انصحوني الله يسعدكم،حياتي في دمار ومو عارفه وش اسوي

السلام عليكم ورحمة الله وبركاته
الله يسعدكم دنيا وآخره يا اخواتي
والله اني بهم مايلعم فيه غير ربي،ابي اقولكم عن معاناتي واتمنى الاقي النصح والارشاد السليم منكم
ابي اقسم مشكلتي لكذا نقطه ابداها بالشقه حقتي:
انا متزوجه من سنتين ونص وعندي طفل واحد،من اول ماتزوجت وانا ساكنه عند اهل زوجي بشقه او تقدرون تقولون انه جناح يعني يادوب مطبخ صغير مره وغرفة نوم ومجلس صغير وحمام،الشقه مره ضيقه ومزحومه وبنايتها مو زينه كلش يعني السقف يخر بأيام المطر وبأيام الغبار الله لا يوريكم كأني جالسه بصحراء وبااااارده مره والله اعاني ايام الشتاء،وفوق كل هذا الشقه مو مفروشه،والله يااخواتي اني مو مرتاحه ابدا فيها يعني احيانا اسمع اصوات غريبه وتخوف وجدا اتضايق من ادخلها احس اني مو مرتاحه بس كسلانه ومافيني حيل اشتغل وبس معصبه ومتضايقه وتجيني حالة اكتئاب مو طبيعية وانا احس كذا لان اهل زوجي الله يهديهم ضعيفين ايمان شوي يعني فيه نسبه كبيره فيهم مايصلون ولا يعرفون ربي واغاني ٢٤ساعه وحش وغيبه الله يهديهم ويصلحهم وعندي سلفتي دايما تتخاصم مع زوجها وكل يوم اسمع صوت الضرب والسب والشتم بينهم والله نفسيتي تعبت من هالشي وانا مو مجبوره اسمع واشوف كل هالاشياء وبعد واحد من اخوان زوجي الله يهديه مضايقني بنظراته واسلوبه يعني اذا انا جالسه عندهم يدخل ولا يتنحنح وماادري الا وهو واقف على راسي ولا يمديني اتغطى ونظراته لي احسه غريبه وتراه متزوج ومو بس انا اشتكيت منه،وكمان مدخل البيت مشترك يعني مايمدي اهلي او اخواتي او صديقاتي وقريباتي يزوروني لان بيتهم كله شباب كبار،طبعا انا اتغطى عنهم وهذا الي زاد معاناتي باني مااقدر اخذ راحتي بالطلعه والروحه لان العيون كلها علي والله يابنات لدرجة انهم يراقبون ايش جبنا وايش حطينا يعني لو قطعت خبزه تدخلوا فيها،هذا بالنسبه للشقه.
ثانيا زوجي الله يهديه ويصلحه قولوا امين:
زوجي انسان حنون وطيب وصغير بالسن،بس مشكلته عصبي وعنيد ومايفهم وفوق كل هذا مايشتغل يعني اول ماتزوجنا كان عنده بزنس وبعدها تركه وكل يوم يوعدني انه يدور شغل ويتوظف ومن فتره قريبه اشتغل الحمدلله بس الحين تركها يقول ماارتاح فيها واهو كان واعدني نطلع بشقه ثانيه بعيد عن اهله لان ابوه طردنا كذا مره من بيته ودايما ابوه يسمعني كلام والله يجرح الله يسامحه ويلوموني علشان ولدهم يقولون مافي مره سنعه ادبته وعلمته وانا وربي العالم اني ماخليت شي الا قلت له ونصحته وماخليت شي الا سويته علشان يتعدل بس هو مو راضي مشغول باصدقائه ووناسته والحين حتى الحليب والحفايض لولده ياخذ فلوسهم من ابوه وابوه مانهم علينا وكل شوي يعيرنا فيهم وطبعا حتى الاكل والمشرب نفس الشي،والله تعبت من هالعيشه ماادري وش اسوي مع ذا الرجال والله كنت احبه بس الحين اتمنى اني ابعد عنه واهرب لاي مكان واخذ ولدي معي،تصدقون يابنات اني ادعي عليه بالموت والله لانه قاهرني ومخلي مجال لاهله يتكلمون علي.
والشي الي بعده ولدي الله يطول بعمره ويصلحه:
ولدي ابي اربيه ببيئه هاديه وبعيد عن اطفالهم لان تربيت اهل زوجي جدا سيئه للاطفال يعني دلع ودلال فوق الحدود وفيه تفرقه كبيره بالتعامل بين الاطفال وفيه اسلوب غلط بالتربيه انهم يعلمونهم كلام وتصرفات جدا وسخه وقذره عيب حتى على الكبير ينطقها والي يقهر ان الشي هذا عندهم عادي من باب الضحك وان هذا طفل مايفهم ولا يعلمونهم على الصلاة والاحترام وعلشان كذا ابي شقه بعيده عن اهله علشان اربي ولدي تربيه حسنه.
اخواتي والله العظيم اتمنى اعيش ببيئه كلها ايمان من ربي واطمئنان وفي بيت ينذكر ربي فيه ولا كل شوي اسمع اصوات اغاني وصراخ وضرب ومشاكل،ابي اعيش براحه انا وزوجي وولدي باستقرار وامان،ابي احس اني زوجه وام ومربيه واقدر اعزم الناس واضيف واطلع واروح بكيفي.
ادري كثرتها عليكم بس الحين ابي نصائحكم كيف اتصرف مع زوجي وكيف اقنعه بالوظيفه والشقه وكيف اتعامل معاه لاني احس اني جدا متهاونه معاه يعني مدلعته بزياده شوي ولا اقدر اتكلم معاه بصراحه ماادري ليه اخاف منه؟؟؟
انا ماتكلمت بالتفاصيل بس اذا عندكم اي استفسار اسئلوني ومستعده اجاوب بس ابي من الله ثم منكم النصيحه والدعاء جزاكم الله خير.