لكل من بتشوف موضوعي ماابي إلا دعوة صادقة وهذا يكفيني منكم ياأخواتي العزيزات على قلبي
موضوعي باختصاربكتبه لسببين,أول سبب ابي تشاركوني ألمي ويمكن ألاقي من كلماتكم تخفيف عني ونصيحة استفيد منها
ثاني سبب إني ابغى تستفيدون من قصتي من نواحي كثيرة وراح تفهمون اكثربعد ماتعرفون القصة
انا يااخواتي متزوجة من سنتين والحمدلله مرتاحة في زواجي
بس صار لي شي من يومين قلب لي حياتي
زوجي يشتغل في مدرسة وعمله فيها ممكن يتكلم مع اولياء امورسواء رجال وحريم بس عمره ولله الحمد ماغلط مع وحده ولا من النوع اللي عنده اسرار وحركات مالها داعي
المهم قبل اسبوع دقت عليه وحده الظهروكان قد رجع من الدوام وانا سمعت المكالمة وكانت طبيعية جدا تسأل عن ولدها رد زوجي بكل أدب بس طلبت منه اليوم الثاني يشوف لها مستوى ولدها في بعض المواد وبالفعل دقت عليه ومااعرف وش صار بالضبط المهم انا سبحان الله قلبي حس انه فيه شي مو صح وصرت اشوف جوال زوجي واشيك عالمكالمات وكل يوم القى لها مكالمة بس وقت الدوام الرسمي وبعضها مكالمات اكثر من عشر دقايق صبرت وقلت يمكن الموضوع مشكلة في ولدها وقدمت حسن النية من ناحيتها مع انه قلبي مو مرتاح ابدا لها
في يوم من الايام اخذت جواله ولقيت في الصادر ام فلان اللي هيه ام الطالب قلت الحين راح اسأله وش قصتها كل يوم تدق يوم جاء قلت له هات جوالك بكلم اعطاني بس قبل مسح رقمها من الصادر بعدين اعطاني هنا زاد الشك في قلبي ليه مسح رقمها وموبس كذا غيرالاسم من ام فلان الى فلان
صبرت قلت لازم اتأكد وكل يوم القى لها مكالمات الى قبل امس كان في الليل واحنا خلاص على وشك نتعشى دق صديق زوجي عليه وكلم قدامي عادي وفجأة طلع من البيت وقعد يمكن رع ساعة ادق عليه جواله مشغول بعدين رد وقال انا عند اخوي فوق لان احنا ساكنين مع اهله بس صوته في السيارة ويكذب علي المهم جاء وانا معصبه بشكل موطبيعي جلسنا عالعشاء وقعد يسألني وش فيك قلت له ليه تكذب علي قام عصب وقال ماكذبت...الخ
وقام ماتعشى وانا نفس الشي
بعدها بشوي وهنا الكارثة اللي قلبي ماتحملها واحس بسكين داخله
طلع بسرعة ومارجع الا الساعة وحده ونص الليل وانا طوال ماهو برى ادق وارسل ولايرد ومحول الجوال مايبان اذا مشغول او انتظار
يوم جاء وانا ابكي اخذني بحظنه ومن هالخرابيط سألته ليه ماترد كذب علي وقال كان مقفل الجوال
نمت بعد تعب والصباح قلت لازم اشوف جواله بأي طريقه قبل الدوام راح ياخذ دوش وأخذ الجوال معاة وهذي أول مرة يسويها بس سبحان الله طلع من الحمام ونسي الجوال فيه دخلت بعده والاقي الجوال وافتحه وياليتني مافتحته لاني وقتها حسيت كل مافيني يرتجف
لقيته مكلمها ساعة ونص ولقيت رسالة منها وكل هذا من وراي تماسكت وقتها مااعرف كيف ربي صبرني المهم مابينت شي قلت لازم اتأكد أكثر
وفي نفس اليوم الظهربعد ما نام ارسلت بنت الحرام رسالة اتصل بي أخذت الجوال وطلعت من الغرفة وشوي القى رسالة في الحافظات ماشفتها من قبل اتاريها مرسلتها قبل المكالمة الطويلة في الليل والرسالة واضحة واكبراثبات انه وراها شي
هنا قررت المواجهة وبطريقتي جبت معلومات عنها وعن زوجها وكل شي يخصهم ومن ضمنها رقم زوجها
دقيت على زوجها وقلت له كل شي (لاتجي وحده وتقول حرام مايجوز والله لوفي مكاني تسوين اكثر)
المهم زوجها شكله فيه خير بس هيه انسانه واطيه قال لي لاتخافين ****لله بيتك ماينخرب
العصر قام زوجي وسألني عن جواله قلت له معاي ووحدة اتصلت ورديت عليها
انصدم وحاول ينكر أو يسوي نفسه غبي بس لما واجهته بكل اللي اعرفه اعترف لي بكل شي
يقول كانت تدق عليه وهوه بحسن نيه كان يرد على استفساراتها عن ولدها لانه معاق
ولاشك فيها ابدا لان كل كلامها عن ولدها يقول صح اني لاحظت اوقات ماهي مظبوطة بس قلت حرمة كبيرة قرب الاربعين يمكن طبع فيها ماتعمدت شي
وغير كذا انه لما طلب منها يكلم زوجها حلفته بالله مايدق عليه لانه انسان مايتفاهم صدقها زوجي لان تمر عليه حالات زي كذا مشاكل بين الاب والام
يقول زوجي دقت عليه يوم تبكي وتشتكي من زوجها وانه يضربها واذا ولدها مانجح بيرجع عليها ومن هالكلام بنت الحرام ترسم لبعيد
سألته وش تبريره عن مكالمة آخرالليل قال يوم شفت الرسالة اللي ارسلتها وفيها تصريح واضح عن هدفها دقيت ابغى اعرف وش تبي بالظبط وقعدت انصحها واحاول اقنعها انها غلطانة واني انسان متزوج واخاف على بيتي وعملي وسمعتي طبعا هذا تبريره لي
بعد كذا دقيت عليها السافلة ووجهها قوي كلمتني وهيه تبكي وتترجاني اكلم زوجها واقول اني غلطانة
طبعا سجلت المكالمة عشان تكون اثبات عليها لاني بصراحة خايفة ترجع تلف بذيلها
والله يابنات لوتسمعون كلامها تقولون هذي أم الدين والصلاح قعدت تقول اتقي الله ماسويت لك شي خافي الله ظلمتيني وشوي تقول اعتبريها نزوة شيطان تناقض واضح
بس انا اللي أعرف وش قالت لزوجي وش أرسلت
تخيلوا فيه أم تخاف الله تقول وش رايك بولدي حلو ترى أنا أشبهه
إنسانة مريضة!!الله لايبتلينا
المهم بعد كذا قررت إني ارسل لزوجها رسالة اكذب نفسي فيها واقول اني غلطانة والله موعشان وجهها بس خفت تضر زوجي وعشان عيالها كمان وارسلت له
انتهت السالفة على كذا بس المشكلة اهتزت ثقتي بزوجي وصرت اشك فيه مع اني كنت اثق فيه بقوووووووووووووة
ونفسيآ متقلب مزاجي بشكل مو طبيعي
آسفة يالغاليات طولت عليكم بس أعرف إن قلوبكم كبيرة وراح تخففون علي بكلامكم المفيد أو دعواتكم.
modi1405 @modi1405
عضوة جديدة
يلزم عليك تسجيل الدخول أولًا لكتابة تعليق.
يالغاليه استهدي بالله وقولي لزوجك لاعاد تكلم امهات بل اباء افضل واستودعي الله زوجك من بنات وعيال الحرام
اللهم من اراد يهدم بيت فجعل كيده في نحره
اللهم من اراد يهدم بيت فجعل كيده في نحره
الله يكون بعونك حتى المتزوجه ما راح نسلم منها بس زوجك اعطاها وجه 00الله يسخره لك 0ان كيدهن عضيم00
بصراحه ما ادري وش اقول لك .. ساعة اقول تسرعتي و ساعات اقول احسنتي .. ما تنلامين تبغين تحافظين على بيتك و زوجك .. وهي تستاهل ماجاها .. لو محترمه ماتكلم مدرس ولدها الا بأوقات الدوام الرسميه وتكون انسانه جاده و رزينه بكلامها .. مع انها لو تحب تبعد عن الشبهات كان المفروض توصي احد من محارمها ..
على كل حال استعيذي بالحي القيوم من الشيطان الرجيم و أعطي زوجك فرصه ثانيه و سامحيه و لو عادها ذاك الوقت لكل حادث حديث ..
صدق الرسول الكريم صلى الله عليه وسلم حينما اوضح ان النساء هن اشد الفتن على الرجال ..
على كل حال استعيذي بالحي القيوم من الشيطان الرجيم و أعطي زوجك فرصه ثانيه و سامحيه و لو عادها ذاك الوقت لكل حادث حديث ..
صدق الرسول الكريم صلى الله عليه وسلم حينما اوضح ان النساء هن اشد الفتن على الرجال ..
الصفحة الأخيرة
بس اللي تتحرش في رجل هاذي مافيها خير و الواضح مش أول مره تسويها يعني متعوده لكن ماأقول غير الله يبرد على قلبك و يكفيك شر الظالمين المعتدين