لاحول ولا قوة إلا بالله.. رجيتكم تساعدوني..انصحوني وادعولي

السلام عليكم ورحمة الله وبركاته
كيف حالكم حوائيات.. عساكم طيبيبن وعيدكم مبارك إن شاء الله
السالفة وما فيها يا بنات إني متزوجة من ولد وحيد أمه.. ولا عندها غيره لا بنات ولا شي
وأمه الله يهديها صعبة صعبة فوق ما تتخيلوا, شديدة وعصبية وعندها نوع من الحرص ودايمآ تنتقد ومافي شي لله يعجبها, غير كدا دايمآ تصارخ وعندها حب للسيطرة ولو بيدها تبغى تتدخل في كل صغيرة وكبيرة في حياتنا وتشوف إن ولدها لازم يقدسها بما إنها أمه وإذا خالفها في الرأي فهو ماهه بار بيها.. لدرجة يا بنات زوجي فقد الأمل انه يرضيها.. ودايمآ لما يتكلم معايه ولا مع أصحابه يقول احمدوا ربكم أن الله سهل لكم بر والديكم, في ناس أكثر منكم عبادة وأكثر منكم صلاح لكن الله ما سهل لهم أمر البر.. والله أحزن عليه وأحمد الله إن أمه ماهي أمي لأنه من جد ما تساعد الإنسان على برها والله يا بنات ما أفتري عليها وأصلآ انتوا لا تعرفوني ولا تعرفوها فما حأستفيد شي لو افتريت عليها.. أنا كاتبة الموضوع عشان تنصحوني وتدعولي.. وعلى فكرة أم زوجي عاشت في مشاكل مع عمي أبو زوجي وكانت حياتها مشاكل في مشاكل وزوجي يقول إن عمي كان يحبها وإن معظم المشاكل بسببها.. لدرجة أنها طلبت الخلع مع إن عمي ما كان يبغى يطلق.. يعني اللي في راسها تبغى تمشيه ودايمآ مستقلة برأيها.. وبعد ما تتخذ القرار الخطأ لازم غيرها يتحمل النتايج معاها..
هي الآن متقاعدة عن العمل ومريضة سكري والمرض في السنوات الأخيرة أقعدها ما عاد صارت تقدر تقضي حاجتها إلا بمساعدة الخادمة.. وهذا الشي زود من حدة طباعها وعصبيتها.. دايمآ تصرخ على الشغالة وأحيان كثيرة تقول ألفاظ مؤذية "ياغبية يا بلهاء ما تفهمي" والله أنا وأنا قاعدة اتضايق لما أسمعها فما بالك هما.. المهم كل ما جات شغالة تعاملها بهذي الطريقة والشغالات يستغلوا فترة نومها وعدم وجودنا أنا وزوجي في الشقة ويسوا علاقات مع رجال.. وما عرفنا هذا الشي إلا قريب.. الشغالة اللي سافرت من سنتين علمت الشغالة اللي جات بعدها قبل ما تسافر والثانية مشيت بنفس طريقة الأولانية لحد ما انكشفت وسفرناها من كم شهر ووالله على قد ماهم غلطانين إلا إني أحيانآ التمسلهم العذر.. لأن عمتي لا تطاق وتبغى الشغالة زي المكينة ما ترتاح ولا لحظة وحتى في فترة نومهم تصحيحهم أكثر من مرة يودوها الحمام ويحطولها الدواء..
المهم بعد ما اكتشفت أمر الشغالات قررت أن ولدها يسكن معاها في نفس البيت أو في شقة ملاصقة بحكم اللي صار من الشغالات وزوجي ما عنده قدره مالية يأجر إيجار غالي فاختار انه يدور على شقة كبيرة ونسكن مع بعض.. في البداية ترددت واحترت ورفضت بس الموضوع ما كان بيدي.. وراح زوجي دور على بيت فيه جناح منفصل لينا بس طبعآ الصالة والمجلس والمطبخ وغرفة الغسيل كلها مشتركة.. وصحيح أم زوجي ما تتحرك بس هي دايمآ قاعدة في الصالة ولازم لو رحت لأي مكان أمر عليها.. المشكلة اللي اللحين شايلة همها هي المطبخ.. عمتي بدأت تعطيني أوامر حسيت منها إن المطبخ حيكون حقها وأنا أمشي على ماهي تشوف.. مثلآ ما تبغاني أقضي ولا أطلب من زوجي مقاضي وتبغى هي اللي تصرف وإذا بغيت شي أقلها.. واكتشفت إن هذا أسلوب أطعم الفم تستحي العين.. يعني نآكل من خيرها وما نخالفها في شي تآمر بيه.. الشي الثاني أمس كانت بتكلمني وكانت معصبة مني عشان طلبت رأيي في شغلة وقلت لها وجهة نظري بصراحة وياليتني ما قلت.. لأنها هي اللي سألتني ولما ما عجبها رأيي عصبت علي.. المهم قالت لي الشغالة الجديدة لو جات لا تخربيها لي وتقومي تغسلي الصحون في المطبخ وتنظفي معاها خليها تعرف إن هذا شغلها.. قمت قلتلها بس أنا في بيتي أنظف بعد الأكل على طول وما أحب الصحون تتكوم.. يعني لو الشغالة مشغولة معاك ليه ما أساعدها في الشغل.. زعلت وعصبت وصارت تقول لا أجل اخدميها انتي أحسن.. وكانت تقوللي لا تستخدمي أغراض المطبخ حقك خليها مكرتنة وخلينا نستعمل المطبخ حقي..وبدأت أحس إن أم زوجي ما تبغاني اتصرف في المطبخ كأني في بيتي.. يعني كأني في مطبخها ولازم أمشي على نظامها.. مع العلم مطبخ عمتي معظم الوقت مكركب بحكم إن الشغالات دايمآ مشغولين معاها وبحكم إن طبخها كثير وبصراحة أنا ما أحب مطبخي يكون بهالشكل..قلتلها أنا ما أدري كيف حيكون الوضع في البيت الجديد وإن شاء الله خيرفما عجبها كلامي.. ومن وقتها وهي معصبة وباين هالشي في ردودها وطريقة كلامها.. يعني تتكلم بجفاء.. أحس يا بنات لازم ابينلها من البداية اني أنا كمان لي شخصيتي في البيت ولي في المطبخ زي ما ليها وبالعكس.. أنا الآن المفروض أكون المسؤولة عن ترتيب المطبخ بحكم وضعها الصحي. ولا إيش تشوفوا..
معليش يا بنات أدري طولت عليكم بس أرجوكم لو في أي نصيحة أو توجيه تشوفوه وغاب عني نوروني تكفون.. ولو في وحدة مرت بهالتجربة أو تجربة مماثلة تنصحني.. وادعولي إن موضوع النقل في بيت مشترك هذا يتلغي بقدرة من عنده وربنا يصرفه عنا ويدبر أمرنا ويكفيني شرها وشر كل دابة هو آخذ بناصيتها إن ربي على صراط مستقيم.