جنووون زوجي

السلام عليكم
انا تقريبا من سنتين ماكلمت من اخر مشكله كبيره بيني وبين زوجي.

والحين المشكله من زوجي وليست مني كالعاده

تغيرت حياااتي من ست شهور تقريبا.
صار زوجي يشك فيني. بعد ماكان يبغيب بالايام عن بيته ويثق فيني.
صار يتوهم أشياء مااشوفها
جاه مرض الشك بشكل جنوني. لدرجه ان جوالي قعد معه اسبوع بفتشه. وسكت لأَنِّي واثقه من نفسي. واسايره. بس خفت يحرجني مع صديقاتي.
لدرجه يتوهم. تخيلي نادني بالسياره كانت السياره بحوش البيت. نادني ومسك شعري بقوه. وبيده الثانيه سكروب حق المسامير تخيلي. ويقولي منهو هالرقم. كان كاتب الرقم عنده بجواله بدون اسم وانا مااحغظ الأرقام. قلت مدري. قال هذا رقم تدقين عليه كثير. قال يالله دقي عليه قدامي. وكان ماسك السكروب على راسي. ماتخيلين الرعب اللي عشته. ودقيت على الرقم طلع صاحب البقاله. وأتأسف مني قال خلاص سامحيني. وسامحته وراح شرا مسدس وسكين. قال هذي للي بيخربون حياتي عشت معاه وقت رعب قال انتي متفقه مع احد ضدي.
قلت تبي ترتاح خلاص بغير الرقم ولاراح أحط ارقام احد عندي الا انت وخواتي فقط. قال بنروح بمكه عمره ورحنا وحلفت له قدام الكعبه وبنهار الجمعه أني مظلومه وان فيه احد يخرب حياتنا ماصدقني
هذا الكلام كان قبل ست شهور.




وبعده صار شوي شوي لين كنه اشوى رجع لحياته الطبيعه وتخيلي حملت في هالوقت مع ان كان حملي صعب وعندي ضعف بس قدره الله فوق كل شي. وصار يصلي جميع الصلوات بالمسجد ويصلي قيام الليل


ومن اسبوعين رجع نفس حاله الشك من جديد. صار يقفل باب الشقه علينا. لأننا في ذاك الوقت غيرنا بيتنا الاول طلعني منه اخر الليل يقول معاد اجلس فيه. وأخذنا ذي الشقه صغييره. وصار يقفل الباب علينا. ويتخيل ناس يطاردونه. بالسياره. وصار مقابلني ليل نهار بصلي على طول بالمسجد ويرجع على طول للبيت. أهمل شغله صار مايروح الا للضروره. وإذا راح أخذني معه بالسياره ويرجع على طول.

صار ماينام الليل. يفتح الدولاب وبفتش تحت السرير. ومره شفته صدفه يرفع سرير بنتي ومعه سكينه انهرت وخفت وبكيت قال انا أدور شي. اشوف جن والجن يخاف من السكين.

وقبل ليلتين. صار يحوس الدواليب. يفتش خايف عندي جوال ثاني مخبينه عنه بغرفه عيالي وجبت جوالي أصوره فديو شافني جن جنونه ومسك الجوال من يدي بقوه ودفني بالأرض وجرح وجهي وصار يرافسني بس اشوى ماجا بطني ولا وقف الا لما شاف بنتي تبكي.
وبعدها راح كمل تفتيش بالغرفه قالبها راسا على عقب.
بعدين جاني يقول سامحيني أسف ويحب على راسي. رفضت قلت تحملت شكوكك والحين تضربني وانا حامل لا.

المهم

قال مستعد أنفذ جميع شروطك قلت ابي اهلي خلاص صرت مانام زين خوف وافزفز وعيالي تعبت نغستهم من المشاكل
قال خلاص بكرا اوديك.

جا بكرا قام يماطل. وبتعذر.

دقيت على امي. قلت تعالو خذوني. لأَنِّي ساكنه الرياض وأهلي بالقصيم.
كلمته امي أنكر انه مد يده علي وظلمني أني انا اللي امد يدي عليه. واصارخ عليه.
قلب السالفه ضدي
انهرت من حركته قلت لامي ياتجون تاخذوني يابنتحر ترا.
المهم جت امي بالطريق كلمته قال ليش تجون انا قلت بجيكم. ارجعوو.
يماطل. لما سمع صوت ابوه جاي معهم انقهر وقام يلاعني ويهاوشني والمهم وصلني نص الطريق لهم وهم نص الطريق.

صار يكلمني واسحب عليه. ماارد
ومن ورأي يكلم امي وابوه. يقول بنتكم مو صاحيه. عالجوها. وانا الحين بالمحكمه بطلقها. معاد ابيها.
وهاوشه ابوه.
قال خلاص اجل حللوها هي مريضه ودوها لشيخ وودوها للمستشفى النفسي.
قال ابوه خلاص. بحللها وبعده اجيك انت احللك. قال ابشر
ويقول لهم كلام وانا يراسلني كلام


احس ان الرجل يامريض نفسي يا يأخذ حبوب
مدري وش سالفته صراحه.
مره بيطلق ومره يقول انا بعدك بضيع.

انا حاليا لي اسبوع عند اهلي
وآخر رساله ارسلها لي
يقول انتهينا
وعلى كثر اللي حولك مراح احد بينفعك.
حتى عياله سحب على مصروفهم.
وبنتي خايفه يعاند ولا يجيب ورقه نقلها
وتضيع مدرستها عليها

انصحوني وش اسوي.