..مريومــه.. @mryomh_28
محررة
متزوجه وموظفه وما عندك وقت للطبخ والتنظيف؟؟ تعالي اعلمك طريقتي
السلام عليكم ورحمة الله وبركاته
في البدايه انا حديثة الزواج وموظفه واسكن في شقه لحالي .. وطبعاً ما حبيت اجيب شغاله وانا توني متزوجه وما عندي عيال
كنت شايله هم الطبخ والتنظيف.. في بيت اهلي ما تعودت اسوي شي غير تنظيف غرفتي ..
اوصل البيت الساعه 3 متى يمديني اطبخ ؟؟ متى بغسل المواعين وبنظف ؟؟ متى بنام لي شوي العصر ؟؟
واجهت شوي صعوبه في البدايه بس الحمدلله مع الايام عرفت ارتب وضعي ..
اول ما داومت بعد الزواج كان الغدا يجهز الساعه 5 وتخيلوا على ما نتغدا صار قريب المغرب وابي انام
اصحى من النوم اغسل المواعين وانظف ويومي كله رااااح مع شغل البيت ..
وزوجي يرجع قبلي بساعه يعني تخيلوا ينتظر 3 ساعات لين يتغدا ..
صار يرجع البيت ينام ويصحى ويشوف التلفزيون ويلعب بلاي ستيشن والغدا ما جهز
حسيت بالاحراج مو حلوه ينتظر كل هالوقت والاكل ما جهز ..
قلت لاااااازم اشوف لي حل .. والحمدلله رتبت اموري وصار غداي يجهز الساعه 3.45 إلى 4 بالكثير
وهذا بفضل الله ثم فضل امي الله يخليها لنا ويطول بعمرها صارت تنبهني على شغلات ساعدتني كثير ..
***
اشتري الدجاج طازج دجاج المزرعه واقطع كل دجاجه 4 قطع ..
اشيل الجلد لاني مااحبه بالاكل وانظفه بالملح والخل واحط كل نص دجاجه ( صدر وفخذ ) في كيس بلاستك وعلى الفريزر
ويصير علي بس اسلقه وقت الطبخ او حسب الطبخه ممكن اطبخه بدون سلق
***
الروبيان ( الجمبري ) اقشره وانظفه واسلقه واوزعه باكياس نايلون وعلى الفريزر ..
ويصير جاهز على طول استخدمه ..
***
اللحم ما اشتري الا وقت اللي بسوي .. ممكن مرتين بالشهر ..
طبعا اخليه يقطعه لي حسب الطبخه اذا مرقه قطع صغيره واذا برياني او كبسه قطع متوسطه
***
واشتري صحون صدر دجاج فرش .. كل صحن لاستخدام مره وحده
واحيانا اشتري صدر دجاج مثلج ماركة الاسلامي فيه كيولين اخليه يكسره لي 4 او 5 اقسام لان صعب علي اكسره في البيت
واخلي كل قسم لاستخدام مره وحده ..
***
واخذ ستيك لحم قطع صغيره اتبله واقسمه باكياس نايلون ..
ويصير علي بس اطلع الكيس واشويه .. جاهز بتتبيلته
***
السمك اشتري نوع واحد اللي هو ( الصافي ) كيلو او كيولين حسب المتوفر
انظفه واحشيه بخلطة الثوم واوزعه بأكياس نايلون وعلى الفريزر ..
***
الحين ايدامي كله جاهز .. من الليل اقرر شنو بطبخ غدا بكره ..
اذا دجاج ادخله الثلاجه قبل النوم عشان يفك عنه الثلج على الراحه ..
وطبعا ما يحتاج تنظيف ولا غسيل جاهز
وعاد حسب الطبخه اذا برياني اسلقه من الليل واتبله واخليه بالثلاجه ياخذ النكهه ..
واذا كبسه ما يحتاج سلق .. بس دايم افضل اسلقه عشان يجهز الغدا اسرع ..
واذا صدر دجاج ادخله الثلاجه بالليل وقبل لا اطلع الدوام انقعه بماي وملح
ولما ارجع اقطعه يصير تقطيعه جدا سهل وسريع لانه تنقع فتره ..
***
واذا سمك اطلعه الصبح واذا رجعت على طول اقليه او اشويه ومرات اقلبه بدقيق قبل القلي
ونفس الوقت اسلق رز ابيض .. على بال ما اقلي السمك يجهز الرز
***
واذا لحم سلقته من الليل واذا برياني سلقته وتبلته ودخلته الثلاجه .. ويصير علي بس اطبخ الرز
واذا لحم مفروم اسوي الحمسه من الليل واغطيها بنايلون وادخلها الثلاجه ..
***
واذا بسوي مكرونه بشميل اسوي البشميل من الليل لكن اقلل كمية الحليب عشان ثاني يوم اسخنه وازيده حليب واضبط الملح
ويكون اللحم والبشميل جاهزين ويبقى علي بس اسلق المكرونه
***
طبعا المنتدى ساعدني كثير باختيار الاطباق ..
سويت لي ملف وحرصت اني اختار اطباق سهله مافيها شغل كثير
وكل يوم اتصفح ملفي واختار طبق .. بالاضافة لطبخات الانستقرام
واهم اهم شي اسوي كذا شغله بوقت واحد عشان اكسب وقت ..
يعني على بال ما اسلق الرز او المكرونه اكون جهزت الدجاج او السمك
واحيانا اسلق نقانق للمكرونه واقطعه واقطع الخضار واحمسها على ما تجهز المكرونه
واذا بسوي حمسه مع صدور دجاج اقطع الدجاج واحطه بالمقلاه ونفس الوقت اجهز البصل والثوم والخضار على بال ما ينشف ماء الدجاج
طبعا الفرامه مريحتني عالآخر افرم فيها البصل والثوم والطماطم بدل التقطيع
وعلى بال ما يجهز الغدا اسوي سلطه او شوربه بس مو دايم حسب الوقت ..
اما المواعين احاول كل ما ارمي شي اغسله على طول خاصه اذا كان كل شي عالنار وفاضيه
عشان ما تتراكم علي واحط ايدي على راسي من هول المنظر
ويصير باقي علي بس الصحون والملاعق والمواعين اللي استخدمتها للاكل اغسلها بعد ما اصحى من النوم
اما بالنسبه للتنظيف
شقتي تتكون من غرفتين وصاله ومطبخ وحمامين
المطبخ :: اغسل الفرن وامسح الارضيه مرتين بالاسبوع .. الفرن احاول قد ما اقدر اني ما اوسخه
طاولة الطعام وسطح الدولاب امسحهم يومياً
غرفة النوم :: كل يوم علي ترتيب السرير وبما ان احنا شخصين اكنسها مرتين بالاسبوع لانها ما تتوسخ
حمام الغرفه :: ارشه بماي يوم ورا وغسيل عالسريع .. الغسل العميق مره بالاسبوع
الصاله :: ما نجلس فيها كثير فدايماً نظيفه .. ارتبها متى ما احتاجت
الحمام الثاني والغرفه الثانيه ابد ما ندخلهم مخليتها ستور
اجيب شغاله بالساعات كل اسبوعين مره تجلس ٣ او ٤ ساعات تنظف الشقه كامله من الألف للياء
وبس هذا نظامي اللي ريحني كثير وصار عندي وقت اطلع واستانس واقضي مشاويري وانا مرتااحه
دعواتكم لي بالذرية الصالحه
35
21K
يلزم عليك تسجيل الدخول أولًا لكتابة تعليق.
دايما طيوبة
•
مشكوررة لذكر تجربتك
الصفحة الأخيرة