@شجرة الدر@ :

أهلين سعودة بالنسبة لي في ولدي الأول جابوه لي من الحضانة ورضاعته معاه وقلت هين بدل ما أغلب نفسي معاه خليه يرضع منها وفي البيت أبدأ طبيعي وخاصة اني كنت خجلانة لأن معي حريم بالغرفة ويوم جيت البيت جلس دحموني يوم بعدي لأنه عنده صفار وطبعا طلع والثدي محتقن ولمن حاولت أعطيه صار يرفس ويبكي ويدفه ما يبغاه لدرجة كنت أحيانا اقفل علي الباب بالمفتاح وانزل ملابسي واجلس أحاول معاه وصوت بكاه يوصل لآخر البيت فعرفت انه مافي أمل خلاص راحت علي لكن استفدت منها مع أخوه الثاني ... أخوه ولدته في نفس المستشفى بس سياستهم تغيرت صار نظامهم ممنوع اعطاء أي رضعات صناعية ..وأول ما يحسون الأم ارتاحت يجيبون لها البيبي يقولون لها رضعيه...وكنت أزعل كثير وانا أسمع الأمهات في الغرف الثانية يصرخون على الممرضات يبغون رضاعات لعيالهم ويقولون ما فينا حليب(وهذا سوء فهم من الأمهات لأن الحليب يزيد تدفقه بوضع الطفل على الثدي ما يتدفق لحاله) أما عني رضعته طبيعي ما شاء الله وجلس بعدي يومين في المستشفى وكنت أروح له مرتين علشان أرضعه (تعلمت من اللي قبله) مع ان المشوار مرة بعيد وانا نفاس بس واجهتني مشكلتين : تشقق الحلمات وهذه تغلبت عليها بعد فضل الله بالمراهم الخاصة بالمرضعات وهي أفالون وبالمرز ...وأظن بالمرز أفضل. والمشكلة الثانية قلة الحليب وهذه أحاول اتغلب عليها بالطرق اللي يذكروها الأخوات في مواضيعهم دائما بالإضافة لوصفة أخذتها من كتاب وهي عبارة عن 20 نقطة من زيت الحلبة توضع في أي مشروب وتشرب ثلاث مرات في اليوم(نفعتني في ولدي الثاني أما الثالث لا يمكن حسب نوع الزيت) بالإضافة لكثرة السوائل زي ما قالت الأخت مسالمة حتى لو ماء وهذا اللي نفعني بعد الله مع ولدي الثالث. طبعا الثالث صرت خبرة ما شاء الله ههههههه...ومع اني ولدت في خاص واعطوه صناعي لكن كنت طول فترة وجوده عندي أرضعه طبيعي والممرضات فرحانين ومبسوطين مني (لقلة من ترضع طبيعي للأسف) وما شاء الله ما واجهتني معاه أي مشاكل إلا قلة الحليب والحين ما شاء الله مع الأكل ما صارت مشكلة... هذرتي كثيرة لكن ما حبيت أبخل عليكم بأي تجارب ولاحظوا ان تجربتي ثلاثية الأبعاد ما شاء الله لأن عندي ثلاثة الله يصلحهم ويحفظهم ويصلح ذرياتكم ويفرح أسعد امرأة بشوفة عريسها أو عروستها صحيح معافى

أهلين سعودة بالنسبة لي في ولدي الأول جابوه لي من الحضانة ورضاعته معاه وقلت هين بدل ما أغلب...