مرحبا خواتي
وبكتب لكم قصة ولادتي اللهم لك الحمد اللي قمت بالسلامه ((انا بكريه))
كنت اراجع عند دكتور تقي بالسلامه الين وصلت الشهر السادس كملت مع الدكتوره رنا قمة بالاخلاق والذوق
طبعا غيرت المستشفى لان السلامه قديم مره بس رحت له علشان كفاءه الدكتور تقي
يوم دخلت التاسع كانت لي اوراق عند الدكتور تقي لازم اجددها رحت له المهم قال لي وينك لازم اولدك قيصري لان السكر مرتفع
وكنت منسقه اولد عند رنا ببروكير
المهم رجعت البيت واستخرت ربي وجهزت نفسي ورحت للسلامه مع اني كارهته كره العمي لان غرفة التنويم زفت والحضانه فاتح بابها للي بيدخل وكل الوضع متدهور بس ارجع واقول علشان الدكتور تقي كان عارف حالاتي وزوجي قال تقي افضل
وجاء يوم العمليه الله لايعود هذيك الايام وحلقو بطني واعطوني حقنه وسحبوني بالسرير لغرفه العمليات ويوم جاء وقت الجد ودخلت الين الخط الاحمر الحد بيني وبين اهلي
بكيت بكاء بكاء ازود من الطفل وجاء دكتور تقي يهدي نفسيتي وجلست اودع زوجي
وسحبو السرير ودخلت غرفة تفجع اللي ماينفجع
غرفة العمليات
ولقيت واحد معه ابره فيها محلول ابيض وواقف على جنب كانه قتال القتلا (((الله يسامحه بس ))
جاء بيحط المحلول وعرفت انه بنج وقلت له انقلع وراك انت وابره الحمير
:06: جاتني حاله نفسيه بصراحة صرت عدوانيه ياخواتي وموتي وابو ابره ابي اكفخه
عاد هو لااخلاق ولا خوف من الله جلس يهزئ ويقول هو احنا ماورنا غيرك ؟؟
اخلصي علينا
قمت نطيت بوجه دكتور تقي قلت له الا ذا يادكتور مابي وجهه الا ذا
قام الدكتور تقي اخذ الابره ونزل المحلول بالوريد وانا اقول له تكفى انا برقبتك امانه :06: وانا ابكي واحس بثقل وتبنجت
وقمت الا احس بالم تحت ببطني كانه شئ ثقيل على بطني وجلست ابكي اقول لهم فيه الم احس بوجع
وسحبوني للغرفه وجات الممرضه اعطتني مسكن
ومن هنا بديت مشوار الالم مانتهيت لاوالله :icon33:
طلع المسكن مايناسبني عمل لي هبوط والمسكنات الثانيه مثل ذا وواحد عمل لي ربو
يعني اتوجع من الم مافي مسكن الا بندول والله ياخواتي ماانصح احد بالقيصري والله انه كابوس بالذات قومة السرير وفك القسطره
خلصت اليوم الاول والثاني والمفروض اني اتحسن
الا بالعكس حالتي تتدهور ووجهي قلب وكحه قطعة قلبي وهم يتوقعون انه من البنج وذبحوني بخار
الين زادت الكحه ومع العمليه الكحه تموت
وجابو لي دكتور طواري بالليل علشان ارتفعت حراتي وزادت الكحه وصوت الكحه غريب
ونزلوني للاشعه وطلع عندي التهاب رئوي شديد
تخيلو من وين جاني ؟
عقب العمليه مافي سرير متوفر بقسم الولاده ونوموني بقسم الباطنيه وحوالين غرفتي والقسم كله مرضى فيهم التهاب رئوي وانا لقطت العدوى اه ياقلبي بس
اكتب لكم واتذكر ذيك الايام :icon33: الله لايحرمني اجرها
وبدو يعالجون الالتهاب بمضاد بالوريد غير طبعا مضا للعمليه
ونزل وزني وصرت هزيله هزل لان المضاد قوي ومايخليك تشربي حتى مويه يسد النفس
وفوق كل ذا جاني اكتئاب نفاس وانا بالمستشفى
وطلعت بعد 12 يوم من تنويمي للعمليه
وماكتبت تجربتي اخوف احد ولاشئ انا كنت اقراء قصص واخاف
لاتخافو والولاده تساهيل من ربي سبحانه وربي لايحرمن الاجر يارب
وابيكم تدعون لي تروح عني حاله الاكتئاب تعبت مره تعبت من العمليه والالتهاب ومن الاكتئاب
وعقبال كل اللي يتمنون يارب ربي يرزقهم واشكر من قلب قلبي تجمع بنات الشرقيه كلهم افادوني وماقصرو معاي وقفو معاي وقفة اخوات واكثر والله الين اليوم وهم يتطمون علي ربي يجزاهم الف خير
نسيت اقول لكم جاني ماشاء الله ولد واسمه بدر ربي يطرح فيه البركة يارب
رعشة اهداب @raash_ahdab
محررة فضية
يلزم عليك تسجيل الدخول أولًا لكتابة تعليق.
نايس ورده
•
الحمدلله على سلامتك ، يتربى بعزك
ياحياتي الحمدالله على سلامتك وربي يحفظلك بدر وتفرحين فيه ياررب لاتنسيني من الدعاء ربي يتمم حملي على خيرر
الصفحة الأخيرة