أنا حبيت إنه نتكلم عن موضوع عادات ليلة الحنه أو الغمرة في بلادنا العربيه لأنه أحسه موضوع حلو وفرفوش وحيفيد العرايس
أول شي لازم كل الدول العربيه حتشارك في الموضوع ماأبغى أحدد أسماء دول أخاف أنسى
اللي حتشارك في الموضع لازم تكتب الأتي
1- إسم الدوله
2- المنطقه اللي يطبقوا عادات غمرتها
3-تتكلم عن كل شي متى تكون تتحنى أولا ايش تلبس فين تكون ولكم مطلق الحرية في الباقي
4- الأغاني حقت الغمرة
أنا ببدأ بنفسي بس مو مره أعرف أدق التفاصيل لأني عايشه بالسعوديه
1-اسم الدولة : اليمن
2- المنطقه : أكتر الغمر اللي حضرتها غمر عدنيه وحضرميه شويه قريبه من بعض
3- اللبس :
أول السهر تلبس الدرع اليمني مع طرحه وبرقع قروش واللبس كله لازم يكون أخضر مطرز بالدهبي حتى البرقع دهبي وتلبس بناجر كتير وسلسه كبيرة على الرقبه وحلق طبعا وخلخال ممكن وطبعا حزام دهب بإختصار كل اللي في الدولاب تطلعه للبس :42:
وشبشب في رجلها دهبي طبعا وأهم شي الفل طويل إلين ركبتها وعريض(الفل مره مهم عند أهل اليمن كمان جيزان في السعوديه)
هادا هو الدرع والفل زي كده بس على أطول
وكمان غير الفل في شي إسمه المشموم والله وأعلم إنه هو نفس الريحان ينحط في الشعر
بما إني بدأت أتلكم عن الورد والروايح الطيبه حتكلم عن البخور طبعا في يوم الغمره عندنا العروسه ماتتبخر بالعوده في بخور عدني مخصوص عبارة عن دهن يندهن فيه الملابس الغامقه لأنه يبقع وبعدبن البخور ينحط في المبخر وتتبخر الملابس وتنعاد كذا مره وبعدين يتلف قبل الحنه ويتخبى عشان الريحه تمسك تجي يوم الحنه ياسلام ريحة تجنن
نجي للحنه إذا ماكانت الغمره كبيره تتحنى في نفس يوم الغمرة مع أهلها وصحباتها وسط أغاني وناس ترقص وكده
إذا كانت كبيرة تتحنى قبل حفلة الغمرة بيوم طبعا الحنه الين الكوع والرجل للركبه ( بس البنات اللي عايشين خارج اليمن مايلتزموا بيها أحيانا مايتحنوا وأحيانا شي خفيف بس لما رحت اليمن غصبا عنها تتحنى تقيل)
المهم وفي يوم الغمره خلاص تروح الصالون تسوي رسمه خفيفه عشان البرقع
لكن زمان إيش كانوا يسوا كانوا يلبسوا العروسه زي شرشف السرير كله أخضر مطرز زيزفوها للقاعه وتجلس شوية وبعدين يزفزها للحمام وتدخل وحده تحممها أو تتحمم لحالها وبعدين تخرج تلبس الدرع والدهب وإلخ وتنزف تاني
دحين طبعا لا على تجي مستحمية من بيتها تلبس في القاعه وبس
طريقة الزفه تقوم المطربه هيا وطيرانها ومعاها كل اللي في القاعه أو اللي مره يعزوا العروسه وتزفها زفة عدنيه ولها كلمات معينه موحافظتها مره( الصلاة على الرسول لاإله إلا الله -حلا حلا تستاهل كله حلا تستاهل_ ياناس صلوا عليه ذكر النبي فائده - كله على شانك يافلانه وفلان يهنالكيافلانه) طبعا هادي مقتطفات من اللي فاكرته طبعا الحريم يرددوا مع المطربه إلين توصل الكوشه اللي تكون خضرا كمان وترقص بعدبن الرقص اليمني مع أهلها وصحباتها وكمان خليجي
وبعدين تروح تغير لبس تاني هندي أو خليجي وبعضهم تلاته وتنزف (طبعا هادي الحركه مستحدثه)
التوزيعات:
زي السعوديه ويمكن زي أهل الحجاز لدو ولبنيه وهيل ولبان ونعناع وفوفل وملبس والإضافات الجديده معجنات علىالطلولات
وبعدين أخر شي البوفيه
وعلى فكره دحين صاروا بنات يزفوا عريسهم بلبس شعبي زيها بس أنا أحس إنه تروح طلتها والفكره من الغمره إنه مااااااااااأحد يشوفها إلا يوم الفرح
تقبلو مروري وأنتظر ليالي حنتكم فله مني:26: