cute moon

cute moon @cute_moon_1

محررة ذهبية

اكتشفت انو فعلا (( الحب )) هو سر من اسرار الحياة السعيدة !!

الملتقى العام



السلام عليكم ورحمة الله وبركاته


بنات انا حبيت احط تجربتي لكم ، لصفة ماكان فيا ..
ومنجد يابنات جربو تكون ذي الصفة في شخصياتكم وحتحسو بالنتيجة والله ..



قرأت في كتاب ، انو نظرة الحب ، لو تعتمديها ، حتعيشي حياة حلوه..

والمقصود بنظرة الحب ، هي نظرة وئام ودعم للاخرين و كلها حسن ظن بهم + ان ااركز فقط ع ايجابياتهم ..

ومنجد والله عرفت ليش الاسلام حثنا ع مساعدة الاخرين ، ترا مش هم المستفيدين مننا ، بالعكس احنا المستفيدن كمان وكثير ..


المهم بعد ماقرأت الكتاب ..
وقررت منجد يابنات اتبنى المثل الحلو الي يقول ( هناك من يبحث عن السعاده .. وهناك من يصنعها )
فأنا قررت اصنع السعاده ان كانت غير موجوده عند شخص محتاج ( ومش شرط يكون فقير وحأذكر لكم موقف )..


في آية قراءنية جدا رائعه وهي دعاء دعى به عيسى وقال ( واجعلني مباركا اينما كنت )

فهل يابنات جربتو حلاوة انو تكوني انسانه مباركه في كل مكان تروحي فيه ؟؟
تنشري الخير والحب والمساعده فيه ؟؟



فقررت اني ..


- انظر للأخرين بنظر وئام .
- دعم ( مساندتهم ) بغض النظر اعرفهم او مااعرفهم وحاقولكم مواقف استعملتها .
- حسن ظن بالاخرين و( حأقولكم كيف احسنت الظن بهم )
- اركز في الصفات الحلوة ( وحأقولكم وحده من تجاربي معها وكيف النتيجة )




حأبدأ اقولكم القصص ومواقفي قبل وبعد اعتمادي (الحب ) في حياتي .

اول موقف اقولكم هو ..
انو كانت معي بفصلي بالجامعه ، بنت ..
للاسف كانو كثير من بنات فصلي مايحبوها لأنو اسألتها كثيره + تخوف احيانا بانها بس تكرر جمل سلبية زي انو يووه الله يستر من لاختبار صعب ، او جزئيته مره طويله وانها خايفة ...

فكانت تسألني كثير اشرح لها وكنت اشرح لها لكن كانت بتطلب اشرح لها دروس مش مسأله فبدأت اطفش وابين ضيقتي .



المهم بعد قراءتي للكتاب ،
في ليلة قبل ماانام فكرت فيها...
قلت طيب لو انا كنت انسانه ماني فاهمه المنهج ، ونفسي وحده تشرح لي ومنحرجه من كثرة الدروس الي ماني فهمتها ..
ايش شعوري لما تجي وحده تشرح لي المنهج كله ؟؟؟

والله حطيت نفسي بموقفها بالظبط واستشعرت السعاده لما احد منجد يساعدني بذي الورطه !!

منجد يابنات نظرتي لها تغيرت وصرت الوم نفسي لما اطفش من كتره مااشرح لها ..

فصرت اشرح لها ولما تعتذر من كثرة الدروس الي ماهي فهتمتها ، صرت اقولها :- وي والله مافيها شئ ..

وانظر لها ولوجهها البشوش وهي مره مبسوطه انها فهمت الدروس ونظرة الامتنان منها ، ونظرة الامتنان ماتجي إلا لما الشخص فعلا انحلت المشكلة الي تؤرقه

ووقتها احس انا بسعاده انو ربنا بيوفقني وحيساعدني بيوم ان وقعت انا بورطة واكون محتاجه شخص يساعدني ..



..

وهي نفسها البنت شاركت بقروبي في عمل عرض بوربوينت لدرس ..
وكنا لازم نشرحه ..
فقالت لما اعطيتها الجزئية الي حتقولها : والله انا ماادي ايش حسوي ، انا مااحس اني اقدر اوقف واتكلم ..


فع طول عملت بملامحي علامة تعجب شدييييد وقلت بصوت عالي لها : لالا مستحيييييييييييل اشوفك احسن مني ..
لانك تحركي يدك بطريقة حلوه لما تتكلمي وماتترددي ابدا ..

مدري انا ايش حأسوي ><"

بس ترا انتي مره ممتازه ، فبطلي تستهبلي !!


فضحكت والابتسامه اترسمت على وجهها ، ووقت العرض ، عرضت بحماس وتحرك يدها أكثر وأكثر وده من فضل الله وحده ، لكن كنت مبسوطه انه خلاني السبب في ذالك وكنت مبسوووطه جدا عشانها ..



....


الموقف التاني

ابوووي ..

قبل مااقرأ الكتاب ..
كان يغيظني احيانا لانو يغضب ع اسباب تافهه جدا .. وسريع الغضب وشتماته سيئة جدا ..


بعد ماقررت القرار بالتغيير واضافة الحب في حياتي ..

( ارمي كل عيوب الشخص ، وافكر في الاشياء الحلوه الي فيه لأحبه )

وقفت اطالع اتأمل فيه وهو يتفرج تلفزيون ..

فصرت اقول : هذا الاب الطيب الي رباني من طفولتي واحسن لي ، وهو الان متقاعد ومريض و يجلس وحده يتفرج تلفزيون وانا واخواتي منشغلين بالدراسه عنه وامي موظفة فتجي متعبه وتنام ..


وانا واخواتي كنا نسمع كلامه ، لكن الحب والاحسان يتجاوز كل ذآ
فصرت انظر له نظرة حب ( حب يعني رأفه ولطف به )

ولومت نفسي : وقلت ياربي ليش ما أونس ابوي ؟؟ ماكنت وأنا صغيرة لما اقوله انا طفشانه بيجلسني ع كتفه ويوديني البقالة ويشتريلي ايس كريم ..
او يوديني المراجيح ألعب فيها !!

ليش ما احسن له ؟؟


فصرت لما اشوفه بيفرج تلفزيون ب ، اسوي شاي واجلس معاه واسولف في شئ هو يحبه ..
ولدرجة اشوف مباره معه واتناقش معه فيها مع اني ما احب الكورة بس احبه ...


صار وهو فاضي ، اجيب له اللاب توب حقي ، لانه مايعرف للكمبيوتر ، فأجلس ادخل على مواقف الأخبار واخليه يشوف مقاطع فديو تضحك او مقاطع فديو للاخبار واعمل نفسي متفاعله معه واصلا اكون متفاعله وهو ينبسط لانو بيشوف شئ ع الابتوب :)


وصرت كمان وهو رايح مشوار ، أعمل له شاي واحطها في كاسة حقت الخروج المغطاه بغطا ، فينبسط مره ويصير يسوق وهو يشربه ..



......
امي :)


امي احبها واسمع كلامها

لكن ..


زودت كل ذآ ..

امي تحب المأكولات والمشروبات الصحية ..
صرت كل يوم اعصر لها كاسة عصير برتقال واجيبها لها وتشربه فمررره تنبسسسسط وتقول ايوا ده مره ممتاز وكله فيتامينات دي العصيرات ..

وصرت اعمل كوكتيل للبيت وانا جوتي كله عشانها ..


صارت لما تجي من الشغل متعبه ، اجي اكبسها وتنبسط جدا ..


واصلا احساننا للوالدين بركه وحسيته فعلا ذآ الشئ ...



ومنجد يابنات صرت انبسط لما اشوف شخص بينبسط من مساعدتي له او ادخال فرحه في قلبه ..


وانصحكم دايم تدعو دعوة عيسى (( واجعنـــــي مباركا أينما كنت ))..
29
1K

يلزم عليك تسجيل الدخول أولًا لكتابة تعليق.

تسجيل دخول

ام لممممممممورة
مررررررررررررررررررة كلامك روووووعة حمستيني اغير ف نفسي
ام لممممممممورة
ودي اعرف اسم الكتاب
نقاء روح
نقاء روح
والله موضوع جميل جدا

الله يسعد قلبك
ايدوليا
ايدوليا
(( واجعنـــــي مباركا أينما كنت )).جزاك الله خيرا
سبحان الله وبحمده سبحان الله العظيم
(رائحة المطر)
(رائحة المطر)
الله يسعدك ويقويك
ويبارك فيك
بجد موضوعك مفيد