرغبة(من ناحية الكمية)+2 مكعب ماجي وممكن أكثر تبعا للكمية المعدة نذوبها في ماء ساخن+دقيق.بيض.بقسماط
الطريقة:
نغسل الدجاج ونفركه بالدقيق والملح ونشطفه(الغرض ازالة الزفر)-نقطعة اوصال(صدر -فخذ-.....)-نسلقه على النار.-نغمسه في الماجي حتى يتشبع بالنكهة- نغمسه في الدقيق ثم البيض ثم البقسماط.......ونقليه في زيت غزير وحار حتى يحمر

الطريقة الثانية
المقادير:
2 دجاجة مقطعة أربع أو ثمان أجزاء، للنقع:3 بيض+1 علبة حليب مركز ( مبخر)+1 مكعب ماجي مذاب في قليل من الماء الحار+3 فص ثوم مهروس+فلفل أسود ناعم ( قليل)+ملح +2/1 ملعقة صغيرة بايكنج باودر
للتغليف:دقيق أبيض + ذرة ملح + ذرة بهار +زيت عميق للقلي
الطريقة
نضع قطع الدجاج في وعاء -- نخلط مقادير النقع في الخلاط ثم نصبها على قطع الدجاج ونتركها 10 دقائق أو أكثر- في كيس نايلون نخلط الدقيق والملح والبهار - نرفع قطع الدجاج من السائل ونضعها في كيس الدقيق - نرج كيس الدقيق حتى تتغطى قطع الدجاج بالدقيق نرفع قطع الدجاج من الدقيق ونضعها في الزيت الحار
الطريقة الثالثة
دجاج مقطع ينقع في طاسة فيها ماء مع ملعقة كبيرة ملح لكل دجاجة ملعقة كبيرة ملح والماء يغطي الدجاجة وتترك في الثلاجة لمدة ساعتين بعد ذلك نصفيها من الماء ثم نغمسها في البيض المخفوق ونغلفها بخلطة البروست من كنور الحراق ماركة ونقليها في الزيت لمدة عشر دقائق وتذوقي البروستد المقرمش الحار اللذيذ.

فراخ بالطماطم والزيتون الاخضر
المقادير:
فرخة نضيفة ومقطعة ارباع+2 معلقة زبدة+3 معالق صلصة طماطم مخلوطة بكوب ماء+بصلة كبيرة مفرومة+معلقة مستردة
ملح وفلفل +3 معالق كبيرة زيتون اخضر+2 طماطم مقطعة ارباع صغيرة+2 فلفلة خضراء مقطعة ارباع صغيرة
الطريقة
حمرى فى معلقة زبدة ارباع الفراخ لحد ما تخليها دهبى اضع الفراخ بعد التحمير فى طبق فرن ،فى معلقة الزبدة التانية احمر البصل لحد ما يصفر ثم اضع الفلفل واقلبهم ثوانى اضع الطماطم و الزيتون و المستردة ثم كوب الصلصة وملح وفلفل لمدة 5 دقائق ثم اصب الخليط على وش الفراخ اغطى الصينية بورق فويل واضعة فى الفرن لمدة ساعة ونص لحد ما تستوى الفراخ ويحمر الوش

الفراخ بالكسبرة الخضراء
المقادير:
فرخة حوالى كيلو ونص+1/2 كوب زيت+3 بصلات كبيرة+1/4 كوب عصير ليمون+1/4 كوب خل+3 معالق زبدة+1/2 كوب كسبرة خضراء+ملح – فلفل – معلقة بهارات فراخ+معلقة زعتر
الطريقة
نقطع الفرخة الى اربع ارباع نتبل الفرخة بالخل و الزعتر و الملح والفلفل والبهارات ونتركها من نص ساعة لساعة نضع الزيت على النار يسخن و نحمر فية الفراخ نضع الزبدة على النار تدوب ونضع عليها الكسبرة و البصل المفروم و عصير الليمون ونتركهم حوالى ربع ساعة نضع الفراخ فى طبق فرن و نصب عليها الخلطة اللى عملناها وندخلها فرن متوسط الحرارة حوالى نص ساعة

فراخ مشوية بالجنزبيل
المقادير:
فرخة حوالى كيلو ونص+2 فص توم مهروسين+نص معلقة جنزبيل بودرة+نص كوب زبادى+ربع كوب زيت زيتون+نص معلقة صغيرة زعتر مطحون+ملح
الطريقة
نقطع الفرخة من الضهر بالسكينة بالطول ونعمل اخرام فى لحم الدجاجة نتبلها بالزبادى والثوم و الزعتر و الجنزبيل و الملح وزيت الزيتون وندعكها كويس بالتتبيلة ونتركها من بليل للصبح او لمدة لاتقل عن ساعتين نضع الفرخة فى الشواية او على حديدة الفرن وتشوى

أصابع او كرات او اقراص الديك الرومى المقليه
المقادير:
نص كيلو صدر ديك رومى+ بصلة مفرومة+معلقة كبيرة كسبرة خضراء مفرومة+كوب عيش فينو مفروم فى الكبة+2 معلقة زيت زيتون+نص معلقة صغيرة جنزبيل بودرة+ ملح وفلفل ابيض +زيت للتحمير
الطريقة:
نقطع صدر الديك الى قطع متوسطة نضع البصله على قطع صدر الديك و الثوم والكسبرة و العيش المفروم والملح و الفلفل و الجنزبيل ونخلطهم وبعدين نحطهم فى المفرمة لحد ما تنعم خالص يعنى افرميها مرتين ورا بعض شكلى المقدار اللى عندك على هيئة كور او اصابع او اقراص و بططيها وحمريها فى الزيت لحد ما تحمر

الديك الرومى المشوى
المقادير:
كيلو صدر ديك رومى مخلى +2 كوب زبادى +نص راس ثوم مهروس+معلقة صغيرة كارى+معلقة صغيرة جنزبيل بودرة+ معلقة صغيرة كركم+ملح وفلفل +3/4 كوب زيت زيتون
الطريقة
قطعى صدر الديك الرومى الى مكعبات متساوية متوسطة ،اخلطى الزبادى بالثوم بزيت الزيتون بالكارى بالكركم بالملح وباقى التوابل كويس،انقعى قطع الصدر فى الخليط اللى عملناه من بليل او لمدة لاتقل عن ساعتين ،تنغز الصدور فى الاسياخ وتشوى

كفته الديك الرومى
المقادير:
كيلو صدر ديك رومى مخلى +بصلة +ملح و فلفل و كمون +كوب ورق بقدونس+نص كوب زيت زيتون+بيضة مضروبة+نص كوب بقسماط ناعم
الطريقة :
اغسلى صدر الديك وادعكيه بالخل والدقيق كويس ،قطعى صدر الديك الى مربعات قد قطع اللحم الكباب حله افرمى البصلة وافرمى البقدونس ضعى البصلة و البقدونس و البقسماط والتوابل على قطع الديك الرومى ثم نضع كله فى المفرمه ونفرمهم ناعم .ثم نضع البيضة المضروبة للكفته ونخلطهم كويس نعمل الكفتة اصابع ويا اما تضعيها فى اسياخ الشوى ونشويها او نضعها فى صينية وندخلها الفرن لحد ما تستوى وتحمر

فيلية الديك الرومى المخلى
المقادير:
نص كيلو صدر ديك رومى مخلى +4 بصلات شرائح +ملح – فلفل+2 معلقة زيت زيتون+1 فلفلة رومى خضراء مفرومة +1 فلفلة رومى حمراء مفرومة+معلقة صغيرة كركم +بهارات فراخ
الطريقة
قطعى الصدور قطع زى كباب الحلة ضعى الزيت فى المقلاية وشوحية ثم ضعى علية الفلفل الرومى وشوحية ثم ضعى قطع الديك الرومى وشوحيها مع البصلة و الفلفل . ثم ضعى الملح والفلفل و الكركم والبهارات ضعى قليل من الماء ( ساخن) وغطية وكل شوية تقلبى وتزودى شوية ماء لحد ما يستوى تغرفية فى طبق التقديم على طول وهو سخن

يخنى الدجاج بالطماطم والكريمه
المقادير:
2 ملعقه كبيرة زيت - 2 ملعقه كبيره زبدة- علبة عيش غراب - 2/1 كيلو قطع دجاج - 2 بصله مقطعه -ثوم - طماطم - كوب شوربة - كوب كريمه -بقدونس - زعتر اخضر
الطريقة
ناخذ نصف مقدار الزيت مع ثلث مقدار الذبدة فى مقلاية ثم يضاف عيش الغراب ويشوح على النار حتى يطرى ويصبح ذهبى اللون نخرج عيش الغراب من المقلاية بالمقصوصه نضيف الكميه المتبقيه من الزيت للمقلاية مع قليلمن الزبد ونحمر فيها الفراخ على نار عاليه حتى يصبح جلدها ذهبى وهش نضيف اخر كميه من الزبد ويضاف البصل والثوم ونشوح على نار متوسطه الى حوالى 3 دقائق او حتى يصبحان طريان ثم نصب الطماطم والشوربة والكريمه نعيد وضع عيش الغراب والدجاج فى المقلاية وتترك تغلى على نارهادئه حوالى ثلث ساعةنضيف البقدونس والزعتر ويتبل اليخنى بالملح والفلفل ويترك يغلى على نار هادئه مده 5 دقائق قبل تقديمه

فراخ سريعة بالجبنة
المقادير:
فرخة مخلية- 3/4 كوب جبنة سائلة(سبرد) -فلفلة خضراء رومى+جزرة -2 بصلة -زيت -ملح – فلفل – بهارات فراخ
الطريقة
يقطع الدجاج الى قطع مربعة ويقطع البصل شرايح والفلفلة الى حلقات ونبشرالجزر نضع الزيت على النار مع شرايح البصل وقلبيه لحد ما يدبل ويصفر ثم نضع الفراخ ونقوم بتقليبها كويس وغطى الحلة وتقضلى كل شوية تقلبيهم لحد ما الفراخ تستوى ثم ضعى التوابل والملح ثم نضعها في صينية ويضاف اليها الجبنة ونضع فوقه الفلفلة والجزر ويغطى بورقة فويل ويوضع في فرن متوسط الحرارة من نصف ساعة لساعة الا ربع وبعدين نشيل الفويل لحد ما الوش ياخد لون

اشكال كفتة الدجاج
المقادير:
فرخة 2 كيلو - بصلة كبيرة - نص حزمة بقدونس - ملح – فلفل بهارات – كمون – رغيف فينو +بيضة – بقسماط – بياض بيضة – زيت – ورق نايلون كبير – اشكال تقطيع البسكوت
الطريقة
نسلق الفرخة ونخليها من العضم نقطع الفرخة قطع صغيرة بالسكينة نفرم البقدونس ونفرم البصلة نبل العيش لحد ما يطرى خالص ونصفية بأيدنا من الماء كويس نضع البصل و البقدونس والملح والفلفل والبهارات و الكمون و البيضة والعيش على الفراخ ونخلطهم كويس ونضربهم فى الكبة ضربة واحدة علشان تبقى خشنة شوية نفرد الكيس النايلون امامنا على الرخامة ونضع علية العجينة ونفردها بايدنا شوية تبقى متوسطة التخانة .نجيب القطاعات البلاستيك بتاعة البسكوت ونغمسها فى الدقيق ثم نقطع بها اشكال من العجينة لحد ما يتكون عندك اشكال مختلفة , نغمس وحدات الكفتة فى بياض البيض المضروب و بعدين فى البقسماط ثم نضعها في صينية فى الثلاجة لمدة ساعتين لحد ما تمسك نفسها وتجمد شوية نحمرها فى الزيت ونشيلها على الورق الماص للدهون

صينية البذنجان بالفراخ
المقادير:
فرخة مسلوقة ومقطعه إلى قطع صغيرة. +3 بصلات مقطعة قطع صغيرة+فلفلتين رومى مقطعة قطع صغيرة.+جزرتين مبشورين.+كيلو بذنجان مقلي .+فصين ثوم+كوب صغير جبنة سبرد +علبة قشطة+ملح وفلفل و بهارات.
الطريقة:
نحمر البصل في معلقتين زيت مع فصين ثوم ثم يضاف الدجاج إلى البصل المحمر والملح والفلفل والبهارات مع التقليب .ثم يضاف الفلفل الرومى والجزر ونستمر في التقليب لحد ما يذبل الفلفل والجزر .ثم يوضع نصف الخليط في صينية وبعدها نضع طبقة من البزنجان المقلى بحيث يغطى الوجه تماماً بالباذنجان المقلي ثم يضاف علية باقي الخليط الأول .نضرب بالمضرب علبة القشطة والجبنة ونخلطهم كويس ثم يغطى بهذه الخلطة وش الصينية وندخلها الفرن لحد ما الوش يحمر

المسخن الفلسطيني
المقادير:
خبز عربي ابيض+1 دجاجه مسلوقه ومقطعه شرائح+2 كوب بصل شرائح+3 ملعقه اكل سماق+3/1 كوب زيت زيتزن+2/1 كوب صنوبر محمص + ملح دارسين+ فلفل اسود+زيت للقلي
الطريقه:
يحمر كوب واحد من البصل في زيت ساخن ثم يصفي._ يقلب باقي البصل علي النار حتي يذبل ثم يضاف اليه زيت الزيتون والدجاج ونصف كمية الصنوبر ويقلب علي نار هادئه ثم يتبل بالملح والفلفل الاسود والدارسين ثم يضاف اليه السماق ويخلط. يقسم رغيف الخبز الي قرصين ثم يمسح بقليل من زيت الزيتون ويوضع مقدار من الحشوه ثم يطوي علي شكل اسطوانه وتقسم الي جزأين. تصف رولات المسخن في طبق التقديم وتزين بالبصل المحمر والصنوبر .

صينية البطاطس بالفراخ والسماق
المقادير:
فرخة مسلوقة+كيلو بطاطس +2 ملعقة كبيرة سماق+ملح وفلفل +شوربة الفرخة+معلقة زيت
الطريقة
اسلقى الفرخة واخليها من العظم والجلد وقطعيها قطع متوسطة ضعى عليها الملح والفلفل والسماق واخلطيهم كويس قشرى البطاطس وقطعيها حلقات رفيعة هاتى طبق فرن ورصصى البطاطس فى القعر ثم ضعى فوق البطاطس الفراخ ومعلقة صغيرة زيت ثم ضعى شوربة الفراخ عليهم فى الصينية لحد ما تغطيهم ضعى الصينية فى فرن متوسط الحرارة لحد ما تتشرب الشوربة
تحمر وش الفراخ

دجاج محشى بحشوة جديدة
المقادير:
فرخة صغيرة (كيلو)+ربع كيلو مشروم+بصلة كبيرة مفرومة+معلقة صلصة كبيرة+لبابة رغيف عيش فينو+معلقة بقدونس مفرى
بيضة مضروبة+ملح وفلفل
الطريقة
اخلطى كل المقادير مع بعض احشى الدجاجة بالخليط دة ادهنى الدجاجة من برة بقطعة زبدة صغيرة جدا ضعى الدجاجة فى ورقة فويل ولفيها كويس ضعى الدجاجة فى فرن حامى لحد ماتستوى حوالى ساعة وبعدين افتحى الفويل علشان تحمر الفرخة

الدجاج بالجزر والكرفس
المقادير:
4 صدور دجاج+بصلة متوسطة+4 عيدان كرفس+4 جزرات+كوب ونص شوربة دجاج+ملح وفلفل
الطريقة
نقطع البصلة حاقات كبيرة ونقطع عيدان الكرفس قطع كبيرة نقشر الجزر ونقطعة قطع كبيرة نضع نص كمية الخضار فى صينية
ونرصص فوقها قطع الدجاج ثم نضع باقى كمية الخضار فوق الدجاج نرش عليهم الملح والفلفل ونصب الشوربه نضع الصينية على النار لحد ماتغلى ونشيل الريم اللى حيظهر نغطى الصينية ونضعها فى فرن متوسط الحرارة لحد ما يستوى حوالى ساعة
ملحوظة : ممكن استخدام الدجاج بعظمة بس منزوع الجلد

طاجن الدجاج بالحمص
المقادير:
فرخة حوالى 2 كيلو+بصلة كبيرة+معلقة صغيرة جنزبيل بودرة+كوب حمص+كوب عصير طماطم+ملح وفلفل - زرة بيكربونات+نص كوب زيت زيتون+كوب كسبرة خضراء مفرومة صغير
الطريقة:
تقطع الفرخة الى اربع ارباع انقعى الحمص من بليل لحد الصبح و الصبح اشطفية من الماء اللى كان منقوع فيها اسلقى الحمص فى ماء مغلى مع زرة البيكربونات.لحد ما يستوى وبعدين شيلية من الماء واشطفية وضعية فى المصفاة ضعى زيت الزيتون فى مقلاية مع البصلة المفرومة لحد ما تصفر نضع الدجاج على البصل تقليبه ثم ضعى عصير الطماطم و التوابل و كوب ماء ساخن
ونتركه لحد ما الفراخ تقرب تستوى نضع عليها الكسبرة الخضراء ثم نضع الحمص لحد ما يغلو غلوة ويكون فية صوص بكمية مناسبة نضع الخليط كله فى طاجن فرن ونضع على الوحه حلقات الطماطم وندخلها الفرن لحد الوحه مايحمر

طاجن الدجاج بحمص الشام
المقادير:
2 ملعقه مائده زبد - 1 بصله مقطعه - ثوم - 1 ثمره جزر مقطعه قطع صغيره - 2/1 عود كرفس مقطع قطع صغيره - 2/1 كيلو دجاج مقطع - 1 ملعقه خل - 1 كوب مرقه - 2 ملعقه مائده عصير ليمون - 2/1 كوب بقسماط - 2/1 كيلو حمص شام مسلوق ومصفى - 4/1 كيلو عيش غراب صغير الحجم - 2 ملعقه مائده نعناع مقطع - بقدونس مفروم
الطريقة:
نشوح البصل فى الزبد حتى يطرى بنضيف الثوم والجزر والكرفس ونشوح على نار هادئه 5 دقائق ثم نخرج المكونات من الاناء ونضعها جانبا نذيب الكميه الباقيه من الزبد فى الاناء ونحمر قطع الدجاج فوق نار عاليه نعيد جميع قطع الدجاج الى الاناء بالاضافه الى خليط الكرفس نضيف الخل ونقلب جيدا نضيف المرقه وعصير الليمون يترك على نار هادئه مده ساعه نضيف حمص الشام و عيش الغراب نحكم غطاء الاناء ويترك اليخنى يغلى على نار هادئه 15 دقيقه يقدم بعد نتر اوراق النعناع والبقدونس على الوجه

افخاذ الدجاج المحشوة
المقادير:
10 افخاذ دجاج+جزرتان+عودان من الكرفس العود و ليس الورق+قرع مقطع+نصف اصبع الزبدة+كريما+2م ص الخردل
الطريقة:
انزعى العظام عن لحم الفخد مع ابقاء الجلد قطعى الجزر و الكرفس و القرع الى قضبان رفيعة طول ****** 10سم .ثم اختارى ثلاثة قضبان من كل صنف و ادخليها الى افخاذ الدجاج المجوفة فى وسطها.سخنى الزبدة فى مقلاة كبيرة ثم اضيفى الدجاج. و اقليها من كل جوانبها حتى تسمر خففى درجة الحرارة و اتركى الدجاج ينضج لمدة 10 دقائق ثم ارفعيها عن النار و اتركيها ساخنة .اضيفى الكريما و الخردل الى المقلاة و اتركى المزيج يغلى. بعد ذلك خففى درجة الحرارة و اتركى المزيج ينضج و هو مكشوف لمدة 3 دقائق حتى يتكثف قليلاً . صبى الصلصة فوق الدجاج قبل تقديمه .

دجاج مغربى بالليمون والزيتون
المقادير:
دجاجة مقطعة مع عظمها وجلدها +فلفل اسود+1 م ص زنجبيل بودرة+2 ملاعق كبيرة زيت زيتون+3 ملاعق كبيرة زبدة+ بصلة كبيرة مقطعة نصفين+2 سن ثوم+ نص ملعقة زعفران+حزمة كزبرة +3 ونص كوب ماء+واحد ليمونة مخللة مقطعة+10 حبات زيتون
الطريقة:
نحط الدجاج فى قدر ونضيف الملح والفلفل والزنجبيل والزيت والزبدة والبصل والثوم والزعفران والكزبرة والماء ونخليه يغلى مدة ساعة ونقلبه خلالها مرتين بس ارفعى الدجاج فقط ونحمره شويه بالسمن ونحطه جانبا الثوم والبصل اللى فى المرق فى خلاط واطحنيه بعدين رجعيه للقدر ونضيف الليمون المخلل والزيتون وخليه يغلى على النار رتبى الدجاج بطبق وصبى المرقه فوقه
ثالثا (( قسم الشوربات))
شوربة الخرشوف
المقادير:
4 عدد خرشوف مجمد +4 كوب شوربه دجاج أو لحم +1 ملعقة دقيق+1 ملغقة زبده+1 كوب كريمه لباني+عصير ليمونه
الطريقه
نذيب الزبده ونقلب الدقيق قليلا بدون أن يتغير لونه نضيف الشوربه ونتركها تغلي .. ويراعي أن تكون مصفاه جيدا نضيف الخرشوف بعد تقطيعه مكعبات صغيره .. ونتركه يستوي لدقائق نضيف الكريمه وبمجرد غلوه واحده و نطفئ النار ونضع عصير الليمونه

شوربة الفراخ بالكريمة
المقادير:
قطع فراخ مسوقة .+2 معلقة دقيق+1 لتر لبن+1 كوب شوربة
الطريقة :
تحطى معلقتيين سمن او زبد على النار وتحمرى فيهم معلقتيين الدقيق لحد ما يبقى لونى دهبى .حطى علية لتر اللبن وحركى فية لحد ما تحسى ان الخليط بدا يثقل شوية .ضيفى الملح والفلفل الاسود والشوربة وقلبى ضيفة بعد كدة قطع الفراخ الصغير وقلبى لحد ما الشوبة تاخد القوام المطلوب

شوربة الماشروم
المقادير:
علبة صغيرة مشروم+2 معلقة دقيق+1 لتر لبن+1 كوب شوربة
الطريقة :
نحمر المشروم فى الزيت شوية لحد ما لونة يبدا يتغير طريقة الشوربة نفس الطريقة السابقة مع تتغيير اضافة الماشروم على شوربة الكريمة بدل من اضافة الفراخ..

شوربة العدس
المقادير
بصلة متقطعة صغير ـ زيت زيتون ـ 2 طماطم طتقطعة صغير ـ جزرة او 2 متقطعة حلقاتـ عدد 1 بصله خضراء ـ عدس حسب الكمية اللي عايزاها (يعني للمكونات ده ممكن كوب او كوب و نصف) ـ عدد 1 بطاطس مقطعة مكعبات ـ 1 فلفل رومي مقطعة صغير ـ فرخة مسلوقة ( حسب الرغبة ممكن تعمليها من غير فراخ بس بالفراخ بتبقى احلى كتير)
الطريقة
تنسلي الفراخ و تركنيها على جنب تحطي الزيت يحمي و تحمري فيه البصل و البصل الاخضر لحد ما يصفر و بعدين تحطي الجزر و تقلبي شوية و بعدين تضيفي العدس المغسول بعد مكا تصفيه من المية و تقلبي و بعدين تضيفي الطماطم و البطاطس و الفلفل و تقلبي شوية و بعد كده ضيفي الشوربة و تابعي العدس لانه بيشرب مية كتير و حيقي طبعا بالملح و الفلفل و ممكن شوية قرفة لما يقرب يستوي حطي الفراخ و اعصري عليه نصف ليمونة و لو مش عايزة فراخ ممكن

شوربة العدس (طريقة أخرى)
المقادير:
ربع كيلو عدس اصفر +ملح – فلفل – كمون – بصلة متوسطة مخرطة رفيع – طماطماية – بطاطس صغيرة – جزرة صغيرة +شطة حسب الرغبة
الطريقة
نضع العدس فى حلة على النار و علية الطماطماية مقطعة اربع و الجزرة مقشرة و مقطعة قطع صغيرة و البطاسطاية مقشرة و مقطعة نصين ونضع الماء يغطى العدس بكوب ماء و نتركة لحد ما يستوى مع التقليب و نشيل الريم و نراقب الماء كل ما ينقص نزود شوية بشوية بعد ما يستوى اما نضعة فى الخلاط فى دورق العصير و نضربة ( او ) نصفية بمصفة الطماطم ام ايد عارفينها
وانا بفضل المصفاة ثم نضع شوربة العدس فى الحلة و نبدأ فى وضع الملح و الفلفل و الكمون بس زودى الكمون شوية بيديها طعم جميل وقلبى و ظبطى تخانة العدس زى ما انتى شايفة امامك يعنى لو تخينة زودى ماء و قلبى هاتى معلقتين زيت و عليهم البصلة المبشورة لحد ما تصفر وحطيها على العدس تقليبة و اطفى النار

شوربة الخضار بالكرفس
المقادير :
خضار مشكل +1 حزمة كرفس+1 مكعب مرقة دجاج+2 معلقة زبدة او زيت زيتون
الطريقة:
تحطى الزبدة لحد ما تسيح بعد تضيفى عليها الخضار وتقلبة لحد ما لون الخضار يصبح زاااهى اوى..بعد كدة نضيف الماء ومكعب مرقى الدجاج الملح نترك الخضار لحد ما يقر يستوى نضع الكرفس المفرى على الشوبة ونفلب ويترك لغلوتين ..((علشان ما بتهريش)) وتقدم ساخنة..
شوربه الكريمه بالمشروم
المقادير:
½1 ملعقة طعام زبدة+2 ملعقة كبيرة مشروم مقطع +2 ملعقة طعام دقيق+ربع ملعقة شاي فلفل اسود+¼ 4 كأس ماء +2 مكعب شوربة او لو عندك شوربه فراخ+4 ملعقة كبيرة كريمة مخفوقة .
الطريقة :
ضعي الماء وأضيفي له مكعبات الشوربة واتركيه ليغلي. قطعي المشروم الطازج و حطيه في حله تيفال علي نار هاديه علشان هينزل ميه و دي اللي بتدي الطعم للشوربه سيحي الزبده و حطي الدقيق و قلبي و بعدين الماء السابق و قلبي بمضرب البيض اليدوي علشان ميتكتلش و بعد ما تهدي حطي المشروم السابق و الكريمه و سيبيها علي النار بس متفورش علشان الكريمه متقطعش
علي فكره يمكن استعمال قطع من الدجاج المسلوق مع الشوربة و خدي بالك لا تضعي الكريمة على الشوربة وهى حارة وذلك لكي لا تنفصل المادة الدهنية عن المادة اللبنية في الكريمة وبذلك لا تعطى الطعم والشكل المطلوب.

شوربة القرع
المقادير:
كيلو قرع +2 بصلة+معلقتين كريمة لبانى+معلقتين زبدة +ملح وفلفل
الطريقة
-قشري القرع و قطعيه قطع صغيرة ضعي الزبدة على النار ثم ضعي البصل لحد ما يحمرثم ضعى القرع وضعى الماء وسبيهم على النار لحد ما يستوى القرع ,بعد مايستوى حطية فى الخلاط واضربيه وبعدين رجعية الحلة تانى وضعى الملح والفلفل والكريمة وقلبى تقليبتين وتغرف ( يشبه شوربة العدس)

شوربة الفول النابت
المقادير:
4 كوب فول نابت+2 معلقة سمنة او زيت+ملح - فلفل +حبهان – مستكة+بصلة متوسطة+ليمون
الطريقة
انقعى الفول النابت كزا يوم لحد ما تلاقية نبت وبعدين قشرية اسلقى الفول النابت وضعى البصلة لحد ما يقرب من السوى اقدحى السمنة وضعى المستكة والحبهان لحد ما ريحتهم تطلع روحى حطة عليهم الشوربة على طول غلوة مع الملح والفلفل عند الغرف اعصرى عليها ليمون

شوربة البروكلى
المقادير:
كيس بروكلى مثلج+بصل مفروم+2 بطاط متوسط الحجم+كم عود كرفس+ماجى+فلفل و قليل من الكمون+جبن كرافت مبشور
الطريقة :
احمسى البصل و قليل من الثوم ثم اضيفى البروكلى و الكرفس و الفلفل و الكمون و الماجى و ضعيه على جنب قطعى البطاط الى قطع صغيرة ثم ضيفيه الى الماء الى ان يستوى ثم ضيفيه الى خلطة البروكلى و اتركيه يتجانس على النار الى ان يغلى كله ضعيه فى الخلاطة الكهربائية ثم ديريه فى القدر اضيفى الليمون عليه.عند التقديم اضيفى قليل من الجبن المفروم ثم ضعى الشوربة فوقه .

شوربة الشوفان مع الذرة
المقادير:
بصل مفروم+ شوفان+ ذرة معلبة او مجمدة+ علبة مشروم مقطعة+ماجى ليمون فلفل كمون و قليل من بهارات +ملعقة زبدة
الطريقة :
يحمس البصل المفروم مع ملعقة زبدة و ملعقتين زيت مازولا الى ان يصبح وردى ثم ضيفى الشوفان و الماجى و احمسيهم جميعاً و اضيفى البهارات ثم اضيفى الماء الساخن الى ان
يتجانس الخليط ثم ضيفى الذرة الى ان يستوى ثم اخيراً اضيفى الليمون

شوربة الشعيريه بالكريمه
المقادير
ملعقتين زبده+3ملاعق دقيق+ربع كوب من الحليب المعلب+ربع كوب شعيريه+صدرين دجاج مقطع الى قطع صغيره+كوب خضار مشكله+ملح فلفل اسود +حبة ماجي
الطريقه
ضعي في قدر الدجاج والخضار واتركيها الى ان تنضج في الماء والملح والماجي بعد ذلك ضعي الزبده في القدر على النار وضعي الشعيريه وقلبي الى ان تصفر ثم اضيفي الدقيق وقلبي ثم اضيفي ماء السلق وضعيها على الشعيريه وقلبي واتركي الخليط ليغلي تم اضيفي الحليب والخضار والدجاج وتبلي الخليط بالملح والفلفل الأسود ويترك على نار هادئه حتى يغلظ الخليط وتتسبك الشوربه تغرف وتقدم

شوربة السبانخ السريعه

المقادير:
كوب سبانخ طازج اومثلج+ ظرف شوربة ماجي كريمة الدجاج البودره+كوبين حليب سائل+كوبين ماء+فلفل اسود
الطريقه
اتخلط جميع القادير وتوضع في القدر على النارحتى يبدا يثقل فاضيف السبانخ المفروم واتركيه يغلي ثم اغرفيه


الساعة الآن 01:04 .