صفات نكرهها ويمكن تكون فينا وماندري الكل يدخل ويشارك في الموضوع

السلام عليكم ورحمة الله وبركاته

كيف الحااال جميعا

ان شاء الله تكونوا بألف خير

ودي اكتب موضوعي هذ على راحتي من غير قيود ومن غير التزام بلغة عربية يعني الي بخاطري بنزله لكم بطريقة ان شاء الله تتقبلوها مني ونتشارك مع بعض بالآراء وان كنت على خطأ صححوا لي وان كنت على صواب ايدوني:)
نبدأ بسم الله الرحمن الرحيم

فيه صفات كثيرة نكرهها في بعضنا البعض وودنا نغيرها سواء فينا او في غيرنا وفي ناس تنتقد على الملاء لو شافت عليك خطأ وناس تشوف الغلط وماتتكلم وناس تجي تنصح سري وهؤلاء شرذمة قليلون
نضرب مثل على بعض الصفات الي نكرهها ومانحب الناس يعملوا بيها او ممكن نكون احنا نعمل بيها ومانعلم!!
1- اللقافة او ممكن بكلمة ارقى (الفضول) مثال على ذالك في مجتمعاتنا حريم والعياذ بلله يتدخلوا في اشياء ماتخصهم مثل(خرجت السوق وقلت انك خرجت السوق وسكتي يسألونك وين رحتي ايش اشتريتي كم صرفتي وليه نزلتي غاااالي او رخييييص ، وهذا مثل بسييييييييييييييييييط جدا ويعتبر مافيه خطر على حياة بني آدم بالنسبة لامثلة اللقافة الي بمجتمعنا والعياذ بلله)

0000000000
2- المناظرة وممكن تدخل في باب الغيرة مثلا(فلانة لابسة كذا وكذا بالسعر الفلاني بنزل اشتري مثلها ليه هي تشتري وانا لا هي احسن مني في ايه !!؟؟ او مثلا تجيك في البيت وفرجتيها على اغراض شريتيها حلوة تقول لك في وجهك عندي مثلها وهي ماعندها او ليتك سألتيني قبل تشتريها ماركتها مو زينة وتكون ماركتها من ارقى الماركات او من يوم تخرج من عندك جري على السوق تشري مثلها ،
وفيه حريم يوم تدخلي المجلس وتجلسين بعيد عنها تجيك لحدك او ممكن تناديك علشان تسألك من وين جبتي هاللبس ولا تحسحس على اذونك وصدرك وايديك وتقول وش هالذهب الحلو من وين وبكم كله كوووووم والي يسأل عن الاسعار بكوووووم ثاني وتروح تشتري مثله لو انها تتدين والعياذ بلله ،
ولا فلانة سافرت هالبلد احنا نبغى نسافر مثلها ليه هم واحنا لا واشيااااااااااااااء كثيييييرة ماتنعد
00000000
3- الحسد والعياذ بلله صاروا الناس يوم يشوفونك في المجلس تضحكين بصوت يقولوا هاذي مبسوطة وماعليها خلاف ولا يوم تلبسي كشخة يقولوا غااااااااااالي ماتستاهل فلانة والعياذ بلله وربي فيه ناس تخافين من كلامهم مرة كنت جالسة بمجلس ووحدة تحش في زوجة اخوها وتقول مادري ايش يحب فيها وكيف صابر عليها وماذكرت الله وبعدين تقول احنا نحط رجالنا على روسنا ومايعطونا وجه وهي ماتعطي زوجها خاطر وشايلها على راسه كلامها يقشعر البدن انا تدخلت وقلت لها اذكر الله هذا اخوك قولي ماشاء الله ان حسدتيها اخوك بيتضرر مو بس هي ولا اهتمت الله يصلحها وكملت ،
يشوفوا سيارة جديدة يحسدون ،يشوفوا حرمة تخلف ورى بعض المسكينة يقعدون لها وهاذي بالذات حرمتين قريب ماتوا بسبب هالحالة الله يرحمهم، يشوفوا سمين او سمينة يقعدون لها في صحتها ، واحد عنده فلوس وعمارات يقعدون له ، ناس يسافرون كل سنة يقعدون لهم لدرجة في وحدة تحكيني تقول والله من كثر ماقعدوا لي الناس من يوم اركب السيارة يجيني صداع وهي ماعمرها يصير فيها كذا ويوم راحت الطبيب قال لها شقيقة والعياذ بلله وماتجيها الا يوم تركب السيارة سبحان الله،وفي ناس من يوم يسافرون مشاكل في السفرة الين يرجعون والناس يحسبون انهم انبسطوا والحمد لله والامثلة كثير
000000000000
4-المحرشة الي توشت بين الناس الي قاعدتها بالحياة (فرق تسد) والعياذ بلله هاذي عايشة متنقلة من اذن هاذي لأذن هاذيك تتكلم في هاذي شوي وتحش فيها شوي وتقول فلانة قالت انك كذا وكذا وتروح للثانية وتقول لها نفس الكلام وعلشان ماتفضح نفسها تحلف كل وحدة انها ماتقول لفلانة على الكلام وتأمنها علشان تضمن انها مابتنفضح وهاذي النمامة الله يرفع عنها ولا يبتلينا ولايبتلي ذريتنا آمين
000000000

5- الي تناظر رجال متزوج بالعامي نقول (خطافة الطواقي) والعياذ بلله ما اكثرهم في هالزمن الله يرفع عنهم ولا يبتلينا آمين هذول يلاقوا دعاء من الناس يقصف جريد النخل على قولة المثل مادري مايخافوا يجيهم يوم الدنيا سلف ودين بالذات الي رجالهم يشتغلون اطباء او طيارين او في المؤسسات الخاصة مثل البنوك وغيرها تجي البنت وتدخل على الموظفين وتطلب ارقامهم الله يهديها وتعرف انه متزوج بعض الاحيان الغلط من الرجال نفسه وبعض الاحيان من نفس البنت الرسول صلى الله عليه وسلم حذر من فتنة النساء هاذي خطوات شيطان تطلب رقمه عارفة انه متزوج اعرف وحدة تحلف انها عايشة في عذاب مع زوجها والبنات يتصلون على زوجها وضحك وانها تحبه طيب ذا متزوج ماتخافين تجيك دعوات على رآسك تجيبك الارض اتقي الله وبعضهم يرسلون له هداية ورسائل على الجوالات غرام وحب والرجال غلطان طبعا رعلشان يعطيهم وجه لكن برضه الحريم كيدهن عظيم يجوا من كل باب والعياذ بلله حطي نفسك مكان زوجته ترضي يصير فيك كذا لكن مالي الزوجة غير ان تقول حسبي الله ونعم الوكيل نعم المولى ونعم النصير اللهم اكفنيهم بمى شئت وكيف شئت واللهم رد كيدهم في نحورهم ترضي احد يدعي عليك هالدعوات؟؟
رسالة الى كل امرأة تناظر رجل متزوج ابتعدي فهذا الطريق شائك ومخيف ومليئ بالدعوات عليك ودعوة المظلوم مستجابة وهي مظلومة لأنك دخلت على حياة زوجها من غير اي وجه حق فأتقي الله واعلمي ان ورائك دنيا وورائك قبر ستنزلين فيه بمفردك وستحاسبين على كل صغيرة وكبيرة وورائك صراط وان كل من اسأت اليهم سيوقفونك على الصراط وورائك جنة او نار فاتقي الله اتقي الله اتقي الله لأنك ستدمرين عائلة بأكملها والعياذ بلله
منهم من يتتبع ايضا الحياة الشخصية للرجل كانها مباحث تسال من بيت مين متزوج كم عنده عيال وين ساكن ايش اسم زوجته ايش اسماء عياله اخواته كل شئ عنه وين يقضي اجازته وبتآخذ المعلومات من اصحابه او تدور بين الناس عن احد يعرفه او يعرف عايلته علشان تآخذ المعلومات الله المستعان مادري وين بتروح من ربنا الله يرفع عنها ولا يبتلينا آمين
00000000000000
6-كشف المستور والكلام في اعراض الناس بذكر اسمائهم وعوائلهم والعياذ بلله وطبعا هذا يدخل في باب قذف المحصنات الغافلات وهذي المسألة صايرة بهالزمن مثل اللبانة في حلوق الناس صرت عادي لو تجلسين بمجلس تقوم وحدة تقول فلانة سمعت عنها كذا وكذا وفلانة انا شاكة فيها لها علاقة مع فلان والعياذ بلله كلام يقشعر منه الابدان طيب يابنت الناس شفتي بعينك تقول لا طيب كيف تحكمين؟؟ تقول حاسة ؟؟حاسة وتقذفين وفوق هذا كله تنحرمين من ريحة الجنة لأنها من السبع الموبقات قذف المحصنات الغافلات وحتى لو فرضنا انك شفتي بعينك استري عليها ربنا ستار في معنى الحديث ان الرسول صلى الله عليه وسلم قال في معناه انكم لو شفتم اثنين يزنون والعياذ بلله استروا عليهم) الستر حلو استروا الناس علشان ربنا يستركم ومايسخر لكم بالي يتتبع عيوبكم ويفضحكم بين الملا ويستركم فوق الارض وتحت الارض ويوم العرض

كلمة اخيرة وليست بأخيرة ان شاء الله لأن لي عودة لمناقشة الموضوع معاكم ومع ارآئكم ومناقشاتكم
((((اتقوا الله اتقوا الله اتقوا الله فالدنيا دار فناء والآخرة دار بقاء وخلود فعملوا فيها كل مايرضي الله تعالى وابتعدوا عن كل مايغضبه تعالى لكي تصلوا الى بر الامان بحوله وقوته))))

في صفاااااااااااااااااااااااات كثيرة كريهة الله يخلصنا منها على خير انتظر منكم المزيد منها والحلول وكل شئ يجي منكم حلو ان شاء الله

اختكم ومحبتكم تراميسو