غسولات مجربة للمنطقة الحساسة

من زمان وانا ودي انزل الموضوع لاني لاحظت كثير يعانو من تغير الرائحة بس والله حست ما عرفت فين انزل الموضوع, أخر شي استقريت على قسم التجارب والحلول وبعون الله تجربتي تكون حل لمشاكلكم
نبدأ بسم الله
عن نفسي انا مو متزوجة ومو مليانة بس كل بين فتة والثانية اعاني وبالذات اذا تغير علي البلد من تتغير رائحة جسمي معها وخصوصا بعض المناطق.

علميا سبب الروائح ممكن يكون فطري وممكن يكون بكتيري والعلاجات اللي تنفع للاولى ما تنفع للتانية عشان كذا راح تلاحظي اني استخدم اكثر من غسول ولو جربتي واحد منها ومانفع يبقى ما ناسبك اتركيها وجربي غيرها
عني انا فانا استخدم الغسولات التالية , واحيانا ينفع معايا واحد منها بس مو كل مرة زي ما قلت على حسب مسبب الرائحة:

1- ابسط شي غسول الديتول المخففب الماء, استخدميه كل مرة تدخلي فيها الحمام الله يعزك, حاولي ما تستخدميه بكامل تركيزة وفي نفس الوقت لا تخففيفة بالمرة يعني خليه وسط دايما عندي بالحمام الله يعزكم قارورة ماء صحة ام ريال عشان
اول ما اتذكر الغسول تكون القارورة جاهزة.

2- غسول خل التفاح مع المُرة (تلاقيها عند العطار), الطريقة انفعي المرة في الخل المركز و خليها يومين على الاقل لحد ما يتغير لون الخل , نفس الحكاية خدي كمية بسيطة من االخل المركز و خففيها واشطفي بها المنطقة. ونفس الحكاية في قارورة الموية ام ريال وحدة اسوي فيها الغسول المركز ووحدة للتخفيف والتشطيف.

3- غسول الصبر ( الصبار) برضو تلاقيه عند العطار , نفس الطريقة أحل الصبار الجاف ( لونه بني غامق وريحته :09: ) في ماء واستخدمه كغسول. ترا الريحة مش ولا بد :( بس ممتاز للالتهابات . انا حتى استخدمه كغسول لوجهي بخفف ظهور حب الشباب بشكل فعال مرررة.

4- محلول الملح, مررررة ممتاز,و المغطس احسن واحسن. والملح الخشن ( الملح البحري) احسن من الملح العادي

5- بالنسبة للمتزوجات مغطس قشر الرمان طيب , لانه معقم من الدرجة الاولى وقابض فبيطهر المنطقة وبيخفف الافرازات, الطريقة انك تغلي قشر الرمان المجفف في الماء لمدة تلث- نص ساعة وبعدين تملي البانيو ماء في حدود ارتفاع شبر او شبر ونص ماء وتصبي مغلي الرمان فيه خلي الموية دافية لاهي باردة ولا هي حارة.
عشان ما تخربي قدور الطبخ استخدمي علبة الحليب البودرة الكبيرة كقدر للغلي :) ( تراها مجربة )
المغطس مرة كل شهرين - ثلاثة كفاية


بالنسبة للعناية اليومية فأهم شي بالنسبة لي :
1- الغسول الصابوني : أنا جربت الغسولات الخاصة زي سيبا ميد وكيرفري وما نفعت معايا يمكن لانها معطرة عملت لي زي الحساسية, لكن اللي نفع صابونة فرجيتني, مرة في اليوم واحيانا كل يومين وقت الاستحمام .
2- نظافة المنطقة الفطري : واقصد هنا سنة الرسول صلى الله عليه وسلم طبعا كل وحدة وطبيعة جسمها بس أهم شي ما نهمل النقطة دي.
3- نظافة الملابس الداخلية, كل بين فترة والثانية اغسل ملابسي في ماء حار وديتول بالنسبة الغسيل العادي واحرص اني اغسل ملابسي الداخلية بالذات بشكل منفصل عن باقي الملابس.
4- تجفيف المنطقة كمان مهم لو تستخدمي مناديل الحمام ( الرول) كفاية ان شاء الله.

أخر شي :
1- لاتنسو أخواتي ان اهم شي ,اي وصفة لازم تستخدمها بإعتدااااال لان كل شي مهما كان زاد عن حده ينقلب ضده حتى لو كان مفيد. الغسولات دي انا استخدمها واحد واحد لمدة تلاثة ايام ولو ما حسيت بفايده اجرب الغسول اللي بعده, يعني مو كل يوم وطول الاسبوع لا. بمجرد ما تروح الريحة اوقف.

2- لو جربتي كل شي وما شفتي نتيجة لازم تروحي طبيبة نساء لان ممكن يكون سبب الرائحة التهاب داخلي, والطبيبة بعد الله احسن من يوصف لك علاج.

اسال الله لنا ولكم العافية والسلامة