السلام عليكم ورحمة الله وبركاته...
هذه بعض الأبيات الأميرة البندري بنت عبد العزيز في رثاء إبنها سمو الأمير الشاعر سعود بن بندر
الذي توفي في 25 / 11 /1406 الذي قال في اشهر وأخر بيت خاطب فيه امه...
ياليتني بينك وبين المضره.... من غزة الشوكة الى سكرة الموت.
ومن هذه الأبيات التى رثت بها سمو الأميرة ابنها...
ـــــــــــــــــــــــــــــــــــــــــــــ
لين اجتمعوا لدت العين لسعود
قامت تلف وين قرة نظرها
وين الكريم اللي سلك سكة الجود
كم واحدا نفسه كسيره جبرها
أضحك وانا قلبي من الحزن ملهود
وأغضي وأذل العين تنثر دررها
رضيت بالمقسوم وأيامي السود
وكتمت نيران تطاير شررها
أبي أرضي رب كريم وموجود
علام مافي برها مع بحرها
لعل يجمعني بهم خير معبود
في جنة الفردوس نقطف ثمرها
ــــــــــــــــــــــــــــــــــــــــــــــــــ ـــــــــ
إن جيت للبيت قام الفكر يلعب بي
وإن رحت للخرج صاب القلب ولوالي
ماعاد أميز وأعرف الجد واللعبي
غديت مثل الخلوج أمشي على فالي
ياسعود هذي تدابير الولي ربي
والعبد ماله عن اللي دبر الوالي
جرحي على سعود ماينفع به الطبي
وشلون أبسلى وهو دايم على بالي
أحس صوته يناديني وأنا البي
يقول يمه نسيتي شبلك الغالي
وشلون أبنساك وانته ساكن قلبي
إنته حبيبي وزولك دايم قبالي
ــــــــــــــــــــــــــــــــــــــــــــــــــ ـــــ
ياسعود كل بالشعر قام ينعاك
ويبين أخصال لشخصك حميده
بالعون حنا كلنا ما عرفناك
كل يسافر يم دار بعيده
من أول ياسعود سلواي جمعاك
تشيل عني كل بلوى شديده
لكن رحلت والي العرش ناداك
عساه يوم الحشر ياسعود يرعاك
يثقل موازينك ولأجرك يزيده
واليوم أنا ياسعود سلواي طرياك
أتابع أخبارك بوسط الجريده
ـــــــــــــــــــــــــــــــــــــــــــــــ
من يلوم العين لو هلت دموع
ومن يلوم القلب لو صفق وصاح
لي حبيب راح ماطرى الرجوع
ليتني ودعت زوله يوم راح
اه من قلب كفخ بين الضلوع
مثل كفخ الطير مكسور الجناح
ليتني وسط الخلا وأعطش واجوع
ولاسمعت اللي نعى هاك الصباح
ساهره ياسعود والعالم هجوع
ليت من هو مات قبلك واستراح
ــــــــــــــــــــــــــــــــــــــــــــــــــ ـــــ
وقد لقبت سمو الأميرة البندري بنت عبد العزيز بـــ(خنساء الرياض)
وذلك لأن سموها فقدت خمسه من ابنائها في حياتها في ازمنة متعددة وهم على التوالي:
سمو الأميرة موضي..سمو الأمير سعود..سمو الأمير محمد ..سمو الأمير فهد ..
سمو الأميرة جهير ..سمو الأمير متعب.
وهم ابنا سمو الأمير بندر بن محمد بن عبد الرحمن آل سعود
رحمهم الله جميعاً ورزق والدتهم الثبات..
ــــــــــــــــــــــــــــــــــــــــــــــــــ ــــــــــ
منقول عن مجلة فواصل العدد(216)
ــــــــــــــــــــــــــــــــــــــــــــــــــ ــــــــــــــ
م ن ق و ل
روح عادل @roh_aaadl
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
ولاحول ولاقوة الا بالله