السلام عليكم

اختي حبيت اعرض لكم حالتي..
انا لي سنه ونص مركبه التقويم بالفك العلوي فقط..مع جهاز ثابت يوسع الفك العلوي .. لانه ضيق..
والان بعد مرور هالوقت ركب لي التقويم بالفك السفلي..
والمقرر لي بعدها عمليه لتقديم الفك السفلي..حتى يتطابقون على بعض ..

حبيت اسال في احد مجرب..
لاني متخوفه مررره .. ولا اعرف احد قد جربها..
اتمنى تفيدوني ..ويجزآكم كل خير على الموضوع..

اهلا جاكي

ان شاء الله مافي شي يخوف اذا حابة تطمنين استشيري اكثر من دكتور

وفيه بمدوننتي مقطع توضيحي لتقديم الفك السفلي اذا حابة تاخذي فكره

وفيه بنت مسوية تقديم لفك السفلي تكلمت عن تجربتها

هنا

السلام عليكم ورحمة الله وبركاته
هانحن نجتمع مره أخرى يا @innocence@ بنفس الموضوع ونفس الحالة
بصراحة أشكرك جدا على التوضيح والشرح المفصل لهذه العمليات التي قلما نسمع عنها أونجد من يكتب عنها ويشرحها شرحا مفصل مثل ماانتي شارحته ..
طبعا انا الان موعدي بعد أسبوعين تقريبا ,وجهزت حالتي للجراحة .خلصت مرحلة التقويم ماقبل العملية والموعد الجاي بيكون مع الجراح والمقوم نفسه طبعا دكتوري الجراح عثمان الطويرقي طبعا انا موافقه على العملية قبل مااركب التقويم وشرحوا لي العملية قبل مااركب التقويم لكن الان بدأت أتخوف من العملية لما اسمع من الحالة والمعاناة بعد العملية وخاصة الشهور الاولى من العملية .حتى سألت الدكتورالتقويم قلتله في مجال اني انسحب قال الافضل ماتنسحبين لانها مهمة هالعملية بالنسبة لي واحنا رتبنا اسنانك على انك تبي تسوين العملية وانا الحمدلله ماهو هذاك التشوية لكن الاطباق هو المعقدني عندي الاطباق بس بالضرسين الاخيرت من الفك العلوي والسفلي يطابقون أما الاسنان الثانية فكل في جهة الله المستعان
بعدين هم قالولي العملية بس الفك العلوي قبل ماأركب التقويم وهالحين يقولي دكتور التقويم احتمال تكون العملية بالفكين لان الفك العلوي متقدم بارز والفك السفلي صغير يحتاج تقديم شوي
انا الان في حيرة واحيانا ماانام من التفكير وابوي رفض فكرة العملية تماما وقال انتي مافيك تشوه مع انه أول موافق على العملية وماعنده مشكلة ؟؟
الحين انا اصبحت ضحية ولا احد حاس فيني كل مااقول لاحد اني ابسويها قالي ليش تسوينها اسنانك مافيها شي
احس اسناني ماهي متطابقة صحيح التقويم عدلها ورتبه لكن الفك العلوي بعيد عن الفك السفلي ومتقدم
والله الحين قاعده افكر اقول لي ثلاث سنوات مواعيد وحالة واضطر اني اطلع من الجامعة واغيب عنها علشان ماافوت الموعد واحيانا اكون مسافرة برى الرياض وارجع لها علشان ماافوت موعدي والحين يوم تفضيت للعملية أتركها والله قهرررررر واخرتها مااكمل
وبنفس الوقت أنا خايفة من العملية تكون خطرعلي لاني انا يوم اخلع ضروسي اغمي علي وانا علي كرسي العيادة ولما اخذ يومين اغمي علي بسبب نزف الدم وعدم توقفه وانا نحيفة جدا جدا كيف لو اسوي عملية وابوي رافضها يقول انتي ماتحملينها ؟؟؟
أتندم احيان على اني ركبت تقويم
أأأأأأأأأأأأأأأأأأأه
بالله اللي عنده حل شي يريحني يقولي ولايبخل علي ماعندي الاالله ثم انتم .....

اهلا ناعمه نورتي
كنتي موجوده بموضوع ميلان الفك؟؟

ماقلتي مين دكتور البريسز تبعك؟

والله انا من رايي تحاولين تقنعين ابوك وواضح ان دكتور البريسز مشجعك وشايف انك تحتاجين والاهم من هذا كله رايك انتي هذا شي يرجع لك واذا انتي مصره لازم تقنعين الكل وتفهمينهم رغبتك

الخوف لابد منه شي طبيعي بس عموما عملية مثل هذي مو صعبة على الدكاترة يسوونها بشكل شبه يومي

بالنسبة لك انتي المفروض ماتسوين العملية الا بعد برنامج غذائي متكامل يزيد وزنك ويفيدك لانك بتفقدين دم كثير ووراك دايت شهر ويمكن زياده بس سوائل غير النفسية الزفت بعد التعب يمكن شهيتك للاكل تنعدم

الدكتور اللي شال لي اسنان العقل لما شافني على اني مو نحيفه مرره سالني عن وزني وهو حبوب يعتبرك مثل بنته قال لي اذا انتي اقل من 50 كيلو ماتسوين العملية

فانا احاول بقدر الامكان حاليا اني ازيد وزني لاني مو بسهولة اكسب وزن بس اخسره بسررررعه فمحتاجه يمكن 10 كيلو عشان بعد العملية ماابي يبين علي النحف

فانتي لاتفكرين ابدا تسوين العملية وانتي وزنك قليل وعندك نحافه شديده

روحي لاخصائية تغذية تعطيك برنامج لزيادة الوزن وخلال هالفتره حاولي تكلمين ابوك

بالنسبة للاغماء وانك ماتتحملين لازم تناقشين الدكتور فيها وماتسوين العملية الا بعد تحاليل واوراق استبيان باي مرض تعانين منه
واكيد راح تحتاجين متبرع للدم

العملية يمكن مو سهله عالمريض فيها تعب و دوخة وادوية كثير يمكن تسبب غثيان وحرقة بالمعده لازم تعرفين هذا كله
بس نظرتك لنفسك راح تحكم مدى حاجتك للعملية لا تلتفتين لراي احد اقصد الراي بشكلك مو صحتك
يعني مادام صحتك كويسه حتى لو كنتي نحيفة نوعا ما وانتي مو متقبلة شكلك حاليا وودك فعلا بتعديل المشكلة
Go for it
يعني توكلي على الله وسويها وبعزيمتك هذي راح تتجاوزين كل التعب وراح تتحملين

اللي يبي الدح مايقول اح خخخخ
مافي شي يجي بسهولة لازم تعب ولازم نصبر ونتحمل بس الايام تمشي بسرعه وان شاء الله راح تعتبر من الذكريات مادامنا باذن الله وصلنا للنتيجه اللي نبيها

ان شاء الله ربي يسهلها

على فكرة ناعمة

اتوقع اللي تعانين منه هو نقص للصفائح الدموية فعشان كذا لو صار عندك جرح او خلع للاسنان الدم مايتخثر ويستمر النزيف

فاسهل عملية هي خطر عليك فلازم تتعالجين قبل او يكون فيه اجراء خاص في العملية
انا مااعرف العلاج بس شوفي ايش الدكتور ينصحك