خلااااص تطلقت ،،،يارب تفرجها علي

الموضوع للفضفضه قبل أخذ أرائكم:confused:

انا متزوجه من تسع سنوات عندي ولدين ولله الحمد
كنا عشاااق بمعنى الكلمه يلبي لي كل طلباتي وأنا نفس الشي والكل كان يحسدني على العيشه اللي عايشتها
بس للأسف قبل ثلاث سنوات تغير كل شي والسبب لأنه ألتزم وصار متشدد في كل شي
أنا هنا مو ضد التزامه انا ضد تشدده
السوق ممنوع الا في الأعياد او المناسبات الكبيره بس
والرومانسيه قلت كثير عن قبل وصارحته بدون أي مجامله
وطلباتنا وأكلنا وشربنا يجيب أساس الأساسيات والباقي بعدين
وانا اجتماعيه احب صديقاتي يجوني واجيهم ممنوع أحاول فيه شهر كامل علشان يوصلني لصديقتي في الحي اللي جبنا
طبعا أنا ماسكت مره كنت أكلمه وأتدلع عليه ومره زعلت عليه وخاصمته واخرتها رحت لأهليوعلمت أبويه بكل شي وبعد شهر رجع راضاني واشترطت عليه انه يتعدل معاي

ولله الحمد كملنا ست شهور ووضعنا من أحسن مايكون
اللهم أن صرفيته ع البيت قلت بزياااده ودايم المطبخ فاضي

وقبل شهور كان محتاج فلوس وطلبني ذهبي ووافقت مقابل أنه بعد فتره ينزلني سوق الذهب ويعوضني بأحلى من اللي باعه طبعا انا سبق وبعت ذهبي علشانه وللامانه عوضني
وفعلا بدأ يجمعلي فلوس للذهب واعطاني 6000 ريال قالي خليها عندك علشان ازيدك عليها واعوضك

الي صار انه انا رحت زياره لأهلي وأرسلت له صوره غراميه وكنت دايم أرسله عادي
وكانت عندنا مناسبه في ذيك الليله وأرسلت له لو سمحت الليله لاتجيلي ابغى احضر عزومة اهلي الا أتفاجأ بالبركان اللي فيه يتصل ويخاصم وانتي ماتستاهلين كم لك عند أهلك وتاركتني
قلتله ياحبيبي بدل الخصام هذا كله قولي لاتحضرين وأنا مابأحضر
ماله داعي ترفع صوتك علي
وجا ورجعني بيتي ويبغاني آخذه بالأحضان وأدلعه لأنه الصوره هيجت مشاعره وكان يبغاني أنام معاه
طبعا عاتبته وزعلت عليه وقلت احنا مو بهايم فيه شي اسمه كلام حلو
وأخذ حقه وأنا مو طايقته وبعد ماخلص بدأت أبكي حسيت نفسي آله اشبع رغباته وبس حتى مافكر يسألني اذا خلصت او يحاول يراضيني
خلص وراح يتحمم

بعدها بأيام رحت لأهلي لأنه كان مداوم وبالعاده هو اذا خلص دوامه يجي ياخذني
وارسلت لي صديقتي قالت بأجيك بكره قلتلها ياهلا
على أساس أني بأرجع بيتي وأرسلتله صديقتي بتجيني خاول تجيلي بدري علشان اتجهز
قالي لاااا ولاتستقبلين في بيتي استقبلي عند أهلك
مارديت عليه واستحيت اعتذر من البنت لأنها أول مره تجيني وكلمت أخوي يرجعني بيتي


ولما رجعت بيتي عصب علي وقالي ليش تجين اطلعي من بيتي قلتله البيت هذا لي ولعيالي اذا تبغى تطلع مع السلامه أنا ما بأطلع منه

وقبل سالفة صديقتي قالي ابغى من الفلوس اللي اعطيتك ألفين قلتله أوكي
بس لما شفت نذالته وأنه ما رجعني لبيتي وحركاته البايخه قلتله مافي فلوس مابأعطيك علشان مره ثانيه تعاملني مثل ما أعاملك

وعصب علي وخاصم وأنا مارديت ولا بكلمه وحده
واليوم الثاني أرسلي أنتي طالق
بكيت وتعبت مررره وقمت وضيت وصليت وتجهزت لصديقتي وكنت أسولف معاها والبكوه في حلقي

وبعد ما طلعت جا عندي وقالي اجلسي في بيتك وانا بأرضيك باللي تبغينه ولا تعلمين أهلك
قلتله ماعاد لك كلام معي وكان الوقت متأخر ونام برا لأني قلتله ما أبغى أشوف وجهك


واليوم الثاني دقيت على اخويه وجا اخذني واولادي معاي

أهله حاولوا يدخلون وانا ماتحملت وقلتلهم بكل عيوبه ووقفوا معاي لأنهم عارفين ولدهم

والحين لي اسبوعين عند اهلي وما احد يدري بطلاقي الا ابوي واخواني واختي
اما امي ماقدرت أقولها لأنها تعبانه وهي من النوع اللي تحب تفضفض للناس وانا ما ابغى الخبر ينتشر ومتأكده انها بتزعل مني بس كل ما حاولت اقولها ما اقدر ينربط لساني خصوصا أني اول مطلقه في عايلتنا وبتشيل همي طوووول الوقت فقررنا مانقولها الا اذا فيه بوادر للصلح


هو يتصل ويرسل بخصوص الاولاد وما أرد عليه نهائيا بس أرسله طلبات أولاده
وأبوي قالي خليك من العواطف وخلي قلبك قوي نهايته يرجعلك بس أنا اشتقت له وأحس أني ماعاد أتحمل غيابه واوقات كثيره ألوم نفسي غلى مشاعري تجاهه وأنه مايستاهل أفكر فيه لأنه باعني

طبعا الفتره اللي طلقني فيها كان متزاعل هو وأخوه فكان متضايق ع المشاكل اللي بينهم


وهذا وضعي
اللهم اجرني في مصيبتي واخلفني خيرا منها
دعواتكم لي