:: عزيمتــــي لاهلي بوفيه صغيــــر شغل يدي بالصوور ::

اطباق عالم حواء

السلام عليكم ورحمة الله وبركاته

امس عزمت امي وابوي واخواني وخواتي على العشا ..

وهذي أول عزيمه لي من تزوجت :27:
حبيت اسوي كل شي بنفسي عشان يعرفون اني شطوره ههههههههه

قبل العزيمه بكم يوم قعدت افكر بالاطباق اللي بسويها وحرصت اني انوع بين دجاج ولحم عشان يناسب كل الاذواق ..

وكتبت مقادير كل طبخه ورحت اشتري الاغراض الناقصه عشان ما اتوهق بيوم العزيمه ..

واستقريت على هالمنيو


:: المقبلات ::

شوربة خضار
سلطة حمص ( نخي - بليله )
سلطة الناتشوز
ديناميت شريمب ( ربيان )

:: الأطباق الرئيسيه ::

مكرونه بالبشميل
نودلز بالدجاج والخضار
صينية توست بالبرجر
كاري دجاج مع ارز اصفر

:: الحلويات ::

كاسات تشيز كيك الاوريو
كب كيك رد فيلفت

وللأسف نسيت اصور الحلويات وشوربة الخضار


منظر عام للسفره






يتبــــع
283
144K

يلزم عليك تسجيل الدخول أولًا لكتابة تعليق.

تسجيل دخول

..مريومــه..
..مريومــه..
سلطة الحمص



بصراحه لذيذه هالسلطه اسويها بشكل دايم

المقادير
خس
بقدونس
جرجير ( ممكن الاستغناء عنه )
حمص ( بليله - نخي )
زيتون
خل + ملح + زيت زيتون

مقادير الصوص
ملعقة طعام لبنه
ملعقة طعام روب ( زبادي )
ملعقتين مايونيز

الطريقه
نقطع الخضار ونخلطهم مع الحمص ثم نضيف قطرة خل ورشة زيت زيتون وقليل من الملح
وملعقه وحده من الصوص ونخلطهم ثم نرش باقي الصوص على الوجه
يزين بالسماق


سلطة الناتشوز



هالسلطه من تأليفي :rotaeye:

المقادير
خس - ملفوف - خيار - جزر - ذره
شبس دوريتوس البرتقالي نكهة جبنة الناتشوز

مقادير الصوص
ملعقة صلصه فرنسيه
ملعقة صلصة ثاوزند آيلاند

الطريقه
تخلط الخضار مع مقادير الصوص ويزين بالناتشوز وجبن بارميزان

ديناميت شريمب





مقادير التتبيله
ملح وفلفل اسود
صويا صوص
ملعقتين نشا
ملعقة دقيق

مقادير الصلصه
صلصة اجنحة الدجاج
sweet and chili sauce ( صوص تايلندي حلو حار )
مايونيز بالثوم ( انا استخدم ماركة هينز لذيذ وفيه نكهة الثوم )

الطريقه
نتبل الربيان ونتركه شوي انا خليته نص ساعه
نقليه في زيت حار
نخلط مقادير الصلصه ونضيفه للربيان

سهل ولذيذ وطعمه نفس المطاعم ..
مره سويته على صدور دجاج وطلع لذيذ

شوربة خضار

نسيت اصورها بس سويتها بالطريقه اللي يحبها ابوي
قطعت الخضار الموجوده عندي
جزر وبطاطس وقرنبيط ( زهره ) وفلفل رومي وبوبر ( قرع - يقطين )
سلقتها في ماي وملح وفلفل اسود ومكعب ماجي بالخضار ورشة اعشاب
بعد ما قربت الخضار تستوي ضفت البوبر لانه بسرعه يذوب دقايق وطفيت عليه




يتبــــع
..مريومــه..
..مريومــه..
مكرونه بالبشميل



المقادير
نص كيلو لحم مفروم
كيسين مكرونه مسلوقه في زيت وملح
بصل وثوم مفرومين
مكعب ماجي
ملح وفلفل وبهارات منوعه ( استخدمت اعشاب ايطاليه وبابريكا واوريغانو وبودرة بصل وبودرة ثوم ونعناع مجفف )
ملعقة صلصة طماطم
جزر مبشور
للوجه جبن موزاريلا

مقادير البشميل
( لكل ملعقة زبده ملعقة دقيق )
٥ ملاعق زبده
٥ ملاعق دقيق
لتر حليب
مكعب ماجي
ملح وفلفل اسود

طريقة اللحم
في مقلى عميق نحمس اللحم بدون زيت لين تطلع مويته وتنشف تماماً
نضيف البصل والثوم وشوية زيت قد الغطاء ونحركه
نضيف الماجي والملح والفلفل والبهارات ونحركه
آخر شي نضيف ملعقة صلصه والجزر المبشور ونحركه شوي وضبطي الملح

طريقة البشميل
نذوب الزبده على النار ثم نضيف الدقيق ونحركه لين تطلع ريحته
نضيف مكعب الماجي والحليب بشكل تدريجي مع التحريك باستمرار
لين نوصل للكثافه المطلوبه ..
طبعا مع اضافة الملح والفلفل ..

طريقة ترتيب الصينية
نمسح سطح الصينيه بشوي بشميل ..
ناخذ نص كمية المكرونه وبهالخطوه احب اخلطها بشوية بشميل
ثم حشوة اللحم ثم جبن موزاريلا ثم باقي كمية المكرونه ثم البشميل وآخر شي الموزاريلا
وعلى الفرن نحمر الوجه

نودلز بالدجاج والخضار



المقادير
اندومي او مكرونه اسباغيتي
صدور دجاج مقطعه مكعبات صغيره
خضار مقطعه بشكل طولي ( جزر وملفوف ) وممكن اضافة فلفل رومي
علبة ذره
جوانح بصل وثوم مفروم
صويا صوص
ملعقة صلصة المحار

الطريقه
نسلق الاندومي في ماء فقط ونحتفظ بأكياس البهارات
وانا طريقتي اسلق الماء ومن يغلي اطفي عليه واضيف الاندومي واتركه شوي لين يستوي واشخله عن الماء
في قدر نضيف مكعبات الدجاج ونشوحها لين ينشف الماء
نضيف البصل والثوم ونحرك ثم نضيف الخضار
نضيف اكياس البهارات وملح وفلفل اسود واعشاب ايطاليه ونعناع مجفف وملعقة صلصة المحار ونحرك
آخر شي نضيف الاندومي ونرش صويا صوص ونقلبهم مع الخضار شوي حتى ياخذ النكهة

صينية توست بالبرجر





المقادير
برجر دجاج مقلي
كيسين توست اسمر
علبة قشطه
كوب كريمة خفق
جزر مبشور
جبن سلايس وجبن مبشور

طريقة الحشوه
في مقلى نشوح جزر مبشور في قطرة زيت مع مكعب ماجي وملح وفلفل اسود واعشاب ايطالية
ثم نضيف البرجر المقلي وكريمة الخفق ونحرك الخليط لين يتسبك مع الكريمه بس ما نخليها تنشف

الطريقه
في صينية الفرن نحط طبقة توست مقطع الاطراف ونرشه بحليب سائل
ثم نضيف طبقة توست ثانيه ونمسحها بمايونيز
ثم حشوة البرجر
ثم طبقة توست ثانيه ونمسح الوجه بقشطه ومايونيز ثم شرايح جبن مربعات وجبن مبشور
ونحمر الوجه

كاري الدجاج





المقادير
مكعبات دجاج
طماطم مفروم
بصل وثوم وزنجبيل مفرومين
كزبره طازجه
نص علبة زبادي
كريمة خفق
بهارات ( بهارات الكاري او الماسالا - ملح - فلفل اسود - هيل - كمون )
ملعقه صغيره من بودرة حليب جوز الهند مذوب في قليل من الماء

الطريقه
نشوح مكعبات الدجاج مع اضافة ملح وفلفل اسود واحب اضيف له بهارات الدجاج لين ينشف الماء ونتركه على جنب
في قدر نحمس بصل ولما يتغير لونه نضيف الثوم والزنجبيل المفرومين مع ملعقة كاري ورشة هيل ورشة كمون
بالنسبه للكاري انا عندي اكثر من نوع فحطيت من كل نوع شوي

نضيف ٤ طماطم مفرومه ( فرميها بمحضرة الطعام وخليها سايله نوعا ما ) مع شوية كزبره ونحركه على نار هادئه مع اضافة مكعب ماجي وملح وفلفل اسود وفلفل اخضر حار للي يحب وشوي كركم لاضافة اللون وحليب جوز الهند المذوب بالماء

بعد ما يتسبك نخلطه بخلاط العصير ونرجعه للقدر مع اضافة مكعبات الدجاج ونص علبة زبادي وشوي كريمة خفق ونحركه على نار هادئه لين يصير قوامه ثقيل شوي وضبطي الملح

قدمته مع أرز اصفر

الأرز الاصفر



نفرم كميه من الثوم ونشوحه في قدر مع قليل من الزيت ونضيف له كركم وملح
ثم نضيف الماء ولما يغلي نضيف الرز المنقوع

وبالعافيه



هذا اول موضوع لي بالقسم اتمنى القى تشجيع :redface:
ام جوري 2012
ام جوري 2012
ماشاء الله عليك اطباقك جميله وطباخه شطووووره
احاسيس ذباحه
احاسيس ذباحه
روووووووووووووعه

تسلم يدك
وبالعااااافيه
والله يخليكم لبعض
LEENA15
LEENA15
ما شاء الله
تبيض الوجه _ تسلم يددك