...
الشي الرابع ...
مو حاااس بقيمه اهله والشي الي يسوووه عشااانه
يعني وضععه احسن بكثييير من الاطفال الي حواليه يعني العابه من احسن الاماكن عكس الي الي
عنده يسافر ويتمشى افضل الاماكن ...
بس مررره اهلي كانو مجتمعين مع بيت عمي باستراحه ويومتها احنا مارحنا زعل وبكى ويقول
احنا حياتنا بائسه وياريت انا من عايله ثانيه ولمن اجي واقوله انت رحت ورحت يعني افضل من
وضعهم بكثييي بس مايحس صح ممكن عشان الجمعه والمه بس يعني رحتا مره معاهم وجرب
بس اصلا اكره انا الخرجات منه يجلس يبكي يبهذلني يبغى يسبح وانا اخاف عليه اخليه بس
خلاص مو كل مررره يعني لمن نخرج ونسافر يفرح وينبسط بس مجرد مايصير موقف ممكن
واحنا بنفس السفره ما مدانا نروح المكان الفلاني يجلس يتذمر ولايعجبه شي وينسى الي سوناه
بلحظه لاتقولوا صغييير كبيير بسنه يفهم ويقدر
** ولــــــــــدك على أعتاب مرحلة المراهقة **
- لابد تعـــــــــوديه على شكر الله على النعم الكثيرة ..واذكري له إن فيه غيره كثير .. عايشين بلا
طعام ولا سكن ولا لباس ولا شيء ممتع ومع ذلك يشكرون الله على الحياة .. ووضحي له إذا ما
شكر ربه على النعمة راح تزول .. تصفحي معاه النت .. خليه يشوف الأطفال المشردين والجائعين
ومن يعانون ويلات الحروب .. ناقشيه .. بحزم .. نبّهيه لنقطة .. أن لا يسيء الأدب مع الله ..
ويتمنى النعم الموجودة عند غيره .. حتى لا ينشأ بقلبه الحسد والتذمر والتسخط والتشكي والغيرة ..
واللهفة على الدنيا والجري خلف ملذاتها .. إيقظي في ابنك العقيدة والأخلاق الفاضلة والتوجيهات
الإسلامية ..
( وينشأ ناشئ الفتيان منا *** على ما كان عوده أبوه ) ..
- لابد من الإصرار والصبر في معاملة ولدك .. ولا تتأثرين بكلامه من ناحيتك .. ولكن وضحي له
.. إن كلامه ما يرضي الله ومن ثم ما يرضيك .. وقولي له .. ترضى أقول لك .. يا ليتك مو ولدي
.. وليت فلان هو ولدي .. مع العلم إني أحبك وأشكر الله إن رزقني بك ..
......
في كل شي مستعجل حتى بالتجميع ما يحب يجمع 5 او عشره لا يبغى 100 او 50 ويروح يطلب
من جدتته بس مو دايم تعطيه او بمعنى اصح تعبت معاه
- حتى يحسّ بقيمة الريال .. لا تشتري له شيء نفسه فيه أبـــــــــــــــداً ..
- خصصي له مصروف معيّن كل شهر وهو مسؤول عنه .. ولو خلّصه بيومين انتبهي تعطيه
أكــــــــــــثر .. وكـــــــــــــوني حازمة بهذا الأمر .. واتفقي مع أبـــــــــــوه ..
- ســـــــــالفة يطلب جدته تعطيه فلوس هذي مصيبة والمفروض تجعلي لها حدّ .. واطلبي من جدته
إنها ما تعطيه وألحّي عليها .. الله يسعدها .. يا أختي المفروض ابنك حتى لو أعطــــــــاه أحد
غيرك أنتِ وأبوه .. فلوس يرفض .. ما عدا الأعياد ... مسموحة ..
كذا ولدك يكون همّه الأكبر في الفلوس وما يهمه كيف يحصل عليها .. والمفروض حصول ولدك
على فلوس من غيرك أنتِ وأبوه خط أحمر ما يتجاوزه ..
- إذا طلب شيء .. قولي أبشر .. هات الفلوس وأحنا نجيبه لك في الحال .. إذا قال ما معي .. قولي
وين مصروفك .. إذا قال خلّص .. قولي أجل انتظر للشهر الجـــــــــــاي .. وكوني جادة ولا
تضعفين .. انتبهي ..
- إذا عطيتيه مصروفه الشهري .. مثلاً 100 ريال .. قولي تخيّل تجمعها للشهر الثاني يكون معاك
200 ريال .. وفي السنة 1200 ريال .. وتقدر تشتري بها أي شيء تبغاه ..
- أمنعي منعا باتا .. ريال واحد يدخل على ولدك من غيرك وأبوه .. والمفروض أبوه يتكلم معاه من
هالناحية .. وإن هذا التصرف يحرجكم ويحرجه إذا كبر إن شاء الله ..
......
الحين طالع لي طلعه في الكوره طبعا قبلها كان متعلق بلعبه ماين كررررافت وحذفتها لنه ادمنها
ونسيها الحمدالله بعدين المصارعه وكنت اخاف عليه يتكسرررر لانه يقلد ويرمي نفسه على الكنت
الحين طلع لي بالكوره والتشجيع قي البدايه قلت افضل من المصااارعه بس صااار مررره متعلق
ويشجع متعصب للاتحاد ليه لانه يقلد ولد اختي بالبدايه بعدين صار ادمااااان ...
- التعصب الريــــــــــــاضي .. آفـــــــة هذا العصر ..
لأن التعصب لولدك الآن تعلم انفعالي من الصغر .. وإذا ما حاولتي تخففي من تعصّبه الرياضي ..
الله يستر .. التعصب ما جاب إلاّ ..المرض بالكراهية العمياء .. ولا يخلو من كلمة بذيئة أو ألفاظ
مسيئة .. والعصبية وحرق الأعصاب ..
- تكلمي معه عن أضرار الانفعال الشديد من الناحية الجسمية والعصبية .. وقولي إذا صرت
عصبي تجيك أمراض اسم الله عليك .. وأهم شيء ما يأثر التشجيع على علاقته باللي حوله ..
- حاولي تشغلوه بشيء مفيد .. شوفة عينك .. الساحات الرياضية هاليومين مخجلة جدا .. ساحات
حرب وتلاسن بألفاظ خادشة .. حسبي الله على الشيطان ..
- إذا يحب الكورة .. يتدرب يلعب ويتحرك .. هذا الحب الحقيقي للكورة .. بناء أجسام وليس هدم
أخلاق وحرق أعصاب ..
- ولدك الآن بين يديك .. استعيني بالله ووجهيه التوجيه الصحيح .. حاولي ما تتركيه يتلف عصابه
عشان كورة .. ما له فيها ناقة ولا جمل .. إن فاز الفريق خذوا الجوائز والمكافآت هاللاعبين وإن
انهزموا عااااااااااااادي .. الكورة فوز وخسارة .. ولكن المشجعين ما لهم إلا الاحتراق وتلف
الأعصاب ..
.....

الصلاه كمان يعني لازم انا اقوله قوم صلي ويصلي على السريع كمان بس انا انببه عليه ونفس
الوقت اقوله هذي الصلاه لك انت انت الي بتستفيد بس اوقات اقوله عيدها واوقات ما ابغاه يكرها
وطبعا انا بمنطقه ما اقدر اخليه يروح لحاله اخاف عليه ولانه بصراحه ما يعطيني الصدق ...
- الصـــــــــــــلاة هي مفتاح نجاة ونجاح ابنك بإذن الله ..
- المفروض تعوديه يصلي بالمسجد مع الجماعة .. أفضل .. يروح مع أبوه .. على الأقل فرض أو
فرضين ..
- إذا صلى في البيت احرصي تكوني عنده .. ولكن لا تحسسيه إنك تراقبيه .. لا .. كأنها صدفة ..
وإذا شفتيه مستعجل أو يسرع .. قولي .. يا عمري .. أنت لما فعلت كذا أخطأت .. والمفروض
تعمل كذا .. وخليه يعتقد إنك ما تقصدين مراقبته ..
....
طيب تقريبا هذا كل شي ويمكن ناسيه شي كمان بس الى يوم الجمعه انا خلااااص تعبت وعشان
كذا كتبت الموضع طبعا بتقولوا وينك عن هذا كله بالعكس انا منتبه عليه من هو صغييير بس هو
يحب اللعب بصوووووره جنونيه يكون لي مواقف معاه اذا سواى شي بس يتعدل ويرجع هذا
وبنفس الوقت اقول ما ابغى اشد عليه وابوه تعبني لانه من هم صغار اقوله شد يقول لسع صغار
الحين الي صاير ماتحملهم ولاهم تعودا على اسلوب ابوهم بالشده ...
- إن شاء الله إنك مأجــــــــــورة .. وثوابك عند رب العالمين .. أهم شيء أخلصي نيتك لله ..
بإخراج أبناء موحدين لله ويشيلوا هم الدعوة لله ويحفظوا كتاب الله ..
وهم أمانة سيسألنا الله عنها يوم الدين ..
- وتأكدي لما تحسني تؤبية ابنك بإذن الله إنك بكذا مسؤولة عن صلاح أسرة مستقبلية ويكون ابنك
هو قدوتهم .. إذا تربيتك راح ينتد أثرهــــــــــــــا لأجيال قادمة إن شاء الله ..
......
طبعا غير انه مو نظامي يعني كل شي له ضايع من اغراض مدرسه وملابس وشراريب وربي
مبهذلني بس انه مشالله عليه ذكي وفوووووووق هذا كله
حنوووووووووووووووون لابعد درجه حبيبي يعني ممكن يزعلنا بس غصب عني ارضى له من
اسلوبه واحزن عليه
- يا عمــــــــــــري الله يحفظه لك ويحفظكم له .. آمين ..
- على فكرة شكلك حريصة ما شاء الله عليك .. وأي شيء تبغي توصليه لولدك .. بالكلمة الطيبة
والهدوء والبعد عن العصبية والصراخ وبالتكرار عليه والأكيد بالدعاء له .. سيكون ولدك كما تحب
نفسك ..
- يمكن يكون ولــــــــــدك مـــــــدلل يا أختي الغالية .. ودلالكم له صار اتكالي وما تركتوه يعتمد
على نفسه وبالتالي لازال يضيّع أشياءه ويعتمد عليكم في الاهتمام بما يخصّه ..
- حمّلي ولدك مسؤولية شيء بسيط .. الأهم يحس بإنكم تعتمدون على الله ثم عليه .. مثلا ..
توقفون عند بقالة وتطلبون منه يجيب لكم عصير على ذوقه .. أو محل حلويات ويجيب لكم كيكة
على ذوقه ..
- إذا جاء مرة وأغراضه كاملة .. احضنيه وشجعيه واشكري فيه .. حتى يلاحظ الفرق .. مو يقول
.. إذا نسيت أغراضي انتبهت وإذا جبتهم كاملين عادي عندها ..
- أهم شيء لا تعصبين عليه ..أرجوك ..
....
لس من يوم الجمعه انا تعبت اشتر بدله الاتحاد الجديده ومايبغى يفصخها تعلق مررره بالاتحاد
هذل ولمن انا سحبتها منه وقلت برميها وزعلت منه وما كلمته قال لابوا بشيل عفشي وبرووح كله
عشان البدله المهم انا ماكلمته يعني برسميه اكلمه وثحي الصباح وسيييده على ابوه ويقوله كلم ماما
تعطيني البدله يعني ماهمه زعلي وفهمته انو انته اهم شي عندك البدله ويمكن بيراضيني بس عشان
البدله ذي وفهمته انو لمن تتغير وتصير رجال انا بعطيك ايها بعدين قال خلاص طيب قلت مو
الحين بعد شهر شترين لمن احس انك صح تغيرت اوكي اقتنع وبدا يحاول يراضيني بس المشكله
اليوم مباراه الاتحاد والهلال وهو مره متحمس وانا اقوله بكره عن،ك دوام لازم تنام بدري وانا
والله عشانه متعصب بزياده مره خسر وبكى كيف اخليه يكون عادي مايتعصب هو اصلا طبيعته
كذا حتى لمن نسوي مسااابقه يتحمس واذا خسر يبكي ،،
- يا بنت الحلال ولدك صغير .. ربي يحفظه ..
- أهم شيء يا قلبي أبعديه قد ما تقدرين عن التعصب الرياضي .. والله ما جاب إلاّ الأعصاب
والانفلات الأخلاقي للبعض والألفاظ البذيئة .. تراك تقدرين بحول الله وقدرته عليه لأنه لازال
صغير وعندك وقت تصوبين وتصححين توجهه ..
- ولو شفتيه عصّب وصارخ وتلفّظ .. قولي المباراة الجاية ما راح تشوفها بإذن الله .. وخليك عند
كلمتك .. ولابد زوجك يساعدك الله يهديه ..
.......
طبعا هو بمدرسه عالميه وهو يحس نفسه مضغوط مره عشان الي عنده عيال خالاته وعيال
اخواني حكومي وعاد انت عارفين كيف الحكومي مافيه ظغط
- عشان كذا لابد يجد الراحة والتفاهم والاحتـــــــــــــواء والاشباع العاطفي عندك .. وإن شاء الله
الضغط الدراسي ما يضرها أبداً .. بالعكس ينفعه وهو لازال صغير ويستقبل قدر كبير من التعليم
وأساليب التعلّم .. وتطوير الجانب الفكري والمعرفي .. بتتعبون معاه الآن ولكن بإذن الله ترتاحون
لما يكبر ..
.....
اما سالفه انه يضرب اخته شي ثاني اخته اصغر منه بسنه
- عنف ولدك مع أخته .. بسبب الغيرة .. لابد تعملي على تقوية الحب بينهم ..
اعدلي بينهم في المعاملة والهِبات والشراء حتى لو علبة بسكويت أو البوسة أو الحضن ..
لا تمدحي أخته أبداً .. اشتري هديه وقولي له هذي من أختك لأنها تحبك
وأنتِ جالسة معاهم .. خليه يكون مسؤولة عنها وأنتِ تراقبينهم من بعيد لا تغفلين عنهم .. مثلا .. جيبي لهم ألعاب جماعية هادفة يشتركوا فيها وشاركيهم اللعب ..
لا تهتمي بأخته وتهمليه .. وقولي هذي أختك اللي تحبك وأنت تحبها .. مع الأيام راح
يتقبّل كلامك ويجعله جزء من حياته ..
......
والله دايم ادعيله بسجودي وبصلاتي واحب احمله مسوليه واعطيه فلوس بيده عشان يحس انه
كبييير بس هو مبذررررررر ومايرتاح ريال بجييبه ...
- أهـــــــــــــــم شيء وأحسن حاجة وأفضل عــــــــــلاج .. وما توفيقك إلاّ بالله .. عليه توكّلي وأحسني الظن وثقي به سبحانه ..
.....
الله ييسر أمرك وأمر ولدك ويجعله عبد صالح حافظ لكتاب الله .. ويبارك لك فيه ويهديه لكل خير ويبعد عنه كل شر .. آمين ..

وربي كأنك تتكلمين عن اخوي الي مجننا الكذب وامسكه وانصحه واعلمه وش عقاب الكذب وان الصادق له الجنه والجنه فيها وفيها والنار فيها وفيها بس كذاااب وكسول تخيلو يكون عنده اختبارات وتذاكر له اختي يروح يقول ي استاذ ماحد ذاكر لي مابختبر يحرج ابويه ابويه معاه بنفس المدرسه وجاه انذار انو بيتحول للوزاره بس مافي فايده مايبغا الا يلعب مايبغا يذااااكر يرفع الظغط الله يهديه واشيا كثيره عجزنا فيه الله يهديه ويهدي ولدك وجميع عيال المسلمين

احس تصرفته زي تصرفات اي واحد في سنه ، بس انتي مكبرة الموضوع ،،، كل الاولاد كده ، بس البنت هادية لانها بنت ،،، خليه ينبسط و يعيش حياته بكرة تتمني يصغر و يرجع في هذا السن ،،، ما اقدر انصحك لانه مو شايفة اي تصرف مو حلو ،،، الحمدلله ما عنده كلمات قلة حياء و لا يسب و لا انحراف و لا شردة من المدرسة و لا يدخن بالدس و لا اي شي ، شكاوي عادية و تصرفات بريئة من ولدك ، ربي يخليه لك ،،

اين دور الأب؟!
فقط رفض شراء ايباد شيء جيد منه
لكن بقية الموضوع
التعب والمسؤوليه عليك
تقاسميها معاه
لا تهملي البنت لانها عاقله