ما تستعملي الماجي بطبخك.. تعالي قولي لي ايش بهاراتك

والله ياالغالية انا احيان اطبخ من غير ماجي
احط ملح وبهارات ويطلع الاكل مرررة حلو
والبصل والثوم
احط الزيت بعدين البصل والثوم بعدين الدجاج بعدين البهارات والملح واخلطهم مع بعض
واحط المويه لما اجي واشيل الدجاج اصفي با المشخل المويه من البصل والثوم بعدين احط الرز
اتمنى اني افدتك
لا تنسين الدعاء

حبيبتي الطعم يعتمد على طريقة الطبخ مو بس المكونات...انا الصراحه عندي بهارات اشكال الوان غير البهارات العاديه اللي عندنا...مثل..بهارات هنديه للبرياني((مهران)) تحطينها هي بس وتخلي الاكل جناااان..وعندي المرقدوش والكرفس الناشف والبابريكا وملح البصل وملح الثوم وملح الدجاج...يعني لو ماتبين تحطين ثوم استخدمي ملح الثوم يعطي نكهه حلوه..

وطريقة الطبخ..مثل طريقة ام يارا.. وحاولي تحطين بقدونس في آخر الطبخه عشان النكهه

وان شاء الله اكون افدتج

للرفع

نستخدم بهارات بحرينيه مشكله او بهارات هنديه مشكله
واساس كل طبخه عندنا
شوية زيت وبصل وثوم وكزبره وفلفل رومي وطماطم
شوية قرفه على حبتين هيل على ورق غار على قرنفل عشان يطيب الأكل
بعدين بنضيف ملعقة بهار مشكله من البهارات البحرينيه او الهنديه ..
وشويه ملح ونستخدم ملح الخشن
واذا بتستغني عن الصلصل اضربي الطماطم مع شوية مويه بالخلاط وبيطلع لك صلصل من غير اضافات ثانيه ..
والله يشافي زوجك ديري بالك عليه

بالنسبة لي..

نادراً ما أستخدم الماجي..

أستخدم الفلفل الأسود.والفلفل الأبيض..

وأستخدم الشبت وجوزة الطيب..

هيل ودارسين و ورق غار..وقرنفل..

أحياناً أستخدم السماق..يعطي الأكل شوية حموضة على شي عجيب مدري شلون أوصفه..

وأستخدم البهار البحريني المخلوط...

وأستخدم ثوم..وممكن ثوم مبشور يصير أخف من الثوم الطازج..

طبعاً الكزبرة والبقدونس ما أستغني عنهم..

وممكن تطحنين شوية من الفلفل الحار..مع الطماط..

الله يشفي زوجك..وما عليه شر يارب...وأجر وعافيه له..وما يجيكم شر..


في أمان الله..