بنات رأس الخيمة وباقي بنات الدولة. للضرورة . أرجوا التجمع .. للبحث و الكشف عن أفضل..

السلام عليكم
علومكم بنات حواء الجميلات
طبعا السموحه أولا لأن الموضوع هو مهم للجميع بس يخص حدود إمارة رأس الخيمة وبناتها .. وإن شاء الله مع الحوار اللي راح يدور إهني راح نعرف شو المنتجات المفيده من نواحي كثيره مثلا البشرة والشعر والجسم ... بلا بلا بلا
بس قبل ماأبدأ ياليت جميع بنات رأس الخيمة يشاركون بهذا الموضوع اللي راح نستفيد منه وهم يستفيدون منه وبنات المنتدى يستفيدون من معلوماته ... أوكي موافقين .
نبدأ
بسم الله الرحمن الرحيم

إنتوا تعرفون يابنات حواء في الآونه الأخيره كثرت محلات العطارة والأعشاب الطبيعية هب بس عندنا... بل في شتى بقاع الدول العربية .. فعساس جذا أنا قلت لازم أفتح موضوع نتكلم فيه عن محلات العطارة والأعشاب الطبيعة في إمارتنا .. وياليت تكون هذي المبادرة من جميع بنات دولة الإمارات وكل بنت تتكلم عن إمارتها ..
عن شوه تتكلم ؟؟؟؟؟ هذا السؤال اللي نبغي نجاوب عنه
الجواب هو :
نبغي نتكلم عن أفضل المحلات في إمارة رأس الخيمة
أنا الصراحة عيزت كل ماأروح عند محل عطارة يتم ساعة وساعتين يمدح في السلع ماندري هل هو صادق أو جاذب .. هل هو يبغي يتخلص من السلع أو يبغي إسم المحل يمشي .. فنشوف أكثرية المحلات عندنا من كثر الكلام والمدح في منتجاتهم .. يوجد تشكيك .. يعني بالمختصر تحسين في نوع من الجذب والخداع
فعساس جذا أنا بقولكم الصراحة .. من ناحيتي أنا أشتري الأعشاب والزيوت من محل إبن سيناء للعطارة في الشارع الكويتي اللي برأس الخيمة .. وفي نفس الوقت .. المنتجات اللي جربتها بكل أمانه ماجابت ولا نتيجة ويايه .. فعساس جذا أنا قلت لازم أفتح موضوع للنقاش في هذي الأمور لين متى بنتم نصرف فلوسنا في أشياء مالها أي فايده يعني نوع من أنواع الإسراف .. لازم ياخواتي نحن نحطي إيدنا بإيد بعض ونجوف منو الأفضل والأحسن من ناحية المنتجات, ومن ناحية المصداقية, ومن ناحية الأمانة, ومن ناحية التعامل الصحيح, ومن ناحية النتائج المبهرة والإيجابية والتي لا تضر بنا من شراء منتجاتهم.
إنتوا ويايه بنات ولا لالا
إنزين بنات رأس الخيمة فديتكم .. سمعوني .. ترا في محلات إشكثر بشارع الكويتي اللي برأس الخيمه وطبعا مايحتاي جوفوا الحريم هبة ريح على المحلات .. بتلقون درزن في محل فلان ودرزن في محل علان .. يالله شو كثرهم .. فالله يخليكم اللي تعرف محل ممتاز ومضمون وأمين .. وجفتي نتايج من منتجاته تقول لنا ولا تبخل علينا
كلنا خوات ونعين ونعاون .. وصدقوني اللي يسوي خير في دنياه رب العالمين يجزيه بالآخره إن شاء الله وراح يجزيكم ويعطيكم على قد نيتكم في الدنيا والآخره إن شاء الله.
والسموحه على الإطاله
لكن هذا الشي لازم ماينسكت عنه.. وماراح نخليهم يلعبون فينا لعبة
وسلامتكم
وننتظر الردود بلييييييييييييييييييييييييييز
:27: