وها قد تغيرت طالبتي بفضل فكرة صغيرة

السلام عليكم


سبحان الله كنت أتمنى أشارك بهالمسابقة

بس كل تصرف أو موقف حصلي من قبل أحس إنه تصرف طبيعي ومناسب للموقف يعني مافيه أي حكمة مني

إنما هذا الحل الطبيعي للحدث نفسه


وأثناء قراءتي للمشاركات تذكرت موقف حصل لي حسيت فعلا إني كنت حكيمة وأحسنت التصرف >>> مداااح نفسه :42:

هذي القصة حصلت قبل سنتين تقريبا

كنت مدرسة بمدرسة أهلية

وكانت أول تجربة لي وكنت أدرس المرحلة الإبتدائية

وفي نظام الندرسة مثل باقي الندارس لابد يكون لي فصل مسؤلة عنه

وصرت مسؤلة عن صف خامس إبتدائي

كان فيه طالبة هادئة جدا ومؤدبة وكنت ألحظ عليها الخوف إذا جت بتجاوب وترتبك إذا وجهت لها سؤال مع إنها كانت ذكية وشاطرة يعني كانت تجاوب صح بس مدري ليش تخاف وترتبك

وكانت تحط عينها على الأرض لما تجاوب وصوتها كان قصير مررره لدرجة أكون بجنبها بس ما أسمع شيء

المهم بالصدفة إكتشفت إن عندها في الشفة السفلية من داخل يعني مايكون واضح إلا إذا تكلمت وهي رافعة راسها كان عندها إنتفاخ سبحان الله شكله غريب

فعرفت إنها كانت ما تبي أحد ينتبه له عشان مايسألها

طبعا كل هذا توقع متي


المهم بعد ماصرت رائدة فصلها

كنت أبي أعزز ثقتها بنفسها

وسبحان ربي اللي ألهمني لفكرة غريبة

أثناء ماكنت أتكلم مع الطالبات على قوانين الفصل واللي مطلوب منهم

قلت وراح نختار العريفة

وطبعا هالمنصب يعتبر أعلى منصب عند طالبات هالمرحلة

طبعا كان فيه طالبات واثقين من أنفسهم وكانوا متوقعين إني أختارهم

لكن قلت لهم

راح ننتخب عريفة الفصل و مساعدتها

وافقوا البنات وفرحوا الله يا أستاذه بنختار العريفة االله وناسة

المهم قلت يالله نبدا التصويت

وصوتوا البنات وخليت كل بنت ترشح ثنتين

وكنت أتمنى إن البنات بختارون طالبتي الهادية

وسبحان الله إختاروها مجموعة بس تساوت الأصوات عاد هنا تدخلت وقلت أنا لي الحق بالتصويت وصوتي عن صوتين

قالوا موافقين

وإعطيت صوتي لطالبتي الصغيرة وكم كانت فرحتها وما كانت مصدقة

المهم وبدأت رحلتي معها في زرع الثقة في نفسها صرت أحملها مسؤليات وأكلمها على إنها نائبتي بالفصل وأقول للطالبات أي شيء تبونها مني قولوا لفلانة وفلانة هي المسؤلة عنكم إذا ماعندكم أستاذة وفلانة هي اللي تجمع الدفاتر وتوزع معي درجات الطابات وتشوف الللي حلوا الواجب وهكذا

وبدأت ألاحظ عليها إنها صارت تشارك وتوقف بثقه وترفع صوتها بالإجابة وصارت لها كلمتها بالفصل

لدرجة لما كنا بغرفة المعلمات قالوا لي زميلاتي فلانة متغيرة مررره قلت إنتوا ملاحظين مثلي

وماتوقف التغيير عند هالحد صارت البنت مهتمة بمادة الرياضيات اللي كانت ضعيفة فيها

وصاروا المعلمات يشكرون فيها

ونهاية هالقصة إنه تم إختيار طالبتي الصغيرة المثالية على مرحلتها وتكريمها في حفل الأمهات والإختيار كان من قبل المرشدة الطلابية اللي جائت لي وشكرت في عملي هذا وقالت البنت تغيرت بشكل ملحوظ

وفي النهاية

حبيت أبين إننا ممكن نغير في صغارنا ونزرع فيهم الثقة بفكرة بسيطة بس الموضوع يحتاج تنفيذ وإصرار منا على تغيير صغارنا

وحبيت أقول إني ما أعتمد على حكمة معينة في الحياة إنما الواحد يأخذ الحكمة من تجاربه في الحياة ويتعلم

دروس مهمة والحكمة هي اللي نعيشها مو اللي نأخذها كمبدأ أو شعار


أختكم أبلة تاريخ