مرحبا انا تسلفت اليوزر من صاحبته واي رد بيكون هينا بيكون مني صاحبة المشكله مو من صاحبة اليوزر الله يجزاها كل خير :26:
بدخل بالمشكله على طول
زوجي انسان طيب وحبوب ويعاملني مره كويس مو مقصر علي بااي شي وانا مرتاحه معاه رغم كل العيوب اللي فيه واللي بذكرها الحين
لما كنا بشهر العسل شرب بيره ولما سألت اللي بالبار قالي انها بدون كحول وأكدلي هالشي
وبعد شهر العسل سافرنا مره ورجع وشرب وصارت بينا سالفه ورحت لبيت اهلي
ومره ثالثه سافرنا ورجع شرب وبعد هالمره انا رحت لااهلي وقعدت عندهم فتره وبعدين رجعت له
حاولت احلفه على المصحف ورفض قالي انو مستحيل يحلف على المصحف لأن الانسان مايضمن نفسه بس حلفلي انو بيحاول قد مايقدر انو مايقرب للشرب ابداً
وأنا صدقته لأن هو مو من الرجال اللي يكذبون وصريح معاي بدرجه فضيعه ويعترف بااخطاءه ايش ماكانت لأنه زي مايقول مايحب يخدع زوجته !
المهم لو جينا للشرب هو مايشرب الا لما يكون برا المملكه لان هينا ماقد شرب ابد
فيه مره شميت منه ريحه بس حلف واقسم انو ماشربها وانو لو شارب بيقولي لأنو زي ماقال انو هو شرب قدامي وليه ينكر انو شرب بالسعوديه
خلصنا من الشرب نجي لسالفه ثانيه اكتشفتها قبل اسبوعين يمكن
انو كلمت على جواله كذا مره ومارد ومره قلقت عليه فـ خليت اخوي يوديني للبيت عشان اشوف لو هو فيه او صارله شي !!
فتحلي الباب وماكلمني وقال انو بس كان دايخ ونام ولما دخل الغرفه سبحان الله شي خلاني اقعد بالصاله واشوف الصدمه
لقيت جواله القديم موجود ولما فتحت الجوال حصلت رقمين مدقوق عليهم فوق النص ساعه ومسجات لااسم واحد مو اسم زوجي وكان اسلوب وحده شاميه
المهم طلع فجأه لأن شكله تذكر الجوال برا
طبعاً كنت منهاره وواجهته بالجوال انو لمين ومدري كيف بالبدايه قالي هذا لصاحبي وانو ناسيه عندي امس لما سهر بالبيت ووضع البيت ماكان مبين ابد انو كان عنده احد زايره لان الصاله كانت على عفستنا وهو لو بيمره احد للبيت يشيل الحوسه كلها ويرميها بغرفه ثانيه
قعدت احاول فيه احاول فيه انو اعترف لو الجوال لك طبعاً هو وجهه بالأرض طول الوقت بعدين قفل الجوال وحاولت فيه يفتحه ومو راضي يقول مااعرف الرقم السري المهم قعدت ازن عليه بعدين قام وكسر الجوال رماه بالارض بااقوى ماعنده وكسر الشريحه و اعترف وقالي انو الشريحه مو حقته وانها حقت 2 من اصحابه وانهم يكلمون بنات فيها وواحد منهم للأسف متزوج وعنده طفلين : (
وهو كان يكلم بنت وقالي اسمها وقال انو مالو الا شهرين او اقل وهو يكلمها وانو وهو يكلمها يحس بالذنب عشاني ومن هالخرابيط طبعاً كان يبكي .. وانو ندم وانه زله و و و
قلتله يابن الناس لو انا مقصره معاك بشي بسيط ولقيته عندها او رحت تدور شي مو عندي وممكن تلاقيه عند غيري قل والله بيكون لك عذر حلف واقسم انو مافيه اي شي مقصره معاه فيه بس انو الشيطان واصحابه اغروه وقام يكلمها
وانو كان ناوي يتركها ومن هالحكي الفاضي
واعترف انو هو أخطاء واللي ابيه اسويه وانو اي ردة فعل مني راح يتقبلها وراح يتحملني لانو هو اللي اخطاء وكيذا وطلب مني اجيبله المصحف عشان يحلف انو ماعاد يكلم بنت بحياته
يعني هو ضامن انو مايكلم بنت بس مو ضامن الشرب للأسف : (
المهم
قعدت فتره شاده عليه وماعدت معاه زي اول وقعد فتره طويله وهو يعتذر لي وانا قلتله ماابي اعتذار بس ابي وقت لاني كرهته من هالتصرف
المهم بعد هالتصرف منه طبعاً قمت اشك فيه وافتح جواله وادور وراه وفتشت ثوبه مع اني ماقد فتشت ثوبه ابداً بس بعد هالحركه غصب عني فتشته مرتين
طبعاً طول زواجي معاه وانا استخير ربي انو اقعد معاه او لا وبعد سالفة الجوال والبنت دعيت ربي يكشفه لي بوقت قريب عشان خلاص ننهي اللي بينا
والله مامر يمكن 3 اسابيع او شهر بالكثير الا وانا اروح فجأه افتش ثوبه مع اني كنت ناويه ادخل انام بس شي قالي روحي فتشي بالثوب
ولما فتشت الثوب لقيت معاه حشيش
طبعاً كلمت امي وقلتلها كل شي لأن امي تعرف بكل خرابيطه قالتلي خلاص بترجعين للبيت بس مو اليوم انتي تعالي عندنا اليوم اتفاهم معاك وبعدين يصير خير
رحت لبيت امي وعاملت زوجي ذاك اليوم مثل دايم بس بنص الطريق ماقدرت امسك دموعي واصر يعرف ايش فيني بس ماقلتله مع انو هو لما يشوفني متضايقه مايسألني على طول ايش فيك شكله كان شاك اني شفت اللي بجيبه
رحت بيت امي وكلمت اخته الكبيره وجتنا وقلنالها كل شي عشان تكون بالصوره لو صار اي موضوع ويكون تفاهمها مع اهلها او تشوف دبره لااخوها او مدري اي شي!!
اتفقت مع امي انها تجيني بوكرا الصباح وتاخذني لاراح للدوام ورجعت لبيتي ذاك اليوم وسألته لو انا قد قصرت معاه بشي ! حلفلي واقسم اني مو مقصره معاه وانو هو اللي مقصر واني استاهل اللي افضل منه وقلتله انت شفت مني شي شين طول وقت زواجنا ! او معامله مو كويسه او اسلوب مو كويس !! وبرضو حلف انو لا
وفعلاً انتظرته يطلع للدوام واخذت اغراضي وجت امي اخذتني بااغراضي للبيت وارسلتله مسج انو شفت اللي كان في جيبك واللي بينا انتهى والله يستر علينا عليك
توقعته ينكر او بمعنى اصح تمنيته ينكر !!
رد علي انو هذي بلوه من ربك وانو هو ظالمني وماله وجه حتى يعتذر مني
وبعدها بيوم ارسل مسج برضو انو هو ظلمني معاه وانو يبغاني في حياته ودق مرتين بس انا مارديت عليه لامسج ولامكالمات
وفيه مره دق علي يمكن 10 مرات ورا بعض الصباح وهو يعرف لاكنت صاحيه جوالي يكون مفتوح وارسل بعدها انو ردي لو كنتي بتقولين شي مو كويس حتى وبرضه مارديت مو قادره ارد الحين ابداً !
انا اتواصل مع اخته وقالتله اخته انو البنت تبي فتره تفكر فيها براحتها ولاعاد تدق عليها او ترسل لها لين تحس نفسك قادر انك تتوب وتبعد عن هالطريق وفعلاً ماعاد دق ولاارسل
وعد اخته بالتوبه وانو راح يغير حياته للأفضل وماراح يكلمني لين يكون عنده استعداد فعلاً للتغيير وأنا اقولها والله مو عشاني للحين شاريته بس زوجي من الناس اللي لو بغى الشي بيسويه
احس انو صادق لأنو مايكذب واخته تقول انها الحين قاعده تشتغل معاه عشان يبعد عن هالخرابيط مع انو مو عارف اخته ايش تعرف عنه بس قالتله انو البنت تقول انك تشرب قام هو وقالها انو قد كلم بنت واعترفلها بسالفة البنت
اخته اعتبرها مثل امي وراعيه دين وتخاف الله ,, اكيد انو اخوها بتصف معاه بنفس الصف بس مااعرف انا مرتاحه لها
على فكره انا لي سنتين متزوجه وماجبت اطفال برغبه مني ومنه لأن تونا على الاطفال عمري 23 وهو 32
ووالله لو انا شايفه مني تقصير بحقه ماجيت وكتبتلكم مشكلتي وكان قلت انا استاهل لأني انا الغلط
اعامله معامله مره كويسه محترمته ومحترمه اهله وحاطتهم فوق راسي
ومدلعته وماني من الزوجات اللي بس تطلب على زوجها او تتأمر عليه ابد ,, مو مخليه عليه تقصير بالمشاعر والكلام والراحه النفسيه
اعرف انو مرتاح معاي بس مااعرف ليه يسوي هالاشياء الخطاء
بشهادة كل اللي يعرفونا اني اعامله معامله جداً كويسه ومو مقصره معاه
مع العلم اني قاعده في بيت امي الحين وامي قالت لااخته انو مافيه اي شي بيصير الا بعد العيد
انا ابوي متوفي ولما كلمت عمي جاء عندنا ونصحني اني مااتعجل خصوصاً انو الولد عنده نيه ورغبه بالتغيير + انه يعترف بااللي يسويه مو يخبي عني او يلعب علي + اني حابه ابقى معاه
اكيد اول احد الجاء له هو ربي وهذاني ادعي واستخير واستغفر ربي بس مايمنع اني ابي رايكم !!
,, ياحبني لي ,, @yahbny_ly_6
عضوة جديدة
يلزم عليك تسجيل الدخول أولًا لكتابة تعليق.
أغلى ما في الكون
•
لاحول ولاقوة الابالله ادعيله في هذي الفترة بالهداية في صلاة الليل
الصفحة الأخيرة