جتني عين ماذكرت ربي

السلام عليكم ورحمة الله وبركاته,,,,

يمكن مو مشكلة قد ماهي مساعدة أبيها منكم


هالموضوع من سنين بس أهملته واليوم وحده الله يجزيها الخير جلست معي وفتحت عيوني


أحب أذكر لكم الموضوع بتوضيح من البداية

من عمري 14 سنة بدأ حب الشباب يظهر بوجهي وكل سنة يزيد حتى وجهي انتفخ وخشمي انتفخ من الدهون

بس الكل كان يقول فترة وتعدي وهرمونات تتغير وكنت كل ماأروح مشفى أبي أتعالج يعطوني أدويه ماتسوي شيء

مليت ومرت السنين وأنا من علاج إلى علاج بس مافيه فايدة ولا نتيجة ووجهي كل ماله يتدمر أكثر وبدأ يتحفر بشكل خفيف ,,, ولما عمري صار 20 شفت وحده أعرفها وجهها كان مليان حبوب ولما شفتها صافي كأنه مرايه

ولما سألتها قالت أنها أخذت حبوب ولا عطتني أسمها ولا عطتني اهتمام وكل ماحاولت أعرف وش هي ماعرفت

وبعد تقريبا سنتين كان عندي موعد مع دكتورة جلديه مو أول مره أروح لها دائما أروح لها ولا مره عطتني علاج حبوب

بس لما رحت قلت لها فيه حبوب مااعرف اسمها تخلي حب الشباب يروح قالت ايوه هاذي حبوب روكتان ( يمكن الأسم فيه غلط لأنه من رمان مستخدمتنها )

المهم وسألتني اذا ابيها قلت ايوه وقال لازم تحليل المهم وعملنا التحاليل وأخذتها

بس في داخلي منقهرة أقول على كثر روحاتي لأطباء مختلفه للجلد وحتى هاذي نفسها ماأحد ذكرها أو وصفها لي

حتى هاذي اللي سألتها عقدتني كان تقول لي يبيلك ليزر وبيحترق وجهك وبتجلسي فترة طويلة ووو



المهم مالكم بالطويل ,,, خلصت فترة العلاج والحمدلله ربي وجهي صار يلق صافي ولوني صار فاتح

وملامحي وضحت وزانت لأنه الدهون راحت من وجهي والله ثم والله وربي شاهد علي حتى خشمي صار حلو

لأنه الدهون كان مخليته منتفخ وكبير وبس راحت سبحان الله انرسم لدرجه والله يفكروني الناس اللي كانت تعرفني مسويه فيه عمليه تجميل



بس مو هذا الموضوع بعد ماصار وجهي يلق وفتح لوني وزان الخشم اللي قبل كان كأنه كمثرى

كنت جالسة في تجمع عائلي وكنت بدون مكياج كان وحده تقول لي وش مسويه بوجهك مره مره منور

قلت ابد ولا شيء تعالجت وبان قالت صدق وش مسويه لونك تغير ووجهك منور وغصب طيب مسويه شيء وماأبي أعملهم

ولا أحد يفكر مايدرون أني تعالجت عن حب الشباب الكل يدري

ولا صدقتني وراحت سألت أمي وطول الوقت تطالع بوجهي ,,, اليوم الثاني من صحيت وجهي كله حساسيه

حبوب حمراء صغيرة تحكني في كل وجهي والله تشوه ,,, بس ماأحب جاب خبر سالفه الحسد ولا أحد علمني وش المفروض أسوي


ورجعت رحلتي لعلاج وجهي من جديد وكل اللي رحت لهم قالوا لي هاذي حساسيه ماتروح مدى الحياة

ومالها علاج والعلاج اللي بنعطيك اياه يروحها ايام وترجع وبالفعل هذا الحاصل يابنات تخيلوا سنين والله


وأنا أطفش كل يوم أحط على وجهي علاج واصلا مده العلاج محدوده لأنه المراهم في فترة ماأقدر اتعدها خطر


واليوم وأنا جالسه بالكلاس كان وحده جنبي الله يجزيها الخير قالت لي وش فيه وجهك أحمر حساسيه؟؟


قلت ايوه حساسيه ,,, قالت لي اللي فيك عيون ,,, قلت لها وش مدريك ,,, قالت واضح وأختي جاها مثلك بالضبط

وماخلت مشفى ماراحت مافاد معاها العلاج ومافاد معاها الا الرقيه


وجلست تعلمني وش أسوي وقلت لها أعرف من احسدتني قالت حلو أخذي من أثرها


بس يابنات ماني عارفه وش أخذ ؟؟ وشلون أخذه وايش اسوي فيه بالضبط؟؟؟

مع العلم هي تجينا البيت يعني مو بالأمر الصعب بس أنا حاليا مو بالسعودية لما أرجع بسويها


وايش تنصحوني اسوي غير أني أخذ أثرها ؟؟؟



ياليت والله تساعدوني أنا أختكم في الله


أصيلة