ادري ان الشكوه لغير الله مذله بس ودي استشير احد تعبت

السلام

لما افضفض لاهلي عن مشاكلي مع زوجي اللي ماتنتهي احسهم يخففون عني بوقتها صحيح بس في نفس الوقت احس تعاملهم لي بعد كذا يتغير يعاملوني بشفقه واني وحده تعيسه وضعيفه وزوجي مكسرني وسافهني وكأن الزوج اهو اللي يخلي المره سعيده بحياتها او تعيسه هذا تفكيرهم عشان كذا اكره اني اشكي لهم واحس اني اذل نفسي لما افضفض لهم وازيد هم على همي:44:

فاتمنى الاقي منكم العكس يااخواتي

باختصار انا ساكنه مع زوجي بمدينه بعيده عن اهلنا ومن بدايه زواجنا كان في مشاكل وكانت تتكرر مليون مره
انا انسانه حساسه دمعتي قريبه وزوجي انسان زعول ونكدي يحب الهذره ويدقق على كل شي حتى الشي التافه بس عشان يسوي اكشن ويبوز

مليت من هالوضع حاسه اني عايشه مسلسل بايخ كل يوم هم ونكد على اسباب تافهه لان حضرته اذا بوز مايكلمني يومين ثلاثه اسبوع +ماياكل من طبخي ابد+اذا حاولت اكلمه عادي يرد علي بدون نفس وكأني مسويه جريمه +اذا اعتذرت وقلت له اسفه مع اني مقتنعه اني ماغلطت بس عشان ارضي غروره بعد مايرضى بالعكس يتكبر علي ويجلس يعدد لي سيئاتي ومواقف صار لها سنين

اقرب موقف تافه باليل قالي نظفي جزمتي (اكرمكم الله) عشان الدوام قلت ان شاء الله بس مع العيال وكذا نسيت والله يوم جا الصبح قالي وين اللي بتنظف الجزمه قلت له نسيت الله يلعن الشيطان
اخذه وهو معصب لحقته قلت له رح البس انت وانا انظفه اهو شوي مغبر قال مايحتاج خلاص ومد بوزه

بنات بالله عليكم في سبب للزعل والنكد انا ناسيه وشي تافه يعني حصل خير
اهو عنده لا صارت جريمه ولازم اني اقطع نفسي عشان حضرته يرضى

تعبت مرررررررره وانا حساسه جدا وبالذات ان هنا ماعندي احد ماشوف ناس ماطلع ماعندي الازوجي وعيالي
حاولت اطنشه وماهتم لحركاته وبوزته بس ماقدرت ماعندي شي يشغلني عنه

مره من المرات لمن عيشنا في جو هالنكد لسبب سخيف عصبت وقلت له ليش تسوي كذا ليش تدور الهم احنا الحمدلله عايشين بنعمه وصحتنا وصحه عيالنا الحمدلله احسن من غيرنا والله اني اذا شفت اللي بالتلفزيون المريض ولا المحتاج اقول الحمدلله ان احنا بخير بس لو هالرجال يترك النكد
الناس تدور الراحه وهذا بالعكس

المهم رد علي شتبين وانا موفاضي اناقشك وعاجبك زين موعاجبك طلبي الطلاق ومن هالكلام

وطبعا دايما نقاشاتنا ماتجيب نتيجه لانه من النوع اللي كل يوم له كلمه للاسف ويخلف الوعود داااااااااااااايما
ففقدت ثقتي فيه

فقررت بيني وبين نفسي اني اطلب منه ان يأجر لي شقه بالمدينه اللي فيها اهلي وهو يجي خميس وجمعه لاني ماقدر استمر في هالوضع حاسه ان نفسيتي تعبانه وبجيني اكتئاب من هالحاله
ولان وجوده وعدمه واحد اهو حاط له غرفه وطول اليوم جالس فيها ويشيش ومايبي ازعاج العيال يعني بس بالاسم موجود والله ماحس فرق بين انه يجي يومين ويمن جينه سكنه عنده

عندي ولد بالروضه وبنت عمرها سنه شرايكم هل بقدر اتحمل مسؤليتهم بروحي انا بكون جنب اهلي بس خايفه على العيال اكون ظلمتهم بهالقرار مادري محتاره
لان اهو بالنسبه له في الحالتين اهو الربحان انا اللي بتحمل اي شي يجيهم

بس اللي حدني على هالشي اني تعبت تعبت تعبت منه وحياتنا كلها نكد وتوتر على الاقل لما اكون قريب من اهلي ازورهم ويزوروني احسن من الحين ساجنه نفسي معاه ولاهو عاجبه ولا مريحني

انتظر تعليقاتكم في وحده تعرفونها قدرت تعيش مع عيالها بشقه وزوجها يجي خميس وجمعه عادي ولا