نفسيتي تعبانه، الناس ما تراعي مشاعري كوني متأخرة عن الحمل، شوفوا ايش قعدوا يقولوا

السلام عليكم 

خواتي انا عارفه انو همي و همكم واحد، و هو تأخر الحمل، أسأل الله العلي القدير أن يفرجها علينا و يرحم ضعفنا 

السنه الماضية أسلبت توأم ولد و بنت في الشهر الخامس حملت فيهم بعد حرمان و لله الحمد 

نقلت جديد لبلد جديده، زوجي دبر الامور و عرفني على حريم اصحابه عشان يصير لي اصحاب هنا،  طلعنا المره الاولى من يومين لكوفي و كانوا امهاتهم معانا، و حريم اصحابه ما شاء الله تبارك الله حوامل و هادا مو الحمل الاول لهم، و يلي قاعدين كلهم عارفين اني متأخرة عن الحمل و مسلبه، كل السوالف كانت عن الحمل، انا انحرجت ما تعرفي كيف تتصرفي او ايش تقولي او حتى كيف نظراتك تكون بحيث ما يفكروكي غيرانه، احتسبت الاجر عند رب العالمين،  و عادي سوالف حريم ما تضايقت، بس بعدين صاروا الامهات كل شوي يقولوا لهم تغذوا كويس عشان البيبي، و صاروا الامهات يقولوا لبعض يلي معانا كلهم حوامل و لازم نهتم فيهم، و طول القعده كدا يلي معانا كلهم حوامل،  طيب يا خي انا مو حامل راعوا مشاعري، متاخره عن الحمل و مسلبه، و قعدوا يقولوا كل وحده تتمنى تكون ام، انواع فتح الجروح يلي ما تسكرت اصلا، وفي المره الثانيه طلعت معاهم رجعت ابكي لانو نفس الكلام تكرر، حسيت مالي محل من الاعراب 
و قاعده اكتب لكم و انا ابكي، لاني اشتكيت لامي من باب الفضفضه قالت لي شو بدك تسوي نصيبك هيك، حسيت بضيقه زياده لما قالت لي كدا ما اعرف ليه، تعبت و الله،  صايره اتجنب الخرجات و الروحات و الاجتماعات عشان هادا الموضوع، و الله انا حامده ربي و شاكرته، و عارفه انو راح يجي يوم ربي يرزقني بالضنا في الوقت المناسب، بس لو الناس ما تقعد تجرح فينا احنا بخير، قررت ما اطلع معاهم اذا هم كدا ما يراعوا المشاعر و يدقوا بالكلام 
لا حول و لا قوة الا بالله العلي العظيم