أخواتي المعلمات وغير المعلمات ممكن تساعدوني ,,,هلب مي

صياني الاطباق هذي خقيقه وسريعه
يعني صينية خضار
مكرونه جبن او باشميل
وانا مااشجع الاكل البايت
احب الطبخ طازج
لو كان خفيف
اسمحيلي لاني مانيب معلمه

قدر الضغط يسهل لك كل شي

شوفي ياعسل عندك في السوبر ماركات الكبيرة مثل هايبر بندة وغيرها
يجيكِ صحن مقطع فيه خضار طازة .. يعني صحن صغير فيه كوسة + بطاطس+ زهرة+ جزر
يكون ياشرايح أو مكعبات .. تسوين كشنة ثقيلة من الليل وإذا جيتِ من المدرسة فرّغي الخضار والكشنة مع بعض في قدر الضغط وربع ساعة وإيدامك جاهز

وعندك المقالي الجاهزة مثل الكفتة تقلينها وتآخذين من الكشنة السابقة وتحطينها مع بعض في قدر محكم عشر دقايق وهذا نوع إيدام ثاني

وعندك بعد امممممم المعلبات مثل البازلاء والذرة والفاصولياء الحمراء
تحطين بزبدية حبة زبادي وعصرة ليمون وملح وخيار مقطع أو مبشور وتخلطين الجميع
هذي سلطة حلوة كـ تغيير في السفرة

وعندك الصواني تسوين صينيّة مسقعة أو صينية مكرونة بالخضار سويها وحطيها بالثلاجة
وإذا جيتِ اقطعي منها اللي يكفيكم وسخنية بالمايكرويف

هذا اللي يحضرني الحين والله يعينك ويفرّج همك
<< معلمة عزباء

ياقلبي ...

هونيها وتهون ...المساله تنظيم لا اكثر ولاا اقل ..

نبدا حبه حبه ..

عندك التفريز للخضار والمعجنات والمقالي

ياتجيبين خضار السنبله او اي نوع ووقت الطبخ تكون جاهزه او تجيببين طازج وتقعدين عليها وتقطعينها وتوزعينها باكياس

طماطم مكشن مع بصل وثوم وماجي وبهارات وصلصله وتطحنيهنا يالخلاط وتزعينها باكياس في الثلاجه تحتاجينها في المكرونه والايدامات والصياني

بصل مقطع طوال او مربعات مكشن في سمنه او زيت عليه بهارات وتضيفين عليه جزر مبشور وتوزعينه في اكياس وفي الفريزر للرز والشعبيات

اللحم تجيبينه وتقولين للقصاب يقطعه تقطيع ثلاجه ويشيل لك الشحم منه ويحطه في اكياس او صحون

الدجاج تسوينه مثل اللحم او تشترين من الوطينه دجاجه كامله متبله شي حار وشي بارد وفي منها بس افخاذ وفي شاورما

انا اشتريها طازجه من اسواق الشمال وتريحني بصراحه لاجاني احد فجاءه

طبعا على شان تتفادين الاكل البايت

تنزلين اللحمه او الدجاج من الليل وتنظفينهم وتغسلينهم وحطيها في قدر فيه بهاراتك العدله او تل الفوح وماجي وكل شي

ودخليها الثلاجه ونامي

اول ماتصحين الصباح صبي عليها مويه حاره من الغلايه ووخليها تطبخ الين تاخذين شور وتلبسين وتفطرين

تكون خذت لو نص ساعه طبخ

سكري عليها واستودعي بيتك وروحي لدوامك

اذا رجعتي ولعي النار عليها وغسلي الرز ونقعيه فيما تغيرين وتخلصين حوستك تكون اللحمه استوت والرز انقع

يادوب تكبين الرز وتبلين اللحمه او تسوينها ايدام كشنة الطماطم في الفريزر طلعيها بوقت وحطيها على اللحمه يادوب تتسبك وحطي من الخضار اللي عندك والرز حطي عليه كشنة البصل

وبكيذا صار عندنا رز بكشنه يجنن وايادم لحمه بخضار مع سلطه خضراء وفواكه وصلى الله وبارك

الدجاج ياتسوينه نفس الرز او تقطيعينه وتبلينه في الليل وتصفينه مع خضار وعليه كشنة الطماطم وتقصدرينه وتخلينه في الثلاجه

اول ماتجين ولعي الفرن عليه وسشوي رز ابيض جنبه او مقالي كبه ورق عنب سمبوسه ....الخ

ممكن سندوتشات تورتيلا والدجاج ياصدور او الشاورما اللي ذككرتها قبل مع بطاطس ومع سلطه

يعني الدعوى كلها تنظيييييييم يالغلا ...

انا استخدم قدر الضغط السيف فية حجم صغير قدري على قدنا في المجلس