أم زوجي أمي الثانيه .. فضفضه لاأكثر

صباح الخير

اول شي كتبت بهالمعرف الجديد لاني ماني حابه احد يعرفني او احد من اهلي يراجع ملفي الشخصي او زوجي ويلقى فضفضتي

السالفه ومافيها اني متزوجه انسان من قبيله غير قبيلتي وكنت متخوفه حيل من اني مادخل قلب أهله خصوصا امه كانت معارضه زواجه من قبيله ثانيه

المهم تزوجنا ولله الحمد وطلعت بصوره قدام اهله جمّلت فيها نفسي واهلي

حبيت أمه حبيتها حبيتها ربي يسعدها وهذا هي ماتدري باللي اكتبه عنها المهم انسانه طيبه مكافحه ربت عيالها وكبرتهم وكانت الام والاب بغياب ابوهم

زوجتهم وفرحت بزواجهم لكن وش كان جزاها على تعبها ؟؟

انها تحتاج 200 ريال لعامل يعدل شغله بالبيت !! ويتهربون منها وكلن يرميها على الثاني ماعندي وماعندي :06: والمسكينه تعبانه تبي المستشفى وتبي قيمة المستشفى وطبعا لاحياة لمن تنادي

هم عيالها حولها بنفس الديره وانا وزوجي بديره ثانيه دقت على زوجي وشكت له الحال وبكككككككككت
آآآآآآآآآآآآآآآآآآآآآآآآآآآآآه يوم قالي انها بكت
رغم اني انا وزوجي اقل بكثير من حالة عيالها الباقين الا انه عطاها وحنا نمر بظرووف صعبه نحتاج كل ريال فيها بس كفووووووووووووو يالغالي كفوووووو والله فرحني والله

معقوله هذا جزى الام ؟ انا والله مابحط بذمتي وبقول من زوجات عيالها لاني ماشفت منهم الا كل خير بس هم هم ليه مايرحمون امهم ؟!!!

يعني بكرى مابيجيهم عيال ويسوون فيهم المثل؟

اشهد بالله ان ام زوجي تنحط على الجرح يبرى من طيبتها وحنيتها لكن سبحان الله ربي بلاها بهالعيال اللي ماقدرو تعب امهم ولكن عوضها بولدها زوجي الغالي وياعلّه يسد مكان اخوانه اللي مدري شقول عنهم آه بس

كتبت الموضوع من غبنتي اشوف زوجي من اليوم مهموم واقوله خلاص حولت لها فلوس وان شاء الله انها ارتاحت
قال ودي اروح اذبح اخواني قلتله لاتذبحهم ولاشي دق على امك وجبها عندنا تغير جو ومنها نوديها مستشفيات احسن من الي عندهم وانبسط لشوري

وعساها تجي وتعتبرني بنتها يارب

طلبتكم ياحريم طلبتكم عينو ازواجم على برهم بوالدينهم وخصوصاً الام كلكم بتصيرون امهات بكرى وكلكم بتتمنون عيالكم يبرونكم ويتذكرونكم لو بسلام
وكلكم لكم اخوان وزوجات اخوان وماترضون على امهاتكم فلاترضون على امهاتكم الثانيات :(

فضفضه لاأكثر

خالص التحايا