حبيبتي لازم تختارين الوقت المناسب لتدريسه
حتى يكون مصحصح و فايق و رايق و يقدر يستوعب
و لا تهاوشينه و لا تتنرفزين وقت التدريس
لازم تروقين و تطولين بالك معه و غير كذا شجعيه لو درس و ساعدك بتودينه المكان الفلاني
أو بتعطينه شي يحبه لازم كذا بالبدايه
و ممكن تقولين له لازم تدرس ولازم تساعدني حتى ما يتفوقون الأولاد عليك
و إذكري له أسماء أولاد بعايلتكم قولي هم الأن يساعدون أمهاتهم و يذاكرون
حتى ينجحون و يكبرون ومن هالكلام إلي يحمس
و برضو حبيبتي أشتري له دفتر خاص للدراسه عوديه يكتب و عوديه ع الحفظ
و أشتري له من مكتبة جرير قسم التعليم المبكر تركيب الأحرف و الأرقام و بكذا يستوعبها أكثر لازم تقضين وقت خاص معه الدراسه متعبه وتهد أنا مثلك لازم نتحمل مزاجيتهم
ولازم نطول بالنا عليهم
و بعدين لا تنتقدينه ولا يسمعك تتكلمين بموضوع مستواه المتدني
بالعكس قولي آنت جبت أربعه زين بس أنا آعرف آنه ولدي بطل و المره الجايه
بيجيب أعلى كذا بيتحمس و بإذن الله بيساعدك ...
لو ماعنده مشكله بالإستيعاب و الفهم و إذا هو بس كذا ما يبي يذاكر ويهتم
و إذا جربتي كل إلي قلته لك ومانفع من تشجيع و تحميس هنا مالك غير العقاب
بالحرمان عاقبيه لو أستمر ما يبي يدرس قولي الطلعه هذي ماراح تطلع أنت ماتبغى
تساعدني و تتعاون معي و أنت لازم تفرق بين الدراسه و الإجازه
وقت الدراسه نجد و نجتهد و وقت الإجازه نلعب ونطلع ونغير جو
لا تقولين صغير ولسى بدري ! إذا من الصف الأول الإبتدائي ما تشدين معه
وتغيرين سلوكه بتتعبين بعدين لإنه بيصير الوضع عنده تعوووود و بتصعب المهمه
لما يكبر سنه ثانيه و يدخل للصف الثاني بتزيد المعاناه
أقول هالأمور من واقع عايشته و جربته مع ولدي فيه وقت للدلع و للوناسه و الطلعه
و وقت الدراسه ما نتهاون فيه .... و إذا لاحظتي عنده مشكله بالأستيعاب و بالذاكره
لازم تعرضينه على طبيب أطفال و هو بدوره بيحوله لطبيب مختص بهالحاله لو يحتاج
و ما أنصحك تنقليه لمدرسه نموذجيه بالعكس مدرسته عطوكم مستواه الأساسي
وما لعبو عليكم و كانو صريحين لو بتنقلينه ممكن يجاملونكم بمستواه و يقولون لك
ولدك ممتاز و يعطونه درجات عاليه و هو من جنبها !!!! وهالشي ماراح ينفعه !
بالعكس هالمدرسه وضحو لكم وين مشكلته و كيف مستواه ..
كان الله بعونك والله يسهل أمرك
منجو
•
الصفحة الأخيرة
اللهم اسألك المعلم الخلص لابني والعلم النافع والصحبة الصالحه والرزق الحلال .