السلام عليكم
شحالكم خواتي .. عساكم بخير وطيبات

أختي العزيزة((Essence)) الله يوفقج في حياتج المستقبلية مع زوج المستقبل
وان شاااء الله تكونين ربة بيت ممتازة

بالنسبة لي ..يايبة لج معاي طريقة ((اللقيمات)) واللي أخذتها من عمتي أم زوجي ..وهي طريقة بسيطة جدا وسهلة وداااايما لما اسويها أسوي كميات كبيرة وتخلص كلها في نفس اليوم ..لأن الشباب ربع ريلي تعجبهم واااااااااااااايد

على العموم ما راح امدح عمري اكثر بس صدقيني راح تضبط معاج ان شاااء الله

المقادير:
2 كوب دقيق ...تضعين عليه نصف ملعقة خميرة فورية
كوب من الماء الدافئ به قليل من الزعفران
2 صفار بيضة (وأأكد على الصفار)
2 ملعقة سكر
2 فنجان حليب نيدو مجفف
وبس



الطريقة وبكل بساطة:
تعجنين كل المقادير مع بعض بماء دافي تدريجيا الى ان تتماسك العجيبة وتختلط كل المقادير ببعضها
وتغطينها بالقصدير لمدة نصف ساعة او اكثر بقليل

ثم تكون العجينة جاهزة لعمل كرات اللقيمات...



وبالهناء والعافية ...ولا تنسين طبعا العسل الطبيعي أو الدبس قبل التقديم
أتمنى تضبط معاج ... بانتظار ردج

أختج // الصدى:19:

السلام عليكم

المسافرة حبيبتي من تواضع لله رفعة .....كل هالاكلات وما تعرفين مستحييييييل :)))))))))))))

Essence لا شكر على واجب ......نحن خوات ولازم نساعد بعض
بس لاتنسينا اول ما تعرفين بلاليط احمد خبرينا اول مرة اسمع عنها
واي شي تسوينة ويطلع حلو خبرينا

انا عندي تجاااارب مع طبخنا يضحك :24:
مرة سويت البلاليط طلع عجين ...فتعلمت انة لا يطبخ كثيرا
ومرة سويت ساجو من منتدى بالشكر المحروق اول مرة اسوية بالمقادير
طلع حلوو بس مررررررررر فقالت امي على الزبالة على طوووووووول بدون تفاهم :)))))))))))))
وسويت الجباب ...ولم يذكر في الكتاب انة يختمر ...مع ان امي قالتلي لازم يختمر
انا مشيت حسب الكتاب طبعا ......فطلع نوع جديد من الجباب وكان اخر مرة
وسويتة مرة من وحده تعلمتة بس ما ذكرت الماء فطلع صنع تايوان مش الامارات :))))))))
وعيش المجبوس يطلع خبيصة مب نثري فتعقدت
وسلامتج توقف الابداع عند هالحد :))))))))))
والله يستر
يكفي علينا الهنود ينافسونا وطلعوا اشطر عنااااااااا ::))))))))))))))))))


الصدي عجبتني طريقتج في اللقيمات وخصوصا اني من عشاقها
بس اعطيني الحل شو اسوى بالبياض البيض ...عشان اسويها قريبا
قصدك الفنجان ...فنجان القهوة صح

وعلمينا شو تعلمتى من عمتج شكلها فنانة ولك تحياتي :26:

مرحبا.....والله انا حالتي نفس حالتج اختي ميس شيف... بس اليوم اول مرة في حياتي يضبط الخميرمعاي... طريقه شمس الامارات يزاها الله الف خير......
على فكرة لو سويتي القيمات خبريني عنها... لاني تعبت منها....

هلا ايسنس مرة ثانية.. بالنسبة للمشوي اللي تقصدينه .. مثل القوزي بس يدفنونها.. لأنه هل العين معروفين بها.. ويمدحونها اللي مجربينها.. والله يعطي أمج العافية ويخليها انشالله..

ميس شيف.. الحال من بعضه أختي.. لازم التخريب.. بخبرج عن وحدة ( ترا والله مب أنا ) هههههههه أول ماتعلمت طريقة الجباب قالت بتسوييه بروحها.. وخذت الطريقة من الحرمة لاكن هذيك نست تخبرها عن الخميرة.. ألحين سوت كل شي ومابقى الا الخبزة تتخبق وارتيت ترتيت والخبزة مكانها قالت كيف هاذيك تتخبق عندها قامت ويابت عود جبريت ويلست تنقز الخبزة من فوووووووووق.. بس قالت كم بخبق.. وعقت العجينة هههههههههههه وترى هالسوالف تصير عند الكل حتى اللي هم شيفش الحين لازم بيكونون مارين بهالتجارب.. ومن الفشل نتعلم..

ومثل ماقتلج أنا أحب الطبخ لاكن العيوش ماحبها وبعد ماضبطها لين هاك الزود.. لاكن عادي تتاكل هههههههههه
وعلمت الشغالة من هنه وهناك وألحين تسوي الغدا وأنا أتنفنتك في العشا أو أخبرها بالطريقة.. وهي تضبط بعد..

ومن المنتدى صارت عندي خبرة وأحب الأكلات اللي فيها مقادير بالضبط.. لأني أخربط بالبهارات اذا بدون مقدار..

وألحين خلااااااااااااص عزمت ما أدخل قسم الحلويات أو مابسوي شي الا للضرورة.. لأني زدت كيلوين

مع انه ايدي تاكلني اذا مادشيت هالأقسام أحس اني مالي غنى عنها والبنات اللي هنه كأنهم خواتي لازم أطمن عليهم..

هلا والله بنات دار زايد



انا بصراحه ابي طريقه مضبوطه لصالونة السمك


اللي تعلمني جزاها الله الف خير