السلام عليكم ورحمة الله وبركاته
هلا ومرحبا خواتي
حبيت أنيه أذكر لكن تجربتيه مع منتجات الأخت بدرية1 ربي يجزيها كل خير
وبصراحة .. أنا ما بمدح منتجاتها لأنيه مندوبتها
ربي يشهد أنيه قلت بجرب المنتجات على عمريه قبل الخوات
عشان يوم بكتب عنهن أكتب عن تجربة
ولو أنها الشحنة وصلتنيه قريب
بس تابعن الموضوع ويايه عشان تعرفن كل يديد
+::+ تونيك وشامبو تطويل الشعر في 28 يوم +::+
ابتديت فيه اليوم
وطبعاً ما بقول لكن هيه شفت النتيجة وشعريه طول
يباليه شهر عشان أخبركن بالنتيجة إن شاء الله
بس حبيت أخبركن أنه الشامبو تحسي به طبيعي
ونفس الشي التونيك
وروايحهن خفيفة وبالتالي تعرفين أنه المنتج طبيعي
بس بعدنيه أطلب منكن اتتابعن الموضوع باستمرار
لين أخبركن بالنتايج الحلوة بإذن الرحمن
-------------------------------------------------
+::+ زيت أسويني أو سواني للشعر +::+
بصراحة خواتي أنا من النوع اللي ما أحب أدهن شعريه
لكن الأخت بدرية1 نصحتنيه أجرب الزيت وأحط منه على شعريه كل ليلة
وأنا ابتديت فيه من اليوم
العلبة فيها 100 مل
والزيت مب سايل شرات زيوت الشعر المنتشرة
هو قوامه شبه كريمي ولونه أخضر حلو
ريحته خفيفة على جوز هند لكن روووعة
الزيت هذا يساعد على تنشيط الدورة الدموية من عند جذور الشعر
وبالتالي يوقف التساقط ويقوي الشعر
وفي نفس الوقت يقضي على القشرة
وبعد يبرد الراس ويخليج تنامين مرتاحة
وصدقونيه خواتي
حطيت منه كمية بسيييطة على شعريه ودلكت فروة راسي شوي
وصدق صدق أحس ببرودة حلوة في راسي
-------------------------------------------------
+::+ كريم للبشرة الجافة +::+
هالكريم ينحط على الأماكن الجافة في الجسم
الركب والكوع والشفايف وأي مكان
ينحط على المكان الجاف المسا قبل النوم
وتدلكين المكان عشان البشرة تتشرب الكريم
وإذا كانت البشرة جافة واااايد
يستعمل صبح ومسا
وعن تجربة أقول لكن الكريم واايد حلو وترطيبه أحلى
والعلبة فيها 200 مل
-------------------------------------------------
+::+ التونيك الصيني +::+
هذا بصراحة قلت بجربه على الوالد ربي يحفظه ويخليه عشان أعرف النتيجة عدل
وعقب أكتب لكن النتايج من استخدامه
بس إن شاء الله أنا متفاءلة خير
هالتونيك ينحط منه كمية صغيرة مرتين في اليوم (صبح ومسا) على الشعر
وعقب تدلكين فروة الراس شوي
وإن شاء الله بشوف النتايج وبخبركن أول بأول
-------------------------------------------------
+::+ زيت نيلينغاتي +::+
نفس زيت أسويني
بس بعدنيه ما استخدمته
أتريا أسويني يخلص وببتدي فيه
-------------------------------------------------
+::+ تونيك حب الشباب + قناع حب الشباب +::+
جربته على ختيه الصغيرة
لأنيه والحمدلله مافيني حب
هي ابتدت فيه من 3 أيام تقريباً
التونيك تستخدمه مرتين في اليوم صبح ومسا
تحط منه شوية على قطنة نظيفة وتمسح به ويهها
أما القناع فهو عبارة عن مسحوق بودرة
تحطين منه ملعقة ونص وتخلطين ويا الماي إذا بشرتج دهنية
أوتحطينه ويا الحليب السائل إذا بشرتج جافة
وتستعملينه مرتين في الأسبوع
ختيه تقول أنها تحس أنه الحب قام يخف (على فكرة هي صغيرة .. فالحب مش واااايد)
بس إن شاء الله مع الاستمرار النتيجة بتكون أحلى وأحلى
-------------------------------------------------
-------------------------------------------------
-------------------------------------------------
خواتي تابعوا الموضوع عشان تعرفن النتايج أول بأول
وأنا إن شاء الله متفاءلة خير
وشرات ما قلت لكن
ما حبيت أمدح المنتجات إلا عقب ما أجربهن على عمريه وعلى هليه
عشان أكتب التجربة بأمانة
بس أكيد النتايج الفعلية بتظهر مع الاستعمال المستمر
وإن شاء الله ببلغكن أول بأول
اشحالج اختي ان شا الله طيبة
الصراحة شوقتينا اختي رومانوف انا نعرف اكثر عن النتايج وان شا الله انها تطلع حلوة وزينة بس اختي ممكن تحطين صور للمنتجات هاي علشان نتعرف عليها اكثر
ولا تنسين تتواصلين ويانا على شان تقوليلنا بالنتايج اللي ان شا الله ترضيج وترضي الجميع ومشكوووورة اختيه على امانتج وصدقج مع نفسج اولا ومع العملاء ثانيا تسلسمين يالغالية
والله يوفق الجميع ان شا الله
اختكم في الله
ام ناصر