السلام عليكم
اخباركم يابنات
ماودي اطول عيلكم انا عندي موضوع من زمان ودي اتكلم فيه بس ماكن فيه مناسبه
لاحضت في المنتدى مواضيع كثيره
بعض الزوجات اللي فقدت زوجها تتكلم عن قصه وفاته زوجها حبيبها
انا لما اقرى هذي المواضيع اجلس ابكي الين ادوخ
والسبب اني جربت نار الفراق بس لفتره بسيطه وانا راح اقولكم الحكايه من اول
انا تزوجت عمري 20 سنه وكانت اول ايام زواجي اسعد انسانه علة وجه الارض
كان زواجي بشهر عشره بعيد الفطر ومرت تقريبا احدى عشر شهر وكنت انا وزوجي نخطط انا نسوي حفله نتذكر فيها ليله زواجنا
وسط تجهيزاتي للحفله كنت حامل بالشهر الخامس وبنفس الفتره اخذني زوجي للعمره ورجعنا وبعدها رحت للمستشفى مراجعه عاديه وكان يوم ثلاث وعشرين من رمضان يعني قرب يوم الحفله راح زوجي يوم 25 من رمضان لمنطقه ثانيه علشان يجيب ابوه من المنطقه وكانت بعيده عنا قبل يروح كنت اقرى بالجريده عن عن حوادث كثيره بس كان حادث واحد هو اللي بقى في تفكيري كنت دايم افكر فيه ماعرف السبب المهم راح زوجي قالي جهزي نفسك انزلك عند اهلك قلت ان شاء الله
رحت للغرفه فتحت درج الملابس
ناضرت على ملابسي اللي راح البسها في العيد جاني شعور غريب مادري وش هذا الشعور بس ضايقني المهم قفلت الدرج ولا اخذت شي معي
وصلت عند باب اهلي طلعت كلمه منى مادري بدون تفكير قلت لزوجي اترك هالسفره لاتروح رد على بدون شعور قال اللي الله كاتبه بيصير مادري كاننا حاسين فيه شي بيصير المهم وصيته كذا وصيه لا تسرع لاتشغل اغاني بالطريق اذا تعبت وقف واترك صديقك يسوق عنك وغيره من النصايح
ولما راح صرت كل ساعه اتصل عليه لما وصل بالسلامه بعدها احس راتحت لمده اربع ساعات بعدها جاء وقت رجوعه رجع القلق من جديد لما تصلت عليه قالي خلاص لاتتصلين لما اوصل انا اتصل عليك وفعلا ماتصلت رحت ابي انام شوي اخذت غفوه وصحيت احس عقلي مو معي كنت شوي وانجن رحت اتصل عيه طلع الجوال مقفل وارجع اتصل وكمان مقفل وقتها مادري وش اسوي كيف اتصرف صحيت امي وجلست ابكي واصيح مادري احس شي صار امي تقولي اكيد جواله قفل شحن قلت لا زوجي معه بطاريه بديله وغير كذا معه شاحن بالسياره هذا احتمال بعيد مستحيل يقفل جواله وجلست اتصل على الجوال من الساعه ست الصباح الى تسع الصباح كمان مقفل
ماقدرت اتحمل رحت اتصلت على خالتي قلت ممكن يكون وصل بالليل وماحب يزعجني وراح للبيت ونام
انا اتصلت على خالتي لقيت خالتي نفس حالتي صحت من النوم مفجوعه شافت حلم خوفها
شفت خالتي كذا وانا اجلس اهديها وان ابكي واقولها خاله ليش تبكين اكيد تعرفين شي
ترد خالتي تقول والله مادري ماعرف عنهم شي بس مادري ليش أبكي
يمكن نص ساعه وأنا أسئلها ياخاله قولي الصدق وهي تقولي مادري وكل شوي يزيد البكي وأحنا مانعرف شي
قفلت من خالتي مادري وين أروح أبوي مو موجود وأخو زوجي أمه خايفه تقوله ويروح مستعجل ويصير له شي
وجلست أفكر وش اسوي رحت أتصلت على أمن الطرق وأنا أبكي أسالهم جاهم بلاغ أو أي شي يدل على أن فيه سياره تعطلت أو حادث لاسمح الله وهم يأكدون لي أن مافيه شي
تسرب شويه شعور بالراحه أو زي ماتقولون شوي أمل بس مو قادره أصدق هالشعور
جلست شوي رحت أتصل على خالتي خالتي ماترد رجعت أتصل على جوال حماتي أخت زوجي أسمع صوت صياح وصراخ مافهمت شي منها وقفلت الجوال وجلست أصرخ بدون شعور وأبكي وأضرب وجهي وأرجع أتصل مره ثانيه عليها وأكلمها وش صار تبكي بقوه وتقول أبوي مات بس فلان ماندري عنه اللي هو حبيبي فجأه طاح الجوال من يدي جفت دموع ماقدرت أبكي من الصدمه مو مصدقه جتني أمي تبيني أبكي علشان أرتاح وتقولي أبكي ماقدرت أتكلم وشوي صرخت صرخه وأنا أقول يااااااااااااااااااووووووووووووووووييييييييليييييييييييي وأرجع اقولها امي لمار حرام عليك أسترجعي قولي أنا الله وأنا اليه راجعون
وأرجع اصرخ وأقول ياويلي تصرخ أمي على لماااااااااار قولي لا اله الا الله ارجع اقول ياويلي والله ماقدرت انطق الشهاده وتجي أمي تضربني بقوه وتهزني وأنا جامده بمكاني بدون دموع بس أقول ياويلي ماقدرت أصدق
ورحت على طول لبيت أهل زوجي بدون دموع مو قادره أقول ولا شي دخلت الباب من باب الشارع أسمع الصراخ والبيت مليان رجال وحريم حسيت هالبيت شي مخيف وقفت عند البا ب مابي أدخل أخاف أنصدم ماقدرت أدخل مو مستوعبه هالوضع شوي سحبتني خالتي ودخلتني على الصاله وأنا ماشوف غير أخوات زوجي اللي تضرب نفسها واللي مغمى عليها وخالتي مو موجوده طحت باغماءه مو قادره أبكي جت وحده من الحريم وشالتني ورشه على وجهي مويه وقتها حسيت أني رجعت للواقع
وأسمع وحده تقول أحمدوا ربكم ماراح غير واحد الثاني مافيه شي وأنا مادري منو اللي راح ومنو اللي يقى وأناضرها وتقولي زوجك مافيه شي ماراح غيرعمك وعمك رجال كبير وفيه قلب والحادث مو قوي بس من الصدمه عمك توفى بس ماقدرت أصدقها وقتها أحس قدرت أنزل دموعي يعني شي ماتخيله لدرجه أن الدموع جفت ماعاد أقدر أبكي ودي أبكي أحس قلبي بينفجر من كثر الكتمه اللي أنا كاتمتها بصدر صرخت وجلست أضرب نفسي ماقدرت أصدق ان زوجي رجع لي أحاول أروح له لانه صار الحادث بين المنطقتين اللي اسكن فيها والمنطقه اللي سافر لها كنت وقتها مافكر غير أطلع بالشارع وأروح مشي لزوجي حبيبي أتاكد هو ميت ولا حي جلست من الساعه ثلاث العصر الى الساعه ست الصبح ثاني يوم
وانا مادري زوجي حي أنتضره ولاميت أفقد الامل رحت دخلت غرفه نومي وشفت صورته وأمسكها وضميتها وبكيت الى أن أغمي على صحيت على أصوات صراخ مره ثانيه خايفين على وجلسو يصحوني وماتركوني لوحدي
المهم جاء أخو زوجي وقال أتطمني زوجك مافيه شي بس تعبان شوي وأدعيله وقتها حسيت الروح أرجعت لي
وجلست فكرت شوي بولدي وش ممكن يصير فيه لو لاسمح الله صار بزوجي شي هو الى الان ماطلع على الدنيا
يعني يعيش يتيم وكل هذا أبكي اللى أن يغمى على ويرجعون يصحوني وهذي حالتي لمده يومين
لانه صعبه على زوجي وعمي أبو زوجي وأخوات زوجي بحاله مايعلم فيها غير الله أخوهم وأبوهم بنفس الوقت صعبه
وشي ماتتخيلونه وبعد يومين أنقلوا زوجي لمسشتفى بنفس منطقنتا ولما رحت ازو ر حبيبي كنت خايفه وبنفس الوقت فرحانه كنت أتخيله أنه راح يكلمني ويسألني أخبارك ويسأل عن ولده ويجلس يتحسس حركته في بطنه مادري ليه كان هذ اللي في بالي ماكنت أتخيل أني أشوف شي ثاني ولما وصلت المستشفى كنت أحس الممرات طويله مره وماكنت أشوف اللي حوالي كان قلبي وعقلي مع حبيبي وصلت اخيرا لغرفه زوجي وتفاجات مكتوب عليها العنايه المركزه غصب عني طحت ماقدرت أوقف علشان اكمل وادخل الغرفه قمت حاولت ودخلت
وشفت مرضى كثيرين بجنب بعض كلهم في حاله مايعلم فيها غير الله
وصلت الى سرير زوجي ماعرفته ماصدقت قلت لا مو هذا زوجي قالوا انتي تبين المريض فلان قلت أيه قالوا هذا هو ماعرفته من كثر الأجهزه على وجه وصدره ومن غير الحروق اللي كانت على وجه ويديه ورجوله ماعرفته كذبت نفسي أول مره ولما أتاكدت انه زوجي صرت بحالتين مادري أدري أفرح اني شفته حي أ و أبكي على حالته اللي وصل لها وقفت ثواني عنده ويجوني الممرضات ويطلعوني ماخلوني أشبع منه وجلس على هالحاله تقريبا شهرين على مابدى يتعافى شوي شوي وبعد الشهرين جتني صدمه ثانيه ان زوجي مشلول شلل نصفي
ماقدرت أتحمل صعب على شبابه وحاله وصعب على حاله طفلنا اللي زوجي كان أول يقول بس يبدا يمشي أخذه معي كل مكان صار الحين حبيبي يتمنى ولده يكبر علشان هو اللي ياخذه معه وكان زوجي بدى يصحى من الغيبوبه كان مصدوم من نفسه مو قادر يتحرك كنت أقوله هذا من التخدير ماتقدر تتحرك علشان ينسى شوي
وبعد شهر تقريبا صرت انا حامل بالثامن وكنت تعبانه مره كنت أتخيل اول ماحملت كيف زوجي يوديني المستشفى الولاده وكيف راح يضم ولده الحين زوجي هومحتاج احد يضمه ويصبره على هالحاله اللي فيها
تقريبا بعد مرور ثلاث شهور بدأ يتحرك شوي وبدا يحرك اطرافه حسيت الفرح بعيون زوجي حبيبي ماتخيلته يفرح بعد والله سجدت سجود الشكر من الفرحه وماخليت احد ماعلمته الخبر والكل فرح معي وبدوا يحتفلون معي
لكن زوجي بقي فتره ملازم لسرير لانه كان عنده كسر بعضمتين بالرقبه الى ان ركبو مثبت لرقبه وصار يقدر يمشي بحريه اكثر انا صرت بالشهر التاسع وماطولت ولدت ولما ولدت بشرت زوجي وعلمته وكان وده يطلع من المستشفى علشان يجي عندي وطلعت من المستشفى مع ولدي ورحت على طول عنده للمستشفى وجاء يشوف طفلنا اختلطت دموع الفرح ودموع الحزن تذكر ابوه اللي كان يتمنى يشوفه حفيده ودموع الفرح ان اول مره ينزل مع الدرج بعد أربع شهور ونزوله كان علشان يشوف اول مولود له وضمه ربع ساعه وهوماسكه وانتهى وقت الزياره وطلعت للبيت عند خالتي علشان تشوف حفيدها ونمت عندهم هذاك اليوم ولما صحيت الصبح صحيت على صوت زغاريد والناس ماليه البيت كان شي صعب أوصف الفرحه اللي كانت في اليوم هذا ططلع حبيبي من المستشفى يمشي على رجوله ماقدر أوصف شعوري صرت أبكي من الفرحه وسجدت سجود شكر ربي اكرمني بفرحتين مره وحده ولدي وزوجي الله يخليهم لي ولا يحرمني منهم
وانا كتبت هالموضوع لاني لما اشوف وحده تبكي وتقول قصه وفاه زوجها اجلس ابكي لا شعوريا ماقدر امسك نفسي غصب تطلع دموعي وأجلس أدعي لها ولزوجها بالرحمه وبعد قلت قصتي علشان اذكر الناس بأن رحمته الله واسعه
والحين ابي منكمدعوه لكل وحده فقدت زوجها او زوجها مريض ان ربي يعوضها ويشفي مريضها
لمار السويلم @lmar_alsoylm
عضوة فعالة
يلزم عليك تسجيل الدخول أولًا لكتابة تعليق.
ماشاء الله الله يبارك لك ويتمم فرحتك
لكن يااختي مافيه فايدة الصراخ لان المؤمن يؤجر على اول لحظة من الصدمة
يكون صابر ومؤمن بالقضاء والقدر
وكلنا بنموت وكلنا بهالدنيا رحلة وبتنتهي لاتجزعين ابدا ودائما تذكري الموت
وخليه ببالك لييييييه علشان ماتنصدمين ويؤثر على صحتك وعلى اللي حولك
قوي علاقتك بالله وكوني كما قال الرسول علية الصلاة والسلام
المؤمن القوي خير واحب الى الله من المؤمن الضعيف
والله يخلي لك زوجك ويطول عمره ويشفية
لكن يااختي مافيه فايدة الصراخ لان المؤمن يؤجر على اول لحظة من الصدمة
يكون صابر ومؤمن بالقضاء والقدر
وكلنا بنموت وكلنا بهالدنيا رحلة وبتنتهي لاتجزعين ابدا ودائما تذكري الموت
وخليه ببالك لييييييه علشان ماتنصدمين ويؤثر على صحتك وعلى اللي حولك
قوي علاقتك بالله وكوني كما قال الرسول علية الصلاة والسلام
المؤمن القوي خير واحب الى الله من المؤمن الضعيف
والله يخلي لك زوجك ويطول عمره ويشفية
ياحيااتي انتي الحمدلله على سلامتك والله يشفي زوجك والف مبرووك عالبيبي يتربى بعزكم والله يرحم عمك :(
الصفحة الأخيرة
والله يااااعمري أكتب وعيوني غرقانه دمووووع .. قصتك جداََ حزينـــــــه
الله يرحم أبو زوجك .. ويشفي لك زوجك ويحفظ لك ولدك من كل مكروووه يارب ..