" السلام عليكم ورحمة الله "
بصراحه ماقد خطر على بالي بيوم اني اكتب هالمواضيع بس اللي شفته للحين يوجعني قلبي
في كارفور اللي على الدائري غرب الرياض ( السويدي والبديعه ... )
اروح اشتري منه اغراض البيت اللي ناقصه بحكم قربه من بيتي
وبصراحه ماقد فكرت اطلع فوق للملاهي
لكن العطله جت وبما اننا ماعندنا طاري سفر وكان فيه اغراض ضروريه ناقصه
قلت خل نروح نقضي ونلعب العيال فيها << تشوف اعلاناتها اذا دخلت كارفور
وقلت للعيال وفرحو
طلعنا بعد صلاة العشا وطلعنا فوق السوق مافيه مرتادين كثير والمحلات اغلبها مسكر وصراحه اللي فاتح فتحت خشتي ودي ادخله لكن ذكرت نفسي باسباب مشواري ورحت مع العيال وابوهم وقالي اشتري البطاقه شفت واحد اعرفه وبلحقكم قلت اوكي
ومشيت لها
واول مشااهده او قصدي سمااع
اغاني طيور الجنه وصراحه فيه اغاني ثانيه اسمع الكلمات وماظنيتها للاطفال كلها غنج ورومنسيه لكن بما اني ما اعرف طيور الجنه الا شفتات وبزيارات للناس يعني مهيب عندي توقعتها هي
لاتقولون حلال لااااااااااااا فيها دف وموسيقى وفيها امور محضوره واللي بيسمعها ببيته والا بسيارته ذنبه على جنبه لكن ليه بمكان عام !!:09:
****
طبعا كلمت اللي يطبع البطاقه وقلت له شيل الاغاني
ولا شالها
ومشيت واشوف الشوفه اللي حرت قلبي من جوى
بنات مراهقات بالغات < لاتقولون مهوب بالغات وكبار يعني طولهم من ال150 وفوق << يعني فيه اللي اطول مني وانا طولي 156
واشكال اجسامهم متقسمه يعني بالغات
وببناطيل ضيقه وتي شيرتات من غير عبايه لا راس ولا كتف وويتزلجون في الصاله حقت التزلج :icon33::icon33:
يعني وينا فيه !!
اتاري زوجي وصل وانا فاتحه فمي
واقول : شفت الاشكال هذي ؟<< مهيب عادتي اعلق بس من الذهول
قال : يمكنهم اجنبيات متعودات << العذر المتعارف عليه
قلت : اجنبيات , سعوديات , غير مسلمات
اي شي المهم هم بديرتنا يتقيدون بديننا على الاقل تلبس عبايه على جسمها
فندائي للهيئه واللي زوجها فيها
ياليت يكون لهم منها نصيب ويشددون على العاملين هناك
فيه ملاهي وش كثرها للحريم اللي بتتزلج تروح هناك اما هالحركات اللي مهيب من ديينا ما نبغاها
سواء بنات سعوديات متفتحات او غير سعوديات
سواء اهلهم يشوفونهن صغار والا ما يشوفونهن
بنت توصل عمرها سادس لاعاد تدخل للاماكن هذي
ولو دخلت تركب شي يناسب الاحتشاام والدين اما سيارات او تلعب هوكي والا اي شي
لكن تزلج وببناطيل جنز وهبال ماله داعي تروح للاماكن النسائيه الله لايهينها
بصراحه طلعت ما لعبت عيالي الا لعبه وحده لكن لاسباب شخصيه تخص العائله :44:
والله يديمكم يالهيئه فووق رووسنا
** ملاحظه : الموضوع مهوب غيره على زوجي لاني واثقه الحمدلله من نفسي ولانه يساافر للخارج واكيد يشوف اكثر وغير اني امر مثل غيري في االاسواق من بنات غير محتشمات ولاعمري حطيت موضوع عنهم
لكن الموضوع غيره على الدين
امس يلبسون لثم ويغازلن
واليوم بناطيل ومن غير حجاب ويتزلجن وهن بهالعمر !!
بكره وش بنوصل له يابنات المسلمين
مصرقعة هانم @msrkaa_hanm
كبيرة محررات
يلزم عليك تسجيل الدخول أولًا لكتابة تعليق.
الله يجزاك خير والله أنك صادقهالله يجزاك خير والله أنك صادقه
ياعمري من اللي يسمعنا جزاك الله خير
الصفحة الأخيرة
والله يقوي الهيئه ويديمهم