ســـــــــــــــــاعدونـي ... أحرجت زوجــي ..!

بســــــــم الله الرحمـن الرحـــــــــــــيم


اشحالــكم يا أخـــــــواتي العزيزات بنــــــــــات حـــــــــــواء
وشخبــــــــــار عيـــــــــــالكم الحلوين ... ربي يحفظهم


المهم ما بطول عليكم وبدخل في الموضوع على طـــــــــــول ...


الســـــــالفه وما فيها اني أعـاني من اهمال زوجي وتخليه عن أهم مسؤولياته ... اللي هم أنا و ولدي ...
كل شي أطلبه منه يقول مشغووول ... ما عندي وقت... بعـدين .. خليه لـباجر ... و و و و.. طااااااااااااااااف

المهم كل شي أبلعه وأتحمل وأســكت .... ما نروح الجميعه الا كل ثلاث شهور مره ... عاادي مب مشكله ما بنموووت
ما نطلع ولا نتمشى مثل الناس .. وان طلعنا ذلنا شهر عليها ونكد علينا الطلعه بعصبيته ... ولو ما صار شي منا يخليه ايعصب طلع حرته بأي شي ثاني .. الشوارع زحمه سواها سالفه وعصب ... واحد دزه وهو يمشي بالغلط قام سبه وعصب وسواله سالفه ونكد علينا الطلعه ... ولده طاح وهو يمشي عصب عليه وقاللي انتي ما تشوفيه ..؟؟:o
المهم خلوني من هــذا كله ..

زوجي الله يهديه جدول حيـاته كالتـــــالي ..
يقوم الصبح يسبح و يركب السياره يوصلني الدوام ويوصل ولده الحضانه وبعدها يروح على دوامه ..
يطلع من دوامه يمر علي وعقب على ولده في الحضانه ويوصلنا على باب البيت و يتحرك وما يرجع الا بالليل ونحن راقدين الساعه 2 أو 3 أو 4 ....كنت أترياه قبل بس بعدها صرت أتعب وما اقدر اتحمل وأعصابي تتعب ...
يعني ارجع من الدوام هلكانه وما أرقد بس أركض ورا ولدي من مكان لمكان .. وأكله وأغسله وأنظف البيت و أغسل الملابس وأكوي و و و .. و بعد ما أرقد ولدي أكون خلاااص هلكت وصرت ما أترياه لاني أضيع وقتي على الفاضي ..:44:

المهم ما علينا من كل هذا ...

ولدي طلعت له حبوب خفيفه في ايده يوم الثلاثاء و لانها كانت بس في أصابعه وكلهم ثلاث حبات بس قلت مب مشكله بس خبرت زوجي علشان أشوف ردة فعله وشفته مب مهتم ..
اليوم الثاني الاربعا .. قامت تنتشر الحبوب في جسمه أكثر وأكثر ... في ريله وايده والكف من برع وداخل ..
فقلت لريلي خل انوديه العياده بعد ما نرجع من الدوام ... قاللي اوكي ... وطاااااااااااااااف
من وصلنا على الباب بعد الدوام ما شفنااااه الا اليوم الثاني ...
يوم الخميس نفس الموال ... الحبوب زادت .. حرااام والله حتى قاع ريله من تحت ...:unhappy:
تخيلوا انه طول الليل يقوم يبكي بسبب الحبوب لانه تسبب له حكه ... والمسكين طفل ما يتحمل ...
فقلت له الصبح تعال شوف كيف صارت الحبوب في جسم ولدك ...
لااازم انوديه العياده اليوم ضرووووري .... لاني ما اعرف شو هالحبوب ولا شو سببها .. وأخاف تأثر عليه أكثر ..
هذا غير انها معذبتنه حبيبي .. كله اييني ويقوللي ماما واوا .. ويراويني ايده فديته .. يكسر خاطري والله ...
المهم الخميس بعد الدوام اتصلت به العصر ما رد عليي ... وهو قاللي انه بيوديه العياده العصر ...
والمغرب اتصلت رد علي وقاللي أنا مشغول واحين أنا بعيد ... بيي عقب .. وبند ...
وانتظرت وانتظرت ...... صارت الساعه 9 وهو ما اتصل بي .. وقلت ما بتصل به لانه فعلا قهرني ...:o:mad:
وخلاص رقد ولده وأنا بعد رقدت وما رجع الا الله العالم متى .. المهم نحن كنا خلاااص راقدين ...
وهو طبعا ما فكر حتى يتصل يعتذر عن انشغاله أو يقول ما ينسير اليوم ولا أي شي ... ورجع كالعاده للنوم وبس ..
المهم أنا كنت يالسه مع أمه بعد المغرب وخبرتها السالفه وراويتها الحبوب في جسم ولدي وقالت حرااام لازم تودونه علشان تعرفون من شو ....

فعلا الواحد يخاف .. يمكن تكون مرض أو حساسيه أو عدوى .... والمسكين حرام يقعد يتعذب ويعاني والحبوب تنتشر أكثر و أكثر ....

اليوم عاد الجمعه .. وهم متعودين بعد صلاة الجمعه يتجمعون العيله كامله ...
عاد أنا بعد الغدا كلمت زوجه أخوه الكبير وراويتها الحبوب في ايد ولدي وقلت لها ما تعرفين شو هالحبوب ؟؟؟
قالت لي اتحذري ترى في مرض منتشر في الكويت وهو جذه يمكن عدوى ... فقالت ليش ما وديتوه العياده
فقلت حقها ليش ريلي يفضى حقنا .. من يومين وأنا أقوله يودي ولده العياده ويقوللي اوكي ويطلع وما يرجع ..
قالت لي أنا بكلمه .. ويوم شافته قالت له شوف اليوم لازم تودي ولدك العياده حرام عليك الحبوب مقطعه جسمه ..
عاد زوجي عصب قالها اذا كنتي وايد مهتمه وديه انتي ... ردت عليه وقالت له ما عندي سياره والا بوديه ...
المهم زوجي ما عجبه الكلام وعصب وشل عمره وطلع من البيت ..
أنا أعرف انه انحرج لانه الموقف صار بوجود أخوانه ... وهو ما يبغي يبين لهم انه مقصر أبد .. :hahaha: ليش هو مخلي فيها شي ....

كل اللي في البيت شايف وضعنا ويعرفون اني ما أطلع الا اذا أهلي مروا علي وطلعوني وياهم ...


أحين ما أدري شقايل أتصرف ...

أتصل به وأسوي عمري عاديه وأقوله متى بتودي ولدك العياده ...:16:
والا أسويله طاااف وأروح مع أي حد ثاني العياده ... للعلم ترى أهلي بعيد عني والا كنت رحت معهم من البدايه ..
وأنا مب متعوده أروح مع أي حد من أهله .. أنحرج ...
شكلي بروح بتكسي :06:

والله صج مقهـــــــــوره ...

ما أدري ليش متزوجه .. بس متحمله المسؤوليه بروحي ...
ما أحس انه في حد يشاركني في تربيه ولدي أبداااا ..
ومع هذا يقوللي انتي كله تشوهين صورتي جدام أهلي ..
مع اني والله ما أقول عنه شي بس الكل يشوف ويحس ..
لاني عايشه مع أهله في نفس البيت ويشوفون كل شي بعينهم ويشوفون انه ما يرجع البيت أبداا ولا ياكل أي وجبه ويانا الا نااادر جدا ؟؟؟


الله المســـــــــتعان ....

ساعدوني بليــز كيف اتصرف .. أنا ما يهمني غير ولدي كاسر خاطري والله ... عمري ما حسيت انه مثل باجي الاطفال .. لا يوديه الالعاب ولا بطيخ .. ولو قلت له شي ترى يقول كل يوم ألعاب شو .. تراني من شهرين مودينه الالعاب ... طبعا أنا اللي ألعبه وهو ولا على باله ولا ينزل ويانا الا ناادر لو حس انه فاضي يلاعبه ...


بانتــظاركم ولا تخذلوني بــــــــــــــليز ...