شخباركم خواتي .... قبل كم سنه اختي كتب لكم عن خلطة الصبار الا راح تخلي شعرك باروكه
الا هي خلطة غنوة .... والحمد الله كثير نفعتهم وجبات معهم نتيجه وفي بنات ما ناسبتهم وطبعا مو شرط الا يناسبك يناسب غير
الخلطة كثير ما ضبطت معهم وفي بنات ما ناسبتهم وفي بنات ما حبوها لان طريقتها متعبه شوي وفي بنات ريحة الحلبة كرهتهم في الاستمرار
اليوم بكتب لكم خلطة بعد بالصبار ونتائجه فتاكة ولكن لاااااااااازم الاستمرار اقل شيء لمدة 3 شهور أسبوعيا وممكن مرتين بالأسبوع كل وحده حسب ظروفها
وطبعا لو تستمري على الخلطة طول عمرك ما راح تفكير بخلطة ثانية أبدا
طبعا انا توني بدات فيها بس أخواتي يستخدموها من فترة وشعورهم روووعه ما شاء الله
بس مثل ما قلت لكم لازم الصبر والاستمرار
يا بنات أرجوكم كل وحده تقراء الموضوع زين كل التفاصيل مكتوبه وبلاش الأسئلة المكرره
معليش اتحملوني وانا اتحملكم
الكميات في الخلطة حسب طول وكثافة شعرك تختلف من شخص لشخص والمقادير بالنظر
الخلطة تتكون من :
1- الصبار :
تستخدمي جل الصبار الداخلي فقط الجل الا لونه ابيض شفاف
وهذا شكل النبته الا ما تعرفها وموجودة وتتباع في كل المشاتل وكل وحده تسال وتدورها في مدينتها تستخدمي منها جزع وحد فقط
والأخوات الا موجودين في امريكا او دول اوروبا يوجد بديل لكم ونتيجته روعه انا اجيبه من امريكا وحتى الاخوات الا بالخليج ممكن تبحثوا عن المنتج وهو ( جل الصبار الجاهز ) 3 ملاعق كبيرة للشعر القصير
2- صفار البيض :
اذا شعرك مره قليل وقصير حبه بيضه ولو اكثر حبتين وممكن 3 حبات للشعر الطويل
3- العسل :
ملعقتين كبيره عسل للشعر القصير والطويل 3 ملاعق عسل
4- زيت النارجيل ( النارجين )
الزيت مهم جداً في الخلطة وانا استخدم نفس الزيت الا في الصورة اجيبه لما اسافر ومثل ماهو واضح في الصورة لونه ابيض ناصع
الزيت الاصلي الا يكون لونه ابيض مثل الحليب يتباع في المعاصر وخصوصا في جدة في البلد بس لحد يسألني فين لأني ما اعرف بس متأكدة انه موجود لان صديقتي تجيبه لي لما ينتهي زيتي
الطريقة :
كل المكونات تخلطيها مع بعض بالخلاط وراح تكون خفيفة
طريقة الاستخدام الافضل تحطي الخلطة في علبة فارغة مثل علبة الصبغة او علبة الكتشب البلاستيك حتى يسهل استخدامها
لما تحطيها عند المغسلة احني راسك للإمام ومشطي شعرك كله من الخلف للإمام وانتي مدنقه راسك وحطي الخلطة على كل الشعر وخصوصا الفروة والجذور
لفي شعرك كله في الوسط ولفي الشعر بنايلون وفوقه كيس واتركي الخلطة ساعتين فقط على شعرك واغسليها
يا بنات الخلطة تستخدميها مره كل اسبوع واقل شي لمدة 3 شهور وطبعا لو تستخدميها على طول راح يكون افضل والنتيجة راح تكون روعه بإذن الله
وممكن كل 3 شهور توقفيها فترة وترجعيها ثاني ..... اي سؤال او استفسار انا حاضرة
لاتحرموني من دعوتكم الحلوه ..... واذا ممكن تقيموا الموضوع
الله يسعدك