اللهم لا اعتراض على حكمك . .
الدافع الأساسي إلى خلاني أكتب هذا الموضوع هو نداء لكل امرأه سواء آنسه أو متزوجه صغيره أو كبيره أنها أول ما تلاحظ أو تحس أو حتى مجرد أنها تشك بوجود أي تغيرات على الثدي حتى لو هي غير متأكده هذا ما يمنع أنها تراجع المستشفى وتتطمن فالوقاية خير من العلاج .
حكايتي بدأت من شهرين ونص لما لاحظت وجود كتله بالثدي الايسر غير ظاهره لكن حسيت فيها صلبه تألمني أحيانا " عمري 28 سنه وغير متزوجه " المهم ما أهملت نفسي وراجعت المستشفى وطوال هذي الفتره ما سمحت للشك ابداً انه يتسلل لنفسي أو يسيطر علي . . المهم فحصت الدكتوره فحص ذاتي وأعطتني تحويل للمستشفى مستعجل وهناك مواعيد المستشفيات الحكوميه الكل عارف حدث ولا حرج ، الموعد الأول فحص سريري ومن ثم موعد للأشعه ، عملت الأشعه وبعدها موعد " ياكثر المواعيد " موعد الدكتور قال لازم نأخذ عينه كل هذا وأنا صابره وقاعده أقول ترى هذا كله عادي بعد ما أخذو العينه كمان أعطوني موعد وطول هذي الشهرين ونص وانا رايحه وجايه وهنا بديت أقلق صراحه وقاعده اصبر نفسي واحتسب الاجر عند الله سبحانه وتعالي وبس افكر اذا كان الخبر مو طيب ايش اقول وكيف اتصرف .
الا اليوم السبت الدكتور يقول هذا ورم حميد هنا قلت الحمد لله الذي لا يحمد على مكروه سواه وقال ولازم استئصال لانه حجمه كبير تقريباً 5*6 متى صار كذا بدون ما الاحظ مادري لاني دائماَ افحص نفسي ودائماً انبه الي حوالي بس سبحان الله الحين اعطوني موعد للعمليه وبصراحه مره خايفه لانه ماني عارفه كيف الشكل بيكون بعد الاستئصال وبصراحه الحجم كبير ، وافكر اتركه زي ما هو بس ماني عارفه ، خايفه يصير ندبه ويصير مشوه ، ياريت الي مرت بهذي التجربه تقولي ايش صار معاها ولها دعوة صادقة بظهر الغيب .
" إنا لله وإنا إليه راجعون : اللهم أجرني في مصيبتي ، واخلف لي خيرا منها "