كيفكم حبيباتي
البارح كنا متجمعين عند الوالده الله يحفظها انا وحريم اخواني وطبخت لهم رز مبخر على طريقتي
وكان مره لذيذ فحبيت انزل الطريقه بالصور وتعتبر هذه اول مشاركة لي في قسمكم المميز والرائع وان شاء الله ينال استحسانكم
بسم الله نبدأ
قولوا معايا استغفر الله الذي لااله الا هو الحي القيوم واتوب اليه
1. نقطع الدجاج انصاص ونغسله بالليمون والملح ونجهزه على جنب
2. نغلي ماي حار بالقدر ونضع الدجاج ونضيف عليه (هيل, قرفه, قرنفل, مكعبين ماجي, ملح حسب الحاجة)
3. بعد مايستوي الدجاج نطلعه من القدر ونخليه بالصينيه على جنب عشان ندهنه وندخله الفرن عبال نطبخ الرز في نفس مسلوقة الدجاج.
4. نحط الرز على مسلوقة الدجاج ونخليه يستوي على نار هاديه طبعا انا استخدمت الرز (مزة الرشيد)
5. نجهز خلطة الدجاج اللي راح ندهنه فيها وهي (معجون طماطم, ملعقه سمن فارم, ملعقه ماء كادي ذايب فيه صفار الزعفران, ملح) نخطلها مع بعض وندهن فيها الدجاج وندخله ع الفرن لين يتحمر الوجه.
6. نجهز لحم مفروم ونحطه ع النار مع رشة ملح وفلفل اسود ونطقطقه لين يستوي ونخليه على جنب.
7. نجيب لوز بجلي نسلقه ونقشره ونحمصه بالسمن الفارم مع الزبيب ونخليه على جنب
8. نحط فحم ع النار ولاصار جمر نجيب صحن او طاسه صغيره نملاها زيت ونحطها فوق الرز وقبل مانحط الفحم بداخل الصحن نحط ملعقتين اكل ماي كادي مخلوط بصفار الزعفران ونرشه ع الوجه وبعدها نطفي الجمر بالزيت وعلى طول نغطي القدر بالقصدير ونكتمه حوالي 5 دقايق
9. بعدها نكشف القدر ونشيل الجمر ونجيب صحن كبير نغرف الرز ونرص فوقه الدجاج ثم نرشه بالمفروم ونزينه بالبيض المسلوق والطماطم والليمون وبالاخير نضع فوقة المكسرات اللي حمصناها بالسمن الفارم (اللوز البجلي والزبيب) وباقي السمن الموجود مع المكسرات ( اللي يعاني من الكوليسترول يلغي فكرة السمن ويحمص المكسرات بزيت نباتي عادي) وبكذا اكون انتهيت وبالعافيه على قلوبكم يارب
تسلم ايديك