قصة ولادتـــي والأكشـن اللي صارلي .. بالحبيب..

الســــلام عليـــكم ورحمة الله وبــركاتـه✨

    مبارگ عليگم الشهــر 🌙
وكــل عااام وانتــم بخــــير ..

انا كتبت لكم من قبل كذا موضوع وطلبت منكم تدعون لي
واللحيـن بقولكِـم وش صار معي بالتفصيل الممل
الله يسلمكم
انا ولدت بنتي الاولى بقيصريــه لانهم قالو لي إن حجــم الطفل كبير والحوض صغير
وحملت بالثاني 
وكنت خايفه إني أولد بقيصريـه ورحت كذا مستوصف خاص ولا ريحوني كلن يقولي سالفه
انا من حايــل والمستوصفات الخاصه بحايل ( فاشله)
ودخلت التاســع بأسبوعين ورحت مستشفى النساء والولاده وقلت لهم يسوون لي أشــعه عشان إذا كان الحوض صغير ليـش أنتظر لنهاية التاسع ويجيني الطلق وأتعـب وبالاخيـر قيصريـه
قالت لي الدكتـوره بالحرف ( روحـي ياماما وإذا حسيتي بالطلق تعالي)
انا مليت وتعبت دخلت النت وأستفسرت
وشفت كثير من البنات يمدحون الحبيب 
ورحــت لأخوي بالقصــيم
وكنت داخله اسبوعي الثالث بالتاسـع
رحت لمستشفى الحبيب. ودخلت عند دكتوره أسمها مهجـه.. اخذت معلومات عني وسوت لي أشعه وتحاليل وقلت لها ابغى أشعه للحوض وقالت ماعندنا وقلت لها كيف اعرف إن الحوض صغير 
قالت .. ماراح تعرفين إلا وقت الولاده
سـوت لي فحص داخلـي وقالت ( تقريبآ حجـم الحوض مايطلع منه طفل وزنه أكثر من ثلاثه كيلو)
بعد الاشعه قالت لي إنه حجم الطفل ثلاثه كيلو وميّه ) 😔
قلت يعني قيصريه قالت مايبين الا وقت الولاده
المهم جلست بالقصيـم قلت على الاقل هنا يعطون مسكنات وقت الطلق وأهتمامهم أفضل من حايل
يوم السبت بتاريخ 8/24 
صحيت من النوم الساعه12 وكنت حاسـه بألم اسفل البطن قلت معقوله هذا وقتي انتظرت شوي وكل ساعه يـزود وعرفت انه الطلق لاني جربته ببنتـي الاولى 
على طول دقيت على امي وخبرتها قالت خوذي لك زعتر واشربيه وانتظري شوي انتظرت لحد الساعه 3 وكان يجيني الوجع كل نص ساعه
دقيت على امي وقالت لي روحي للمستشفى شوفي وش يقولون) 
عشان إذا كانت ولاده تجي
انتظرت اخوي لحد ماجاء من دوامـه الساعه 4 ونص وخليته يتغدى وبعدها رحت لمستشفى سليمان الحبيب

   هنا بــــدأ الأكــشـن....
اول مادخلت اخذو الضغظ والوزن وحطو لي التخطيط
وقالو من دكتورتك قلت لهم ( مهُجه) بس ماأبيها 
أبـي ( ساجيلا)
قالو أوكي 
نادولي دكتورة طوارئ وجتني وشافت التخطيط 
وقاست وقالت لي .. مفتوح خمــسه سم..
شهقت ماكنت اتوقع لانه ماكان ذاك الألم
قالت يالله فوق على طوول تنويــم
قلت لا خايفه
قالت لي ماتبين تولدين طبيعي قلـت بدون شعور ( يالــيت)
حسيت براحــه نفسيه ماتتصورونها
اول ماطلعت فوق دخلوني غرفه فيها ممرضه وقامت ترحــب فيني كأنـي زايرتها ببيتها☺
وتسولف معي وتعطيني ملابس وقالت بدلي ملابسك
وجلستني على السرير وحطت التخطيط وتمسح على شعري وتسولف علي 
وتـدخل علي دكتوره شكلها سعوديه بس كلامها فيه شويه مصري
المهم سألتني عن حالتي واخذت معلومات وقالت لي لاسمح الله إذا ماقدرتي تولدين طبيعي
تبين بنج نصفي او كامل قلت لا ابي كامل لاني مجربته قالت النصفي افضل بس انا خفت
المهــم
قاست الرحم وقالت مفتوح 6 سم
وقالت خليني افتح لك المويا 
قلت اوك .. فتحت المويا وكانت تألمني كثير بيدها وكنت اصرّخ وفجأه ارتبكت 
وقالت المويا كــثيره المويا كثيره تقول  دفي دفي الطفل صغير بس المويا هي اللي نافخته تقدرين تولدين طبيعي وانا مااقدر مافيه طلق قوي
وكانت  الممرضه واقفه عندها ماسكه كيس عشان تصب فيه المويا
وكل شويا ترفع صوتها المويا كثير .. تقولي ليه ماقلتي لنا.. 
قلت انا سويت اشعه وتحاليل عندكم انتم اللي ماقلتو لي
وكل شوي ترفع صوتها زياده هاتي كيس المويا كثير وبالاخير قامت تصررخ الحبل الـسري طلع
الحبل السري طلع وتدخل يدها بكل قوتها احس روحــي بتطلع
واصارخ بأعلى صوتي( خفي علي ذبحتيني)
وهي ماهي معي تقول للممرضه نادي الدكتوره بسررعه وتدخل علينا وحده مصريـه وتطالع فيني
وتقول .. عملتي إيـه.. وهي ترد عليها تقول .. ماادري المويا كثيره..
وانا يوقف قلبي واصيح واقول شـ صاير
تقول الحبل السري طلع قبل الطفل!!  مافهمت قلت يعني إيـش   قالت.. يعني عمليـه اللحــين!! 
قلت لــيش تقول ماينفعش ياماما
وينزلوون راسي لتحت ويرفعون رجولي لفوق قال إيش عشان يرجع الحبل السري
المهم ويسحبوني على العمليات وانا ابكي وارتجف
واقول ماابي وكانو يصرخون علي ويقولون تبين الطفل يموت
ووقعوني على اوراق وانا بغرفة العمليات ماادري وشي
والجوال كان بيدي ودق زوجي ورديت عليه وانا ابــكي واقوله عمليه عمليه.. وهو مايدري وش السالفه تو قالو لي طبيعي .. المهم قالي اذكري الله اذكري الله
وسكرت الجوال
ويدخل علي رجال وانا انسى كل اللي فيني وقعدت أطالع فيه واقول هذا وش يبي
قالو هذا دكتور التخدير..هو حقّد علي 
وجت الدكتوره ساجيلا وتمسح على راسي وتقول اهدي انا ساجيلا يالله بنسوي لك العمليه عشان مايموت الطفل
وحطو فيني البنج وبعدها ... ماادري
الهذا الكلام الساعه سته
وصحيت الساعه تسعه وكانت عندي 3 ممرضات وقالو هلووو كيفك ماما .. البيبي كويس ماشاء الله بنت قـًمر
اخذوني للغرفه الخاصه ودخلت لقيت أمـــي واخواني كلهم ينتظروني
وأمي علامات الالم بعيونها وأختٌــي تبكي
واخواني مبسوطين الله لايحرمني منهم
عجزت لااتكلم بس حركت شفايفي وابتسمت وسألتهم عن بنتــي قالو هذي جنبك والتفت لها وهي تبي تبكي تقولي شفيك ماما ( ربي يحفظها لي هي واختها) 
جلست بالمستشفى 4 ايام ورجعت لحايل طبعآ بمسكنات لاني مااقدر اتحمل السياره

وهــذي قصة ولادتـي ببنتي ( القصيميه) 
 والحمدلله على كل حال


أشــكـر كل وحده ردت علي بمواضيعي السابقه واللي دعت لي وكل اللي بالمنتدى
واقولكم الله يجزاكـم كل خير... 
اي استفسار انا جاهزه