قصه ولادتي بـ ( مستشفى الأمير سلطان للقوات المسلحه )

السلام عليكم ورحمه الله وبركاته ..
يآآرب سهل لكل حامل ويسير ولادتها وقومها بالسلامه يارب

بنات بكتب لكم هنا قصه ولادتي المعقده وتجربتي وبختصر لكم في الاخير نقااط استفدتها من هالتجربه .. و مراجعتي وولادتي كلها كانت بمستشفى الامير سلطان للقوات المسلحه ( الله يغفر له ويرحمه ) احداث القصه في رمضان السنه الماضيه أول ليله منه .. ولاني احبكم واحب اشارككم كل شي فصلت لها لكم كم كل النواحي ( مشاعري - حالتي الصحيه - حاله زوجي واختي وطبيبتي ) وبسم الله نبدأ

كان حملي بكريه والمعروف ان اول حمل صعب وعسير عند اغلب الامهات .. وهكذا كان حملي .. سبحان الله عندي ماشاء الله اخوات واخوه يتعدون بعددهم اصابع اليدين ( ماشاء الله لاقوه الا بالله ) وكلهم صاحبات باع في الحمل والولاده يعني امهات قديمات لكن حملي كان فريد على مستوى العائله .. سبحان الله حجم البطن كان كبير جدا جدا حتى بعض الناس كانو يشكو اني حامل بتوأم و مخبيه عنهم .. فوق البطن الكبير جدا انتفخت انا بشكل كبير جدا تخيلو يا بنات اقسم بالله في الاسبوع الواحد ازيد اربعه كيلو حتى الدكتوره كثرت مراجعاتي خلتها كل اسبوع لانها منفجعه من الزياده وتقولي انا مش شايفاكي سمينه اوي الزياده دي فين بتروح فكانت خايفه علي من الضغط والزلال جسمي تنفخ رجلي سارت بالون لكن والحمدلله مافيا زلال او ضغط فكانت حاطتني تحت المراقبه كل اسبوع حتى بالشهر التاسع قالت لي بنومك لاني خايفه عليكي بس انا رفضت ووعدتها التزم بالمراجعات وفعلا كنت عند وعدي ..

والحمدلله عدى الحمل على خير رغم انه كان متعب جدا جدا الله لايوريكم ماشفت من الم الظهر وصعوبه المشي والحركه وكنت اعد الايام لجل ارتاح ودخلت التاسع ومرر ببطء شديد حتى حسيت إني طول عمري حامل << هالاحساس يجي لكل حامل ترا

وانتهى التاسع على خير والحمدلله وبديت بالعاشر وانا ولا حتى نص طلقه ولا ألم ولا مغص ولا حس ولاخبر و كنت اراجعهم بانتظام ومن بدايه ما دخلت العاشر سرت اراجع عند الاستشاري ( عبيد الحربي ) الله يديه العافيه وكان يطمني انو مافي خطوره والامر طبيعي ولانه صديق لزوجي وصف لنا طلعه يسميها طلعه الحوامل ههههههههه قالي روحي امشي فيها طالعه نازله كـ تحريض طبيعي للولاده و فعلا رحت وطلعت ونزلت فيها الين داخ راسي ورجعت البيت و برضو نفس الشي لا حس ولا خبر ومرت الايام وسبحان الله من دخلت العاشر سارت الايام تجري لدرجه اني عديت 14 يوم بالعاشر ولا حسيت هههههه وبزياده لان الدكتور مطمني فريحت بالي ..

وفي اليوم الـ 14 بدأ الاكشن ههههههه

رحت للمستشفى زي الحلوين على اساس مراجعه ( عندي موعد مسبق ) والاستشاري كان مو موجود فدخلوني عند دكتوره مقيمه ( مقيمه يا بنات بالمنصب الوظيفي مو تحسبو مقيمه انها اجنبيه هههه بس تراها فعلا أجنبيه ) المهم لما دخلت وتسألني الاسئله المعتاده .. فس الاسبوع الكم و و ولما قلت لها عن الوضع شهقت وفتحت عيونها مفجوعه .. تقولي انتي متأكده ؟ و جلست تحسب معي حملي وتشوف تبي تتأكد ويوم تأكدت انو كلامي صح جلست تخاصم وتهاوش ( ايش مستنيه أنتي ؟ منتي عارفه خطوره الوضع وانو ممكن الطفل يتبرز على نفسو ويختنق ببرازه ومن دا الكلام ) عاد انا فزيت قلت لها دكتور عبيد قال لي عادي .. قالت لي مو عادي مستحيل يكون قال لك عادي الله يسامحها كذبتني
المهم وهي تقولي هيا على سرير الكشف وسوت كشف لقت منسوب المياه قل << حشى بحر مهو مشيمه ههههه
عاد هنا من جد خافت وقالت انتي كيف خوافه ولا لأ ؟؟ انا هنا فهيت شدخل !! قلت لها لا عادي قدعه ههههه مدريت وش مستنيني هههه .. المهم وهي تقولي طيب انا بكشف عليك من تحت بشوف هل مفتوح او لا قلت لها طيب واتهيأ على الوضعيه وكشفت آآه من الكشف ياويلي ويلاه اطثر شي يعقد في الولاده وقالت لي مو مفتوح بس انا الحين بفتح لك اياه وبحرض لك الولاده .. انا عيوني سارت كذا :eek:

آآه من التوسيع اخس من الكشف كنت اشوفها تروح عند طاوله بعيده وتقربع بأغراض بس تحاول تخليني ما أشوف ايش بيدها وفعلا ماشفت وتدخل يدها وتوووووسع وانا آآآآه وصريخ اعتقد المستشفى كله سمعه اول مره احسني اصارخ من قلب و زوجي المسكين عند الباب حسبني ولدت ههههههه ..

المهم لما خلصت وانا اقوم اكمل بكا هههههه ومسحت بمنديل لقيت دم نازل قلت لها قالت اي ح ينزل دم اكييد المهم وقالت لي انا الحين سويت لك تحريض ولاده وانتي الحين بتبدين تحسب بطلووق فلا تخافي .. بكره الصبح الساعه 8 تكوني هنا .. 8 مو بعد ولا حتى بدقيقتين ولو ماجيتي ما تلومي الا نفسك .. تخيلو يا بنات ورب العباد هذه كلامها بالحرف :44:
( عذرتها شكلها حست اني بحط رجلي ولاعاد بخش المستشفى من الصريخ )
طبعا الوقت دا كان آخر العصر قريب المغرب .. المهم رحت البيت ونمت وكانت ليله رمضان ( بكره بيبدأ الصوم ) المهم نمت وصحيت على 10 بالليل وأخدني زوجي وطلعني نتمشى بالسياره ونشتري عشى وله هو سحور وكدا طبعا الوقت دا كله وانا طلوق متوسطه بس كنت حزينه وخايفه وحب يخفف عني مسكين حتى هو كنت اشوف الخوف بعينه بس كان يخفف عني ومايبين .. المهم تعشيت ورجعت البيت ونمت ساعه الا الفجر مأذن صحيت ودخلت الحمام وتروشت وحلقت وكنت قبل منظفه البيت وجهزت شنطه البيبي ولما جات سبع ون صحيت زوجي يلا نمشي وهو يماطل وانا اعجل به ابي اكون هناك 8 بالضبط هههه والله ارعبتني والحمدلله 8 بالضبط وانا هناك

ودخلت على طول ودوني قسم الانتظار وبدو يجهزوني من شرنجه وكشوفات سونار وكشف نبض الطفل وتحليل دم وسكر وضغط حتى تخطيط قلب سوو لي ومن هنا منعو عني الاكل معني مافطرت على عشاي امس وقالت لي الطبيبه المسؤله قومي تمشي بالممرات عشان يحمى الطلق وفعلا انا واختي الله يجزاها الجنه نتمشى بالممرات ما جلسنا وطبعا الطلوق مستمره معي متوسطه القوه وأعطتني رطب بالدس وقالت لي كليه وأكلته وكانت تقرا علي ايات المخاض وانا ارددها معها وعلى هالمنوال ألين الساعه 2 الظهر قالو يلا على غرفه المخاض << ياربي يا اسمها يخوووووف:06:

وكانت الطلوق يوم دخلت المخاض كل ربع ساعه .. الله يصلحهم مستعجلين علي << ما ألومهم خايفين ع البيبي
اول مادخلت غرفه المخاض ويبدأو يشبكو المغذيات حطو لي بيديني الاتنين واحد لطلق الصناعي و واحد مدري لايش وتجي دكتوره عجوووز الله يقلعها ما تراعي الخوف اللي فيني تكشف علي وقت الطلق وانا ابكي من الالم تعرفو كيف الوحداه مع الطلق تشد جسمها كلها وماتحب احد يلسمها وهي لا جلست تصارخ علي وتفتح رجلي بالقوه زين ما ضربتني المهم المفتوح 2 سم فقط وهي تقول لي يلا بشق كيس المشيمه كـ تحريض زياده للولاده وشقته بس ابددا ما حسيت فيه وطبيعي لانه مو عضو بجسم الحرمه ومافيه اعصاب انا هنا دخلني خوف من جد .. المهم ويبدا مشوار المياه اللي تكت والحمدلله من شقت الكيس طلعت شفتها انتهى الحمدلله ذفت عن وجهي قاسيه هالدكتوره


ويلا مع الطلق الصناعي بدا الطلق يحمى وانا ابكي واقول للدكتوره حقتي ( نفسها اللي امس سوت لي تحريض ولاده وقت الكشف ) تكفيييين ابي مسكن قالت لي استني يا حلوه لسى دوبك بأول المشوار لو اعطيتك الحين بعدين لما يحمى الطلق بجد مقدر اعطيك احسلك اجلي لبعدين قلت طيب وامري لله على الساعه 6 المغرب بدا يحمى اكتر واكتر انا قلت خلاص جا وقته اعطووني مسكن وتمسكني ممرضه فلبينيه ( الله يجزاها الجنه ) وتهدي في وتمسح على راسي وانا والله سرت زي الطفل بين يدينها اطاوعها وتمسك يدي لا جا الطلق متحمله تعصيري بيدها الله يسعدها المهم راحت دكتورتي تفطر واشوفها عندي تعزم الممرضات على فطور جايبته من بيتها وانا ذابحني الجوع << زين ما تسممو من نفسي هههه

المهم وتروح تغيب ساعه الله يصلحها وانا ألتوى من ألم اطلق سار اسرع واقوى ابغى مسكن وانادي على الممرضات نادو الدكتوره ولا حياه لمن تنادي آآه بس وبعد الساعه جتني تنخش سنونها بلسانها من الفطور هههههههه وانا مقهووره متألمه بمووت من الالم حتى المغذيات سارت تعورني بيدي من قوه ما اشد يدي وقت الطلق وانا اقولها جا وقتتته هاتيه ههههه وهي تعطيني اوكسجين وانا اقولها ذا مسكن ؟؟ تقول دا مو مسكن مافيه مسكن عندنا لكن دا بيدوخك وبيحافظ على تنفس الجنين لانه هو كمان يعاني وقت الولاده ويتألم و آآه آخرتها مافيه مسكن قلت لها يالله بطلع من عندكم طلعوني بروح مستشفى خاص يريحوني قالت ما نطلعك وتطالعني بقوايه عين قهرتتتني فوق اللي انا فيه قلبي احترق حسيت ببكي واتصل بزوجي ( راح يفطر ببيت أمه ) اقوله تعال طلعني حتى مسكن ماعندهم يلا بنروح المسشتفى اللي كنا مخططين اني اولد فيه ( كنت مخططه اول بخاص لكن لانهم لغوصو فيني خفت لجهلي وقله خبرتي والحمدلله كان خيره ) وهو يجي طيرااان ويدخلونه عندي واتصل بأختي وهو جاي بالطريق خوفها وفجعها ( هي كمان راحت تفطر ببيتها ) وجات هي كمان طيران ودخلوه عندي وانا أمسكه يده وأبكي اقوله طلعني مابي هنا ابي مسكنات ابي ابره ظهر ابي عمليه والله والله اني كنت شايفه الموت يبنات ضغطي نزل 42 وبغيت اروح فيها لكن ربك ستر دا كله وتوسع الرحم بطيئ جدا يعني طلق حامي وسريع بدون استجابه من الرحم آآه بس .. المهم زوجي شفت الرعب بعيونه وحاول يهديني شوي وخرج من عندي وانا اناااديه وابكي ( عرفت بعدين انه طلع برا وبكى الين قال بس ولما جات اختي وصاها علي وراح بيت امه وسوا مناحه هناك حتى خالتي واخواته مرا انفجعو )

المهم جات اختي ودخلوها دقيقتين بس وتحاول تقرا علي وتوصي الدكتوره تقرا علي وتسمي وانا داايخه من الاوكسجين ولجا الطلق صحيت وبكيت وشديت يدي لين احس بتنفجر عروقي .. المهم طلعو اختي واستمر على هالحال الين تقريبا 11 بالليل كل ماله الطلق يحمى ويسرع و الرحم استجابته بطيئه جدا جدا ما توسع الا 4 سم رجع لي زوجي بعد ما استجمع قوته وراح للاستشاري اللي بألو القصه وكلمه عن حالتي ولان الاستشاري مو مناوب قاله اقترح على دكتورتها القيصري وحاول يهدي زوجي جاني زوجي وكلم الدكتوره بس مارضيت وانتو ادرى بعناد الدكتورات المهم وانا ماصدقت سمعت سيره القيصري رجيتهم كل دقيقتين اصيح ابي قيصري خلاص انا بموووت وكان ردها الوحيد لييش قيصري طفلك نبضه ممتاز والحمدلله مافيه خطر حتى نقرر قيصري وانا اصارخ عليها ليه هو بس طفلي البشر انا ما احس انا مو مهمه انا مافي خطر علي وكان ردها انو تسكت وتحاول تشغل نفسها << الحق انها صبوره والله يا إني شرشحتها بالكلام وأذيتها أذى حتى كانت مراعيه ما تكشف علي وقت الطلق تراعيني والكشف طبعا ما اقولكم كل نص ساعه حتى بالاخير سبلت المنطقه هههههه مفتوحه للي يبي يكشف ماعاد فيني حيل ارادد عن نفسي طبعا ذا كله بدون مسكن فقط الاوكسجين اللي يدوخني وقت مايروح الطلق ( مدري شفايدته بالنسبه لي اما بالنسبه للطفل كانت تقول دا ينظم تنفس الطلفل حتى لا يتعب )

وعلى هالحال وانا ابكي واقول قيصري ونفس الرد منها حتى بالاخير سرت ادعي بنفسي ان نبض ولدي يضعف عشان يقررو قيصري ( يارب سامحني ) واستمر الحال زي ماهو طلق حامي جدا ورحم غير مستجيب للطلق .. شوي الا يبين بالجهاز اللي كرهت صوته انه نبض طفلي ضعف انا هنا انفجعت بس فرحت من جواتي :hahaha: أدري خبله بس من جهلي والله المهم وتجرون الممرضات يجيبون جهاز ثاني بيتاكدون وتشبيك يا عم سرعه سرعه ويبن النبض طبيعي ههههههه يعني مجرد تخريف الجهاز الاول ويا فرحه ماتمت هههههههههه وانا ارجع اصيييح وبانت خيبه الامل بوجهي هههههه واستمر الحال الين 2 بالليل يأست الدكتوره مني وقالت انا لازم اجيب الاستشاريه تشوفك << توك يا المقروده
وتتصل بالاستشاريه ببيتها تستدعيها باسم حاله ولاده متعسره ( هالمعلومه من زوجي اخدتها ) وساعه كمان على ماجات الاستشاريه وانا ادعي يارب تقرر عمليه خلاااااااص شفت الموت طلووق شديده ع الفاضي .. الدكتوره اللي عندي توقعت انها تقرر عمليه عشان كدا جابت لي استشاري التخدير يسألني اسئله عشان البنج وكدا وسوت لي اختبار التحسس من البنج وتأكدو اني ما اكلت شي ابدا عشان ما يصح اكل قبل العمليه قلت له اصلا ما اكلت من البارح وحتى و اكلت انا استفرغت ثلات مرات وانا في الطلق << من قوه الالم


وجت الاستشاريه وهي كمان تعرف زوجي وشكله مكلمها قبل تدخل علي انو خلاص قرري قيصري واول ما دخلت عندي مسكت يدها بغيت ابوسها ههه قلت لها تكفييين قرري قيصري قالت طيب خليني اكشف للمره الاخيره عشان ما اقرر شي ماله داعي وكشفت وطالعت فيني وقالت الكلمه اللي انتظرتها 12 ساعه هههه خلاص بنعمل لك قيصري والله اني بغيت :icon28: هههههههه جو الممرضات يلبوسوني لبس العمليات وجابو سرير المتحرك وانا بحاله الله يعلم فيها هنا جات ممرضه فلبينيه صديقتي احببها الهه يسعدها ومسكت يدي ودعت لي وانا شايفه عيونها مرره حمرا من ورا النقاب ( ماشاء الله ملتزمه حتى حجابها زينا ) اتاريها طلعت تبكي عشاني طلعت شبعانه بكا برا عند زوجي و زوجي يبكي معها وشالوني لغرفه العمليات و زوجي يمشي وراي شايفته والخوف مالي عينه حتى هو عيونه حمر واختي كمان معي وتقرا علي وتدعي ..

دخلوني الغرفه وبنجوني تبنيج موضعي ولما اداني الابر بظهري كنت مبسووطه حتى ما تحركت مع النغز حتى الدكتور انبسط مني هههه مدرى ان الابر مناي المهم سدحوني انا احرك رجوله واقوله دكتور لسى فيني احساس برجولي ما بنجتني زين هههههههه قال لي اصبري شوي يبدا المفعول خلا دقيقه الله يسعده حتى هو طيب وصبور وكل شوي اقوله شوف اقدر احرك اصابيعي ههههه ناحلته حتى هو ما سلم مني وشوي شوي بدا الاحساس يروح الين اختفى تماما وحسيت بدفا في جسمي دفا راااااااائع بعد الالم والعذاب اللي اول حسيت اني مبسوطه جدا وحسيت بنشوه رائعه هههه اقسم بالله اني حسيت بنشوه اشك انها مثل نشوه المدمنين بعد البنج سرت اضحك مررره ومبسزطه واسولف مع استشاري البنج هههههه وهو معطيني وجه هههه سألني عن تخصصي وكدا وقال لي ترا زوجك انسان مرا طيب وحنون وانا من النشوه اللي حاستها رديت عليه رد مدري كيف جاني قلت له ( الطيبون للطيبات ) ههههههه يعني انو حتى انا طيبه ههههه حتى هو انصدم من ردي وسكت ههههههههه هذا كله اثناء العمليه الدكتوره قاعده تشقشق فيني وانا اسولف واضحك ولما طلعو البيبي و وروني اياه انه ولد قال تبين بنج كامل ؟ قلت له ايه قال حااضر اللي انتي عاوزاه ح نعملو احنا هنا بخدمتك ههههههه وبنجني كاامل ومدريت عن نفسي الا انا بغرفه مابعد العمليات والحمدلله .. فقت تبدا الاتصالات تجيني واثنين من اخواتي جوني مع انه كان الساعه 3 بالليل وانا منشششكحه ومبسوطه حتى من البسط ما وقفت قرقره والممرضه تقولي لا تتكلمي كثير عشان لايدخلك هوا ههههههههه .. والحمدلله على كل حال الطب نعمه وهبه راااائعه جدا من رب العالمين .. والعمليه متعبه اول اسبوع بعدين يخف الالم جدا وطبيعي يجي الوحده احساس انها لو تحركت راح ينفتح بطنها ههههههه

الحاجات اللي استفدتها من تجربتي هي :
1- ان التساهيل من رب العالمين وحده وما نفعله بغرض تسهيل الولاده ما هو الا اخذ بالاسباب
2- بعد تجربتي قدرت أمي جدا جدا جدا وقلت لها يالله يمه كيف كررتي هالتجربه 13 مره لاقوه الا بالله صدق اننا لو نشيلك على ظهورنا مانلحق جزاك ( الله يرحمها ) أدعو لها بالرحمه
3- لازم تقوي قلبك وتعرفي انها تجربه مؤلمه حزتها لكن تبقى ذكرى جميله والحمدلله على نعمه النسيان
4- لاتهملي كشوفاتك وأختاري المستشفى بعنااايه

شخصيا ما اعتقد راح اكرر التجربه بنفس المستشفى الا ان يشاء الله - وانا الان اكثر خبره ووعي بالولاده وما اخفيكم اني متعقد جدا جدا مدري كيف بولد ثاني ..

موقف عرضي : اول مادخلت غرفه المخاض بالغرفه اللي جنبي كانت وحده تولد المهم اول مادخلت بدأت هي تصارخ هههه والله يا صراخها يخوف ويضحك بنفس الوقت تعرفو كيف صوت الجمل لقام يرغي هههههه وانا بعز الالم جلست اضحك وابكي بنفس الوقت ضحكت من الصوت وبكيت لان دقيقتين الا وانا اسمع صوت البيبي جدا موقف مبكي في حالتي والله اني تمنيت اني مكانها وغبطتها جدا ..

ادري طولت هذره سامحوني .. أحبكم في الله


دعواتكم لامي بالرحمه والمغفره ولي بالصلاح والهدايه