ام زوجي وعنادها وزوجي ويا قلبي لا تحزن....

السلام عليكم ورحمه الله وبركاته


مالي بالمقدمات


السالفه وما فيها زوجي يبي يبر بأمه:)

وقبل فتره تقريبا جا وقالي ابجيبها تسكن عندي
طبعا احنا بمنطقه غير الي فيها اهل زوجي وزوجي المسكين يسافر 3ساعات اسبوعي ليشوف امه عقب وفاة ابوه
عنده 4اخوان متزوجين والله حريمهم ما يروحون لها ولا يدورونها وما يبونها
ولانن قرابه عينهم قويه بس انا الغريبه بينهم ما عجبتها وكل كرهها حطتو براسي الله يسامحها تمنيتها تعاملني مثل بناتها والله لحطيتها بقلبي وعيوني وعلى راسي بس رفضتني رفض تام
والغيره ذبحتها مني هي وبناتها وحريم عياله فقررت ابعد وقاطعتهم 7سنين ما ادري عنهم ابد لا من تزوج ولا من وخلف

قطعت كل شي بيننا حتا عيالي روحاتهم بحكم الطريق سفر كانت قليله
المهم قبل سنه امه وخواته طلبو صلح معي
وزوجي ما قصر سوينالهم عشا وجو عندنا من ديرتهم جلسو يومين وما انكر يسولفون ويضحكون وساعدوني ما قصرو وكل هذا وانا عايشه بجو المفاجئه مو مصدقه وش الي غيرهم
اتاري ابو زوجي وجعان وهم مهم فاضين له ويبوني اخدمه
والحمد لله انا ما قصرت وخدمته بعيوني جلس عندي ست اشهر وقالي تو اعيش واحس بالاهتمام الله يجزاكي خير يا بت الاصول ودوم يدعيلي .. وبعدها توفا بصالتي وكنا نتغدا عقب الغدا شرب الشاهي ونام بس ما صحا الله يرحمه😢😳
كان غالي بغلاوه ابوي الله يرحمه ويغفرله

توفا الغالي وام زوجي بقيت لحالها بدارها
عشان كذا زوجي قرر انه يجيبها عندي
قلت مو مشكله بس مالي صلاح


لا بخواتك ولا بزرانهم سنين ولا سالو فيني

ما اعرفهم زين وتجيب شغاله البيت كبير

وانت حر وقام وما راقله كلامي وانا

طنشت المهم راح لامه وقالها باخذك معي

بيتي تسكنين عندي وهنا الصدمه:D:D

قالت مابي ما ارتاح غير بداري انا ما اقدر

اخلي اخوانك وخواتك ورجالن وحريم

اخوانك وخواتي واخواني وزوجتك ما اعرفها

زين وهي ما تعرفني ما نبي مشاكل خلني بداري

روح من عندها بالليل مزعوج لانه مخطط

وتخطيطه فشل

وانا مستانسه الصراحه
وربي سبحانه عارف نيتي وانا مو كارهتها يعلم الله بس ما اعرفها زين ما ادري وش تحب كيف روتينها مع بناتها وعيالها
وصدق عيالهم مزعجين وسخين وانا حياتي غير منظمه مرتبه الكلمه الوسخه ما تطلع من عيالي كيف لو يحتكون بعيال عمامهم


ما علينا مرت فتره ورجع قالها ورفضت ورفضت وما تبي

فقرر يستاجر شقه جارنا نضيفه واسعه وقريبه من بيتنا 3دقايق مشي وهو عندها

وكتب العقد ودفع المقدم وسافر لها وقالها بنقل عفشك استاجرتلك شقه وعيت ورفضت وزوجي هنا عصب قالها انت تبين الناس تقول تاركين امهم يا يما انا ببر بك
وانت ما حد فاضيلك كلن لاهي بحياته ورفضت
ورجع من عندها وزعلان

اليوم تو من شوي قبل لا اكتب الموضوع قلبي مو مرتاح قلت له اقنع امك تجي تسكن
عندنا واذا ماتبي بالشقه الي استاجرتها لها
استغرب😁
وقال غريبه كنت معارضه قلت قلبي يوجعني عليك ما غير مع الخط وانت تعبان
وامك ما عندها احد وجعانه عالاقل هنا نسال فيها نشوفها العيال يرحون يشوفونها يعني لا سمح الله جرالها شي نكون حولها
قال خلاص امشي معي اخر الاسبوع وحاولي معاها قلتلو ابشر ما طلبت شي صعب

والله شفت الفرحه تبي تطلع من عيونه

والصراحه قلبي مو مرتاح امس واليوم وهي ببالي مدري ليه وعندي رغبه تسكن بالديره عندنا ايش هالشعور مدري

انا قلت لكم قصتي معها كامله وابي مشورتكم امشي معه ابقا عموقفي ولا ارجع
وكيف اقنعها لانها عنيده عالفاضي
مدري كيف تفكر

الله يكتب لها الاجر الي تعطيني راي بهالموضوع