البــــــــف على طريقتنا نحن اهل المدينة .. يامرحبابكم

السلام عليكم ورحمة الله وبركاته
حبيت افيدكم بطريقة عمل البف وخصوصا ااننا على ابواب رمضان
والله يبلغنا رمضان بخير وصحة سلامة اجمعين يارب
واعذروني على طريقتي في الكتابة
وححاول اكتب لكم كل شي بالتفصيل الممل لاني ماراح اقدر امر عليكم كل شوية




العجينة
الكاسة الكبيرة قصدي اللي نشرب فيها مويه
الكاسة حقت الشاي العادية مو ابو يد (تسموها بياله اعتقد لا مو هذاي)
انا اقصد الكاسة اللي بحجم كاسة جبنة كرافت الصغيرة
المقادير
4كاسات كبيرة دقيق
ا م ص ملح
ا م ص نشاء
ا ونص كاسة كبيرة موية (لاتنقص ولاتزيد)
كاسة شاي الا ربع زيت زيتون

وتعجن وتعجن حتصير قااااااسية ترا انا اخلي زوجي يعجنها مااقدر عليها

ولاتقولوا عجانه تر حتكسرها لكم نبهتكم

واتركوها ربع ساعة متغطيه وارجعوا اعجنوها تاني واتركوها وارجعوا اعجنوها اوكيه

دحين نجي للحشوة

مثلا كيلو لحم مفروم ناعم
بصلتين متوسطة مفرومة نااااااااااااااعمة مرة
ا م ص فلفل اسود
ملح حسب الرغبه

طيب

ولعي ع القدر خليه يسخن
كبي البصل عليه الين تنشف مويته ويدبل
ارمي عليه المفرومة
وخلي النار عاليه الين تطلع موية المفرومة وبعدين وطي النار وغطي القدر
وخليه يستوي على مهلو بس لاتتركيه كل شوية قلبيه

ولما خلاص تنشف مويته وتستوي المفرومة حطي الملح والفلفل

خلاص كده جهزنا الحشوة وبردت هيا دحين قطفي بقدونس وافرميه ناعم ناعم واخلطي مع المفرومه

نرجع للعجين

في طريقتين عشان نحشيها الاولى صعبه وتاخد وقت وتطفش وانا عمري ماسويتها بس هذي الطريقة للي ماعندهم ماكينة الفرد حقت العجين

وهي انك تكوري العجين كور كور صغيرة قد بعض

وبعدين كل وحدة تفرديها بالنشابة وتحشيها ووتقفليها وبعدين تدعسي على اطرافها بطرف اصابعك عشان تتقفل كويس وفي روله زقزاق تقصي اطرافها فيها
وهكذا الين تخلصي الكميه

الطريقة التانيه

للي عندهم الماكينة ياسلااااااااااااااااام تسويلك 50 حبة في ساعه

تمسكي العجينه تقصي وصله قد كفك وتفرديها شوية بالنشابة

وتحطيها في الماكينة على رقم 1

بعدين على رقم 3

بعدين على رقم 4

والا تشوفي العجينة صارت طويييييييييييييييييييييييييييي ييييييلة

فتقومي تفرديها وبالنظر كده تقسمي العجينة دي بالنص

تقومي تحطي الحشوة ع العجينة جنب بعض كتلة كتلة بينهم مثلا تلاثتة اصابع فرق المسافة

وتقومي تغطيها بنص العجينة التانية

وخلاص تدعسي بطراف اصابعك وتقصيها بالزقزاق

وكده حتكوني سويتي تقريبا 25 حبة << زيي

بعدين تكوني قادحة الزيت وترميهم حبة حبة وبسرعه تشيليهم يادوب لونها يصير دهبي وتتنفخ

وترا لاتقولوا كتير والله والله 50 حبة لعيلة فيها 4 انفار يادوب يكفوا

تراها خطيرة تموووووووووووووووت وبس تاكلي منها ماتشبعي


.............................. ..

بخصوص الماكينة

هي ماكينة فرد العجين الايطاليه تنباع في البطحاء من عند محلات الاجهزة المنزليه

وفي ماطور كهربائي تشتريه لوحده احسن من العجله حقت الماكينة باليد تتعب

انتوا بس قولوا لراعي المحل كده وهو يعرف

الماكينة الايطاليه ترا في زيها تقليد انتبهوا

انا اخدتها كلها على بعضها مع الماطور ب 180 او 200 شي زي كده

وسلامتكم

ماابغى الادعواتكم ربنا يتمم ليا حملي على خير واشوف وليدي بصحة وعافية


وترى انا كتبت كل شي بالتفصيل لاني ماقدر ارجع لكم تاني

وسامحوني اذا قصرت

تحياتي لكم:26: