شربت خروع والحين فيني طلق قوي

صباح الخير للسهرانات شراتي

قبل كم يوم نزلت موضوع قلت إن الرحم مفتوح عندي 2 سم بس بدون طلق :06:

ماخليت شي ماجربته من أناناس وبابونج وقرفه وزنجبيل وعسل طبيعي ومراميه ويانسون وماحرك فيني ساكن :44: ولازاد الطلق أبدا وكملت أسبوع على هالحاله من الجمعه اللي طافت

مابقالي غير الخروع بعد ماقريت مواضيعكم هنيه عن الخروع وتسهيله للولاده توكلت على الله وقررت آخذه :09: يوم الأربعاء الصبح بعد مانشيت من الرقاد رحت الصيدليه وخذت زيت خروع وسألت الحرمه الصيدلانيه عنه وقالتلي عادي آخذه وهي بعد حامل... وأول مارجعت البيت صليت استخاره لأني وايد كنت خايفه منه مادري ليش...

المهم قلت حق الخدامه تسويلي عصير برتقال بس قالتلي البرتقال مخلص... ومافي غير الفيمتو... قلتلها خلاص أمري لله سويلي عصير فيمتو وحطيت فيه ربع غرشة الخروع :09: أبدا ماقدرت اشربه لأنه ثجيل وما انخلط ويا العصير وع وع وع :09: (بتشوفون هالويه وايد)

قلت في خاطري خلاص يمكن خيره.... ومابدا فيني المغص إلا العصر وعلى طوووول ع الحمام الله يعزكم... وبعدين ماحسيت بأي شي ثاني لا مغص ولا طلق ولا هم يحزنون :06: وبالليل غصبت نفسي على الجماع مع إن النفسيه عدم :06:

ويوم الخميس بعد فكرت فيه بس ترددت مع إني سرت وخذت عصير مانجو على أساس كلام البنات اللي يكتبونه هنيه إنه ماتحسين بطعمه إذا خلطتيه مع عصير المانجو.... ومن الصبح وأنا أحس إن بطني يابس بس طنشت قلت أكيد كالعاده فتره وبيخف..... بالليل تجرأت مره ثانيه اشرب الخروع وحطيته مع عصير المانجو وشربته كله :09: صدق وع وع وع.... صح إني في البدايه ماحسيت بطعمه بس بعدين صرت أحس بلوعه طول الوقت ومافاد وياها شي

بعدين شربت كوب يانسون وبالغصب نمت الساعه 2 وعلى الساعه 2.45 قمت من النوم على ألم قوي في ظهري وبطني... وبعد 5 دقايق مغص فظيع وعلى طول ع الحمام.... يعني إذا صارت ولاده إن شاء الله مابحتاج الحقنه الشرجيه والله إنها عذاب... والحين الألم في ظهري وبطني وأحس فيه كل 7 دقايق تقريبا

أكيد بتقولون وين فيها طلق وهي كاتبه قصة حياتها :hahaha:... لين الحين الألم محتمل مع إنه مضايقني ومب قادره أرقد... المشكله زوجي سافر وبيرجع السبت :icon33: والله إني افتقده بشكل مب طبيعي وساعات أقول ياريتني ما استعجلت واترييت ردته وعقب شرب الخروع... أساسا ماتوقعت مفعوله بيكون جيه قوي

الله يخليكم خواتي ادعولي أولد اليوم وإن الله يسهل علي... أخاف لين الصبح كل هالألم يختفي وكأنك يا بوزيد ماغزيت