تعالوا اسولف لكم عن بازار العيطموس الي بسلام مول

السلام عليكم ورحمة الله وبركاته
اهلا وسهلا بكل من دخل موضوعي
هذا ياطويلات العمر كان فيه إعلان عن بازار العيطموس فأخذت الرقم وسألت الا الطاولات على 3000 وعلى 2000ريال فحجزت نصف طاوله بـ1000 وجأت المنظمه لبيتي وأخذت مني عربون 500 ريال الموهم تحمست وكان نشاطي مأكولات واستعديت وكانوا شارطين تختيم وتاريخ صلاحيه ودرت السبع دورات لحد ماحصلت الة الصلاحيه ...المهم رحت اليوم الي قبله وكانت الطامه أن النصف طاوله مايجي شبرين لاوالي جنبي ألعاب يارببببببي أعترضت وقالت خلاص أزيدك طاوله على جنب قلت طيب اليوم الي بعده الساعه 9 مرسلين رساله أنه ممنوع بعد الساعه 3 تدخل بضاعه فقليت وغلفت وسجلت الصلاحيه وطلعت الساعه 2ونص وضيع السواق الطريق والله مارجعت الامن الشفا وأتصلت على المنظمه وقلت لها إني ضيعت الطريق وأخاف مايدخلوني فقالت لي أنا قايله ومادري إيه المهم بالنهايه تقول وش دخلني وأنا مطوله بالي عليك ....المهم ربي يسر أمري ووزعت علبي باأكياس ودخلت الا قد بدلت طاولتي وحطتها بالنص وطاوله كامله فستانست الا الصاله كلها مطاعم والله مابعت لحد الساعه 11 الا 80 ريال لاوعيالي وعيالي صديقتي هم الي مشرين مني الموهم ماكان فيه دعايه والي بسوق ماكنوا عارفين عن البازار الا الي جالسين ورى الصور تبع الصاله ولما شكيت لها قالت إنه بكره بيحطون إعلانات وماسألت عليه دخلت ولا مادخلت الا على الساعه 8 مرت من عندي تقولي دخلتي ؟ فعاتبتها ليش ماسألتي عني ليش ماساعدتيني قالت إن أختها كان بالمستشفى وهي كانت معاها فلتمست لها العذر ولو إنه المفروض تكون متواجده والمشتركات هم مسؤوليتها ماأخذه فلوسهم ولازم تكون معاهم طول الفترة الموهم وقالت لي لو مابعت بالأسعار الي إنتي حاطتها نزلي في الاسعار علشان تقللي الخساره .......وعلى أخر الليل ترجيتها ترجع لي نصف المبلغ لكن الحمدلله رجعت لي 300 ريال من الــ500 وأنا طالعه الاكرتون المناديل معي زي ماهوه مليان علب سمبوسه لحم ودجاج وبف بأنواعه وورق عنب وسبنق رووول وحلا الا نعمة ربي وإين أروح فيها فستأذنت المدير أبسط عند الملاهي بريالين ووافق ولما صفيت أغراضي بدقيقتين الا السكرتي جاي قال ممنوع وتعالي المدير يبغاك ولما رحت قالي والله ماأقدر ممنوع أنا بشتري منك كل علبه بررررريال’’’’ 63 علبه تخيلو كل علبه فيها أكثر من ثلاث حبات فجادلته وأخذها برررريالين الله يكثر خيره وروحت وأنا مكسورة الخاطر
وحتى الحريم الي تجي تسأل تقولين خلاص بتشتري الطاوله كلها لكن بعد ماتقولي لها الأصناف والأسعار تروح وتترك طيب خلاص مابتشتري لاتعشمين الناس وبعدين تطنشين ولا الي تسأل عن مكونات الحلاليش؟تقولك علشان بصلحه حلوووووه وأنا ليش متعبه حالي ؟؟؟
ولاالأطفال الصغار نفسهم في ورق العنب ولا الحلا تقول أمهم لالالاهذا ككه حسبي الله و نعم الوكيل نعمة ربي كككه مابتشترين من بنت بلدك الي شغلها نظيف وتراعي لك الجوده روحي إشتري من الهنود الي الله يرى حالهم ولا تقولين على نعمة ربي ككه عالم ترفع الضغط
وكان فيه بنت جنبي تبيع عطور روعه حاطينها باللاخير وطاولتين يمين المدخل ويساره عطور ليش ماهي نفس النشاط ليش ماحطوها جنب اي طاوله فيهم ؟؟؟
لكن بصراحه فرق بازار عن بازار رحت مركز يارا كان رائع ودعايه وترتيب وتنظيم وحتى الزوار عالم تقدر تعبك ..سلام مول عليه إقبال لكن الناس ماتشتري
وإن شاء الله ربي يكتب لي بازارات أروع مما قابلت ،،،
وسلامتكم