بليز اللي راحو مصر تعالو أبيكم شوي

انصحك اختي بشركة الطيار


راح يفيدونك بكل شي وعندهم اسعار لكل الفنادق والاماكن السياحيه

هلا أختي الجوري مشكوره حبيبتي ماقصرتي:27:

يالله يابنات اللي تعرف قد ايش المبلغ اللي احتاجه في السفر تساعدني شدو حيلكم معاي

للاسف حبيبتي بالنسبه للميزانيه
ما عندي خلفيه..
بس اذا تميتوا على السفره ان شاء الله على خير حابه انصحك باماكن تروحيها مررره وناسه واماكن ما تروحيها لانها بايخه..

1-القريه الفرعونيه مررره رهيبه وتجنن انا عجبتني بس لا تشتري منهم اشياء تذكاريه لانها غاليه وبعدين تشوفيها في الاسواق الشعبيه ارخص
2-الاهرامات وحاولي تروحي من الصباح عشان يمديكي تدخلي الاهرام اذا كنتي تستحملي الدخول وظهرك منحني ويمديكي تاخذي صور حلوه في الصباح..
بس اصحك تشتري من العطور حقت زهرة اللوتس مرررررره معفنه وغاليه ويضحكوا عليكي بيها..
3-طبعا الحسين او خان الخليل روعه هذا مهما تمشي فيه ما تشبعي منه اسواق شعبيه والمصريين على طبيعتهم ووناسه ممكن تشتري من التحف الصدف لبيتك (احنا البدروم حق الرجال عند اهلي كله ديكوره من هذا النوع بس نشتري الرخيص اللي نص ديلوكس هههههه لان الفل ديلوكس غالي شويه) او النحاس او الزجاج المنفوخ يدويا مره تحفهم تجنن..
4-حاولي ان تسألي عن مطعم العمده للكشري مررررره لذيذ
5-في مطعم للحمام بالفريك زوجي عجبه بس انا ما عجبني لاني مني متعوده عليه
6-اذا تحبي الملاهي في دريم لاند -هذي بعيده عن القاهره شويه في 6 اكتوبر يعني روحوا مع تاكسي بحوالي 25جنيه فقط واذا ما رضي شوفوا واحد تاني -اعتقد تذكرتها اذا ما خانتني الذاكره 23 جنيه للشخص بس يوم كامل يعني من الصباح للمساء
7-اذا ما تحبي الملاهي في برضه في 6 اكتوبر ماجك لاند وهي المدينه السينمائيه محل ما تتصور المسلسلات والافلام اعتقد انها راح تعجبك اذا تحبي المسلسلات المصريه اما اذا كنتي ما تحبيها ف بلاش منها
8-برج القاهره ما ادري هو حلو بس مو مررررره يجنن مجرد برج دوار وتشوفي القاهره كلها من تحتك اذا تبغي تروحيه لا تنسي كاميرا الفيديو عشان تصوري
9-اذا يوم تبغي تدلعي نفسك وتروحي مطعم ياخذ العقل روحي الفور سيزنز واو ..او اي مطعم من مطاعم الفنادق الفخمه بس بعضها تحتاج حجز مسبق
10-اه نسيت كمان المتحف المصري روعه هذا اكثر شئ عجبني انا وزوجي مع انه كثير ناس ما يعجبهم بس يوميها مره انبسطنا خاصه ان زوجي دراسته اثار وحضارات اسلاميه ههه فجالس يتفلسف على دماغي وتذكرته مررررره رخيصه افتكر ما تتعدى 5 جنيه !!
11-حديقه الحيوانات اذا تحبي تروحيها بس هي عاديه
12-الاسواق شوفي جنينه مول وسوق اسمه صعب نسيته بحرف الكاف عموما اسواقهم مهي بروعه اسواقنا في السعوديه انا هذا رأيي بس عندهم اشياء رخيصه
...
هذا اللي جا على بالي دحين ..
ان شاء الله تبسطي وتلاقي الوناسه وترجعي ونفسيتك عال العال..
بس حابه اقولك شغله ترا اتوقعي تشوفي الشحاتين 24 ساعه بشكل مو طبيعي وراح يمسكوا فيكي بنظام تقطيع القلب..
اذا ما كان قلبك جامد رحلتك راح تتنكد لهذا السبب - زي ما يصير فيا دائما كل ما اشوفهم ابكي-بس الحمد لله على كل حال..الواحد يشكر ربه على النعمه
وسواقين التاكسي ترا مره يغلوا السعر اذا عرفوا انكم سعوديين ف احنا ايش نسوي
نحدد السعر مقدما قبل ما نركب وما نخليه يقول (اللي يجي منك) لا نحدد السعر 5 جنيه 4 جنيه زي كذا اذا رضي كان بها ما رضي نشوف واحد غيره.. وحتى حقين الاحصنه خلاص هذا اسلوبنا في التعامل معاهم..
..
الله ذكرتيني باللذي مضى..
الله يذكر ذيك الايام بخير..

اختي الصالحيه
انا مصريه مقيمه بالرياض اولا ااحب اقولك اهلا بيكي في بلدك التاني مصر انتي حتنورينا
بالنسبه للاوتيلات 4ستارز في فندق البارون في شارع العروبه بمصر الجديده ده حلو قوي ده لو تحبيتكوني في منطقه هادئه.ممكن لوتحبي اكتبلك ارقام التليفون.
وفيه كمان فندق اطلس الزمالك ده في شارع جامعة الدول العربيه _المهندسين وعلي فكره الشارع ده لذيذ جدا وكله محلات ومطاعم وقريب من اماكن كتيره حلوه .
وفي ان اوتيلات كتير4ستارز حلوه موت اما بالنسبه للاماكن اللي ممكن تزوريها خوخايه قالت لك المفيد واضيف كمان لكالمها انك لازم تروحي اماكن بره القاهره زي شرم الشيخ دي تجنن وخاصة انك حتيجي انشاء الله وحيكون الجو هنا حلو موت تقدري تروحي شرم وتتبسطي جدا بس انزلي في اي اوتيل في خليج نعمه اوقريب منه وفي هناك اوتيل يجنن اسمه كتاركت.
ودي مواقع تقدري تدخليها وتشوفي اسعار الاوتيلات واماكن تزوريها
www.intoegypt.com
www.2travel2egypt.com
وانشاء الله اسالك علي اوتيلات تانيه واقولك.

هلا أختي خوخايه مشكوره حبيبتي استفدت كثير من معلوماتك ماقصرتي ياعسل وعلى فكره ترى أنا مو سعوديه بس مولوده وعايشه هنا يعني مغتربه زي حالاتكم بس فرق كبير طبعا هنا موحاسه بغربه لأني متعوده على العيشه الله يهون عليكم الغربه ويرجعكم الى بلدكم سالمين يارب

لك أطيب تحيه:27: