ولدت ولدت ولدت الحمدالله ماني مصدقه للحين ..قصتي واستفساري

السلام عليكم ورحمة الله وبركاته
كيفكم يااحلى حوائياااات ..
ولدت ورزقني ربي بولد خيشة ملح هههههههه.قبل سبع ايام. 
اول شي انا عندي ولد جبته قيصري بسبب اني خواااافه ومن شدة الخوف قفل رحمي وقبل كان مفتوح 5  ..
المهم حملت بعد ماكمل ولدي سنتين وطول الحمل مقنعه نفسي اني بولد قيصري شايله الطبيعي من راسي بسبب الخوووف ..
من دخلت التاسع تنزل مني افرازات مخاطيه كثيفه وطنشتها وبعدها حسيت بطلوق خفيفه لمدة 3ايام وبعدين اشتدت وصارت منتظمه ورحت للمستشفى ومفتوح الرحم 1 وطلعوني فوق لغرف تحظير الولاده لان مافي سراير بالقسم وقلتلهم اذا سمعت صراخ ماراح يفتح الرحم من الخوف ودخلوني بغرفه بعيده عن غرفة الولاده. دخلت الساعه 12بالليل وكان الطلق بارد وجت الساعه 8 وجاء الدكتور وفتح موية الجنين واشتغل الطلق صح وقلتلهم مابي طبيعي لو تموتون وقال الدكتور خلاص بجهز غرفة العمليات وهو كان يكذب علي وجلست انتظر وكل ماصرخة فيهم وقلت نادو الدكتور قالو عنده عمليه ..وادق ع زوجي قلت تعال وقع ع العمليه مابي طبيعي وجاء ووقع قسم من قو الالم اناظر بالدريشه ودي اكسرها وانط معها عشان يظطرون يبنجوني واذن الظهر وانا انتظر الدكتور والطلق تعبني وكانو مصوميني وكل مااستفرغت قلت ابي مويه بشرب ورفضو عشان يمكن يحولوني عمليه وكنت ميته ابي النوم وعجزت انام واشغل سورة البقره وادعي واطلب ربي واخر شي طلعو الدكاتره من غرفة العمليات واطلعلهم قلت ابي عمليه وامسك يد الدكتور وابوسه اقول طلبتك ابي عمليه قال لاتضيعين الفرصه عليكي طبيعي ورفضت قلت لا ابوس رجلك قال يلا ركبو القسطره وجيبو سرير العمليات طبعا انا رافضه احد يكشف ومصره ع العمليهم ركبت النيرس القسطره قالت البيبي قريب ونادت الدكتوره مفتوح 8 والراس مرا قريب واصرخ فيهم قلت ماابي طبيعي وودوني لغرفة الولاده قالت بس بشوف نبض البيبي وقعدت تفك الحلق من اذاني تحاول تاخرني شوي وقالت يلا ادفعي بيطلع ويحطوني بسرير الولاده وتقعد تصرخ تنادي الدكتوره وكلهم يصرخون ادفعي ادفعي ومع الدفعه الثالثه طلع وليدي حبيبي اخخ والله يافرحة فرحه لاتوصف وانا اشوفه قدامي وماكنت مصدقه ابداا احسه حلم والئ هاللحين ماني مستوعبه عشاني كنت خايفه من طلعة الراس ماتوقعتهابهالسهوله ....

والحمدالله ثم الحمدالله حتئ يبلغ الحمد منتهاه ..

عندي كم استفسار ياليت تجاوبوني ..
1-الخياطه متئ يخف الألم وكيف اعتني فيها ..

2-صدري مرا متحجر ويعورني عجزت ارضع ولدي وانا قبل كنت متحمسه لرضاع بس هونت من الألم الحين احط عليها كمادات من الملفوف احطها بمويه دافيه وادخله بالسنتيان خف التحجر شوي بس للحين متحجر ويوجع ..

3- طريقتكم في شد البطن ووش تدهنون الكرشه فيه عشان تروح وتنشد وتصير مثل قبل الحمل ..

4-متى استخدم حمام الساونا البخار ..  

وبس سلامتكم ..الله يسعدكم جميعا لاتنسون تجاوبون بالتفصيل الممل ..


*ولدت بتاريخ 1435/10/11. يوم الخميس الظهر.