انا وبنتي و....... اكتب وانا العبرة خانقتني ساعدوني

بسم الله الرحمن الرحيم
السلام عليكم ورحمة الله وبركاته
اخواتي بقولكم قصتي اللي حارقه قلبي
لكن قبل القصة بقولكم كيف كانت حياتي انا وبنتي
بنتي الان عمرها تسع سنوات
لما كانت صغيرة ماتتخيلون فرحتي فيها احبها العبها انشد لها
كل وقتي لها
لدرجة من كثر ما احب اونسها اجمع الاطفال اطفال الاقارب او الاصدقاء والعبهم معها
وانا احب الاطفال بشكل خيالي
لدرجة الكل يقول وشلون لك خلق عليهم
وحاجه ثانيه اني اعتبر بحمد الله حكيمه في تصرفاتي بشهادة اللي حولي الكل يجي يشاورني
وياخذ بشوري
لدرجة اني احلم باحلام واذا فسرتها عند شيخ مفسر
يقول لي انتي امرأه حكيمه والناس ياخذون بمشورتك
وبالفعل هذا اللي حاصل
ناس كثير يستشيروني واحل مشاكلهم بطريقة دبلوماسيه
لكن للاسف باب النجار مخلع
من هنا المشكله
مشكلتي بدت مع بنتي
من تقريبا 5 سنوات
من. يوم عمرها 4 سنوات
صار بيني وبينها نفرة عجيبه
دايم صراخ عليها اضربها اهزئها وفي داخلي احترق
اول كنت احاول الان خلاص ماعاد استحملها
لدرجة انها تقول بابا انا احبك اكثر من امي
ومرة قالت لي انتي ام قاسيه
انا بداخلي صراع
اتمنى ابوسها زي اول
اتمنى اضمها
اتمنى العب معها
عندي عيال غيرها
احيانا اضربهم واهاوشهم زيها من تأنيب الضمير لكن ما احس اني انفر منهم زي ما انفر منها
مشكلتي
انها تخاف علي اكثر من اخوانها
تحبني تتمنى اني اضمها
لانها من النوع اللي تحب التواصل الجسدي
متفائله واحس انها تحب تسوي نفسها اكبر من عمرها
اقسم بالله يابنات
انها اذا جت تبوسني او انا ابوسها احس انو على راسي ثقل عجيب
ابيها تفارق وجهي
انا ما اكرها لا احبها
بس ما ادري ليش كذا
والله اجلس يمكن بالشهر او الشهرين او الثلاثه ما ابوسها
وعلى كذا اسوي مع اخوانها كذا مابوسهم مو لاني احس بنفس الاحساس اللي احسه معها
لا عشان ربي مايحاسبني على التفرقه
عجزت ودي اضمها ودي ابوسها بس والله تقولون بيننا حاجز خراسني
دايم اصرخ عليها واهزئها واحطمها
ما اهتم فيها اخليها تصلح نفسها اذا جت تروح المدرسه اخس اذا جيت امسكها اتكهرب
ما ابيها تقرب عندي
والله اكتب ودموعي اربع اربع
بس والله غصب عني
انا جامعيه
ودارسه سلوك الاطفال وانصح الامهات
لكن مع بنتي شي تعاملي مع بنتي كأني اني جاهله من العصر الحجري
الحين بنتي مقبله على مرحلة مراهقه ما ابي اخسرها لاني احبها وتحبني
بس ما ادري وش فيني انا واياها
تو اكلم امي
وتقولي انتبهي لبنتك تراها رقيقه وهي في مرحله حساسه
ليش تصرخين عليها
سولفي معها صادقيها
والله يابنات ما اقدر والله ابكي الحين وانا اكتب لكم
ماعمري دلعتها
غير يومها صغيرة
دايم تقولي ماما ناديني باسم الدلع حقي
مو لازم في البيت
بس عند الناس كل الامهات يدلعون عيالهم
ابغى البنات يمعونك وانتي تدلعيني
لاحظت من فتره انها بدت تسفه كلامي وانا مالومها
لو اني مكانها وامي تعاملني كذا كان انحشت من البيت
امي كانت لطيفه معي انا واخواتي
ومعيشتنا احلى جو
الله لايحرمني منها


في خاطري كلام كثير اقوله

ارجو عدم الرد برد جارح اللي فيني كافيني

يمكن كلامي هنا فضفضه من اللي احسه
ومن تأنيب الضمير خصوصا بعد مكالمة امي من شوي

اتمنى تدعون لي وتنصحوني
الله المستعان بعد ماكنت انصح الامهات لبناتهم واقرب وجهات النظر
جاني شي اشد واعظم منهم
اللهم يا حي ياقيوم حببني لبنتي وحببها الي
اللهم وازل مابيننا يا حي ياقيوم
اللي ماعندها رد مفيد
ترفع الموضوع بدعوه لي ولبنتي
اليوم جمعه ولعل من فيكن من لو اقسمت على الله لابرها
ادعو لي
اختكم
خوف ورجاء