فعاليااااااااات الصيف

السلاااام عليكم ورحمة الله وبركاااااااته


اخباركم وعلومكم والله اشتقت لكم بس كنت مشغوله في الفعاليات الي مسوينها فكنت اطل احياناً على المنتدى من فتره لفتره بس ما الحق اكتب شي عاد يوم جا اليوم قلت خليني اقول لكم عن فعاليات الصيف المقامه في منزلنا الكائن على سطح الكره الارضيه وبالتحديد على اليابسه >>>> هااااه بشروا عساكم عرفتوا الوصف :11:
هنا من هذا المنزل انطلقت فعاليات الصيف لعام 1425 وما زالت مستمره الى عوده المدرسين الى اوطانهم

هذا المنزل يحتوي على 3 عوائل والرابعه عائله الجد الذي هو راعي البيت والراعي الرسمي لهذه الفعاليات وعياله مع حريمهم وعيالهم مجتمعين عنده ليقضوا صيفهم في صحبت والدهم الذي يحتري عودة المدرسين على احر من الجمر ولكن ماله الا ان يقول >>>>>>>>
ماااااا اطوووووووولك يا ليييييييييييل

نبدأ في شرح الفعاليات :

اولاً : المطبخ : ويعمل اربع وعشرين ساعه بالتناوب ويطبخ فيه كل شي من الاكلات الرسميه الى انواع القهاوي والعصيرات والوجبات الخفيفه والمجمده وكل ما يخطر في بالك وفي اي وقت تشتهين اي شي ما عليك الا ان تدخلين المطبخ طبعا بصحبة الاعضاء عشان تكتمل الحوسه يعني تقومين الصبح وماتلقين شي في الدوالايب ((( ما اقول الا الله يعين الشغاله هي المتضرر الوحيد من هالفعاليات))))

ثانياً : حلبة المصارعه : وهي الصاله توقعي في اي وقت تمرين منها تلقين ثنين من الاعضاء يتضاربون ((((نصيحه لا تحاولين تعرفين منهم السبب او انك تصلحينهم للحفاظ على سلامتك ))))
احيانا المتصارعين يصل بهم الامر الى الشراسه الزائده فيتسببون في نزف الدماء في هذي الحاله ايضاً لا تتعرضين لهم بس اخبري السلطات العليا (امهات المتهاوشين ) واشترطي عليهم انهم ما يعلمون احد انك انتي الي معلمتهم ايضاً حفاظاً على سلامتك ودمتم سالمين خخخخخخخخخخ

ثالثاً : غرفة الترفيه : هذي الغرفه تحتوي على جهاز التلفاز والفديو والبلاي ستيشن والعاب وسيارات
في هذي الغرفه يجتمع الاعضاء ويلعبون ولا يخلوا لعبهم من مهاوشات الي يبي الفديو والي يبي بلاي ستيشن والي يبي تلفزيون في هذي الحاله يتم نقلهم الى حلبه المصارعه او تحويلهم الى اولياء امورهم وعدم دخول الغرفه الا بعد توقيع تعهد والهدنه بين الاطراف

رابعاً : الغرف الخاصه :
هذي الغرف عباره عن كل عائله لهم غرفه يحتمعون فيها ليناقشوا الوضع في البيت ويخططون لبكره ولا تخلوا طبعاً من الحش في حريم الاخوان وعيالهم وكل واحد يقول عيالي كاملين والعيب من عيالكم


نظام البعثات :
اولاً : بعثات طويله (اكثر من يوم )
في هذه البعثات تذهب بعض العوائل الى خوالهم وينامون عندهم يومين او ثلاثه واحيانا اسبوع والمشكله بس اذا راحت عائله وتركت بعض اعضائها ليستمتعوا في الفعاليات (((هذي المصيبه)))

ثانياً : بعثات قصيره
وهذي البعثات تكون للاعضاء وهي عباره عن ذهاب بعض الاعضاء الى مركز صيفي في العصر
وهذه البعثه مفيده جداً على الاقل تعطي نوع من الهدوء والامن والاستقرار ولو بعض الشيء

ثالثاً : بعثات للنزهه
وهذي البعثه عباره عن قيام بعض الأباء بأصطحاب جميع افراد عائلته الى احد منتزهات او المطاعم
ولكن بشروط وهي
1) عدم اخبار اي احد عن هذه البعثه لا بالتصريح ولا التلميح
2) الخروج من المنزل على اطراف اصابعك حتى لا يحس احد فيكم
3) رمي العباءه مع الشباك حتى لا احد يشوفك وانتي تلبسينها
4) ركوب السياره دفعه واحده يعني مع بعض
5) انطلاق السياره بسرعه قبل ان يكتشف امرها
وطبعاً كل هذي الشروط لسلامتكم اثناء الرحله


وهذي فعالياتنا في هذا الصيف مع اهلنا ومع ذلك ما اقوووووووول الا

صيفنا مع اهلنا احلىىىىىىىى :41:

وبنفقد هالجمعه اذا بدت الدراسه :06:
وسلاااااااااااااامتكم