العنوان 2 في 1
عشان أفيد كل أبو خلق الله
لأني أول ماشريت الغساله بحثت بقوقل مالقيت شرح بالمنتديات مجرد تساؤلات أو أنا شريتها ومن هالسوالف :icon8:
يالله ي إدارة ثبتوا موضوعي + حطوة بالأرشيف ( نسخة للتاريخ ) :king:
بس تكفوون لاعاد ترفعون موضوعي القديم يوم أني مفهيييه بس أسألكم والله أنه يفشل :eek:
الصدق ترا موضوع شرح سريع وأبعطيك المفيد لأني خبرتي بسيطه بالغسالة صارلي من شريتها حول الشهر
المهم ......
هذا سلمكم الله ... محدثتكم تقول وصلت إلى مرحله مو قادرة أغسل الصحون
بعد كل وجبه أشيل همها تعبت يعني سنتين من تزوجت وأنا أكرف ليل نهار باستثناء شهر العسل :2thmup:
تخيلت أنه يوميا يروح من وقتي ساعتين إلى ثلاث وأنا واقفه مقابلتها فطور غداء وعشى
لدرجه صرت احيان اشخط العشى من القائمه أو اسويه بدون نفس وانا اساسا عندي شغل مشغلني عن هالمطبخ
واكثر شي يقهرني هي صحون العشى لان صدق البطاريه عندي تطفي
والله الوحده صارت ماتستمتع ولا تتفنن بالطبخ من كثر ماشلت هم الصحون
اما الان .. بس انظف المطبخ وترتيب الاطباق ياخذ من 10 دقايق او ربع ساعه
وكل اللي جربو الغسالات مافيه احد تذمر منها الا اللي تستهبل او ماتعرف لها !
مره تخدمك ومره تسااعدك وتخفف عليك نص التعب والكرف صراحه مهمه !
صدق ياحياة الشقى ويني عنها من زمان ؟!!!!!
المهم ..........
يوم طاحت عيني على شسمه اعلانات اكسترا وعرووضهم
وأشوف غساله كاندي ..... صراحه سعرها أرخص من الغسالات اللي اقراها هنا في تقارير بنات حواء
كان سعرها حول يمكن 1400 طبعا خلوني اطلع منهم بالف و 900
مره يقنعونا بالضمان انه اربع سنوات اذا خربت يجون للبيت يصلحونها ببلاش ومدري ايش
وشريت شويه اغراض منهم فما اذكر بالضبط سعرها لكن ماكان سعرها الاصلي يزيد عن 1500
لها لونين ابيض وستيل الاستيل يفرق عن سعر الغساله البيضاء بـ 400 ريال يعني زياده اربع ميه ع البيضاء
ليش مادري ؟!
وفيه غسالات كاندي فوق الألفيييين .
وأهم شي ء اللي لازم تعرفونه أن كل الغسالات نفس الغسيل ونفس العمليه في التنظيف ونفس الأدوات
( صابون ملمع ملح ) اللهم الاختلاف في الشكل والبرامج حسب تبع الشركه
يعني اشتري الغساله اللي تحبينها وفي النهايه نفس التنظيف
واللي ماتنظف أكيد يانها مارتبت الصحون زين بحيث انها ماخلت فراغ لو شويه يسمح بمرور المويه
او أنها ماتخترت البرنامج او مااستخدمت الصابون تبعها
أنا طبعا كنت مجرمه بالبدايات ماشريت صابونها ولا دريت ان لها صابون مخصص @@
ولو امر على مواضيع البنات امرر سريع ولا كنت اركز
يعني صراحه جربت الفيري دمار ماينظف زين وحتى لو نظفها لابد تعيدين الدوره عشان يشطف الرغووه
اللي حتتى تكون طالعه من الغسالة : | @@
واعرف وحده لها سنه تقول انا على الاريل لان مالقيت صابون في منطقتهم ولا الملح
يعني اوقات هالاشياء تفك ازمه $ ولكن مانصح فيها حاليا بعد ماجربت المنظفات تبعها
وترا .. ماقولكم استخدموها يعني فيه بديل ولاتحاتين ولو مؤقت
_______________ صناعة الغسالة ______________
شركة كاندي إيطالية
مقرها في بروغيريو الإيطالية بالقرب من ميلانو وتصنع الأجهزة المنزلية. الشركة مملوكة للقطاع الخاص (أسرة فوماغالي) وتمتلك مجموعة من الشركات وهي من بين المتصدرين في صناعة الأجهزة المنزلية مثل الغسالات وغسالات الصحون والبرادات والثلاجات وأجهزة الطبخ والأفران سواء مضمنة أو قائمة بذاتها. بلغ عدد العاملين فيها نحو 7000 عامل في نهاية سنة 2008، منهم حوالي 80 ٪ من خارج إيطاليا.
شكرا موقع ويكيديا
وهي ماخذة التوب في ايطاليا واوربا وفي مواقعهم بالنت تجي تقييم وتصويت على اجهزتهم
لكن عندنا بدت تدخل أسواقنا .. عشان كذا مانشوف لها صوت هنا
موقع الشركة عبر النت ::
http://www.candy.ae/ar/index.asp
من فوق .. ع اليمين انقلش / عربي
وتقدرين تحملين الكتيب تبع التعليمات من عندهم
وايضا كثير اشوف ارقام بقوقل أشخاص متخصصين في صيانه غسالات كاندي .
___________________ التركيب ______________________
الصحون تمديد المويه تبعه معروف لابد سباك أو واحد خبير
ياما التوصيل يكون من الصنوبر أو من السخان طبعا هو يسحب مويه بارد فقط
والغساله هي اتوماتيكيا تسخن على طلبك اللي هو البرنامج اللي أخترتيه
فيه وحده من الأخوات تسألني عن الماء وكم يسحب مااعرفت صرااحه الاجابه
لكن مكتوب عندي ضغط إمداد الماء 8 ميجا باكسال
الفيش طبعا خط 200 تقدرين تجيبين كهربائي يحول لك او يمد لك خط جنب الغساله ويحول لك على 200
____________________ صورتها ____________________
فيه أنواع كثيرة من غسالات كاندي واذا زادت البرامج حتى شكل لوحه التحكم بالبرامج تختلف
لكن انا بتكلم عن اللي عندي بناء على طلب الأخوات ..
أبيض
_____________ أدوات النظيف _____________
1_ صابون بودره 2_تعليقه تعطي رائحه منعشه للغساله 3_ ملمع 4_ ملح
مثل أي غسالة صحون لابد هالاشياء
والصابون يجي نوعين ( بودرة - مكعبات )
انا من بحثي شفت يمدحون الصابون البودره اكثر .. من المكعبات
مكان وضع الملح... يوجد في قاع الغساله من الداخل
لاول استخدام للغساله املئي مكان الملح بالماء بعدها ضعي الملح مكانه حتى يمتلئ
اضغطي هنا لمشاهدة الصورة بحجمها الأصلي
ملاحظه ...
يجي مع الغسالة قمع خااص للملح
اذا غسالتك جديده ومابعد غسلتي والملح متوفر
لابد تحطين مويه حول كوب كذا وبعدين ضيفي الملح
الطريقه حطي القمع في فتحه الملح ةاملي ملح لين ماتحسين مكان الملح امتلى
تقريبا الملح بحجم القمع رح يكلفك
ولكن اذا اشتغلتي عليها قبل وبدون ملح يظل مكان الملح فيه مويه
يعني اذا هالمره بتحطين ملح وخلاص خلاص تكتفين بالملح فقط
بالنسبه للملمع
اول مره رح يمكن يكلف ربع او نص العلبه ورح تلاحظين الملمع بدا يطلع من مكانه يعني يطفى يعني هنا توب
هو انتي صبي بالمكان المخصص حتى تصير لون القزاز الي بمكان الملمع اسود او معتم لان معناته صار فل وكويس
واذا مضيء معناته فاضي < احس غساله كاندي عكس الناس خخخ
وحدة من الأخوات تقول "" المهندس قالي حطي ملمع كل 80 غسله ""
والبنات بالمنتدى يقولون كل 3غسلات
وبصراحه انا لي اسبوعين من حطيت الملمع والى الان الكاساتتللللللللمع
على اني اشغلها مرتين باليوم.
فنصيحه لاتحطون ملمع الا اذا صارت الكاسات والفناجيل مكتمه( يعني بدون لمعه)
وهنا صوره تقريبيه من النت مو نفس الشكل بس عشان افهم الجديدات
مكان الصابون والملمع .. موجودان ع الباب من الداخل
اضغطي هنا لمشاهدة الصورة بحجمها الأصلي
1_ مكان الصابون .. سواء بودره او مكعبات
2_مكان الملمع .. يوضع بالفتحه حتى يمتلئ .. وتكون ضبطتي درجه اللمعان .. افضل شي من 3 الى 4
اضغطي هنا لمشاهدة الصورة بحجمها الأصلي
مكان الصفايه او الفلتر يوجد في قاع الغساله من الداخل .. يجب تنظيفه دائماآآآ
أنا عني اقول بين فترة وفترة لان اذا اغلب الصحون مافيها اكل انظف دايم ليش ؟؟
اضغطي هنا لمشاهدة الصورة بحجمها الأصلي
اختي MEMOoO الحلوة اللي من عالم حواء شكرا لك غاليتي اقتبست كذا صوره منك اعذريني غلاتي ويسعدك ربي
__________________ شرح الأنظمه ( البرامج ) __________________
بشرح لكم .. .. .. *
المربعات الثلاث من اليمين
الأول اللي رسمة ورقة شجرة ( زر سوبر إقتصادي ) : يهدف الى توفير طاقة والوقت حول 25 % عن البرنامج اللي اخترتيه ..كيف ؟ وذالك بـ تقليل حرارة المء وتقليل الشطف والتجفيف .
الثاني اللي كنه مربع ودائرة فوقه ( زر الوضع الشامل ) : يوصي بهذا الخيار مع مجموعه المنظفات الشامله
أحيان فيه مكعبات 3×1 أو 4 ×1 أو 2×1 لانه يحسن التنظيف عند استخدام هالمنظفات .
الثالث + - ( زر كثافة الغسيل ) فايدته :اذا اخترتي برنامج معين
و ضغطي + تزيد الحرارة والمدة ورش الماء يعني تكيف الغسيل
والعكس اذا ضغطتي -
وحده من البنات تقول هـ البرنامج تستخدمه زياده على برنامج التنظيف الرئيسي حسب مقدار اتساخ الصحون
أنا عني استخدمته مره حسيته يستهلك مويه كثير دام البرنامج الرئيسي ينظف وشهوله تكثيف الغسيل وأسراف الماء ؟!
ممكن استخدمه اذا بختار تنظيف سريع
ووحدة من الأخوات تقول العامل يقولها مانصحك تستخدمين كل مره تكثيف
يكلف جهد للغساله !!
الا اذا صحونك كثيره و بالحييييل رايحه فيها بين فتره وفتره .
*** الحين أشرح لكم وشو برامج التنظيف الرئيسي ؟؟؟؟
من اليسار المربعات الثلاث :-
المربع الأول هذا زر تختارين برنامج الغسيل اللي هي البرامج الرئيسيه
القدر الغامق أعلى حرارة مركز 75 = لصحون شديدة الأتساخ وأستمرت الأوساخ عليها طوال اليوم
القدر الفاتح هو البرنامج الموصي به عام 60 درجة الحرارة = لصحون عادية الأتساخ وأستمرت الأوساخ عليها طوال اليوم
eco زر اقتصادي أخر 45 درجة الحرارة = عادية الأتساخ
اللي علامه ساعه 24 = غسل سريع للأطباق بعد تناول الطعام عليها مثل صحون الفطور
المربع الثاني اللي علامة ساعه زر تأخير البرنامج هذا لاتقربينه هو حق تأخير الغسيل تبين بعد 3 ساعات او 6 او 9 .... طريقته من الكتالوج فقرة "زر تأخير البدء" صراحه مافهمت شلون أسويه
لكن اذا اخترتيه (( بيأشر لك )) زر البرنامج + زر الوقت 6 او 3 او 9 يعني بيكون على استعداد لـ الوقت اللي اخترتيه له .
المربع الثالث اللي هو ستارت / ريست = تشغيل / ايقاف التشغيل
اذا حددتي برنامج الغسيل الرئيسي اللي تبينه اضغطي ستارت هو على طول رح يجي علامه 3 اللي هي غسيل
للعلم اول ماتضغطين ستارت رح تسمعين صوت تصفير ثاني معناته الان تشتغل
واذا بتعيديى الدورة او بتغيرين البرنامج المهم تبين تبدين من جديد
خليك ضاغطه على ستارت ثواني ورحت تسمعين صوت وكل الازرار بتنور
هنا حتى لو معلقه اللوحه عندك اضغطي الستارات وعلقي عليه ثواني
أنا عني .... أضغط القدر الفاتح وستارات وخلصنا ماعترف بكل البرامج اللي ع اليمين
*** ملاحظه : لابد تتابعين الكتالوج وتتاكدين لان غسالات كاندي فيها اختلاف في كل نوع بالبرامج والمقصود بها
نجي لعلامه الأرقام ( 3 يعني تغسل 6 يعني تجفف 9 يعني ستوب انتهت )
احيان تصفر واحيان تهجد وبعدين تصفر وبكل الاحوال اذا جت ستوب يعني خلصت
هالشي ماله دخل بتأجيل الغسيل اللي هو خربطني اول ايامي
نقطه مهمه ::: اذا عرفتيها رح تعرفين تشنغلين عليها لان هالنقطه اللي حوست علي /////
الفرق بينهم انه تأجيل الغسيل الأحمر والأزار تظل تومض يعني على استعداد
يانتي تضغطين ستارت = بدء ي أننك تجهزينه
اما اذا "تشتغل" معناته الزر ماايومض ولا ياشر فهمتو هالنقطه
اذا كانت تشتغل تنظيف يعني رح تشوفين الزر ثابت ولا يأشر
العلامه S معناته الملح اذا فاضي رح ينور الزر اذا ممتلى وفيه رح يختفي ويهجد
صوره لغسالتي وهي قاعدة تشتغل .. ..
وفيها ذاكره يصير بكره اذا شغلتها ياشر البرنامج اللي ابيه
بس اضغط ستارت يصير (زر 3 اللي هو الغسيل+البرنامج اللي اخترته ) منورين ثابتين ولا ياشرون .
وعن عن ماقبل الغسيل بعد الأكل لابد تزيلين الاكل من الأطباق
ياما تمسحينه بمناديل وانتي واقفه أو اسفنجه مبلله ع السريع او صبي مويه عليه .
وبعد الغسيل .. افتحي الغساله شوي عشان يجف
واحيان من حظك تصير الصحون جااافه واحيان رطبه لابد تجففينها او تتركينها تجف .
أقصر مدة غسيل طبعا انا جديده وتو اتدرب عليها
اقصر مده ممكن 45 دقيقه واطول مده ساعتين او 1 و 45
لكن برنامج القدر الفاتح اللي متعود عليه ياخذ ساعه و 45 دقيقه
ساعه وربع تنظيف نص ساعه تجفيف وبعدها ستوب .
.................... الملاحظات اللي خاصه بغساله كاندي ...............
مافيها خاصيه رف او رفين . واقصد هاذي اللي شرحتها
ولا فيها انها تطفي من نفسها اذا جت ستوب لانها تقعد تصفر او تظل شغاله
وبما اني للان على توصيله فمن حقي أخاف : / !
يعني يمكن هالشي ماحبيته مره طلعت يوم جيت لقيتها تناديني ض1
لكن ممكن الانواع الثانيه غير عن هاذي وانتو أسالو وانتو بالمحل : )
طبعا لابد تختارين حجم للغساله مناسب كأني أشوف غسالات كاندي حقتهم حجمها صغير !!
لان هم اطباقهم صغيره لكن حنا وش نقول يكفي صحن الكبسه السعودي @@
وغساله كاندي مثل غساله الصحون لاتقبل القدور
ولا ترا بيروح لونها خاصه قدر الضغط الفضي
ولكن ملاعق الخشب وباقي الصحون عادي تغسلهم تمام
.................. وأخيرا
بخصوص اللي يشتكون من الالتماسات في كل غسالات الصحون مو بس كاندي السبب
لازم تقطعين الكهرب اذا فتحتي الغساله ماايصلح مويه وكهرب وتحطين يدك ! الحذر واجب او لابد عامل كهربائي يشوف الخلل .
ويقول كتالوج كاندي انه الغسيل المنقطع او اذا ظغطتي ستارات البدء وماسمعتي صوت المويه
مو معاته فيها خلل او عيوب هي طريقتها كذا
ونصيحه اذا حطيتي الصحون انسيها مو تفتحين كل شوي مثلي هذا كان يخليها تطوول !
واحيان مع الغسالت تجي زوائد اظاافات لتقسيم الصحون انا صراحه شلت 2 حسيتهم ضيقو علي ... وشلت ايضا غطى المكان المخصص للملاعق
واكتفيت بكذا نفس الاخت حور العبدالله
وخلصت .. أن أعجبتكم أذكرو الله وادعو ان الله يعطيني خيرها ويكفيني شرها
ويرزقني بالذريه الصالحه بالصلاح والسعادة أنا ولـ أخواتي في عالم حواء
ترا نص الصور اخذتها من النت والعذر والسموحه من اصحابها .
أحبكم :luvkiss:
واللي عندها سؤال عن هالغسالة أنا حاضرة ..
وأدري فية بنات يقولون وين صور الصحون وووو
وش تبون فيها ياحبكم يالحريم لهالسوالف خخ بس هذا اللي قدرت عليه لاني مشغووله
وفيه بنات طلبوشرح البرامح بأسرع وقت ولعيونهم نزلت الموضوع
من قبل العصر وأشتغل عليه الله يوفقكم وتفرحون بغسالاتكم يارب
مشكوووره ويعطيك العافيه