وصباحكم كلة رضى وسعادة وتفاؤل
اعتذر للتأخير للأخوات اللي طلبوني طريقة الأطباق اللي نزلتها في سفرتي
لصاحبتي من مصر والله وقتي مرة ضيق
وكذلك أعتذر جداً للأخوات اللي رسلوا عالخاص واللي يسألون
عن فطيرة التفاح
وابشركم رفعت الصور :pinklove:
وبحاول الليلة انزل الطريقة
السفرة على هذا الرابط
http://forum.hawaaworld.com/showthread.php?t=3782253
طريقة اللحم المشوي عالفحم
لحم طازج
حبة بصل
2 حبة ثوم
علبة زبادي
فنجان سفن آب
بهارات " كمون ، فلفل أسود "
ملح
مطري لحم
نضع البصل والثوم والزبادي ومطري اللحم
نحطهم في الخلاااط ونخلطهم حتى يتكون لنا عصير ثقيل
نصبة على اللحم ونضع السفن آب علية ونقلبة مع بعض كويس
ثم نضعة بالفريزر
أنا لآن الوقت كان ضيق عندي وضعتة بالفريزر بس أنتم لو تبغوة للعشاء
تبلوة من الظهر وحطوة بالثلاثة
المهم بعد ساعة إلا ربع طلعتة من الفريزر وحطيت علية الملح
وكان الفحم عندي جاهز ومجمر
صفيت اللحم فوق الشبك حقة ورشيت الفحم بشوية موية
لآن النار كانت قوية شوي وأنا ما ابغى اللحم يحترق ابغاه يستوى بهدووووء
حطيتة على الفحم وكل شوي اقلبة وإذا استوى احطة في حافظة واغطي علية واتركة لوقت التقديم
واثناء ماكان اللحم بالفريزر جلست اجهز تتبيلة الدجاج المشوي بالفرن !
دجاج كامل وكل ماكان صغير بيكون احسن !
تغسلية وتنظفية وتفركية بالدقيق والخل الأبيض
وتخلية على جنب
وتجهزي التتبيلة
بصل
ثوم
زيت زيتون
تمر هندي منقوع ومهروس
ملعقة دبس الرمان
كركم
ملح
مهارات مشكلة
كتشب ملعقتين مخلوط بملعقة دقيق
ملعقة خل
نسوي عصير البصل مع الثوم والملح
والتمر هندي
ونخلطة مع باقي المقادير
ونغسل الدجاج من الدقيق والخل
وندهنة بالخلطة اللي سويناها وندخلة الثلاجة لمدة نص ساعة
ثم نطلعة ونحطة في شواية الفرن المتحركة
ونشغل النار من تحت
ونشغل الشوية ونخلية على نار هااااااادئة في الوسط حتى يستوي
الرز ببهارات الأندومي
رز الشعلان
بصل
زيت
بهارات اندومي بنكهة الكاري
تاخذي البصل وتقطعية صغير وتكشنية مع الزيت عالنار
وتحطي معاه خمس حبات هيل وتصبي الموية الحارة " اللي تبغى نكهة الرز تطلع صح لازم تحط موية حاااارة مغلية " !
تحطي الملح ولا تكثري لآن بهارات الأندومي مالحة !
وبعدين بهارات الأندومي " أندومي بكاري الدجاج "
بعد ماتحطي البهارات خلية يغلي ربع ساعة وحطي رزك وتاكدي من الملح لو محتاج زيدي ملح شوي !
وبعد ماتنشف موية الرز ابشري عالوجة شوية زبدة " أنا استخدم زبدة مازولا اللي يحطوها على الذرة !!
وتغطي علية خمس دقائق وتقدمية
الصواني .. الكفتة بالخضار .. ودجاج التكا بالسبانج
الكفتة بالخضار
لحم كفتة
نشكلة على شكل دوائر صغيرة ونحطة في صينية وندخلة الفرن يتماسك شوووي !
نجهز خضار .. بطاطس ،، جزر ،، كوسا
ونقطعم مكعبات وسط
ونقطع بصل
نضع البصل في القدر مع الزيت ونشوحة شوووي
ونضع علية معجون طماطم
ثم نضع الخضار ثم نصب علية الماء المغلي
ولما يبدأ في الغليان
نسقط فية حبات الكفتة
ونضع الماجي
وبهارات مشكلة ونغطي عليةونخلية يستوى على نار متوسطة
ولما يستوي وقبل مانقفل علية
نضع علية فص ثوم مطحون وكزبرة خضراء ونطفي النار ونقفل علية
ونتركة لوقت التقديم
الدجاج التكا بالسبانخ
صدور دجاج مقطعة مكعبات وسط
بصل
علبة طماطم مقشور
سبانج مجمد
نشوح البصل في الزيت ثم نضع الدجاج
ونقلبة شوي ثم نضع صلصة الطماطم المقشور
ونقلبهم مع بعض ثم نضع السبانخ ونقلب
ونصب الموية الحارة ونضع الماجي وبهارات كاري حار
ونهدئ علية النار حتى يستوي .. ونقدمة
سلطة المكرونة بالمرتديلا وحبيبات الرمان وصوص الزبادي
مكرونة مسلوقة مع شوية ملح
خيار
طماطم
جزر
فصوليا حمراء
مرتدلا دجاج الوطنية
ذرة
حمص مسلوق
صوص زبادي ( 2 علبة زبادي ، 2 ملعقة مايونيز ، 4 ملاعق جبنة سائلة ، خل
فص ثوم مطحون زيت زيتون ، ملح )
نقطع الخضار والمورتديلا
ثم نضيفها للمكرونة ونضع الملح المناسب
ونصب عليهم صوص الزبادي
ونضعهم بطبق التقديم ونزين الطبق بالسماق والترمس واللفلفل الرومي الملون
والجبنة التشدر المبشورة
حلى الطبقات بالجلي
بسكويت شاي
جلي
دريم ويب
3 حبات جبنة كيري
ظرف كريم كراميل
علبة قشطة
نغمس البسكويت بموية باردة معها 3 ملاعق حليب نستلة المركز
وشوية نسكافية
والطبقة الثانية عبارة عن
في الخلاط دريم ويب وقشطة وثلاث حبات جبنة كيري
وظرف كريم كرامل
نخلطهم مع بعض ونصبهم على البسكويت
وندخلهم الفريزر شوووي
وبعدين تسوي الطبقة الثالثة وهي الجلي
وتصبية على الخلطة وهو بارد
وتدخلية الثلاجة
وبس يتماسك قطعية وقدمية
وسلامة قلوبكم .. واي سؤال أنا حاضرة
